أرجوكم مقارنة تفصيلية ودقيقة بين اللادا الروسى و المصرى

[Abdm]

أرجوكم مقارنة تفصيلية ودقيقة بين اللادا الروسى و المصرى و أيهما أفضل و هل الروسى تم تعديلها للاجواء المصرية أنا سمعت انة يتم تغير الترموستات هل هذا هو التعديل الوحيد فقط
ام توجد تعديلات أخرى فى الروسى وهل بعد اجراء التعديلات على الروسى لن تسخن بعد ذلك أم أنها لا تتناسب مع الاجواء المصرية . و أيهما أفضل رجاء شرح ذلك بالتفصيل و شكرا .

أرجوا أن يرد علي أحد الاساتذة الافاضل أرجوكم اجابة وافية و مفصلة لانى أنوى شراء لادا قريبا انشاء اللة . أرجوكم عدم اهمال الرد وشكرا .

[a.baibars]

ارجوا لمن يريد أن يعرف الفرق بين المصرى و الروسى أن يذهب للمعرض و يجلس فى كلاهما و يضغط على الدبرياج و يقفل الباب و يلف الدركسيون و يفتح الشنطه و الكبوت و هوه هيعرف الفرق بوضوح لوحده الفرق واضح جدا لصالح الروسى لانها اخف و اطرى بكتير دبرياج المصرى فظيع و الكراسى ناشفه أما الكمليات فدى سهل تركيبها فى اى مكان الروسى بها استوب خلفى فى النصف المرايات تحكم من الداخل زى المصرى و لا تحتاج الى اى تعديل فى دوره التبريد كما يقول بعض الاخوه لانهم فى الموديلات الحديثه خلوا المروحه بموتور و سريعه جدا العداد مبيعديش النصف بل ان التكييف بيبردها كمان عن الطبيعى لما بيشتغل0 انا عندى الروسى2107موديل 2007 مكيفه انجكشن و بركب لادا من زمان كان عندى 2105 موديل 1984الر وسى كمان طريه عن المصرى فى المطبات و ركبتلها سنتر و انذار و كاسيت 0 الروسى لها احزمه امان ورا وبطانه للكبوت من فوق و الشنطه من تحت و المصرى مفهاش0 المصرى الجنوط و الشكمان و الزجاج والدينامو و الردياتير و الفرش و المروحه و البطاريه و الصدامات مصرى و انت عارف التقفيل المصرى اللذيذ وعيش حياتك بقى0 مع التصليحات و الاكصدام المصدى و الشكمان المخروم و الدينامو العطلان0 نصيحه اشترى دماغك و خد الروسى كو عايز تحس بطعم عربيه زيرو0 عيب الروسى الوحيد هو ان الانجكشن مبينفعش معاه البنزين ال 80 بس هى سلسه و بتوفر عن كاربراتير المصرى فى الاستهلاك وبتدور بدون ما تلمس البنزين وبتسخن نفسها اتوماتيك زى السيارات الحديثه عشان الانجكشن 0 لمزيد من التفاصيل جرب بنفسك فى الوكيل بس خد بالك هما بيشجعوا طبعا مصنعهم و بيقولوا مفيش فرق فى السيارتين بس المصرى زياده فى الكماليات0 اعتمد على ملاحظتك الشخصيه 0ارجوا ان اكون افدتكم و مبروك مقدما على الروسى0

[nezamy]

تجربتى مع اللادا 2107 المصرى

الحكاية تبتدى بانى عندى اتنين اصدقائى عندهم اللادا الروسى وانا جربتها وكانت كويسة وعملية ولكن لما جيت اشترى مالقيتش غير المصرى وانا كنت مستعجل فاضطريت انى اشتريها (غلطة عمرى للأسف)
المهم استلمت العربيه ولقيت الآتى:
1- الدركسيون تقيل مووووت ... اتقل من الروسى بمراحل
2- تارة الدركسيون مش مستقيمة مع العجل (رحت التوكيل وماعرفوش يعدلوة ..بالعكس خلوة اسوأ بمراحل)
3- الدركسيون فية بوش رهيب ... الميكانيكى قاللى غير علبة الدركسيون فورا لأنها بايظة
4- فية صوت وننة عالية فى الكرونه ..... لازم الكرونة تتغير هى كمان ..يادى النيلة
5- العربية ما بتعديش 120 كم / ساعة ودى كانت شكوى كل اللى قابلتهم فى التوكيل
6- المراية اليمين زجاجها عادى مش مقعر .... اخرك انك تشوف 20 سم جنب عربيتك ولا يمكن تشوف اى عربية جنبك
7- لما تنزل اى مطب مابتبقاش عارف انت هاتروح على فين ... ممكن يمين ... مكن شمال ممكن تفضل مكمل فى طريقك ..انت ونصيبك الله اعلم (بسبب بوش الدركسيون وسوء المساعدين) ولو قررت تعدى من وسط عربيتين على كوبرى 6 اكتوبر تبقى مجنون لأنك اكيد هاتلبس فى واحدة فيهم بسبب بوش الدركسيون برضة
8- العربية بتحك فى المطبات لو ركب 2 ورا
9- المساعدين بتاعه العربية خفيفه جدا ولازم تغيرها بمساعدين محترمة وتعللى العربية بعد تغيير السوست مش مجرد تركيب علايات ما بتعملش اى حاجة ... مصاريف ... مصاريف ... مصاريف
10- الكاسيت معقول ... الحمد لله فية حاجه عدلة
11- السماعات زبالة الزبالة
12- كرسى العربية دة قصة لوحدة... اولا ناشف جدا كأنك قاعد على خشبة (لا ينصح بشراء العربية لمرضى البواسير) ثانيا الكرسى عالى جدا جدا ... راسك هاتخبط فى السقف فى المطبات (انا طولى 177 يعنى مش طويل ولا نيلة)
13- العربية لما تمشى فى الحراره العالية والشمس تبتدى تقطع وعطلت بى مرة على كوبرى 15 مايو بعد اقل من شهر من شرائها (المضحك فى الموضوع ان كل العربيات اللى جنبى قاعد يقوللى رش ميه على طرمبة البنزين ... اتارى ده عيب معتاد فى اللادا) ... لازم تغير طرمبة البنزين كمان وانت وحظك يا تطلع سليمة يا تطلع زى اختها
16- التوكيل ... دة بقى عايز منتدى مسموح فية بالسب علشان عضويتى ماتتوقفش فى المنتدى المحترم اللى باحبه ده
17- التوكيل... اول حاجة المهندس القرفان من نفسة ومن شغلة واحتمال كمان من مراتة وكل حاجة تقوللة عليها يقولك هى كدة طبيعى حتى جرب باقى العربيات هاتلاقيها زى بتاعتك
18- التوكيل... كل ما تقول للمهندس على حاجة يقولك "ما تنساش انك راكب لادا .. هى كدة على اد تمنها"
مش بجد حاجة تقرف
وفيه حاجات تانية كتير مش فاكرها لأنى الحمد لله بعت العربية لأنى كنت كل ما اركباه احس انى هاعمل حادثة موت (خسرت فيها 6 الاف جنيه فى شهرين الحمد لله) واشتريت عربية اكسنت مستعملة موديل 99 1300 سىسى .... احسن من ام اللادا وابوها كمان
ربنا معاك ياللى هاتشترى اللادا ولو ليك اى استفسارات اخر قوللى

[Abdm]

شكرا جزيلا يا أخوانى على هذة المعلومات و النصائح الغالية وأنا باذن اللة هتوكل على اللة و أشترى اللادا الروسى وجزاكم اللة خيرا.

[a.baibars]

كلمه حق لو قارنا اللادا الروسى2107 بالهيونداي و انا عندى اللادا و بحبها لمميزاتها الاخري طبيعه دركسيون اللادا فيه بوش مهما كان جديد او مظبوط هوه تصميمه كده ويحتاج للتعود عليه لتعلم دقه التوجيه و هتحس ان العربيه بتعوم منك فى الاول فى السرعات العاليه او الغرز و لكن بعد شويه ايدك هتاخد عليه وهتبقى دقيقه ولكن استجابته ليست مباشره ودقيقه مثل باقى السيارات عشان البوش

[a.baibars]

توضيح اخر دركسيون الروسى اخف من المصرى بمراحل ولكن اللادا دركسيونها تقيل بطبيعته بالمقارنه بالهيونداى و باقى السيارات وده بيبان فى الركن اكتر من فى المشى العادى ولكن بحبها زى ما قلت لمميزاتها الاخرى الكثيره

[msb_designer]

طيب وبعد الكلام الجميل قوى عن المصرى دى ماظنش ان حد ممكن يشوفها واقفة فى الشارع ويعدى من جنبها ويسيبها واقفة فى حالها كدا.

كنت عايز اعرف الروسى الزيرو بس اللى فيها الكلام اللى بتقولوا عليه ولا أى روسى حتى القديمة (بداية التسعينات مثلا)

والقديمة اللى من بداية التسعينات دى تعملها كام

[mwhoob]

انا ناوي اشتري لادا سمارة وعاوز اعرف انها روسي اصلي مش مصري ارجو النصيحة

[magdi mina]

احذر .. قطع غيارها قليلة جدا .. ودى اهم شكوى .

[magdi mina]

هى روسى .. ومفيش سمارا مصرى .

[thefighter22]

لادا روسي مش باور ولا تكيف لكن عربية عفية