زيارتى الاولى لمركز خدمة القطامية

[lonedoctor]

كنت قد ذكرت لكم قيامي بعمل صيانة الالف لسيارتى فى مركز خدمة مصرح به من شركة الامل فى ميدان اثر النبى وكان الامر مقتصر على تغيير الزيت والفلتر والكشف على الفرامل وتربيط العفشة وكان باقى بعض الاشياء الاخرى مثل تركيب الفوم والفرش وترييح الابواب والشنطة وكان في حدفة شمال بعد 120 ك/س يعنى وكان صوت الموتور موش عاجبنى (عالى شوية)
المهم اتصلت بالشركة(مركز صيانة القطامية) وردت على اخت فاضلة وفهمتها انى عايز اكمل باقى الصيانة والعيوب اللى ذكرتها فحجزت لى موعد الساعة التاسعة صباحا
المهم استعنت بالله وذهبت للمرة الاولى امس صباحا وكنت هناك الساعة 8:55 ص وللوهلة الاولى كان المكان شكلة موش مريح ووجدت 3 سيارات ملاكى واقفة طابور وطلب منى الامن اقف وراهم وكان فى سيارات تاكسى كتير واقفة فى الجنب التانى
بعد 10 دقائق من الانتظار جاء واحد معاة سيارة ملاكى لونها نحاسى بس تحفة بصراحة وحاطط نسر كبير على الزجاج (اوعى وشك) المهم كمان 10 دقائق مرت وانا واقف بردان بعدين ذهبت للاخ ابو نسر وقلت السلام عليكم فرد على بقرف شديد فقلت له سعادتك حاجز ولا جاى كده فقال لى لا موش حاجز انا عندى حاجة هايفة موش محتاجة حجز فذهبت الى الاخ بتاع الامن فقلت له يا اخى انا حاجز على الساعة 9 ليه توقفنى فى الطابور فقال لى والله ؟ انت عربيتك فين(سؤال غريب)فشاورت له على السيارة فقال ااه صحيح ولقيت معاة ورقة مطبوعة فيها اسماء الناس اللى حاجزة والوقت والتاريخ ورقم السيارة بس هو مطنش
المهم قال طب اركن شوية قدام بعيد عنهم
بعد 10 دقائق ظهر واحد لابس نظارة بلاستيك زى اللى باشتريها لاولادى فى العيد وبنطلون وشيرت سبور (غير لائق بالمكان) وطبعا راح للباشا ابو نسر الاول يشوف اوامر سعادته بعدين جاللى وسالنى على مشاكل السيارة فقلت له ما ذكرت لكم فكتبها فى اوردر الصيانة ونسيت اقولكم انه لما كشف على الاكصدام وجد الفوم راكب من الاول والحمد لله
اخد السيارة ودخلها الصيانة
فضلت واقف فى البرد شوية بعدين ظهر واحد شكله ذو شان وكان جاى راكب سيارة بيجو ومعلى صوت الكاسيت على الاخر وعايش حياته وقال للناس بتوع التاكسى اللى جالسين على الرصيف ياجماعة اطلعوا فى الاستراحة فقلت له هو فى استراحة هنا؟ فقال طبعا يا باشا فى اتنين فى الدور التانى فقلت له موش تقول من الاول فطلعت فوق فعلا وجدت 2 استراحة موش بطالين وتشوف منها سيارتك وهى فى الصيانة واتعرفت على اتنين جايين من السويس للصيانة وقعدت ادردش معاهم وكانوا متضايقين من عدم وجود مركز هناك بالرغم من انتشار السيارة هناك جدا
فى احد الاستراحات كان فى اخ بيعمل شاى اخدت منه كوب وبصراحة كان بيتكلم بطريقة مبتذلة وعدم احترام مع زملاء ليه ويعنى كان فيه الفاظ خارجة ماليش ذنب اسمعها (معلش نظام بيئة)
شوية والسيارة خرجت ونزلت تحت فوجدت ظهر واحد تانى لابس طاقية شكلها غريب على راسه وبقول لى انا بتاع الزوايا تعال نجرب ياباشا
طلعت معاه نجرب ورجعنا وقال لى كده 100 100 وكان بيحاول يتعرف واى خدمة والنظام ده بس انا طنشته ولم اعطى له ولا مليم
بعدين سالت على الفرش فعرفت انه انا باشتريه من عندهم واركبه بره وكان غالى شوية فصرفت نظر
نسيت اقول لكم انه السيارة تم عمل المطلوب كله بشكل جيد للامانة وتظبيت الموتور وترييح الابواب بس الاخ بتاع الزوايا ماكانش شغله مظبوط قوى وحاسس انه السيارة لسة محتجة تظبيط اكتر ويمكن محتاجين يكون عندهم كمبيوتر علشان الموضوع ده وبرضه كان فيه فرش بلاستيك على الكرسى والدواسة اثناء الصيانة وده شئ كويس
المهم الخلاصة اللى طلعت بيها انه دعيت للواء حسن صاحب الشركة انه ربنا يوفقه ويعينه لانه بيحاول يعمل حاجة كويسة ومحترمة بس المشكلة فى العاملين فى المركز سلوكهم العام غير مهنى او احترافى بالمرة وبالذات تعاملهم اسوء مع اصحاب التاكسى كانهم موش بنى ادميين وقرفانيين منهم ماعرفش ليه؟ ولذلك انا حددت المساوئ فى الاتى والله يعلم ليس بغرض انى اعيب فيهم ولكن بغرض الاصلاح
يجب التنبيه على الاخ اللى مالوش لازمة اللى شغال امن بفرز السيارات ومعرفة اللى حاجزيين وتنظيم دخولهم حسب ترتيب المواعيد والجدول
يجب على المهندسين الالتزام بزى خاص بالشركة بدلا من الازياء البيئة وده شئ بيعطى نوع من الاحترام للمظهر العام
يجب ان تنضبط سلوكيات العاملين بالمركز امام العملاء والتزام الادب فى التعامل وعدم الهزار والتهريج كانه جالسين فى كافيه موش محل شغل وده بيؤدى لعدم رضاء العملاء واحساسهم باللامبالاه ويعنى الواحد بيقول موش عشان شارى سيارة رخيصة بياخد على قد فلوسه وهناك نماذج ناجحة زى مركز سوزوكى يبعاملو صاحب الالتو زى التريوس مثلا وكذلك احترام اصحاب التاكسى زى الملاكى وانا اقصد التعامل بالتحديد لكن طبعا يجب فصل صيانة التاكسى عن الملاكى كنوع من التنظيم وده شئ تانى
الاستراحة والكافتريا محتاجة شوية نظافة واهتمام لانه حرام المكان واسع وجميل بس عايز شوية نظام ونظافة هيبقى حكاية
وشكرا لاصحاب شركة الامل لما قاموا به واعتقد انهم بالمتابعة والتطوير هيكون عندهم حاجة مشرفة جدا ليهم ولكل المصريين
وتقبلوا تحياتى

[hefz]

تشرفت جدا بحضرتك وبجد والله انا بتاسف لحضرتك لو فى اى شىء غير لائق كان فى المركز وصدقنى بالنسبة لعملاء التاكسى او الملاكى التعامل معهم واحد وده عن نفسى انا بتعامل معهم سواء وعارفة ان سائقى التاكسى ده مدخل رزق لهم وانا الحمد لله بتعامل معهم بضميرى وبحاول اكون سبب فى حل ولو جزء بسيط من مشكلاتهم واوعدك ان كل مكان نظام وده الى بنحاول نطبقه اما بالنسبة ان حد يحاول يتلاطف علشان ياخد فلوس ولا يهمك من اى حد ولو حصل شىء زى ده لازم تشتكى وبشكر حضرتك وانا تحت امرك ........

[lonedoctor]

والله يا اختى الفاضلة انا باشكرك جدا وباشكر اصحاب الشركة على اهتمامهم الشديد بالعملاء واصحاب السيارة وده شئ واضح جدا والتطور السريع الحاصل فى الشهور الماضية فى المركز ونظام الحجز واحترام العملاء وكذلك السرعة فى الانتهاء من الصيانة وانا ماكتبت هه المشاركة بغرض انى اعيب فى احد ولكن بغرض اظهار العيوب وتوصيلها لاصحاب الشركة ومتابعة تغيير هذه الملاحظات الى الافضل ونحن نريد ان يكون مركز الصيانة الخاص بسيارتنا رقم واحد فى مصر
وشكرا للجميع وتقبلوا تحياتى

[ابو ياسمين]

والله يا اختى الفاضلة انا باشكرك جدا وباشكر اصحاب الشركة على اهتمامهم الشديد بالعملاء واصحاب السيارة وده شئ واضح جدا والتطور السريع الحاصل فى الشهور الماضية فى المركز ونظام الحجز واحترام العملاء وكذلك السرعة فى الانتهاء من الصيانة وانا ماكتبت هه المشاركة بغرض انى اعيب فى احد ولكن بغرض اظهار العيوب وتوصيلها لاصحاب الشركة ومتابعة تغيير هذه الملاحظات الى الافضل ونحن نريد ان يكون مركز الصيانة الخاص بسيارتنا رقم واحد فى مصر
وشكرا للجميع وتقبلوا تحياتى

أخى المحترم .. lonedoctor
أشكرك على تقريرك الذى تميز بالأنصاف والموضوعية .. فقد وضحت الأشياء الجيدة .. كما نبهت التوكيل لما يحتاج لتصحيح .. فاعطيت لكل ذى حق حقة .
كما أشكر الأخت الفاضلة .. hefz
على جهدها المشكور فى مساعدة الزملاء ومتابعتها بأهتمام لكل المشاركات .
وأدعوا الله أن يستمر هذا الأتجاة الطيب للتوكيل .. وأن يستمر جميع الزملاء فى تشجيع مايجدونة من أشياء حسنة .. وان يقدموا ملاحظاتهم دائما عن أوجة القصور .. بغرض الأصلاح والتقدم .
ولكم تحياتى .

[bassem.naguib]

وان يقدموا ملاحظاتهم دائما عن أوجة القصور .. بغرض الأصلاح والتقدم .
ولكم تحياتى .

أيوة هو ده المطلوب .. وبدون تجريح .. مادام في استجابة باستمرار من التوكيل في تلافي أوجه القصوة .

[lonedoctor]

شكرا استاذنا الفاضل ابو ياسمين
للامانة انا اود ان اطمأن جميع الاخوة فى المنتدى بان كل ما يخص موضوع الصيانة تم تعديله للافضل وكل الملاحظات التى ذكرتها للاخ المهندس الذى استلم السيارة تم التعامل معها بشكل مرضى من الناحية الفنية
اما معظم السلبيات التى لفتت انتباهى كانت متعلقة بالشكل العام واسلوب التعامل وهى اشياء مهمة تكمل الصورة العامة للمركز وترضى العملاء عن الخدمة المقدمة بشكل كامل وبلا شك هذا الامر له اثر ممتاز فى تحسين سمعة الشركة وازدياد المبيعات بل واعتزاز العملاء بهذه السيارة الجميلة والتى يزداد اقتناعى بها يوما بعد يوم ولم اندم على اختيارى لها ابدا
وتقبلوا تحياتى

[ابو ياسمين]

أخى العزيز .. lonedoctor

لقد فعلت ببساطة ما يجب أن يفعلة أى رجل فاضل .. ولة تفكير متزن .. وهذا ما نعرفة عن سيادتك .. وهذا ظننا الحسن فيك ..
وكما قال صديقنا العزيز .. ziabassem

(أيوة هو ده المطلوب .. وبدون تجريح .. مادام في استجابة باستمرار من التوكيل في تلافي أوجه القصور .)

وهناك فارق كبير بين من ينقد ليصلح أوجة القصور التى يلاحظها ..
ومن يكتب بغرض الهدم والتجريح .. وهو فى الحقيقة غير مهتم بأصلاح شئ ..

علما بأن المستفيد الأول من الأصلاح هو نحن ملاك السيارة
وأول من يلحقة الضرر لو أنهار التوكيل
هو نحن أيضا ملاك السيارة

لذلك أحى سيادتك على تقريرك
لأنك أوضحت ماهو جيد وأوضحت كذلك مايحتاج لأصلاح

وهذة هى التقارير التى نحترمها ونثق فيها ونؤيدها

كما فعل زملاء أفاضل لنا من قبل
فلك ولهم جميعا خالص التحية والشكر .

[Ahmed A Rahman]

وهناك نماذج ناجحة زى مركز سوزوكى يبعاملو صاحب الالتو زى التريوس مثلا وكذلك احترام اصحاب التاكسى زى الملاكى وانا اقصد التعامل بالتحديد لكن طبعا يجب فصل صيانة التاكسى عن الملاكى كنوع من التنظيم وده شئ تانى
وتقبلوا تحياتى

الف مبروك على الصيانة

فعلا هذا ما لاحظته حتى في مبيعات شركة الامل, التعامل السيئ مع سائقي التاكسي


بس على فكرة اكيد حضرتك تقصد السوزوكي فيتارا لان التريوس دايهاتسو مش سوزوكي !