طلب المشورة من وحوش الملاكي

[Abomalk link]

السلام عليكم ورحمة الله وبركاته
أنا هدخل في الموضوع على طول
أنا طبعا معنديش ملاكي بس عندنا نص نقل بتاعت البيت كله تمام كده
لحد هنا وكويس
نقطة ومن اول السطر
أنا عايز اجيب مرسيدس معدل ٢٠٠ علشان ان شاء الله تبقى ركوبة ليا وفي نفس الوقت هطلع بيها كام مشوار كدة كل اسبوع من عندنا في حسينية فاقوس للقاهرة أجرة طبعا
هيا قطع غيارها مالية فاقوس مفيش مشاكل فيها بس أنا عايز اعرف الأعطال هل ممكن تعمل الناقصة وتقل أدبها عليا ولا إيه
ده كده رقم واحد
رقم اتنين المشوار ده رايح جاي يعمل ٤٠٠ كيلو تقريبا ياخد بنزين قد إيه تقريبا
رقم تلاتة أنا معايا حاليا ٢٠ الف وممكن اكمل كمان ٢٠ قسط الصح بقى اجيب عربية كويسة ب ٤٠ او ٥٠ ولا أجيب حاجة ب ٢٠ وأشدها على ايدي واحدة واحدة
أنا عارف إني تقلت عليكو بس أنا عارف أنكو أخواتي الكبار وهتستحملوني
شكرًا مقدما لكل واحد سواء شارك او لا
السلام ختام وكل عام وانتم بخير والفلة في المنفلة .

[ahmedalaahosny]

بص ياسيدي انا هفيدك علي قد مااقدر اسمع ياسيدي كان عندنا واحده موديل ٧٩ المكنة البيضا دي كاربراتير بس كانت تحفه وبالنسبه ليها ال ٤٠٠ كيلو دوول مش حاجة وقطع غيارها رخيصه جدا واغلبها الماني فانت كده كده هتحطها وتنساها ده غير ان العربية دي ف السوق ماسكه سعر جامد اوي يعني لو حاله فابريكه من كله هيطلب ٦٠ ودي لو حالتها نادره اهم حاجة هات اساسياتها سليمه والمكنة السودا ( موديلات الثمانينات كانت انجكشن وده اوفر ف استهلاك البنزين عن الكاربراتير ) ثانيا انا شايف ان سيادتك لو عندك طوله بال لمتابعه الصنايعية واحده واحده هات واحده تعبانة وشدها انما لو مش فاضي يبقي بناقص الصنايعي اليومين دوول ان مكنتش تقف علي ايده ف كل حاجة وتبقي فاهم بيعمل ايه هيعك ف العربية جامد بس انا شخصيا بفضل انك تشتري حاجة حالتها جيده جدا يعني اخرها شوية تظبيط ف الصالون ودهان خارجي وحبه الرفايع اللي بره من فوانيس وخلافه انما موتور وفتيس وكارونة وكهربا وعفشة حالتهم زيرو عشان ماتتعبش معاها وبرده لاحظ انك هتهلك العربية جامد ف موضوع الاجره ده ثالثا بصراحه مااقدرش افيدك ف موضوع استهلاك البنزين ده بس نصيحه لو لقيته عالي حاول لو غلبت معاها بيعها وماتمشيهاش بالغاز بيدمر الموتور اول عن اخر بلاش غاز

[Abomalk link]

الف شكر يا كبير
أنا موضوع الصنايعية ده واخد ومدي عليه مفيش مشكلة وبيني وبين فاقوس اللي هي ام المرسيدس في حدود ٣٠ كيلو
اما موضوع الغاز ده أنا اساسا مش مقتنع بيه علشان أنا جربته على ماكينة مياه على الارض عندنا وكلت العمرة بعد ٥ شهور تقريبا
اما حكاية الأجرة دي هي هتطلع مخصوص يعني المشوار اللي على الكيف ماشي واللي مش على الكيف ينضرب بالسيف يا سيد الناس
معلش يا كبير لو فيها رزالة مني أنا قدامي شمامة حالتها ممتازة ب ١٩ الف انت رأيك أجيبها واصبر على المعدل شوية ومنها اشوف الدنيا رايحة فين ولا ازنق نفسي واجيب المعدل
وشكرا يا كبير على الاهتمام الغير عادي ده
والفلة في المنفلة وكل عام وانتم بخير

[ahmedalaahosny]

تسلم ياكبير انت تؤمر شوف انا رايي تجيب المعدل لان الصراحه الشمامه شكلها من وجهة نظري بشع تحسها موديل حاجة وخمسين وساعات بحس ان خساره فيها الفلوس واللي معاه حاجة نضيفه بيبيع ب ٥٠ الف انا شايف ان المعدل انضف بكتير كشكل واوبشنز ياراجل كفاية الباور لاحظ ان عربية تقيله زي الشمامه من غير باور ف الركنة مرار طافح انا شايف انك تجيب حته موديل ٧٨ هتكون بحاجة وثلاثين وشدها واحده واحده بمزاجك او ممكن تشوف واحده واقعه وتجيبلها مكنة وفتيس العيون ب ٩ الاف وتظبطها علي زوقك انت بقي بحيث هتبقي عارف كل مسمار فيها طالما انك قريب من فاقوس ده انت تبقي محظوظ جدا ف الشد والبيع والشراء بس كله علي حسب فلوسك رايي تصبر لغاية ع الافل اما تشوفلك حته معدل تمشي بيها امورك يعني حالتها معقوله تسافر وتروح وتيجي وشوية شوية اللي مش عاجبك فيها استني لما فلوسك تجهز وتشد فيها حاجة حاجة

[Abomalk link]

شكرًا يا كبير أنا فعلا هدور على راحتي خالص لأني جايلي فلوس بعد ٣ شهور هكمل بيهم على اللي معايا واوقع واحدة نضيفة على كيفك كده
الف شكر مرة تانية وانا اسف على تعبك معايا بس اعمل إيه الواحد لازم يستغل اخواتو ويطلع عنيهم وبعدين لو مش أنا اللي هتعبكوا مين هيتعبكوا يعني
شكرًا مرة أخيرة وسلام