مركز القطاميه لصيانه byd ... عتاب و شكر...

[x_gomgom]

انا سوف اسرد تجربتي الكامله بكل صدق و امانه و الله على ما اقوله شهيد....
الحكايه على جزئين و كل واحده في مشاركه و احب اوجه خالص الشكر و التقدير للاستاذه داليا بخدمه العملاء و السيد المهندس / حسن لانهم بجد اشخاص محترمين جداً جزاكم الله كل خير.....

الجزء الاول (صيانه ال 1000):
انا عملت ال 1000 كيلو في 6 ايام بسبب ظروف سفر و جين من السفر على مركز القطاميه لصيانه ال BYD ...
وصلت هناك حوالي الساعه 8.20 صباحاً.....
استقبلني موظف الامن و قالي حاجزالساعه كام قلتله اني جاي من السفر(و الحمد لله اني وصلت اساساً لان اليوم دا كانت شبوره غبيه) على مركز الخدمه و اني فعلاً لا اعلم ان في حجز و انا الضمان معايا و محتاج اعمل صيانه الالف و هو تفضل مشكوراً و قالي ادخل و قالي اركن و ووراني الورقه اللي فيها ارقام الحجز و قالي المره الجايه لازم تحجز و الصراحه هو راجل محترم.....
بعديها بحوالي نص ساعه جاه مهندس الاستقبال و كنت رابع عربيه واقفه و سألني انت حاجز ولا لا قلتله اني جاي من السفر و اني لا اعلم موضوع الحجز دا تفضل مشكوراً بعمل استاره استقبال للعربيه و بعد كده سألني انت عندك حاجه بتشتكي منها في العربيه قلتله (التيل بيصفر و دواسه الفرامل وطيت و الجريده بتاعت السقف مفكوكه من مكانها لوحديها و نور الكاسيت بيضعف ويقوي لوحده ووجود تزييق بكرسي السائق و الموتور به رعشه و صوته عالى) ....
و بعد حوالي ساعه تقريباً فوجئت بدخول عربيه و جه جري عليها واحد (اقسم بالله شكله مسجل شقي خطر) و ميل على بتاع الامن و بيقوله الباشا ظابط و مستعجل و لازم يدخل بدري و اتعمله job و دخل قبل الجميع (منظر محزن جداً).....
المهم نفس الشخص (انا مش عايز اقول اي لفظ خارج) جاه ياخد العربيه اديته المفتاح و فجأه صمعت صوت صريخ ابص الاقي العربيه اللي تعبان في فلوسها العربجي بيفك بيها و قال ايه بيدخلها المركز!!!!!
المهم طلعت على الاستراحه و الحق يقال هي نظيفه و مقبوله جداً مع العلم ان المكان يعتبر به إنشاءات و لسه فيه شغل و الصراحه انضف من استراحه فرع الدراسه (نسيت اقولكم اني كان معايا 2107 موديل 2008 و اتعاملت معاهم فتره).....
المهم العربيه دخلت على الكوريك و اترفعت و غيروا زيت و فلتر و ربط العافشه و غسل الموتور في ساعه و نصف و بعد كده ابتدت المأساه.....
ساعتين العربيه مركونه جنب الحيط ما فيش حد حتي فكر يسأل نفسه العربيه دي بتعمل ايه هنا و طبعاً الواحد اتنرفز و دخلت الورشه و قابلت المندس / صبحي و دا راجل في قمه الادب و الاخلاق و بجد مجتهد بالعمل حكيتله على الموضوع قالي انه بيدور على ال JOB بتاع العربيه و مش عارف هما راكنيها ليه و بعد محاولات اكتشفت ان العربجي ال JOB في جيبه و سارح بيلف في المركز!!!!!
المهندس مشكوراً قالي ساعه زمن و ان شاء الله العربيه هتخلص انا بصراحه استريحت جداً لما قابلته لانه بجد شخصيه محترمه جداُ و انتظرت....
و بعد ساعه بالفعل العربيه طلعت (و اكيد المهندس/ صبحي لا يرضي بذلك) فوجئت بصنايعي لازق السقف بشريط لحام اسود و بيقولي كده تمام انا لازقها بسيلكون و متجيبش مياه عليها (السيلكون بيبوظ الدهان و دا دليل انه اساساً بياع طرشي مش صنايعي في توكيل اياً كان) الصراحه طلعت فيه و دخلت للباشمهندس صبحي و حاكيتله و لما شاف قالي (ايه القرف دا!!) و نادي على فني تاني يعيد الشغل و اكتشفت ان العربيه لسه مخلصتش اساساً و الصنايعي هو بيقولي خلاص يا باشا ادفع الحساب!!!!!.
عصرت على نفسي كيلو لمون و ضغطي علي قلت اطلع بدل ما اموت حد .......
و لقيت عربجي الحنطور سايق عربيتي و طالع بيها و ركب جنبه المهندس بتاع الاستقبال و بيقولي اركب عشان نجرب( اصلها عربيه خالته و خارج يكروز) و فين يوجعك حرق على الغيارات و نتش و غرز و بيقولي عربيه زي الفل انا ظبطهالك و بتاع (اي كلام عشان يخبط قرشين ثمن الهباب اللي بيشربه اكيد - الاشكال دي عارفها كويس بحكم طبيعه عملي - ) .....
رحت دفعت الحساب عشان لو كنت قعدت لحظه انا بالفعل كنت هركتب مصيبه (من 8.20 للساع 2.45 الظهر) و بعد ما دفعت اكتشفت لما انا اللي سقت العربيه اني دفعت 150 جنيه تمن لطعه ست ساعات و علو الضغظ و غيار زيت و فلتر!!!!!! و طبعاً ولا اي حاجه من اللي قلت عليه اتعملت.....
انا مشيت و صممت على حاجتين: اولاً: لازم اداره المكان ده تعرف مين بالظبط اللي شغال عندها ......
ثانياً:...... (احب احتفظ بيها لنفسي).....


تابعوا الجزء الثاني في المشاركه القادمه

[x_gomgom]

الجزء الثاني (شكواي بالمنتدي و دور الاخت الفاضله داليا من قسم خدمه العملاء):

طبعاً العربيه طلعت بحاله سيئه جداً عما كانت عليه : الموتور مخنوج و صوته زي ما هو تشغل التكيف العربيه تكلبش في الارض غير اني كنت هاعمل حادث بسبب ضعف الفرامل....
قلت اولاً انا هنسي الضمان و انسي اني اشتريت زيرو و اعتبر نفسي اتقلبت تاني ( http://www.nilemotors.net/Nile/189470-byd-f0.html) و ثانياً قلت انا مش رايح تاني التوكيل....
و بصراحه عرفت ان العضو hefz هو يعمل لصالح خدمه العملاء و انه ينقل شكوي الاعضاء للاداره قلت على الاقل عشان ابقي خلصت زمتي و عشتن يعرفوا ايه اللي بيحصل قمت بإرسال رساله بمضمون شكواي.....
بعد موضوع ارسالي الرساله بحوالي يوم اتصلت بي الاستاذه داليا من قسم خدمه العملاء بمركز صيانه BYD بالقطاميه و ذكرت لي ان الشكوي تم ايصالها لمدير المركز و و ايضاً السيد اللواء (انا مش متذكر الاسم حالياً) و الصراحه انا قلت كل اللي عندي و يكفيني ان على الاقل حد سمعني و طلبت مني الحضور لمركز الصيانه حتي يتم الاصلاح (انا عن نفسي قلت الموضوع خلاص و سافرت عشان الشغل و كنت بفكر ابيع العربيه)
حجزت يوم 21/1/2011 بعد شهر من شكواي و قلت اكيد الناس نسيت و رحت الساعه 9 الصبح و جه مهندس استقبال استلم العربيه و حكيتله على كل اللي فيها و اللي لاحظته انه مهتم شكوي العميل و بيحاول يتأكد من شكوتك تحديداً عشان يكتبها صح في ال job و ضيفت انه في مشكله عندي هي عضه في عصايه الفتيس و بالاضافه الي جميع المشاكل اللي لم يتم حلها سابقاً و المستجد منها.....
و استلم المره دي العربيه واحد محترم و سواقته هاديه و دخلها المركز....
و اترفعت العربيه على الكوريك و فضلوا يشتغلوا فيها و الصراحه سيبتهم مركزتش....
اللي لفت نظر ان الشخص الغير محترم بتاع الدور اللي فات عمل نفسه مش عارفني (انا متأكد انه فاكرني من المره اللي فاتت)....و بعد حوالي ثلاثه ساعات و نصف العربيه خلصت و نادولي و طلع معايا فني قالي جرب العربيه و هو قاعد جنبي و عرفت ان التيل اتغير في الضمان و ان العربيه كان فيها مشكله في سوسته البوابه و كانت محتاجه ضبط كومبيوتر بس الحق يقال العربيه رجعت جديده و سحبها رجع تاني و حسيت انها زيرو و الفني رفض انه ياخد مليم عكس الشخص العربجي بتاع المره الاولي......

حابب بجد اشكر جميع العاملين على اداره مركز خدمه القطاميه و اشكر الاستاذه داليا بجد على اهتمامها و حسن استماعها للشكاوى بجد ربنا يقويكم و يعينكم خصوصاً ان العربيه الBYD انتشرت جداً و ابتدي يبقي فيه ضغط على مركز الخدمه شديد.......

انا بجد كل رجائي انه يكون في رقابه على مستوى جميع الفنيين و المهندسين القائمين بالاعمال بالورشه من الناحيه الفنيه و الاخلاقيه لان في اشخاص تصرفاتهم غير اخلاقيه و البعض الاخر لا يفقه شيئاً في السيارات.....


و دي خلاصه تجربتي مه مركز خدمه و صيانه BYD مع سيارتي البالغه من العمر شهر و 1500 كيلو.....
والسلام عليكم و رحمه الله و بركاته

[lonedoctor]

اخى الكريم حياك الله
انا لما ذهبت لصيانة الالف فى سيارتى f3 تقدر تقول انى لمست اشياء كثيرة سلبية منها او اغلبها نفس اللى سعادتك شوفتها وهذا يدل انه فعلا فى مشكلة وليس موضوع شخصى
يجب ان ينتبه اصحاب الشركة انه بسبب بعض العمال وسوء سلوكهم هيضيع مجهود كبير جدا هما بيحاولوا يعملوه وسمعة سيارة بدات تاخذ وضعها فى السوق المصرى ممكن تتاثر بسبب هؤلاء
وطالبت انه الفنيين اللى بيشتغلوا فى المركز لابد يكونوا مؤهلين وعلى مستوى فنى وخلقى ايضا محترم
عموما الاخت داليا معانا فى المنتدى واصحاب الشركة نفسهم بيقراوا مشاركتنا ونتمنى لهم التقدم للافضل دائما
بارك الله لك فى سيارتك اخى الحبيب
تقبل تحياتى

[aamn]

الحمد لله ان حضرتك وصلت للنتيجه اللى انت عايزها من العربيه ومعلشش ممكن يكون المستوى من ساعت ما جبت العربيه عشان جبتها بدرى عننا كانت الاوضاع لسه متحسنتش ولما الناس شافو الشكاوى بداو مشكورين فى رويه الناس اللى زهانه من الشكوى ده ان شاء الله تجربه ال5000 تبقى زى الفل ان شاء الله وربنا يباركلك فيها انا بالنسبه لى مشتركين فى بعض المشاكل رعشه الموتور وتيل الفرامل وللسه التكييف مجربتوش طبعا

[kokyjoon]

سلام عليكم

نحمد الله إنك إستريحت نفسيا أولا
وثانيا نتمنى أن تزول تلك المشاكل الصغيرة
وان تحل جميع مشاكل العملاء

[memos]

انا اؤيدك في ان فيه سلبيات في مركز الصيانه وما بتتحلش الا بعد توصيه شديده وده بسبب عدم درايه العاملين بالحرفيه في التعامل والنقص التام بالخبرات التعامليه وليست الفنيه بدليل بعد التوصيه الشغل بيتعمل كأفضل ما يكون

[mmmmgogommmm]

واللة انا بشكر ايجابية حضرتك فى ضرورة عرض الشكوى على مسؤلى التوكيل---وكمان انا معجب جدا بحيادية حضرتك فى تقييم الجزء التانى من التجربة-------(زى ما اشتكينا زى ما شكرنا)----ومن المهم جدا انى اقول لحضرتك ان تشخيصك لسبب البلاء فى التوكيل مهم لانة حصر العيب وسهل علاجة وكان العيب (شخص العامل المنفلت-الهوجائى-الاونطجى)-ودة شىء مهم لانى لما اقول التوكيل زفت ومبيعرفش يصلح والعربية زى ما بتدخل زى ما بتخرج غير لما اقول المشكلة فى العامل واسلوبة وطريقتة فى التفكير وامكانياتة فى العمل وحبذا لو تم وضع اسلوب لمتابعتة هو وغيرة من العمال يضمن عملهم بشكل ايجابى-----التقييم الموضوعى يعتبر فى حد ذاتة خطوة للاصلاح--اما التقييم الجائر سواء اكان سلبيا ام ايجابيا فهو خطوة للوراء لانة اذاكان بشكل سلبى ومبهم ومبالغ فية هيؤدى الى نفور العملاء الاخرين والى احباط الوكيل وشل قدرتة على التطوير ومعالجة السلبيات لانى هكون بقولة انت كلك غلط ووحش ومفيش فايدة فيك وهو هيقولى خلاص انا هعمل اية اهو دة اللى عندى----ولو كان التوكيل ايجابى ومبالغ فية فالمبالغة هنا تقتل روح السعى الى الافضل----واخيرا شكرا على تقييم حضرتك

[x_gomgom]

والله انا شخصياً اتمني ان الاحوال في التوكيل تتحسن و يتقدم و الفائده تعم و نرتاح.....
العربيه ال byd سواء f3 او ال f0 ليهم مستقبل في السوق و بالفعل ابتدت تنتشر و دا هيحتاج مركز صيانه قادر على العمل بحرفيه و دقه تحت ضغط...
و ربنا يكرم و يوفق

[aamn]

ان شاء الله هتتحسن وانتشار العربيه يبقى مصلحه لينا عشان لما نيجى نبيع ونحدث متخسرش كتير والصبر ان شاء الله حيوصلنا للى احنا عايزينه من الشركه

[x_gomgom]

سؤال بيطرح نفسه هنا ........
محدش يعرف ايه نوع التيل اللي ممكن يركب على ال f0؟ لاني اتعقدت منه انهارده عمل صوت حشرجه زي ما يكون التيل ناشف او خلصان بس مش صفاره (مش عارف من البرد ولا ايه؟؟؟؟؟)
يا رييييت لو حد يفيد انا شاكك انه بتاع ال السيريون او الايكو بس مش عارف.....
يا ريت حد يفيدنا

[العندليب]

الاستاذة المحترمه الانسه داليا بصراحه انا مش عارف ابد من اين انا صاحب مشكلة الزجاج الذى تم اصلاحه فى المركز وتم تغيره بعد كسر الفنى للزجاج هو السطى محمود وتم لصق الزجاج الخلفى ولك جزيل الشكر ولاكن يوجد تسريب مياه عند غسيل السياره فتوجهت الى المركز وتم الصق بطريقه كزره من الدخل المهم بعد فتره سمعت صوت من الخلف فتوجهت الى مركز الصيانه فى غمره لقرب السكن وذا المهندس محمود ومن معه وابل من التبويخ الى ما فعلته وهو الذه الى القطاميه روح اعمل شغلك هناك المهم دخلت السياره وكان الرد هاعمل الشغل على حسابك وكان الرد موافق تم فحص اليساره وكانت الشكوه فى صوت من الخلف تم فحص العفشه تم خراب الشنطه وتم اللعب بالسياره لمدة ثلاث ايام متليه ولم يتم اكتشاف العطل وكان اخر رد هنغير طاقم المساعدين الخلفى كامل ونشوف العيب مطلوب مبلغ 840 ولو العيب موجود سوف يتم تركيب حاجتك مره اخره وهل هذا كلام يرضى النفس هو مش عارف العطل ومن معه ولالاسف انا ميشت الان اكلام مش مظبوط وعلى فكره انا فنى سيارت واكتشفت العيب برجاء شد الحساب على مركز غمره علشان سمعة شركة الامل دى شركة مصريه محترمه معنا لبناء مصر ونحن ابناء مصر برجاء الحساب الحساب الحساب محمد فوزى 01001718774

[العندليب]

اقسم بالله ان السياره محترمه جدا بنسه للفلوس المعفوعه فيها بس عاوزين اهتمام فى اعمال الصيانه فى مركز غمره لوسمحتو حرام كل الجهد من السادة اصحاب شركة الامل يضيع هضر برجاء المحافظ على الجهد المبزول من اجل رفع كلمة صنع فى مصر برجاء الاهتمام الاهتمام شكرا 01001718774

[طارق محمد نبيل]

تحية طيبة لصاحب التجربة ولكل انسان ايجابي بطبيعته ينقل بدقة وينتقد بحيادية وخبرة، ولي عدة اقتراحات علي أعضاء المنتدي الكرام :
أولا : لمالكي السيارات : سرد تجربتهم عند كل زيارة للتوكيل مع ذكر العناصر السلبية وعلي راسها (اسم - وظيفة - وصف الموظف او العامل ذو الأداء السلبي ) .
ثانيا: للأستاذة داليا الموظفة المجتهدة بتوكيل (زميلة المنتدي) : تجميع أسماء الموظفين او العمال أصحاب الأداء الضعيف او السلبي واتخاذ اللازم نحوهم ( توجيه - إعادة تاهيل - تدريب - تعليم - ترفيه - علاج - ....الخ).
والمنهج الذي اقترحة سيعود علي الشركة لانه يمثل تطبيق لما يسمي" بقياس رضاء العملاء عن خدمة ما بعد البيع "
كما افضل ان تتفضل الأستاذة داليا بنشر استمارة لقياس رضي العميل علي المنتدي لتوضيح النقاط الإيجابية والسلبية لتطوير الأداء
وشكرا

[M_HaFeZ]

جميل جدا ان فى ناس لسه جديده فى المنتدى وتعرف مسئولين من الشركة

[ehabpopo]

والله انا بشكر ايجابية حضرتك فى ضرورة عرض الشكوى على مسؤلى التوكيل---وكمان انا معجب جدا بحيادية حضرتك فى تقييم الجزء التانى من التجربة-------(زى ما اشتكينا زى ما شكرنا)----ومن المهم جدا انى اقول لحضرتك ان تشخيصك لسبب البلاء فى التوكيل مهم لانة حصر العيب وسهل علاجة وكان العيب (شخص العامل المنفلت-الهوجائى-الاونطجى)-ودة شىء مهم لانى لما اقول التوكيل زفت ومبيعرفش يصلح والعربية زى ما بتدخل زى ما بتخرج غير لما اقول المشكلة فى العامل واسلوبة وطريقتة فى التفكير وامكانياتة فى العمل وحبذا لو تم وضع اسلوب لمتابعتة هو وغيرة من العمال يضمن عملهم بشكل ايجابى-----التقييم الموضوعى يعتبر فى حد ذاتة خطوة للاصلاح--اما التقييم الجائر سواء اكان سلبيا ام ايجابيا فهو خطوة للوراء لانة اذاكان بشكل سلبى ومبهم ومبالغ فية هيؤدى الى نفور العملاء الاخرين والى احباط الوكيل وشل قدرتة على التطوير ومعالجة السلبيات لانى هكون بقولة انت كلك غلط ووحش ومفيش فايدة فيك وهو هيقولى خلاص انا هعمل اية اهو دة اللى عندى----ولو كان التوكيل ايجابى ومبالغ فية فالمبالغة هنا تقتل روح السعى الى الافضل----واخيرا شكرا على تقييم حضرتك

منورنا يا استاذ / محمود ومنور بيتك الاولانى ... وحشتنا ووحشتنا مشاركاتك معانا واتمنى تكون بخير ....
هى فعلا مشكلة التوكيل انة فية شخص او شخصين بيسيئوا للتوكيل فعلا ... وبدون مبالغة ممكن يطفشوا اصحاب العربيات من التوكيل ... بس الموضوع دة لازم يكون لية حل .... على الاقل لازم يكون فية حد متابع الصنايعية ... علشان على الاقل العميل اللى بيترزع 6 ساعات فى صيانة ال 1000 كم ... وغيرة وغيرة وغيرة وفى جميع الصيانات *
والمتابعة ايضا فى جودت الشغل .... وربنا يوفقهم ودايما فى تقدم بإذن الله