حكايتى مع اللادا 2107 المصرى

[nezamy]

قصتى مع الادا 2107 المصرى "حسبى الله ونعم الوكيل"

الحكاية تبتدى بانى عندى اتنين اصدقائى عندهم اللادا الروسى وانا جربتها وكانت كويسة وعملية ولكن لما جيت اشترى مالقيتش غير المصرى وانا كنت مستعجل فاضطريت انى اشتريها (غلطة عمرى للأسف) Crying or Very sad
المهم استلمت العربيه ولقيت الآتى:
1- الدركسيون تقيل مووووت ... اتقل من الروسى بمراحل
2- تارة الدركسيون مش مستقيمة مع العجل (رحت التوكيل وماعرفوش يعدلوة ..بالعكس خلوة اسوأ بمراحل)
3- الدركسيون فية بوش رهيب ... الميكانيكى قاللى غير علبة الدركسيون فورا لأنها بايظة
4- فية صوت وننة عالية فى الكرونه ..... لازم الكرونة تتغير هى كمان ..يادى النيلة
5- العربية ما بتعديش 120 كم / ساعة ودى كانت شكوى كل اللى قابلتهم فى التوكيل
6- المراية اليمين زجاجها عادى مش مقعر .... اخرك انك تشوف 20 سم جنب عربيتك ولا يمكن تشوف اى عربية جنبك
7- لما تنزل اى مطب مابتبقاش عارف انت هاتروح على فين ... ممكن يمين ... مكن شمال ممكن تفضل مكمل فى طريقك ..انت ونصيبك الله اعلم (بسبب بوش الدركسيون وسوء المساعدين) ولو قررت تعدى من وسط عربيتين على كوبرى 6 اكتوبر تبقى مجنون لأنك اكيد هاتلبس فى واحدة فيهم بسبب بوش الدركسيون برضة
8- العربية بتحك فى المطبات لو ركب 2 ورا
9- المساعدين بتاعه العربية خفيفه جدا ولازم تغيرها بمساعدين محترمة وتعللى العربية بعد تغيير السوست مش مجرد تركيب علايات ما بتعملش اى حاجة ... مصاريف ... مصاريف ... مصاريف
10- الكاسيت معقول ... الحمد لله فية حاجه عدلة
11- السماعات زبالة الزبالة
12- كرسى العربية دة قصة لوحدة... اولا ناشف جدا كأنك قاعد على خشبة (لا ينصح بشراء العربية لمرضى البواسير) ثانيا الكرسى عالى جدا جدا ... راسك هاتخبط فى السقف فى المطبات (انا طولى 177 يعنى مش طويل ولا نيلة)
13- العربية لما تمشى فى الحراره العالية والشمس تبتدى تقطع وعطلت بى مرة على كوبرى 15 مايو بعد اقل من شهر من شرائها (المضحك فى الموضوع ان كل العربيات اللى جنبى قاعد يقوللى رش ميه على طرمبة البنزين ... اتارى ده عيب معتاد فى اللادا) ... لازم تغير طرمبة البنزين كمان وانت وحظك يا تطلع سليمة يا تطلع زى اختها
16- التوكيل ... دة بقى عايز منتدى مسموح فية بالسب علشان عضويتى ماتتوقفش فى المنتدى المحترم اللى باحبه ده
17- التوكيل... اول حاجة المهندس القرفان من نفسة ومن شغلة واحتمال كمان من مراتة وكل حاجة تقوللة عليها يقولك هى كدة طبيعى حتى جرب باقى العربيات هاتلاقيها زى بتاعتك
18- التوكيل... كل ما تقول للمهندس على حاجة يقولك "ما تنساش انك راكب لادا .. هى كدة على اد تمنها"
مش بجد حاجة تقرف
وفيه حاجات تانية كتير مش فاكرها لأنى الحمد لله بعت العربية لأنى كنت كل ما اركباه احس انى هاعمل حادثة موت (خسرت فيها 6 الاف جنيه فى شهرين الحمد لله) واشتريت عربية اكسنت مستعملة موديل 99 1300 سىسى .... احسن من ام اللادا وابوها كمان
ربنا معاك ياللى هاتشترى اللادا ولو ليك اى استفسارات اخر قوللى

[cobraa2008]

بصرااااااااااااااااحة احسن حاجة انك بعتها وعلى العموم اللي عايز يركب لادا يبعد عن 2107 ويخليه في 2110 افضل بكتييييييييييييييييييييير وبمراحل واريح وانعم واخف واحلى


على العموم التوكيل من ازبل زبالة التوكيلات في مصر

من حرامية الى نصابين الي الخ.....

وعلى العموم ربنا كرمك ولقلها بيعه

[tamim]

الف مبروك الاكسنت عربية حلوة وناعمة بكتير عن اللادا 107
وحمدلله على السلامة يابراهيم

[ahmedsamir79]

nezamy باشا
مش الموضوع ده أنت حطيته من مده

[yasoxp]

ياجماعا التجربه الشخصيه ليس من الضروى عموميتها على العربيه وانا اسف لكل ما عانيته فى العربيه واتمنى لك التوفيق ومن الله ان يعوض عليك
بسسسسسسسسسسسسسسسسسسسسسس انا معايا لادا 2107 موديل 2008 مصرى العربيه باشا
سرعه حتى 165 كم عن تجربه شخصيه بحته عاى طريق الاسكندريه بورسعيد الدولى ثبات مقبول
موتزر 1600 اسد من الاخر معلى بلاطه محدش بيعرف يعمل معايا حاجه على السكه
التسارع جيد ومقبول جدا وعدانى من مشاكل كتير على الطريق

رجو عدم الافتراء على العربيه وارجو لك النجاح فى منتدى الهونداى احنا فى منتدانى بنحب عربيتنا ونظهر محاسنها ونعالج عيوبها ومنعقدش الناس واظن ان كل الموضوعات فى المنتدى معظمها لصالح السياره يعنى السياره جيده ولو بنسبه 80% وهذا مقبول وخصوصا على ما توفره من جهات اخرى لا تحتاج الى الشرح ولاكن تحتاج الى الاطلاع على موضوعات المنتدى

وشكرا

[Goodle]

لا حول ولاقوة إلا بالله

[Dr_Medschool]

شكرا على التقييم الجميل و الوافي و ربنا يعوض عليك
و المرة الجاية ابقى اسأل كويس عشان ما ينضحكش عليك
عقبال يا رب ما تكون المرة الجاية دي مرسيدس