سؤال للخبراء عن e190

[vecevector]

خبراء المرسيدس
انا ركبت عربيات كتير فورد و اوبل و كيا و بروتون ولانسر
انا حابب العربيه e190 عشان عربيه حجم كويس و وشكل الزلموكه السؤال
كل معرض اروحه واتكلم علي العربيه يقول كلام ينرفز مثل عربيه تعبانه سيبك منها هات 200 احسن
ملهاش قطع غيار بلاعه بنزين قطع غيارها غاليه جداااااا و مبتلقيهاش
هل فعلا الكلام صحيح وهالبس عربيه معرفش اخلع منها

انا عايز اشتري E190 من موديل 85 الي 90 تنصحوني اشتري ولا اجيب ال200 المعدل مع العلم مبحبش العربيات الطويله موضوع قطع غيار غاليه مش مشكله المهم تكون متوفره
و شكرااااااااااااااااااا

[إبراهيم المصرى]

عربية ممتازة وحاجتها متوفرة و مش غالية والمصدر من متخصص فى قطع غيار استيراد

[vecevector]

فين الخبراء

[أبو عمار]

http://www.nilemotors.net/Nile/223317-190.html مفيش خبراء بعد كده

[vecevector]

انا عارف انها عربيه كويسه بس انا محتاج واحد يرد من ملاك e190 هو اكتر واحد عارف العربيه و قطع الغيار متوفره عند مين

[Amr Pavrish]

شوف بقي انا مش من احد ملاك 190 احنا من اول ناس دخلنا العربية دي مصر من سنة 85 والدي كان شغال ايامها في المانيا وهو راجع مصر جابها معاه من هناك وبعد 10 سنين باعها عشان كانت مانيوال وجبنا واحدة اوتوماتيك والكلام ده كان تقريبا سنة 96 والعربية لسه معانا لحد دلوقتي وهقولك مميزاتها وعيوبها بالنسبة للعيوب هي فعلا بتاكل بنزين كتير بس كل المرسيدس القديم كده مش هي بس وكمان هي مش واسعة زي الزلموكة وعشان كده المعلمين اللي ماسكين السوق مش بيحبوها لانهم بيحبو العربيات الكبيرة وانا اتغلبت علي موضوع انها بتستهلك بنزين كتير بقيت بحطلها بنزين 80 والعربية زي الفل مقالتش لا وكمان بجيب بيها عالصحراوي 195 كم وانا حاطط بنزين 80 وبالنسبة لقطع الغيار اللي يقولك غالية ومش موجودة اضربه علي قفاه اولا معظم قطع غيارها هي نفس قطع غيار 124 الزلموكة وثانيا معمرة وسعرها معقول لانها بتكون استيراد والميزة بتاعى المرسيدس 190 والمرسيدس 180 دول تقريبا العربيتين اللي شكلهم شبابي وبيليق عليهم الجنوط وشغل الشباب ده انما الزلموكة والتمساحة والكلام ده مينفعش معاهم والموديل ده بالذات اكتر حاجه بتعجبني فيه الثبااااااااات الرهيب والعزل يعني انا ساعات وانا مسافر عالطريق بسرح ولما اجي ابص عالعدان الاقي نفسي ماشي 160 ومش حاسس بحاجه خالص وبكون فاكر نفسي ماشي علي سرعة 90 او 100 انا ياباشا ساكن في الهرم وشغلي في بنها وبقالي سنتين بسافر بيها كل يوم والعربية مبتقولش لا ومعملتش معايا الناقصة حمارة شغل بس عيبها او عيب الالماني القديم عموما انها بتسخن في الزحمة العربيات دي مش عايزة تمشي جوة البلد دي عايزة طريق سريع عشان تاكل فيه اهم حاجه لو لقيت نفسك ماشي في طريق زحمة والجو حر خلي عينك علي عداد الحرارة وبمجرد مالزحمة تفك وتجري بالعربية هتلاقي الحرارة نزلت لوحدها خلاصة تجربتي مع العربية دي انا بنصحك بيها وسيبك من كلام التجار ولو العربية دي كانت غلطة مرسيدس زي مبيقولو عليها التجار في مصر مكنتش شركة مرسيدس هتفضل تنتجها من 83 لحد 93

[Amr Pavrish]

وبالنسبة لقطع الغيار انا بجيبها من الحرفيين ومن الوكالة اللي ورا ماسبيرو وبجيبها كمان من بنها وساعات من المنصورة يعني علي حسب المكان اللي انا بكون فيه بجيب قطع الغيار موجودة عند تجار المرسيدس بتوع اللاستيراد

[vecevector]

وبالنسبة لقطع الغيار انا بجيبها من الحرفيين ومن الوكالة اللي ورا ماسبيرو وبجيبها كمان من بنها وساعات من المنصورة يعني علي حسب المكان اللي انا بكون فيه بجيب قطع الغيار موجودة عند تجار المرسيدس بتوع اللاستيراد

يا باشا الف شكر
تنصحني بموديل كام و الانجكشن ولا الكربراتير احسن

[Amr Pavrish]

ده علي حسب نوع البنزين اللي انت ناوي تحطه يعني لو هتحط 80 يبقي هاتها كربراتير ولو هتحط 92 هات انجكشن بس ميزة الكربراتير ان اي ميكانيكي بيصلحه ومش معقد انما الانجكشن له ناس معينة ومش اي حد يفهم فيه وانا كان ليا تجربة مريرة مع الموتور الانجكشن بس في عربيتي القديمة اللي انا بعتها وكانت جولف 2 ومتسقطلها موتور انجكشن وكنت مسافر بيها اسكندرية ومرة واحدة لقيت العربية بترمي البنزين من الكبوت وبتعمل حاجات غريبة وكل موديها لميكانيكي ميعرفش يصلحها روحت شيلنها علي ونش من اسكندرية للهرم وودتها للميكانيكي بتاعي واول مشافها قالي من الاخر انا مش هعرف اعملك فيها حاجه خدها واطلع بيها عالحرفيين وفعلا جبت ونش تاني وخدتها عالحرفيين عند واحد متخصص فولكس وفي الالخر طلع العيب في وحدة الكنترول بتاعة الانجكشن كانت مهنجة وماول مصلحتها بيعت العربية عشان كنت اتعقدت من الكنترول والانجكشن وقعدت اقول ولا يوم من ايام الكربراتير ورجعت اركب المرسيدس بتاعة الحاج من تاني بعد مكنت اتمردت عليها ساعتها بس عرفت قيمتها

[Amr Pavrish]

لما تيجي تشتريها متشتريهاش علي حسب الموديل اشتريها علي حسب حالتها يعني مثلا ال 190 اللي معايا دي موديل 85 و رشة برة بس وماشية 140000 كم اهم هاجه ركز عالحالة وصدقني بعد مهتركب 190 مش هتعرف تركب اي عربية من تاني جديدة زي اللانسر والسيراتو والهلس ده العربيات دي هي فعلا اعتمادية بس جوة البلد بس انما في السفر بعد 120 بتبقي حاطط ايدك علي قلبك وبتحس انها لو عدت علي زلطة هتتقلب انا مشكلتي اني طول عمري راكب الماني عشان كده مبعرفش اركب ولا اسافر بالعربيات الكوري والياباني دي عالطريق خصوصا اول مبتعدي120 ببقي مرعوب في حين اني علي طول العادي بتاعي عالطريق وانا ماشي براحة بالمرسيدس بكون علي 140

[ashrafyoussef]

انا عندى 190 موديل 91 مواصفات اوربا فتحة سقف مانيوال فابريقة من الخارج والداخل لما تحب تسال حد عن العربية دى اسال حد سافر اوربا كتير وهتعرف الرد اللى مش ههتتوقعه
على فكرة دى اكتر تالت عربية عملت مبيعات فى تاريخ مرسيدس والشركة صرفت على تعديلها فى انجلترا 600 مليون استرلينى وهى مصممة لتنافس البى ام الفئة الثالثة والسيارة هى الاولى فى سباق التحمل 24 ساعة يعنى لو قعدت اقول لحضرتك عن المميزات مش هتخلص انا على فكرة جربت كل انواع العربيات فى مصر يابانى وامريكانى والمانى وكورى جديد لمدة شهرين فقط وكانت غلطة فعن التجربة الشخصية عربية ملهاش حل قوية جدا حجمها ممتاز مناورات وغرز وثبات وملفات على 140 150 كيلو حاجة عادية جدا ممكن تقول انها بتحرق بنزين شوية بس بالنسبة ليا مبحسش بفرق كبير بينها وبين عربيات تانية يعنى تقدر تقول عادية مع حجم الموتور اما قطع الغيار فحاجة ببلاش كدا ومتصدقش ان فى حاجة مش موجودة كله موجود وربنا يوفقك

[EBRAHIM ABOUEM]

أستاذ عمرو
تحياتى لك و عجبنى جدا تقريرك عن السيارة ال 190
حضرتك منين في الهرم ؟ انا من فيصل عند كلية التربية الرياضية و معى مرسيدس اى 190 موديل 1988 اشتريتها من أسبوعين فقط و اتشرف بمعرفتك عن قرب و مقابلتك لافادتى عن التعامل مع السيارة ت 01225461300 وشكرا مقدما

[Zidane elnagy]

استاذ ابراهيم السلام عليكم عرفت ان حضرتك اشتريت مرسيدس e190 طبعا الف مبروك وربنا يباركلك فيها انا بخلص ف عربيه زيها بس موديل ٨٤ علي ٧٨ الف جنيه حالتها الداخليه تمام فابريكا بس طبعا رشه خارجي وفيها شوية شغل بسيط في العفشه فلو حضرتك تكرمت تقولي السعر كده مناسب ولا لأ وهكون شاكر فضلك