بهدلة بسبب جراب مراية بالتوكيل

[drpeter]

مساء الخير لكل عشاق البى واى دى
اكتب هذه المشاركة لان لازم بجد نجد حل لتوكيل الامل القطامية لان الوضع اعتقد يزداد سواء
ادارة للاسف بكل المقاييس سيئة
الحكاية ببساطة ان في جرار ربنا يسامحه خبطلى المراية اليمين وانا واقف بس نشكر ربنا فقط جراب المراية هو اللى لاقيته اتفك فجبته ولزقته بامير الا انى اكتشفت بعدها بكام يوم انه وقع وانا مخدتش بالى
فاول امس وانا روحت التوكيل بعمل صيانة ال 15 الف
قولتله عاوز جراب ( cover ) مراية
قالى كل الجرابات اللى عندنا لونها ابيض
قولت ازاى ابيض مفيش اسود قالى لا احنا مش بنجيب غير ابيض
وانا مش فاهم ازاى توكيل بيبع عربية يجيب منها لون واحد فقط لقطع غيار مايجيب ولو عدد قليل الوان اخرى والابيض يجيبها كتير
المهم قولتله ايه الحل
قالى ندهنه ( طبعا دا على حساب العميل ) فقولولته ماشى
المهم في اخر الصيانة لاقيته جايبلى العربية بالجراب الابيض فقولتله االجراب ابيض
فراح الفنى بيقولى مفيش اسود قولتله ما انا كاتب انه هيدهن اسود
دخل اللى كان معايا في الاستقبال وقالى الدهان ب 30 جنيه
دا غير طبعا ان الجراب ب 25 جنيه
قولتله ماشى وانا على مضض
المهم
قالى تستنى ساعتين ولا تحب تيجى بكرا
قولتله لانا اهاجى بكرا
روحت وجه تانى يوم روحت التوكيل بستلم الجراب
روحت للاستاذ هانى بتاع الاستقبال اللى كان قايلى السعر
المهم
بعد ما خلاص جاب الجراب وبيضبط الفاتورة الشخص اللى هو المسؤل بتاع الفواتير
بصلى كدا قالى هو كان قايلك بكام الدهان
قولتله 30 جنيه
راح قال للاستاذ هانى اومال ازاى كدا الفاتورة
الفاتورة كانت 156 جنيه

طبعا تهريج مش عارف كان في واحد كاتب تمن بوية ومش عارف اد ايه تنر دا غير الضريبة والمصنعية وما الى ذلك
المهم طبعا بصراحة استاذ هانى الراجل قال ليه ياعم هم قايلنلى امبارح كله على بعضه 30 جنيه
وروح هنا وروح هناك انا دخلت الساعة 9.15 خلص موضوع الفاتورة دا 12 الاربع
وانا واقف على حيلى لان طبعا كان في مشكلة في السيستم في ارجاع الحاجات
المهم دفعت المبلع 33 جنيه مش عارف ال 3 الزيادة بتوع ايه قولت خلاص مش مهم واخدت الجراب
بركبه دخل من ناحية والناحية التانية مش راضى يخش
روحت رايح للاستاذ هانى مرة تانية وبصراحة الراجل محترم جدا وقالى طيب خش لهم جوا قولهم دخلت جاوبلى عامل جه يركبها برضوا لاقهها مش ماسكة كويس من ناحية تانية قالى هعملهالك بامير قولتله تعملها ازاى بامير دى جديدة ازاى الامير مش هيمسكها كويس قالى لا يابيه واحنا على طول الحاجات اللى زى كدا بنعملها بامير قولتله اه دا المسكور ولا اللى حصله حاجة لكن مش الجديد المهم هو جاب الامير ولزقها بس كان واضح برضوا ان لسه في فاصل ممكن يدخل اى مية دا غير انى خوفت انها تكون مش تثبته برضوا كويس وتقع مع اى خبطة حتة صغيرة
دخلت ليهم مرة تانية قولتلهم المراية مش راكبة كويس دخلت للمهندس صبحى راجل كبير وشكله محترم نادالى على صناعيى قالى لف بالعربية ودخلها
لفيت بالعربية وجيت اخش بتاع الامن قالى ممنوع قولتله هو اللى قالى قالى ممنوع قولتله طيب هخش انا انده ممنوع لازم انا الف طبعا شديت شوية معاه لان الساعة كانت 12 وربع او 12 وخمسة روحت لافف وسايب العربية في مدخل الورشة لاقيت الصنايعي جاى قولتله انا لفيت بالعربية قالى خلاص يااستاذ بعملها ( بقرف كدا ) المهم جيت امشى معاه باتجاه العربية قالى لا لف
طبعا يعنى انا افضل الف واروح وقلة قيمة المهم هو بصراحة عملها كويس لانه فك المراية ومثبتها من جوا وضبطها تمام

دلوقتى انا مش فاهم ليه التوكيل مش بيستورد قطع الغيار كاملة
ولو هو مش بيستوردها كاملة ايه زنبى انى اتحمل تكلفة شئ هو مش عاوز يجيبه ؟
ثالثا كل واحد عامل فيها انه ماشى بسيستم ولا في اى احترام لادمية يعنى انا افضل الف واروح واجى علشان ممنوع اخش الورشة ومش عاجبهم ان الناس تتلطع دى بقى مش عيب ولا حرام
برضوا شدنى ان في كذا واحد شد مع الحسابات ومع الفنين لان في حاجات مش بتتعمل وحاجات بيشخصوها غلط والعميل بيتكفل طبعا بكل شئ للكن هم لا
بصراحة دى مهزلة وقلة ادب وياريت لو حد عنده اقتراح ازاى نلفت نظرهم لهذه المهازل اللى من 2008 الناس عمال تقول عليها ولاتغيير بل يزيد الى الاسوأ

[MOK3336]

و الله ده عيب التوكيلات .......
ولوهو حاسس فعلا انه توكيل محترم مكنش عمل كده معاك أو مع غيرك
لكن تلاقيه اساسا كان تاجر في وكاله البلح ولا حاجة و ربنا كرمة و قال ياخد توكيل
و بعدين اساسا الكفر بيبقي مش ملون من الأساس و لو نفترض هو بيجيبوا متلون من برة يبقي يجيب علي الأقل الألوان الأساسية يعني أبيض - أسود - دهبي - أزرق كده يعني
ما علينا
التوكيلات ايلي زى دي ملهاش إستمرارية و هما ايلي بيجنوا علي العربيات ايلي هما وكلاء لها مع إنها ممكن تكون عربيات كويسة

[mem]

حضرتك ممكن تقدم شكوى على الميل الخاص بيهم لمجلس الاداره
ولو لم تكن هناك استجابة ابعت شكوى للشركة الام بالصين وهما هايقوموا باللازم

[mk3]

انت معدى 15000 كيلو الحمد لله يعنى مفيش احتياج للضمان
قطع غيار عربيتك فى كل حته ورخيصه
سيــــــــــــبك من التوكيل وانت الكسبان

[esmail_ali]

أنا قولتها كلمة ده مش توكيل الله يكون فى عونك والله حاسس بيك وبكل كلمة أنت قولتها لأنى عانيت كتير فى التوكيل بتاع العربية اللى ربنا بلانى بيها دى بص صاحب الشركة والاستاذ عماد والاستاذ عمرو ناس محترمة جدا بس ناقصهم حاجة مهمه جدا بس أن شاء الله يكملوها وهى أنهم محتاجين مدير أدارى يبلع التوكيل ده فى دماغه وعنيه ويبقى حافظ كل شئ فيه زى أسمه يكون قلبه على المكان وعلى استمراريته مش شرط أنه يرضى صاحب الشركه على حساب العميل علشان يعجب صاحب الشركة لازم يبقى عنده ضمير مهنى حقيقى ويعرف أزاى يقيم الأمور مش لما حد يبقى ليه حق فى شئ فنى بعض الشئ يقوله أنا مش فنى يا بيه روح أنزل لمش عارف مين وأطلع بتاع أيه المكان ده عايز شخصية أدارية تجيد فن الأدارة كما دراستها (تخطيط _تنظيم _توجيه _رقابة) مش ضحك على الدقون وأهمال وشرب شاى وقهوة وقعدة على الكرسى و شكمان سجاير مبيبطلش وأنزحه فرغة ملهاش طعم ولا معنى

[hugan]

التوكيل من اسباب فشل العربيه كملاكي
سواق التاكسي مريح دماغه وبيعمل شغله بره
سيبك من التوكيل طالما العربيه حاجتها موجوده ورخيصه واي حد يشتغل فيها

[drpeter]

شكرا ليكم
بس مينفعش بصراحة اخلى العربية تفتح بقها مع الصنايعية برا لان انتوا عارفين لو حد لطها برا يبقى كل شوية هتفتح بقها لان مفيش صنايعيى بيعمل الحاجة من الالف للياء
ومشكلة مركز القطامية ادارة في الاساس الاول وياريت ادارة شركة الامل تتخذ اجاراءت سريعة لوقف المهازل هناك

[flightbyd]

ههههههههههههههههه مانا قولت كدة من زمان قولتوا دول ناس محترمة ياسلام المصرى مايتعظش الا لما يتسك على دماغة انما لما اخوة ينصحة يعمل عشر رجالة

[drpeter]

عدد المشاركات : 3
فين بقى حضرتك قولت قبل كدا
ياتريت النقد يبقى بناء مش اى كلام وخلاص

[bassem.naguib]

ما هو الراجل نبه بصراحة قبل كدة بس بأكونتات تانية وأنت مش واخد بالك .. بس ملاحظة جيدة منك يا دكتور في عدد المشاركات .

[drpeter]

لو النقد موضوعى وبناء يااستاذى الفاضل مكنتش عضوياته السابقة اتوقفت