المرسيدس بتاعتى ادمرت

[Mody_Benz]

امبارح وانا ماشى على الدائرى عند نزلة البحر الاعظم كانت المفاجاة
ماشى على سرعة 40/50
وقدامى نص نقل من بتوع الشركات واعتقد كانت شركة ثرى شيفس
ماشى عادى جدا ولا مشغول باى حاجة وراح داس فرامل مرة واحدة وبدون اى سبب روحت لبست فيه بعد فرامل زحف مترين منى على الاقل طبعا الاكصدام كله عنده حديد من ورا
واللى اتفاجئت بيه وانا لسه بقلع الحزام انه هرب وطار بعديها ولا حتى نزل شاف عربيته عاملة اذاى والله اعلم هوا هرب ليه بس اخدت رقم العربية علطول!! معهوش رخصة - خايف للشركة تخصم منه ثمن التصليح من مرتبه الله اعلم
وروحت عملتله محضر فى قسم الجيزة ولسه معرفش اية اللى يحصل
وطبعا الونش جه وخد 180 جنية وعلى مركز الصيانة علطول ولسه هيشتغل فيها بكرة وشامل سمكرة ودوكو وكهربا وميكانيكا وكله

اثارها
-تدمير الريداتير كله ونقط كل الميه اللى فيه
-ومروحة الماتور
-والفوانيس اللى قدام كلها يمين-شمال-اشارات
-والشبكة اللى قدام طبعا
- وطبعا الكبوت اطبق ومعرفش لسه هيتعمل ولا هجيب كبوت جديد
بس علامة مرسيدس محصلهاش حاجة سبحان الله

والله اعلم السمكرى هيطلعلى اية تانى


وده اللى عرفت اصوره بليل والله

والحمدلله انا كويس محصليش حاجة غير الدركسيون بس لما دخل فى بطنى

الحمدلله على كل حاجة وقدر الله ماشاء فعل

[dr-mohamed]

الحمد لله قدر الله وما شاء فعل
المهم سلامتك انت

بس بجد انا مستغرب لان دي مرسيدس المفروض اقوي من كدة
انا لبست نفس الخبطة وبردو في نص نقل بس على سرعة 80 والخساير كانت اقل من كدة
ومرة تانية في عمود وبردو على 80 وكانت بردو الخساير اقل
وعربيتي لانسر كريستالة يعني المفروض اضعف من عربيتك

ربنا يقويك والحمد لله ان خبطة الدركسيون في بطنك معملتش حاجة خطر

[Ralliart]

والله انا دمي اتحرق وانا بقرأ القصه ربنا يكون في عونك

الحمد لله قدر الله وما شاء فعل
المهم سلامتك انت

بس بجد انا مستغرب لان دي مرسيدس المفروض اقوي من كدة
انا لبست نفس الخبطة وبردو في نص نقل بس على سرعة 80 والخساير كانت اقل من كدة
ومرة تانية في عمود وبردو على 80 وكانت بردو الخساير اقل
وعربيتي لانسر كريستالة يعني المفروض اضعف من عربيتك

ربنا يقويك والحمد لله ان خبطة الدركسيون في بطنك معملتش حاجة خطر

مش معنى ان الصاج ناشف ان العربيه تبقى خسايرها اقل لان لو حضرتك جبت مسطره ناشفه وتنيتها هتتكسر انما لو جبت واحده لينه مش هتتكسر
بمعنى ان الخبطه ليها طاقه لازم تستهلك لان الطاقه لا تفنى ففي حالة المرسيديس الطاقه معرفتش تبهدل الصاج فاتنقلت للداخل وكسرت الرايديتير وكمان لا قدر الله بتتنقل للسواق نفسه والكراسي وكل حاجه في العربيه
انما في حالة اللانسر فالصاج بيتخرشم فبيمتص الطاقه فالتأثير على الاجزاء الداخليه والسواق اقل بكتير طبعاً
والدليل على كده لو شفت حادثه قويه لبيجو 504 هتلاقي الناس اصاباتها خطيره ومش متناسبه مع التأثير على الصاج لانهم شربو الخبطه بدال الصاج

[menocomp]

الف حمد الله على السلامة, وميهمكش ياباشا مدام انت سليم.

[Ellawai]

كنت عملت محضر معاينه و اثبت رقم العربيه اللي خبطتك في الموقع اللي اتخبطت فيه و سيبت المحضر يمشي .. الناس اللي زي دي تستاهل كده.

[Mody_Benz]

والله بجد يا اخوانا انا متشكر جدا على سؤالكوا ربنا يخليكوا
انا الحمدلله كويس وورشة الصيانة بدأت تشتغل فيها النهاردة
ولسه بكرة هيقولى هيا العربية عايزة اية بظبط
وربنا يستر ومتطلعش فيها حجات غير النا اتوقعته
والحمدلله على كل شئ

كنت عملت محضر معاينه و اثبت رقم العربيه اللي خبطتك في الموقع اللي اتخبطت فيه و سيبت المحضر يمشي .. الناس اللي زي دي تستاهل كده.

والله روحت عملت محضر زى مقلتلكوا ولسه معرفشاية اللى حصل

[gomangy]

حمدالله علي سلامتك
واللي يجي في الريش بقشيش

[د.محمود صلاح]

حمداً لله على السلامة ,, بس فى قوانين المرور اللى من الخلف غالباً هو المُخطئ

[احمدعبدالعزيز]

قدر الله ما شاء فعل الحمد الله على سلامتك

[morsi]

ان شاء الله عربيتك ترجع زى ماكانت. بس انا بأستغرب أزاى حضرتك كنت ماشى على سرعة 40 -50 وماتلحقش نفسك وتفرمل وتكون خسايرك جامدة جدا زى مابتقول وكمان عربيتك مرسيدس وحضرتك بتقول زحفت مترين؟؟؟ اعتقد انت كنت على سرعة اعلى من كدا.على فكرة دايماً اللى ورا هو اللى غلطان علشان لازم تسيب مسافة قانونية بينك وبين اللى قدامك.المهم حمداً لله على سلامتك.

[Mody_Benz]

انا عارف ان ناس كتير قالتلى اللى خبط من ورا هوا اللى غلطان انا عارف كدة وخلى بالك انه محصلوش اى حاجة من ورا وهرب لانه غلطان محدش بيفرمل مرة واحدة علطول كدة وكمان كله عنده ورا حديد مش صاج والله اعلم هرب ليه
بس محدش يحس باللحظة ديه صدقونى الا اللى فيها بس ويارب محد يحس بيها ابدا
وسعات الواحد يمشى ويهدى ويوقف ويمشى ويهدى ويوقف لكن لما تلاقى نفسك مرة واحدة قدام حاجة كدة فجاة

وفى الاخر هتقول ده قضاء وقدر والحمدلله

ويارب ولا واحد فيكو يحس بيها ابدا

وربنا يستر علينا

[pharonicking]

معلش دة نصيب "" ومش حتاخد منه حاجة لان انت اللى خابطه من ورا"

[A7MED_PHARMA]

الحمد لله بسيطة ..المهم إنك بخير

[yyy]

الحمد لله قدر الله وما شاء فعل
المهم سلامتك انت

بس بجد انا مستغرب لان دي مرسيدس المفروض اقوي من كدة
انا لبست نفس الخبطة وبردو في نص نقل بس على سرعة 80 والخساير كانت اقل من كدة
ومرة تانية في عمود وبردو على 80 وكانت بردو الخساير اقل
وعربيتي لانسر كريستالة يعني المفروض اضعف من عربيتك

ربنا يقويك والحمد لله ان خبطة الدركسيون في بطنك معملتش حاجة خطر

مش حكاية العربية جامدة ولا لا بس مع الفرامل الجامدة وش العربية وطى
واكصدام النص نقل دخل فى الفوانيس (شوف الاكصدام فى الصورة هتلاقية سليم)

اما بالنسبة لتكاليف التصليح
الفانوس الامامى استيراد(المدور) ب 150 (بييقى كانة زيرو)
2 فانوس اشارة جديد(اندونسى)الواحد ب18
الشبكة استيراد كاملة ب250 (ممكن السمكرى يستعدل النيكل وتغير البلاستيك كامل جديد ب50ج)
الكابوت يتسمكر ويشتغل عادى
الريداتير والمروحة معرفش اسعارهم

[JOOOOOOOOOO]

الحمد لله قدر الله وما شاء فعل
المهم سلامتك انت

بس بجد انا مستغرب لان دي مرسيدس المفروض اقوي من كدة
انا لبست نفس الخبطة وبردو في نص نقل بس على سرعة 80 والخساير كانت اقل من كدة
ومرة تانية في عمود وبردو على 80 وكانت بردو الخساير اقل
وعربيتي لانسر كريستالة يعني المفروض اضعف من عربيتك

ربنا يقويك والحمد لله ان خبطة الدركسيون في بطنك معملتش حاجة خطر

لو تلاحظ الاكصدام زي ماهو مافيهوش خربوشة

دا يدل ان الاكصدام دخل تحت العربية النقل

او بمعنى اكصدام العربية النقل اعلى من اكصدام المرسيدس فعلشان كدا جه في ازاز الفوانيس والشبكة والريداتير

بس لكن المرسيدس معروفة هي والبي ام والبيجو و العربيات الامريكاني


المهم انت كويس كله يتعوض والحمد لله انها جت على قد كده