موديلات مرسيدس القديمة كاملة

[medo2o1o]

فى اطار حملة الاستاذ محمد سليمان للنهوض بقسم المرسيدس

يسعدنى ان اقدم لكم التحفة الجميلة الرائعة انهاااااااااااااا.................مرسيدس

طبعا استاذ محمد عمل موضوع عن تاريخ شركة مرسيدس

http://www.nilemotors.net/Nile/140635-a.html

بس انا هاتكلم عن العربيات اللى انتجت باسم Mercedes Benz

الموضوع ثلاثة حلقات تتناول السيارات التى انتجت من عام 1950 الى 1989

الحلقة الاولى: الخمسينات

Mercedes-Benz W120/121

دى انتجت من سنة 1953 لسنة 1962

و كانت تسمى ايضا ب 190 و180

نتيجة لتوافرها بمحركين واحد 1800 سى سى و التانى 1900 سى سى وقوتهم 75 و 80

حصان على التوالى

فى ناس بيعتقدوا ان دى هى بداية السى كلاس خاصة انها كانت اصغر سيدان مرسيدس تعمله

تخيلوا بقى ان مرسيدس خلت العلامة بتاعتها متحركة و ممكن تتخلع من اول الموديل ده

ليه بقة .....عشان النمسا طلبت كدة و بعض الدول الاخرى عشان سلامة المارة

اتعمل منها 442,963 عربية

Mercedes-Benz W180

1954-1959انتجت فى الفترة من

دى برضه بيقولوا انها بداية ال E –class

و اتعمل منها سيدان و كوبيه و كابورليه

كان متورها سته سليندر 2200 سى سى بيطلع 85 حصان و سرعة قصوى 150 كيلو

و تعم تحديثه على مدار الوقت عشان يطلع 90 حصان و بعد كدة بقت 100 حصان

و كان سعرها 4500 دولار للفئة الاعلى فى السيدان و 7138 دولار للكوبيه

انتج منها 84,645 عربية

Mercedes-Benz 300SL

انتجت فى الفترة من1955-1963

دى بقة تحفة و تبقى اول عربية مرسيدس فى فئة الSL

الباب بتفتح لفوق اكنها جناحات (جناحات النورس- (Gull wings

متورها كان بالانجيكشن و كانت اسرع سيارة فى العالم

رقم 300 ده عشان متورها 3000 سى سى

و SL معناهSport Leicht- Sport Light

كانت 212 حصان و فى نسخة 222 حصان

و السرعة القصوى 260 كيلو

بس العربية دى كان فيها مشكلة انك لو ممشيتش بسرعة هاتبوظ (بتعاقيك يعنى)

نظام الانجيكشن كان غبى حبتيين كان ميكانيكى مش كهربائى و كان بيكمل ضخ البنزين من ساعة ماتقفل الكونتاكت لغاية لما المتور يقف خالص و مكنش بتحرق طبعا

طبعا تسبب فى ان البنزين كان بيخفف زيت المتور و كان لازم تمشى بسرعة عالية عشان تسخن و بالتالى تبخر البنزين ده

انتج منها 3,258عربية

وكان سعرها 11000 دولار بعد كده رخصت بقت 7000 دولار

Mercedes-Benz 190SL

1955-1963أنتجت فى الفترة من

العربية دى انتجت فى نفس الفترة بتاعت الGull wing

بس كانت اصغر و طبعا متور اصغر و كانو بيعتبرها الكابورليه \الكوبيه

بتاعة W121

كان متورها اربعة سليندر 1900 سى سى

بيطلع 104 حصان صافى و 120 حصان اجمالى

و كان فيه عيب فيها هو ان الاتنين كاربراتير بتوعها ماكانوش مظبتين التوقيت مع بعض

فى مفارقة غريبة العربية دى اشتهرت باسم Nitribitt-Mercedes

نتيجة لان فى بنت اسمها Rosemarie Nitribittكان فى فضيحة حوالين مقتلها و كانت تقتنى العربية دى

انتج منها 25,881 عربية

و كان تمنها اعلى فئة 4300 دولار

الى القاء فى الحلقة الثانية و حقبة الستينات

[ahmed2y]

مجهود رائع وفى انتظار الباقى

[eng.octooo]

بجد هوة دة الاداء الراقى من ملاك السيارة الراقية

بجد موضوع جامد ومستنين باقى الحلقات

[د.محمود صلاح]

موضوه ممتاز احييك عليه

[medo2o1o]

نبتدى الحلقة التانية

هابتدى بفترة الستينات

طبعا الفترة دى موديلات مرسيدس كانت مسماه بFin tail

بالالمانى Hechflosse

و سبب تسميتها كده هو شكل الزعنفة الصغيرة اللى كانت على الشنطة

و كانت معمولة كدة عشان يخلوها مناسبة اكتر للسوق الامريكى اللى كانت فورد و كاديلاك

ماسكاه و كانوا بيعتمدوا على هذا التصميم

دى كاديلاك و لاحظ الزعنفة اللى على الشنطة

دى مرسيدس

Mercedes-Benz W110

انتجت من 1961–1968

العربية دى طبعا استبدلت ال W120 and W121

و ده لانها جائت بتشكيلة متنوعة من المحركات

المحرك ال 1900 بقوة 80 حصان و دخلت محركين جداد برضه عشان المنافسة فى السوق الامريكى

محرك 2000 سى سى و محرك 2300 سى سى ستة سليندر و طبعا محركات الديزل المفضلة فى اوروبا

دى كانت اول عربية يتعمل عليها اختبارات الامان بمفهومها الحالى(سباقة دايما يا مرسيدس)

و انتج منها 628,282 عربية

Mercedes-Benz W111

الشكل ده انتج من سنة 1959 — 1968

دى تبقى بداية ال S-Class

و اتعمل منها كوبيه و كابورليه

و نزلت بمجموعة محركات بقوة تتراوح بين 95-200 حصان

و طبعا زى ما قلت موضوع الامان لم تغفله مرسيدس فكانت كل عربيات هذه الحقبة فيها Crumple – zones

عشان عند حدوث التصادم القوة الناتجة من التصادم تروح فى الصاج و ما تتنقلش للركاب

و مخترع هذه التكنولوجيا كان مهندس فى الشركة اسمه Bela Barenyi

انتج منها 370,807عربية

حصل زى Face lift للموديل ده

و كان اسمه

Mercedes-Benz W108

Mercedes-Benz W108

انتج من 1965 — 1972

الموديل ده يبقى اخر موديل S-Class

يتعمل بالايد

و طبعا استغنوا عن شكل الزعنفة الفظيع اللى على الشنطة

و كان صاحب هذه الفكرة المصمم Paul Bracq

و لازم نديله بوسة انه شالها

برضه نزلها مجموعة من المواتير برضه تتراوح قوتهم من 100-200 حصان

بس اهم متور فيهم كان اللى نزل فى موديل 300SEL 6.3

ده كان اول متور V-8 مرسيدس تعمله و كان 6300 سى سى و كان بيجيب من صفر لمائة فى 6.3 ثانية مش عارف هم مظبطنها ولا ايه

طبعا دى كانت اسرع عربية سيدان فى العالم و فضلت محافظة على اللقب لفترة طويلة

و كان سعرها 15000 دولار

طبعا بعد كدة نزلت مواتير V-8 اصغر

و كانت مجهزة بكماليات كتيرة جدا منها الازاز الكهرباء و الباور ستيرينج و الفتيس الاوتوماتيك

انتج منها 383,361 عربية

ملحوظة صغيرة ان فى منها كوبيه و كابورليه

و الكوبيه منها اللى هى w 112 كانت بتعليق هوائى

Mercedes-Benz W114

دى بقة الشمامة

انتجت من سنة 1968–1976

فيه منها كوبيه و كابورليه

و نزل منها مواتير من 2000 سى سى لغاية 3000 سى سى

و منها اوتوماتيك تخيلوا ايه كمان فيها مواتير انجكشن

انتج منها 1,919,056عربية

و تبقى تانى اكتر عربية مبيعا فى تاريخ مرسيدس

حقبة السبعينات

مفيهاش عربيات كتير لان العربيات اللى انتجت فى الستينات فضلت مكملة فى السبعينيات

بس هما عربيتين اللى انتجوا فى السبعينيات طبعا فى عربيات تانية بس مكملين فى التمانينيات هحطهم فى الحلقة الاخيرة ان شاء الله

Mercedes-Benz G-Class

العربية دة بتنتج من سنة من 1979 لسنة 2008 بتعديلات طفيفة بس للاستخدام المدنى

كان الغرض منها انها تكون عربية حربية للجيش بس الاوغاد اشتروا

Volkswagen Iltis عشان رخيصة بس فى 1990 الجيش اخد العربية

كانت مزودة ب متور 5500 سى سى و ثلاتة كرونة لوك !!!

اسمها اختصار ل Gelandewagen و معناه عربية الطرق الوعرة

بتنتج فى بعض الاسواق باسماء مختلفة اهمهم بيجو بس بيجو بتحط مواتيرها

و دى اطول عربية مرسيدس استمرت فى الانتاج

Mercedes-Benz R107

انتجت من سنة 1971–1989

و دى تانى اطول عربية مرسيدس تستمر فى الانتاج

كانت متركبلها تشكيلة مواتير كتيرة قوى بتتراوح قوتها من 180 -240 حصان

اول موديل منها سنة 1971 كان سعره 11000 دولار بعد 18 سنة فى الانتاج بالتحديد سنة 1989 بقى سعرها 64000 دولار للهاى لاين

و ممكن تشتريها مستعمله ب 50000 جنيه مصرى لا غير

الى اللقاء فى الحلقة الاخيرة

[medo2o1o]

موضوه ممتاز احييك عليه

:ta_clap[1]:

مجهود رائع وفى انتظار الباقى

بجد هوة دة الاداء الراقى من ملاك السيارة الراقية

بجد موضوع جامد ومستنين باقى الحلقات

ربنا يخليكم بجد و انشاء الله نعمل مواضيع اكتر و اكتر عايزين نكبر القسم

[misoalex]

شكرا شكرا
بجد مجهود جميل وشرح وافى
بجد تسلم ايدك
انا قاعد عمال سقط وعاوز انام بس مقدرتش اسيب الموضوع الجميل ده
وفى انتظار البقيه

[eng.octooo]

تحححححححححححححححححححححفة يا دكتور ...بجد تستاهل كل خير

ومستنين الحلقات الجاية

[eino666]

الله يبارك لك
رجعتونى للذى مضى لما والدى الله يرحمه اشترى
اس 320 ب 75000 جنيه زيرو (بعد ما قبض
الميراث) فى اواخر الثمانينات على ما اتذكر
........................*
محمود عينو

[medo2o1o]

نكمل الحلقة الاخيرة

ناقصنى عربية واحدة فى فترة السبعينات

Mercedes-Benz W116

انتجت من 1972-1980

العربية دى اول عربية مرسيدس تحمل رسميا علامة S-Class

و دى اختصار ل Sonderklasseاو Special Class

و دى كانت بداية تصميم مرسيدس الجديد اللى استمر لغاية 1992 و كانت كل العربيات ليها نفس

Outline

الحاجة المميزة فى الموديل ده انه ركب فيه اكبر و اقوى ماتور مرسيدس تعمله فى الفترة بتاعتها

و كان V-8 6900 سى سى و كان بقوة 282 حصان

و طبعا تشكيلة المحركات المتنوعة اللى تراوح قوتها من 110 حصان الى 282 حصان

و طبعا كان الموديل اللى فيه المتور ال 6900 سى سى كان اول عربية يركب عليها ال ABS على

الاربع عجل

و اول عربية يتعمل فيها كل التجهيزات بتاعة الامان اللى مرسيدس اخترعتها فى الوقت ده يللا نعد

1:كابينة مدعمة بالفولاذ فى السقف و القوايم

2:الاشارات و الزراير كانت سهل انها تتكسر عند الحوادث بالتالى متسببش اصابات

3:الطابلوه مبطن عشان يحمى الركاب من الاصابات

4:الدريكسيون كان فيه ممتص للصدمات عشان برضه يقلل من الاصابات

5:تانك البنزين حطوه فوق المحور الخلفى مش عند الشنطة عشان زيادة فى الامان

6:الاشارات الجانبية كانت واخدة Curve لجنب عشان تسهل على الناس اللى حواليك تشوف انت

عايز تروح فين

العربية دى اخدت احسن عربية اوروبية لعام 1974

كان للعربية مفارقة جميلة ان كان فى فلم فرنساوى بيتصور و كانت الناس فاكرة ان العربية اللى

بيتصور بيها الفلم كانت فيرارى

عشان صوت المتور لكن طلعت مرسيدس بمتور 6900 سى سى

بصوا شكل طابلوها ايه ده و الله احلى من عربيات زيرو كتير

انتج منها 473,035 عربية

حقبة التمانينات

اول عربية هاتكلم عليها هى حبيبة قلبى W123

مع ان استاذ محمد سليمان عمل عنها موضوع كامل و سبقنى بس برضه هحاول احط بصمتى

http://www.nilemotors.net/Nile/14099...3-e-class.html

Mercedes-Benz W123

العربية دى مش عارف ليه فى الحرفيين مسمينها 102

ماعلينا

دى تبقى انجح عربية مرسيدس تعملها لوقتنا هذا و انتج منها 2,696,915عربية

من الفترة من 1976 – 1985

فيه منها موديلات و اشكال كتير جدا

كوبيه- كابورليه- سيدان-ستيشن-عربية نقل موتى كله كله مخليتش

العربية دى اول عربية تتباع فى السوق السوداء و عند الموزعين ب Over Price

و كانت طوابير الحجز ممتدة لغاية 12 شهر

و تشكيلة مواتيرها كانت تتراوح قوتها من 75 حصان ل 182 حصان

و نزل منها مواتير انجكشن بس مش كتيرة فى مصر للاسف

قبل سنه 80 كانت الفوانيس بتاعتها مدورة بعد كدة حصل فيس ليفت و بقت مربعة

كان فيها كماليات بدانا نسمع عنها دلوقتى زى فتحة السقف-مثبت سرعة-سخان للكراسى-تكييف تاتش

(عندى انا تكييف تاتش فى عربيتى)

نزلها Abs and Airbags فى سنة 80 بس طبعا (اصله ماعداش على مصر)

العربية دة كانت و مازالت رمز للعز مهما كان شكلى لابس مكرمش مش حالق دقنى الاقى كله بيقولى

اتفضل يا باشا و محدش بيكسر عليا فى الشارع

اللى موجود منها فى مصر تلات مواتير

المتور الابيض و ده كان برضه فى الشمامة و كان قوته 93 حصان

المتور الاسود و ده قوته 108 حصان

المتور الاسود 2300 سى سى الكاربيراتير بيطلع 108 حصان برضه

و الانجيكشن بيطلع 134 حصان و ده نادر شوية

عربية سفاحة بجميع المقاييس و لو اعيد انتاجها بنفس مواصفتها هاروح اشتريها تانى

بجد انها تستحق الاحترام

Mercedes-Benz W124

دى البداية الرسمية لل E-class

و استبدلت ال W123

انتجت من سنة 1985 الى 1995

نزل منها كوبيه و كابورليه

فى الوقت ده كانت مرسيدس لا توفر فى الخامات و لا فى الابحاث فبالتالى كانت غالية جدا و كانت

تعانى فى المنافسة مع السيارات اليابانية الرخيصة

تخيلوا العربية كانت مصممة لانها تمشى مسافات طويييييييلة جدا من غير ما تعمل عمرة مسافات

تصل لمليون ميل

العربية دى استعدوا للمفاجئة كانت احسن عربية فى الايرو داينمكس حتى احسن من الفيرارى و

اللمبورجينى فى الوقت ده

و كان الDrag coefficient 0.28

و كان فيها حساس اوكسجين فى الشكمان فده مع الايرو داينامكس قللت استهلاك البنزين جامد

كانت اول عربية مرسيدس تستخدم فيها نظام ال 4matic اتحط فيها سنة 1986 فى موديل اسمه

4matic saloon

شركة سانج يونج اشترت خط الانتاج بتاع العربية دى و عملت عربية اسمها Chairman و

استخدمت مواتير المرسيدس كمان

تشكيلة مواتيرها كانت تتراوح قوتها ما بين 104 حصان ل367 حصان

و كان منها نسخة AMG كانت 3600 سى سى و بتطلع 268 حصان

Mercedes-Benz W126

العربية دى كانت عند والدى فى الامارات كانت مش ممكن عربية بجد مش لعب الاطفال اللى بتتباع

اليومين دول

بسبب العربية دى والدى حلف ما يركبش عربيات تانى غير مرسيدس و قد كان

دى تبقى تانى S-class رسمى مرسيدس تعمله

فضلت تنتج من 1979–1991

و تبقى اطول S-Class تستمر فى الانتاج حتى يومنا هذا

و كانت اول عربية يتركبلها Traction Control

و يبقى نظام الAirbags اللى بشكله الحالى(اول ما يقوم بوظيفته يروح مفضى الهواء اللى جواه)

و احزمة الامان ثلاثية النقاط

تقريبا كده مقولة (عايز تعرف عربيتك هاتبقى شكلها ايه بعد عشر سنين شوف الS-class دلوقتى)

شكلها صحيح

و اخدت جائزة سيارة العام سنة 1981

و جائزة اكثر سيارة امانا عام 1988

العربية دى كانت ضمن مشروع مرسيدس لتقليل استهلاك البنزين فبالتالى كانت معمولة من سبائك

خفيفة و كان Drag coefficient قليل

تشكيلة محركاتها كانت تتراوح قوتها بين 164 حصان الى 294 حصان

فى موديل من مودبلاتها اسمه 350 SD/SDL كان بيعانى من مشكلة فى تصميم محركه و لم

تعترف مرسيدس بهذا العيب

و كانت تكلفة اصلاح هذا العيب 11000 دولار اى اغلى من سعر العربية نفسه

و اكتفت مرسيدس باصلاح سياراتها اللى لسة فى الضمان و اوقفت انتاج المتور ده نهائيا

اتعمل من تصميم السيارة دى اول S-guard و كانت مزودة بزجاج ضد الرصاص و كانت مصفحة

و مازالت تستخدم هذة السيارة فى مواكب الوزراء و الرؤساء حول العالم

و كانت و مازالت اشهر S-class ليومنا هذا

و تعتبر ثروة فى حد ذاتها و مازالت تحتفظ بسعر اعادة بيعها عاليا

حتى انها فى اوروبا ثمنها فى زيادة

Mercedes-Benz W201

و كانت تسمى ب 190

و كانت اخر عربية تسمى بهذا الاسم و العربية اللى جائت بعدها كانت البداية الرسمية لC-class

و كانت ارخص عربية مرسيدس فى هذا الوقت و كانت عشان تلبى احتياجات الناس اللى ممعاهاش

تجيب ال W123

كانت مزودة بجميع وسائل الامان و كمان التعليق الخلفى متعدد الاذرع(خمسة اذرع)

مرسيدس صرفت 600 مليون استرلينى لتطوير الموديل ده و كانت تعول عليه انه ينجح بقيت

موديلاتها اللى نازلة فى الوقت ده خاصة انه ارخص موديل فلو عجب الناس اكيد الفئات الاعلى

هتعجبهم

و فعلا نجح و كان تالت اكتر موديل مبيعا لمرسيدس

اتعمل منها 1,874,668 عربية فى الفترة من 1982 الى 1993

لكنها لم تنجح فى مصر

و جائت بمواتير تتراوح قوتها بين 105 الى 225 حصان

كان فى منها نسخة AMG هى اللى كانت بتطلع 194 حصان و كان اسمها EVO I

و نسخة تانية بتطلع 225 حصان و اسمها EVO II

و كانت بتنافس ال M3 بتاعت بى ام دابليو المنافس الحقيقى لمرسيدس

و انتصرت عليه بالرغم من ان الM3 كانت ارخص

مازالت السيارة دى تنافس فى سباقات التحمل ال 24 ساعة فى فئة 2500 سىسى

Mercedes-Benz R129

انتجت من عام1989–2001

استبدلت R107 و هى ثانى سيارة SL-class مرسيدس تنتجها

انتج منها 213,089

و كانت مبنية على شاسيه W124

كانت تشكيلة محركاته تاتى بقوة تتراوح بين 190 حصان الى 389 حصان

و كانت بداية شهرة العربية دى لما الاميرة ديانا اشترتها بعد ما باعت الجاجوارXJS بتاعتها و طبعا

كان فى ضجة اعلامية كبيرة لانها كانت اول فرد من العائلة المالكة يركب عربية اجنبية

بسبب هذا الضغط اضطرت الاميرة ديانا انها ترجع العربية لمرسيدس و العربية دلوقتى فى متحف

مرسيدس

دى صورة عربية الاميرة ديانا

فى النهاية اشكركم لمتابعة الموضوع ارجو انه يكون حاز اعجابكم

و يكون فكركم شوية بأيام جميلة يمكن كنتم نسيتوها

مرسيدس........هل من منافس

الموضوع من مجهودى و غير منقول برجاء ذكر المصدر عند النقل

المصادر

Wikipedia

Autopedia

Mercedes classics

Auto evolution

[eng.octooo]

موضوع تحفة بجد شكرااااااااااا جدا دكتور مودى وتستاهل واحدة ماكلارين

[medo2o1o]

ربنا يخليك و شكرا لكل اللى ردوا بس واضح ان مفيش حد لسة بيخش القسم او مش عاجبهم الموضوع الله اعلم
تيجى نعمل اعلان فى بقيت الاقسام

و يسمع من بقك ربنا و اركب ماكلارين و اشد مع الحتة ال F -700 بتاعتك قول يا رب

[eng.octooo]

صحيح مش عارف لية مش عاجبهم القسم ..... دة انا حتى جايبلهم موضوع تحفة عن الاسعار ادخل شوفة ....

شكلنا كدة هانبيع عربياتنا ..

[إبراهيم.صادق]

موضوع رائع ومجهود ممتاز

تسلم إيدك يا باشا :)

[yyy]

موضوع جامد جدا
شكرا ليك