مأساتي مع فرع النزهة و تحية إجلال و تقدير لأستاذ عماد حبيب

[gad_fcis]

ترددت كثيراً في كتابة هذا الموضوع و لكن بعد ما حدث اليوم قررت الكتابة حتى أعطي كل زي حق حقه


أولاً و قبل أي شيء أريد أن اشكر أستاذ عماد حبيب على تحمله ليه و لمكالمتي و امتصاصه لإنفعالي اليوم


الموضوع اني كنت حاجز العربية (BYD F3 Automatic) في معرض الأهرام بتاريخ 14-01-2011 و كان الاستلام المفروض بعد 15-03-2011 ، المهم أنا ابتديت أسأل من بعد 15 مارس و الموضوع مكنش فيه رد واضح و صريح هيكون امتى أنا قلت ممكن يكون عشان الأحداث اللي حصلت في البلد التسليم هيتإخر شوية لكن اللي حصل حسسني إن الموضوع ابتدى يتحول لإستخفاف و عدم إحترام و شبه إستغلال لعدم علم العميل ببعض الإجراءات المتبعة عند شراء سيارة بالتقسيط و التأمين عليها


أنا هحاول الخص الموضوع في نقاط عشان أكون مختصر و يارب أعرف أقول كل اللي عندي و أقدر أوصلكو اللي عايز أقوله :


1- الإستلام كان المفروض بناء على تأكيد أستاذ مدحت و أستاذ خالد من فرع النزهة يتم الإسبوع دة و لم يحدث


2-يوم السبت إلي فات كلمت الأستاذ مدحت و قللي كلمني على الاتنين و أقولك على معاد الإستلام و للأسف من يوم الاتنين لحد النهردة (الخميس ) مكنش بيرد على مكالمتي و رد عليا بس لما كلمته من موبايل غير موبايلي(أنا مش عايز أكون سيء ال ظن بس هو دة اللي حصل فعلاً)


3- أنا جايب العربية بالتقسيط الإسلامي مع بنك أبو ظبي و دة معناه إن العربية لازم تكون واقفة في المعرض عشان باقي اجراءت البنك تتم عشان البنك بيعاين العربية و يشتريها و بعد كدا يبعهالي


4-الغريب إن أستاذ خالد كان بيقولي أنا مش هقدر أطلع العربية من المصنع غير لما البنك يخلص اجراءته و دة بيخلينا نطرح سؤالين :
السؤال الأول : هو ليه المعرض يتدخل في طريقة الدفع، هو مش ليه إن الفلوس تجيله سواء أنا هدفع كاش أو هقسط مع بنك؟؟
السؤال التاني : إن للأسف الأستاذ خالد حاجة من الاتنين يا إما مايعرفش نظام التقسيط الإسلامي و دة في حد ذاته كارثة لأنه المفروض مدير معرض و أكيد جاله ناس قبل كدا بنفس الحالة بتاعتي أو هو بيماطل و بيتحجج بالبنك لأن العربية مجتلوش أصلاً وهو فعلاً دة اللي حصل لما هداني تفكيري اني اختبره إختبار بسيط و أقوله أنا هدفع كاش و مش هقسط تبع بنك و ياريت تقولي هستلم العربية امتى ، لقيته بيقولي بمنتهى البرود و الإستخفاف إن مفيش عربيات هتتسلم قبل شم النسيم يعني الإستلام هيكون على التلات أو الأربع اللي جاي


٥-لما كنت عند أستاذ خالد و بالمصادفة بساله على التأمين، لقيته بيقولي حاجة غريبة جداً و هي اني لازم أأمن تبعهم (هما بيأمنوه مع مصر للتأمين ) و دة أنا إستغربتله جداً لأن قرار التأمين في الأول و في الأخر بيرجع للممول و هو البنك في حالتي يعني هو ملوش إنه يجبرني على شركة تأمين معينة و دة معناه إن لو فيه حد مش فاهم هيوافق على الموضوع مضطر و أكيد النسبة بتاعة التأمين هتكون عالية عشان أنا لما قلتله أنا هامن تبع قناة السويس بنسبة 3.5 سكت و قلي ok ذي ماتحب


6-أنا النهردة كنت ثائر جداً لأقصى درجة و الأستاذ عماد حابب مشكوراً كان سبب في إن المشكلة تتحل إلى حد كبير و اديني مستني العربية تيجي يوم التلات المعرض عشان أخلص اجراءت البنك و استلم على خير


إستنتاجي من اللي حصل معايا هو الأتي :
1-فيه ناس محترمة جداً جداً إلى أقصى درجة ذي أستاذ عماد حبيب و غيرهم من اللي اتعملت معاهم النهاردة و فعلاً لو باقي العاملين بالتوكيل مشيوه على نهجهم التوكيل دة هيبقى من أحسن التوكيلات في مصر


2- الإستخفاف بالعميل و عدم إحترام المواعيد و إن العميل يحس إنه بيتعامل مع ناس لا تلتزم بكلمتها و إنه النهاردة ممكن يقوله كلام و بكرة يقوله كلام تاني دة يدل على إن الناس ده بتفتقد أبسط معايير المصداقية و الشافية و الإحترافية في التعامل و أنا فعلاً ندمان اني طلبت إستلام العربية من فرع النزهة وقت الحجز و لولا وجود شخص ذي أستاذ عماد حبيب و إن الموضوع أصبح بالنسبالي موضوع عند أنا كنت لغيت الحجز و فكرت في عربية تانية


أنا أسف اني طولت عليكم بس أنا حبيت ذي ماقلت في الأول اني أعطي كل زي حق حقه و اني أنفس عن نفسي شوية معاكو لعل و عسى أشوف في ردودكم حاجة تواسينى او تقولي أنا غلط في إيه و لو كنت أسأت التصرف كان المفروض اتصرف ازاي

[memos]

لا يا محمد انت مش غلط اللامبالاه وعدم احترام العميل وعدم الصدق هي السمه السائده لتعاملات التوكيلات مع العميل والتى كنا نعتقد بزوال اثارها بعد الثوره ولكن للأسف والسؤال هنا مايمنع من انتاج السياره في ميعادها اذا ما توفرت الخامات طالما خرج التصريح منا ولو يوم يتم انتاج عشر سيارات تسكت بعض العملاء وسوف تزيد من مصداقيه الشركه

[bassem.naguib]

مش عارف والله أقولك أيه يا محمد غير ربنا يكون في عونك .. من نقاط ضعف توكيل بي واي دي بعض العاملين في الصيانة واللي واقفين في معارض البيع .. اللي ماشيين بنظام "أديني حسنة وأنا سيدك" .. لا مبالاه وعدم اكتراث واهتمام بالعميل اللي بيتعامل معاهم اللي لو فكروا شوية حيعرفوا أنهم بطريقتهم دي حيطفشوا الزباين اللي هما السبب في أنهم بياخدوا مرتباتهم .

ولا بد من وقفة حاسمة للسيد اللواء/ حسن سليمان رئيس مجلس الإدارة أو أي شخص أخر مسئول ..وإلا سينهار التوكيل بعد فترة على الرغم من جهودهم المبذولة في تحسين مستوى الخدمة .

وفي النهاية إن شاء الله تستلم على خير .. وكل تأخيره وفيها خيره .

[lonedoctor]

معلش ربنا يعينك وهى دى بلدنا من الاول وثقافة التسويق الاحترافية غير موجودة فى مصر اصلا الا فى مجالات قليلة جدا وده من اسباب فشل مشاريع جميلة جدا وبتقدم منتجات جيدة لكن للاسف بتخسر زبونها وتدفعه لشراء سلعة اقل جودة بسبب حسن التسويق والتعامل الجيد
فيه نقطة اخرى مهمة سعادتك راجل بتدور على الحلال وده امر موش سهل ولازم يبقى فيه شوية ابتلاء مع تدخل من الشيطان شوية علشان تكره نفسك وتستسهل وتدخل فى السهل الجميل اللى هو فيه شبهة حرام وربا والذى منه
يبقى تحتسب الامر عند الله وتتحلى بالصبر وربنا هيجزيك خير على تحريك الحلال
وبعدين السيارة الاوتوماتيك احلى موديل فى ال byd وامكانياتها جميلة بالنسبة لسعرها ماشاء الله لا قوة الا بالله
معلش تحلى بالصبر وخليك معاهم للاخر وان شاء الله فرحتك باستلام السيارة هتشيل عنك كل الهموم ان شاء الله
تقبل تحياتى

[gad_fcis]

متشكر جداً لاهتمامكم و ردودكم الكريمة، أنا مستني يوم التلات بفارغ الصبر عشان أشوف هيحصل إيه و هل موضوع المماطلة هيستمر ولا هيحصل رد فعل سريع زي ما إتوعدت (المفروض العربية تكون بايتة في المعرض من يوم السبت أو الحد عشان يوم التلات مندوب البنك يخلص الاجراءات على طول بس للأمانة الوعد دة كان قبل إعلان الحكومة إن يوم الحد اجازة رسمي )



و اللي غيظني بجد اني اعتبر من أوائل الناس إلي حجزوه العربية يعني المفروض أكون من أوائل الناس اللي تستلم



أنا هعمل تحديث أول بأول عن كل اللي بيحصل معايا سواء كان بالسلب أو الإيجاب و الله المستعان و دعواتكم معايا

[mmffor]

معروف توكيل الامل يا حبيبي من غير ما تقول
قطاع عام على ابشع مستوى

[ehabpopo]

معروف توكيل الامل يا حبيبي من غير ما تقول
قطاع عام على ابشع مستوى

حضرتك جبت من الاخر .... وبعدين هم عندهم ميزة كمان زيادة .... انهم فعلا مش عارفين حاجة ... وطبيعة فيهم مش بيعرفو يتعاملو مع الناس اصلا ....
المهم تستلم على خير ... وتنضم لينا ولمركز الصيانة الجامد بتاعنا ... هههههههههههههه ... وربنا يعطيك خيرها ويكفيك شرها ...

[gad_fcis]

إستكمالاً للمأسة اللي فعلاً مش لاقي كلمة أكتر من كدا عشان تعبر عن اللي بيحصل معايا


أنا كنت إتوعدت إن يوم الحد العربية تكن موجودة في المعرض عشان يوم التلات الاجراءت تخلص


كلمت مدير فرع النزهة و بساله على العربية لقيته بيقولي موجودة و ممكن تيجي تتفرج عليها سألته بتقفله الساعة كام قللي احنا النهاردة هنخلص على 5


روحت المعارض على طول و فعلاً لقيت عربية BYD F3 automatic فيراني ذي اللي أنا طلبها بالظبط ، بسأل الولد اللي وقف في المعرض إن المفروض العربية ده بتاعتي و عايز أشوفها لقيته بيقولي لأ ديه محجوزة لواحد و قلي إسمه ، قلتله فين مدير المعرض قلي جوا ، دخلتله قلي عربيتك في الma7'zan و هتيجي يوم التلات على الساعة 3 أو 4 ، طبعاً أنا سبحان مين خلاني أسكت و مفتحش بقي و اشتمه ولا أقول كلام يعاقب عليه القانون خصوصاً اني جاي من القاهرة الجديدة يعني مشوار مش قليل


المهم بعد مداولات اتفقنا إن العربية هتكون موجودة يوم التلات على الساعة 3 أو 4 و الاجراءت تخلص على يوم الأربع


كلمته النهردة الساعة 4 و بساله العربية جت ، لاقته بيقولي بمنتهى البرود هتيجي بليل ( طبعاً أنا بعد اللي حصل لو حلفلي انها واقفة قدامه مش هصدقه )، قلتله أنا عايز أشوفها قبل البنك ميجي قللي تعالى 11.30 بليل


المهم كلمت ناس في التوكيل و يمين شمال قللي العربية هتكون موجودة كمان ساعتين اللي هو الساعة 6 أو 7 ، و اديني nazel رايح دلوقتي و لما أرجع حبقى أحكلكو إيه اللي حصل و ربنا يصبرني على اللي أنا فيه بجد

[ehabpopo]

طمنا الله يخليك على اعصابك ... وياريت تقيس الضغط بعد زيارتك للمعرض ... علشان تطمن على نفسك .... ويكون معاك دكتور صاحبك يلحقك ....

[bassem.naguib]

تستلم على خير إن شاء الله يا محمد .. وربنا حيكرمك إن شاء الله في العربية .. بس هما بيعملوا كدة علشان تبقى غالية عليك .. وربنا يعينك على حرقة الدم ، وبعد الاستلام كل القرق ده حيروح إن شاء الله وتبقى مبسوط بيها .

[gad_fcis]

أولاً أنا أسف على التأخير


ثانياً أخيراً العربية جت امبارح و الملاحظ إن طريقة تعامل مدير المعرض اتغيرت شوية للاحسن و إن كانت لسة مش على المستوى المتوقع من مدير معارض


بس فيه حاجة للأسف هتأخر الإستلام و هي إن اجراءت البنك هتاخد وقت عشان تمشي و كمان إن لسة موافقة هيئة الإستثمار أو جواب المرور بتاع العربية مجاش و هيجي على حساب كلام مدير المعارض كمان 3 أو 4 أيام


على أي حال المهم انها جت ، و هقلكوا ملاحظتي عليها سواء عيوب أو مميزات :


المميزات :
1- تقفيل العربية كويس أوي إلى حد كبير بإستثناء بعد الحاجات حقولها في العيوب
2-العربية جاية بسماعتين ورا ، يعني كدا العربية 4 سماعات مش سماعتين في الباب بس
3- تقفيل العربية كان أحسن من اللي شفتها في معرض الأهرام (كانت مستوردة من الصين)

4-كل ال كماليات اللي في العربية تعمل بكفاءة (الزجاج الكهربائي و المرايات و فتحة السقف و الأنوار )

-تكييف العربية ممتاز و متحسش بصوت علو الموتور و إنت قاعد جوا العربية
5-حسيت و أنا جوا العربية اني فعلاً أحسنت الإختيار الحمد لله







العيوب :
1-شنطة العربية لازم تترزع رزعة محترمة عشان تقفل
2-الحتة اللي بتعمل كونترول منها على فتحة السقف حسيت انها مش ثابتة كويس في مكانها ، يعني تحس إن فيه فرق بسيط بين البلاستيك و السقف
3-كعادة كل عربية BYD f3 فيه تقوس بسيط من النص في الإكسدم الخلفي
4-كان فيه فيشة واقعة مابين الإكسدام و الرادياتير كانت جانب الكلاكس، أنا مش خبير أوي في العربيات بس أنا يتهيئلي انها حساس و المشكلة اني لما سألت الولد اللي كان بيفرجني على العربية لقيته بيقولي تلاقيها فيشة زيادة ، أموت و أعرف بيجبوهم منين و بيعينوهم على أي أساس ، ازاي كلمة زي ديه تطلع من واحد المفروض إنه شغال في مجال السيارات (أنا خايف أطلع أنا اللي جاهل و تكن فعلاً فيشة زيادة :))


أخيراً أحب اشكر كل اللي ساعدني في إختيار العربية و كل اللي قدملي نصيحة و واساني من وقت كتابة هذا الموضوع


ملاحظة أخيرة عشان أكون صادق معاكو ، مدير المعرض وراني ورق لعملاء تبع البنك الوطني للتنمية (اللي أنا هقسط تبعه) و بيقولي إن الورق خلص من غير ماتكون العربية موجودة ، كل اللي حصل إن البنك خد رقم شاسيه و موتور و الورق مشي لحد ما العربية تيجي ، بيقولي البنك الوحيد اللي بيشترط إن العربية تكون موجودة هو بنك ناصر ، هو بيقولي كدا عشان أنا كنت مصر على وجود العربية عشان ورقها يمشي في البنك زي ما مندوب البنك أكدلي ، أنا مش عارف بقى هل كل مندوب ولا كل فرع بيمشي بمزاجه ولا إيه؟ و خصوصاً إن كدة ميعتبرش إسلامي على حد علمي

[ehabpopo]

4-كان فيه فيشة واقعة مابين الإكسدام و الرادياتير كانت جانب الكلاكس، أنا مش خبير أوي في العربيات بس أنا يتهيئلي انها حساس و المشكلة اني لما سألت الولد اللي كان بيفرجني على العربية لقيته بيقولي تلاقيها فيشة زيادة ، أموت و أعرف بيجبوهم منين و بيعينوهم على أي أساس ، ازاي كلمة زي ديه تطلع من واحد المفروض إنه شغال في مجال السيارات (أنا خايف أطلع أنا اللي جاهل و تكن فعلاً فيشة زيادة :))

الكلمة دى فكرتنى بكلمة الاستاذ / مدحت ... مدير المبيعات فى فرع النزهة ايضا .... لما كنت بستلم عربيتى المانيوال ... ال فول اوبشن .... فى شهر يناير .... بقولة معقولة عربية بالسعر ده والمواصفات دى وجمال الشكل دة ومايكونش فيها سماعتين على الرف خلف الكنبة ؟؟؟ قالى ماهم سيبنهالك علشان تحط سماعات نضيفة على مزاجك ..... هههههههههه ... تخيل ؟؟؟؟؟ لاتعليق ...
أخيراً أحب اشكر كل اللي ساعدني في إختيار العربية و كل اللي قدملي نصيحة و واساني من وقت كتابة هذا الموضوع

الف الف مبروك يا باشا ... وربنا يعطيك خيرها ويكفيك شرها ... وان شاء الله اختيار موفق فعلا ....
وان شاء الله هاتبتدى وتخش معانا ونواسى بعض لما تستلم وتدخل على مركز الصيانة فى الصيانات المعروفة ... هههههههههه ....
ماتزعلش منى ... انا بهزر .... وشر البلية ما يضحك
والف الف الف مبروك مرة تانية ... وتستلم على خير ان شاء الله

[gad_fcis]

أنا اللي نفسي أعرفه ، المفروض الناس ديه شغالة في المبيعات، يعني من الأخر رزقهم من حلاوة لسانهم و طريقة مقابلتهم للعميل، و اللي بيحصل عكس كدة تماااااماً


حاجة كمان ، أنا ملاحظ اني مش لوحدي اللي قابل مشاكل مع الناس ديه، طب ليه مفيش رد فعل من التوكيل؟؟ أنا مش بقول يمشيهم ولا حاجة أنا بس عايزهم يعرفه إن السمعة بقت وحشة أويي و في الأول و في الأخر دة رزقهم و أنا واحد كبيري هستلم العربية متأخر شوية و مش هتعمل معاهم تاني لكن هما بيتعمله كل يوم مع أكتر من عميل و لازم يكون فيه ما يسمى بفن البيع عن دراية مش أي كلام و السلام

[gad_fcis]

يا أستاذ إيهاب أنا مقدرش ازعل منك، كلنا في الهوى سوى :)

[gad_fcis]

امبارح (يوم الأربع ) أستاذ خالد (مدير فرع النزهة ) كلمني و قللي إن مفيش حد من البنك جه يخلص ورق العربية


كلمت البنك و سألته ، طلع إن الراجل اللي أنا بتعامل معه عنده ظروف و كان اجازة و قللي إنه هيبعت واحد تحته يروح يخلص الموضوع و إنه هيكلمني عشان يعرف ازاي يعمل كونتاكت مع المعرض


مفيش نص ساعة ولاقت مندوب البنك بيكلمني و بياخد مني التفاصيل و ادته نمرة أستاذ خالد عشان يحدد معه ميعاد لمعاينة العربية و تقديم طلب الشراء


كلمت مندوب البنك النهردة و بساله إيه الأخبار لاقته بيقولي إنه إتفق مع أستاذ خالد إنه يجيله الساعة 5 ، و قللي و هو مستغرب إن أستاذ خالد كان بيعملوه بطريقة مش كويسة (أنا مش فاكر بصراحة نص الكلام )


الحاجة الجامدة جداً واللي خلتني طاير في السما إن أستاذ مدحت (من مبيعات فرع النزهة ) كلمني و لقيته بيحكلي الكلام اللي أنا كاتبه في الموضوع و بيستفهم مني إيه اللي خلاني أقول كدا
(يوم السبت اللي فات كلمت الأستاذ مدحت و قللي كلمني على الاتنين و أقولك على معاد الإستلام و للأسف من يوم الاتنين لحد النهردة (الخميس ) مكنش بيرد على مكالمتي و رد عليا بس لما كلمته من موبايل غير موبايلي(أنا مش عايز أكون سيء ال ظن بس هو دة اللي حصل فعلاً))
قلتله حضرتك ده اللي حصل معايا فعلاً و ذي ما قلت اني مش عايز أكون سيء الظن بس أنا بكتب اللي حصل ، المهم اعدنا نتكلم شوية و يستفهم مني عن بعض حاجات ، و أنا قلتله أنا كاتب الموضوع ده على منتدى كذا و حق الرد مكفول لحضرتك ، إدخل اعمل account و رد عليا و لو كنت غلطان في أي حاجة ناحيتك لك عليا أعتذرلك أمام الناس كلها بس على فكرة حضرتك لما هتقرأ الموضوع حتشوف اني مش لوحدي اللي بشتكي


ليه بقى أنا بقول حاجة جامدة، عشان هو ماشفش الموضوع من على النت هو إتبعتله فاكس من الادارة و ده معناه إن التوكيل بيتابع و مهتم إنه يحسن نفسه


طبعاً أنا توقعت بعد المكالمة ديه إن الدنيا تتغير من كل العاملين في فرع النزهة، و إذا بي أفاجأ بمكالمة من مدير مندوب البنك (اللي كان واخد اجازة ) و بيشتكلي من سؤ معاملة أستاذ خالد للمندوب و كان الراجل مستاء جداً و بيقولي ده إبن ناس و مندوب بنك محترم ماينفعش يتعامل كدا، و معلش يا أستاذ محمد لو التعامل هيبقى كدا أنا أسف مش هقدر أكمل مع حضرتك ، قلتله طب أنا هحاول اتصرف ، و كلمت الرجل المحترم جداااان إلى أقصى درجة و اللي يعتبر إلى حد كبير سبب في إن الموضوع ماشي لحد دلوقتي أستاذ عمرو سليمان و فهمته اللي حصل و قلتله ياريت أستاذ خالد يعامل المندوب بادمية شوية، الراجل مشكوراً تفهم الموقف و قللي إنه هيتصرف


كلمت مندوب البنك باليل و سألته إيه الاخبار ، قللي الدنيا مشيت كويس الحمدلله و إنه لم يقابل الأستاذ خالد و قابل الأستاذ مدحت و كان محترم جداً معه


ده الكلام اللي حصل لحد النهاردة و أنا متابع معاكو أول بأول لحد ما استلم العربية على خير إن شاء الله