عربية 200 موديل 94 ( استفسارات )

[bmw3m007]

السلام عليكم ورحمة الله وبركاته

معايا زلموكة 94 كانت مركونه حولي 10 سنين
الحمد لله ظبت المكنة و شغاله تمام و غير تيل فرامل و سير
بس الي معذبني فيها الكهرباء
كل الناس بتقولي دي فيها مكنة 111 بتاعة العيون و دي كلها كهرباء في كهرباء

فـ تنصحوني بمين اروحله ؟
في ناس بتقولي مقار ؟ مقار دي توكيل يعني ولا مركز صيانه ولا ايه ؟

الي يعرف حد كويس في المرسيدس يا ريت يفيدني الله يكرمكم

العربية فيها حاجه عامله ماس بتفضي البطارية
عايز اشغل الاريال الكهرباء بتاعها
عايز اظبط التكييف في تسريب بسط اوي في الفريون
و اراجع الكهربا بتاعتها
لأنها بتاكل بنزين زياده عن اللزوم يعني

و متشكر جدا لحضراتكم

[WalidAdel]

ميكانكية المرسيدس كتير بس مش مجربهم بس بشوف واقف قدامهك عربيات كتيييييييييييير اوي
حضرتك ساكن فين و انا احاول افتكرلك اقرب واحد ليك فين
انا اعرف واحد في ابن سندر كويس و واحد في السواح كويس بردوا

[bmya]

عربيه ممتازه ربنا يبارك لك فيها لو ككنت من المنصوره كنت قلت لك

[midogeem75]

مقار ده توكيل مرسيدس بنز وموجود في 1 ش التحرير بالدقي .. وطبعا هيرجعوهالك زيرو بس انت اللي هتدفع .. وفيه فرع تاني للتوكيل اسمه الالمانيه لصيانه السيارات مرسيدس بنز وده في جسر السويس .. ومن واقع تجربتي مع التوكيل لا انصحك بالذهاب اليه .. فيه مهندس اسمه احمد عثمان عنده مركز صيانة مرسيدس في جسر السويس ناس محترمة وفاهمة قوي وطبعا اسعاره معقولة غير التوكيل خالص.. وتقبل تحياتي .... جمال

[bmw3m007]

ميكانكية المرسيدس كتير بس مش مجربهم بس بشوف واقف قدامهك عربيات كتيييييييييييير اوي
حضرتك ساكن فين و انا احاول افتكرلك اقرب واحد ليك فين
انا اعرف واحد في ابن سندر كويس و واحد في السواح كويس بردوا

متشكر جدا لحضرتك
انا حاليا قاعد في الهرم حوالي شهرين كده قدام و بروح الحرفيين يومين كل اسبوع تقريبا و رحت هناك شارع المرسيدس و في مراكز خدمة كتير هناك طبعا بس كنت عايز اعرف هل في حد محدد بيتشكر فيه يعني , مش عايز ادخل على اي حد و خلاص

[bmw3m007]

عربيه ممتازه ربنا يبارك لك فيها لو ككنت من المنصوره كنت قلت لك

ربنا يكرمك يافندم , المنصورة اجدع ناس و في الاستاذ مصطفى هنا وقف معايا في موضوع العربية دي وقفة جميلة يعني ربنا يجازيه خير و للأسف مليش حظ اكون من المنصورة و متشكر جدا لحضرتك

[bmw3m007]

مقار ده توكيل مرسيدس بنز وموجود في 1 ش التحرير بالدقي .. وطبعا هيرجعوهالك زيرو بس انت اللي هتدفع .. وفيه فرع تاني للتوكيل اسمه الالمانيه لصيانه السيارات مرسيدس بنز وده في جسر السويس .. ومن واقع تجربتي مع التوكيل لا انصحك بالذهاب اليه .. فيه مهندس اسمه احمد عثمان عنده مركز صيانة مرسيدس في جسر السويس ناس محترمة وفاهمة قوي وطبعا اسعاره معقولة غير التوكيل خالص.. وتقبل تحياتي .... جمال

متشكر جدا لحضرتك و ربنا ييسر الحال و اروحله ان شاء الله هي من الركنه محتاجه تتظبط شوية كده
محتاجه مراجعة تكييف و كهرباء

[هانى القناوى]

الف مبروك يا باشا على العربيه
انا كنت عايز اعرف من خضرتك اشتريتها بكام ؟؟ والعداد عامل كام وحالتها عموما ايه ؟؟
وياريت تبقى بعد ماتظبط اللى فيها تعرفنى على الاداء بيتاعها وخصوصا التكيف واستهلاك البنزين والسخونيه
علشان ف ناس مخوفانى منها من نايه قطع الغيار الغاليه وانها قديمه وتحتاج مصاريف كل شويه بيحصل عطل فيها وخصوصا فى الكهربا يا ريت تفيدنى لو سمحت
والف مبروك للمره التانيه

[dr_omzy]

حضرتك لو مستعد تيجي بنها في كهرباءي مرسيدس انا بتعامل معاه محترم جدا و فاهم كويس