صيانة ال 10000 كيلو ... وكمان مفاجئة

[ehabpopo]

السلام عليكم ورحمة الله وبركاتة

الاخوة الاعزاء .... فية مفاجئة بس فى الاخر

كنت امبارح السبت بعمل صيانة ال 10000 كم ... كنت فى مركز الصيانة بدون حجز الساعة 1 ظهرا بعد الاتصال بالانسة داليا فكانت مش موجودة وردت علية الانسة نور ... وقالتلى ما فيش مشكلة تعال *
رحت المركز ... قابلنى المهندس ماجد راجل محترم ... وعمل امر الشغل ... وكان اهم شىء عندى الطنابير الاماميين ... كان فيهم ريجة كتيرة وغويطة لدرجة ان العربية كانت بترعش بسيط لما بدوس فرامل ... المهم قلت للمهندس وعمل امر الشغل وانا بتكلم معاه .. دخل فى الحوار الاستاذ / محمد رمضان مدير المركز .. ولما عرف المشكلة بتاعت الطنابير ... خرج مهندس مع محمد الصنايعى .. يجربو العربية ... وقالى ماتقلقش لو المشكلة فى الطنابير .. هايعرفو ... وهاغيرهملك علطول ... قلتلو ماشى ..
ودار بيننا حوار خاص بالنايل موتورز ... وقالى انة زعلان جدا مننا ... فقلتلة خير ... لية ؟؟؟ قالى علشان الشتيمة اللى بيتشتمها على الموقع ... فقلتله اللى بيشتمك دة انسان مش محترم انما احنا محترميين واكبر من كدة بكتيير ... انا لو عندى مشكلة معاك مش ها شتمك ... ممكن اقول كلام كتييير ( اعاتبك ... اشتكيك ... اشوف حد غيرك ) بس ما اشتمكش ... قالى والله انا مستاء جدا لان اولادى شافو الشتيمة بعنيهم ودى حاجة مش كويسة ابدا لانهم عارفين ان ابوهم كان عقيد فى الجيش وليه هيبتة ... طبعا انا معاه فى النقطة دى بالتحديد ... فقالى المشكلة ان فية ناس بتيجى المركز وفيه ( من وجهة نظرهم مشكلة فى عربياتهم) ولما بنكشف على العربية .. مش بنلاقى المشكلة او مش بنلاقيها زى ماهو متخيلها ... فبيتقال علينا اننا مقصريين ..
المهم دار بيننا حوار طويل ها نحكية فى المقابلة برحتنا ...
طلعت الاستراحة .. وبعد شوية جالى استاذ / محمد رمضان وقالى ان العربية ها يتغيرلها الطنبورتين وطبعا تيل الفرامل ...
قلت كويس ...
خلصت العربية وطلع يجربها معاية محمد الميكانيكى .. فاهم ومحترم جدا ... وكمان المهندس ماجد كان متابعنى ... المهم ان النتيجة ان العربية فعلا بقت مختلفة عن قبل دخول المركز بكتييير ...
دفعت 225 جم تمن الزيت وفلتر الزيت المصنعية والضريبة ... ومشيت ...
معلشى انا طولت عليكم ... بس زى ما احنا متعودين مع بعض .. اننا نحكى بالتفصل ... علشان كل واحد يا خد حقة

نيجى للمفاجئة

وانا بتكلم مع الاستاذ / محمد رمضان عرفتة اننا عاملين مقابلة .. فوعدنى انة ها ييجى المقابلة ... واتمنى انة يوفى بوعدة

[bassem.naguib]

ألف مبروك على الصيانة يا بوب وعقبال صيانة المليون وتكون مبسوط من العربية .

أكيد أي حد مستاء من حاجة في التوكيل بتخرج منه ألفاظ مش مناسبة وبيكون ليه دوافعه لذلك مش من الباب للطاق يعني (إلا إذا كان عاوز كدة لهدف معين) .. فيجب تفهم ذلك ووضعه في الاعتبار .

وطبعاً يهم أعضاء المنتدى أن يحضر مقابلتهم مسئول كبير من التوكيل للتواصل معهم والنقاش للوصول لأفضل خدمة ومعرفة أراء العملاء في التوكيل وما يحتاجونه منه ..

[elmanahry]

الف مبروك ياستاذ ايهاب وفعلا الاستاذ محمد رمضان انسان غاية فى التهذيب والادب وانا تعاملت معاه فى صيانة ال 15 الف وكلنا مديون لهذا الرجل بالاعتذار بسبب المذمة التى صدرت من شخص واحد
وهنا ياتى دور الاستاذ باسم مشرف القسم فى سرعة مسح اى لفظ غير مهذب يطول احد من العاملين فى توكيل الامل بدون وجه حق
اكرر اعتذارى استاذ محمد رمضان بالنيابة عن كل اعضاء قسم ال byd على نايل موتورز تاخرنا فى الاعتذار ولن انسى مدى تعاطفك معى عندما رجعت لمركز الصيانة تانى يوم بعد تغيير الطنابير وتيل الفرامل
وشكرا شركة الامل الذى جعلت هناك وصال ومحبة بين الشركة واعضاء القسم عن طريق العاملين بها مثل الاستاذ عماد حبيب والانسة داليا ونكسب لنا شريك اخر وهو الفاضل المحترم الاستاذ محمد رمضان

[hzem]

هو أ/ محمد رمضان توكيل فرع ايه

[Emad Habib]

القطاميه

[ehabpopo]

الف مبروك ياستاذ ايهاب وفعلا الاستاذ محمد رمضان انسان غاية فى التهذيب والادب وانا تعاملت معاه فى صيانة ال 15 الف وكلنا مديون لهذا الرجل بالاعتذار بسبب المذمة التى صدرت من شخص واحد
وهنا ياتى دور الاستاذ باسم مشرف القسم فى سرعة مسح اى لفظ غير مهذب يطول احد من العاملين فى توكيل الامل بدون وجه حق
اكرر اعتذارى استاذ محمد رمضان بالنيابة عن كل اعضاء قسم ال byd على نايل موتورز تاخرنا فى الاعتذار ولن انسى مدى تعاطفك معى عندما رجعت لمركز الصيانة تانى يوم بعد تغيير الطنابير وتيل الفرامل
وشكرا شركة الامل الذى جعلت هناك وصال ومحبة بين الشركة واعضاء القسم عن طريق العاملين بها مثل الاستاذ عماد حبيب والانسة داليا ونكسب لنا شريك اخر وهو الفاضل المحترم الاستاذ محمد رمضان

الله يبارك فيك يا دكتور ... وهو ده المعنى اللى انا كنت عايز اوصلة لاصدقائنا فى القسم ... ان مهما كانت المشكلة مايكونش فية رد بالشتيمة والسب ... لان ده مش هايحل مشكلة ... وهو ده اللى وصلتة لاستاذ/ محمد رمضان امبارح ... احنا مش بتوع شتيمة وسب ... لذلك هو كان مرحب بحضور اللقاء ... ويا رب يوفى بوعدة

[elmanahry]

شكرا استاذ ايهاب ولكن الذى شتم كلنا لانعتبره عضو معنا لانه غريب عن اسلوب كل الاعضاء شخص يدخل ليعيب فى فى الاعضاء ويحول اى موضوع الى فوضى لكى يتوقف الاعضاء عن الكتابة لان الموضوع بالنسبة له تصفية حسابات بينه وبين شركة الامل وادارة الموقع توقفه لكى يرجع ويدخل باسم اخر وبتسجيل جديد حتى انه اخذ اسم حرفى من الاعضاء وهو 666
بعضا من الاعضاء تقول عليه انه كان يعمل فى مركز صيانة لشركة الامل وهنا يكون على الاستاذ محمد رمضان معرفته بالاسم اما من ناحية الاشراف على الموقع فلقد حصلت على وعد من الاستاذ كريم منير من سرعة التخلص من تسجيل هذا الشخص عندما يعيب باللفظ فى اى من المترددين على موقعنا الذى نعتز به وشكرا جزيلا

[bassem.naguib]

د. المناهري .. لكل شيء بداية ونهاية .. وليه منكونش كلنا أسرة واحدة وعلى رأي المثل ما محبة إلا بعد عداوة .. إذا ثبت عكس ذلك بعد محاولات يبقى نعمل اللي أحنا عاوزين نعمله .

[flightbyd]

ما هو لو انت يا عم مناهرى اتقرصت منهم ولا من محمد رمضان وبلاش شتيمة علية علشان ميزعلش كنت عملت اكتر من كدة انا اتأدبت وربونى وعلمونى الادب انى مروحش التوكيل اشتكى من حاجة فى السيارة واكيد انا مش حشتم حد انا او غيرى الا اذا كان خرج عن شعورة وضرب نفسة ميت جزمة انة اشترى العربية عارف لو العربية فيها العبر ولقى التوكيل محترم والعاملين فية كويسين كان بلع موضوع شراء العربية انما الاتنين العربية والتوكيل يبقة لازم الواحد يطلع عن شعورة يا اخى لانى مش لاقى فلوسى تحب تعرف يا اخ مناهرى انا اتقرصت من اية من محمد رمضان اللى زعلان اوى اقولك
1- ونة الفتيس قالولى هى كدة
2- ريجة الطنابير كانوا عاوزين يشيلونى الليلة وادفع انا النصف وهما النصف ودة من فم محمد رمضان اللى زعلان اوى كانهم بيفاصلوا فى بطيخ ولا خيار
3- روحت اسال على كلبسات كسوة الباب علشان بتتكسر لما تتشال اقسم برب الكعبة الواد محمد الكهربائى ورب القران اشترط عليا 20 جنية علشان يجيبلى 8 كلبسات واعطيتهم لة
عاوزين تانى ولا كفاية
....تحياتى لكل من هو زعلان منى وقبل ما تزعل يا خويا وتنقمص صلح من نفسك ومن العاملين عندك وابقا قول لاولادك يا محمد يارمضان بابا مش بيراعى ضميرة فى شغلة فالناس بتشتمة وتدعى علية لان مفيش اى سبب يخلى اى حد يغلط فى حد من غير سبب الا اذا كان مؤذى فيدعى علية ............وبعدين ماهو لازم يا اخ ايهاب تمدح وتقول اشعار فى محمد رمضان طالما المصلحة خلصت وقضيت واتعشت كمان روح شوف سواقين التاكسى بيقولوا اية وبقوا بيتعاملوا مع ميكانيكية فى الشارع بسبب معاملةالتوكيل اسال يا اخ ايهاب قبل ان ترمى التهم على الناس ولا الاخ مناهرى بردو الموضوع بتاع عربيتة قضى وبقى مية مية وتمام فلازم يشكر طبعا ويمدح لو تلاحظوا كل واحد مصلحتة قضيت يشكر ويلعن الناس اللى مش بتشكر فى الشخص المسئول

[lonedoctor]

بس الحاجات اللى انت قولتها دى حاجات خايبة موش عيوب ولا حاجة ايه ريجة وكلبسات وكلام فاضى دى حاجات مستهلكة فى اى عربية عادى يعنى
ده الكورولا اللى معايا عملت ريجة فى اول 10000 كيلو وفراملها بايظة وموش عارفين يصلحوها لغاية دلوقت وفرامل البى واى دى برقبتها
اهدى كدة وصلى على النبى وحاول تكتب لنا مشاركات مفيدة الله يرضى عليك

[bassem.naguib]

الأخ flightbyd .. برجاء تمالك النفس .. وبعدين حاجة عاوز أقولهالك الكتابة بخط كبير بشكل مبالغ فيه يعطي انطباع بالزعيق والعصبية مما يخلق جو من المشاحنات أو بمعنى أخر يكهرب الجو وأحنا الحمد لله نظرنا مش ضعيف .. إلا إذا كنت عاوز توصل للغرض ده ومعتقدتش أن قصدك كدة ..

أنا مقدر اللي أنت فيه .. ولو مواقف وحشه اتعملت معاك في التوكيل فأخد الحق ميبقاش بالشكل ده أبداً .. فأخد الحق حرفة زي ما بيقولوا .

بالنسبة لكلامك على أ/ محمد رمضان .. إذا كان فيه مواقف شخصية بينك وبينه .. فياريت متتصفاش على صفحات المنتدى .. وله مننا كل الاحترام كما لك كل الاحترام .

ملحوظة أخيرة .. العم مناهري زي ما بتقول.. ده راجل واخد بكالوريوس طب ودكتوراه .. وبعدين ده راجل مش صغير سواء سناً أو مقاماً ..حتى لو صغير في السن فأدبه وعلمه ومعرفته (بعيداً عن الطب خااااالص) اللي بيفيدنا بيها تستوجب وتستلزم مننا كلنا أننا نجله ونحترمه ونقوله على الأقل يا د. مناهري .. ككبير لأسرة البي واي دي .

رجاء مراجعة النفس واختيار الألفاظ على صفحات المنتدى .

[darsh_]

ما هو لو انت يا عم مناهرى اتقرصت منهم ولا من محمد رمضان وبلاش شتيمة علية علشان ميزعلش كنت عملت اكتر من كدة انا اتأدبت وربونى وعلمونى الادب انى مروحش التوكيل اشتكى من حاجة فى السيارة واكيد انا مش حشتم حد انا او غيرى الا اذا كان خرج عن شعورة وضرب نفسة ميت جزمة انة اشترى العربية عارف لو العربية فيها العبر ولقى التوكيل محترم والعاملين فية كويسين كان بلع موضوع شراء العربية انما الاتنين العربية والتوكيل يبقة لازم الواحد يطلع عن شعورة يا اخى لانى مش لاقى فلوسى تحب تعرف يا اخ مناهرى انا اتقرصت من اية من محمد رمضان اللى زعلان اوى اقولك
1- ونة الفتيس قالولى هى كدة
2- ريجة الطنابير كانوا عاوزين يشيلونى الليلة وادفع انا النصف وهما النصف ودة من فم محمد رمضان اللى زعلان اوى كانهم بيفاصلوا فى بطيخ ولا خيار
3- روحت اسال على كلبسات كسوة الباب علشان بتتكسر لما تتشال اقسم برب الكعبة الواد محمد الكهربائى ورب القران اشترط عليا 20 جنية علشان يجيبلى 8 كلبسات واعطيتهم لة
عاوزين تانى ولا كفاية
....تحياتى لكل من هو زعلان منى وقبل ما تزعل يا خويا وتنقمص صلح من نفسك ومن العاملين عندك وابقا قول لاولادك يا محمد يارمضان بابا مش بيراعى ضميرة فى شغلة فالناس بتشتمة وتدعى علية لان مفيش اى سبب يخلى اى حد يغلط فى حد من غير سبب الا اذا كان مؤذى فيدعى علية ............وبعدين ماهو لازم يا اخ ايهاب تمدح وتقول اشعار فى محمد رمضان طالما المصلحة خلصت وقضيت واتعشت كمان روح شوف سواقين التاكسى بيقولوا اية وبقوا بيتعاملوا مع ميكانيكية فى الشارع بسبب معاملةالتوكيل اسال يا اخ ايهاب قبل ان ترمى التهم على الناس ولا الاخ مناهرى بردو الموضوع بتاع عربيتة قضى وبقى مية مية وتمام فلازم يشكر طبعا ويمدح لو تلاحظوا كل واحد مصلحتة قضيت يشكر ويلعن الناس اللى مش بتشكر فى الشخص المسئول

مع كامل الاحترام للجميع د المناهري و استاذ باسم و العضو المحترم صاحب الموضوع

انا مع الاستاذ flightbyd في كل كلمة قالها...و خصوصا لما اتكلم عن التاكسي

انتم ماشفتوش الي احنا شفناه في توكيل القطامية ............ و لا قدر الله لو حصل معاكم اي حاجة او تقصير من اي حد في القطامية مش هتقولوا كدة

هناك بتاخد حقك يا بقلة الادب يا بلوي الدراع و التهديد و الفضايح و بعدين لما هو بيخاف و اترعب لما كان عندي مشكلة في عربيتي و هددت بعمل شكوى و سبحااااااااااان الله تاني يوم علطول فجأة الجهاز بتاع الانذار وصل من الصين ( صدفة طبعا ) و والدي راح هناك لقاه مستنيه و سال عليا شخصيا و قال لوالدي استاذ مصطفى بيهددنا عالنت و بتاع .............طب لما هو كدة ليه مش بيشوف شغله من الاول بما يرضي الله

ليه عشان اعمل حاجة من حقي لازم ال 10 جنيه و ال 20 جنيه تطلع و الا مش هتعمل حاجة و ده الحمد لله مش ضعف مننا ده عشان ترييح الدماغ

هناك في رشاوي و في اكراميات و عمولات و كل شيئ تتخيلوا انت في عزبة بتاعة ناس معينة مش في توكيل محترم

المحترم محمد رمضان الي بيشتكي مش شتيمة بيتعامل هناك قدام العملاء بشتيمة و الفاظ مش كويسة عادي اكنك بتكلم واحد في الشارع مش في شركة محترمة

واحد مثلا زي المهندس اسامة مبروك في اسكندرية و بشهادة الجميع بيجبرك على احترامه لانه متربي و محترم لاقصى الدرجات بشاهدة الجميع و ليس بشهادتي لاني مقابلتوش

يا ريت نبقا محايدين شوية ارجوكم

و شكرا

[flightbyd]

ياباسم يا حبيبى انا لما بقول عم المناهرى بقول مش قصدى كلمة عم اللى بتتقال فى الشارع انا قصدى عم يعنى راجل كبير زى عمى او فى مقام عمى اولا
ثانيا تكبير الخط علشان انا عينى بتزغلل من الخط الصغير مش اكتر مع انك بتستخدمة فى كتاباتك

[bassem.naguib]

مختلفناش يا درش .. بس عاوز أسألك سؤال .. هل سبق ليك أنك شتمت حد في التوكيل وتعرضت ليه بألفاظ مش مناسبة ؟!

ولا عرضت مشكلتك بشكل حيادي وقلت أن فيه تقصير من التوكيل (أنا بتكلم على صفحات المنتدى مش على طريقة التعامل في التوكيل) .. قول اللي عاوز تقوله من غير غلط أيه المشكلة يعني !!

حتى لو فيه إجماع على شخصية ما في التوكيل أو على طريقة التعامل في التوكيل أنها سيئة .. لما منكونش أحنا المرآة بتاعة التوكيل ومساعدته في تقديم خدمة أفضل لأعضائه أو لعملائه بصفة عامة .

واللي أنا شايفة بصراحة هو استجابة للمشكلات والعمل على حلها في أسرع وقت سواء من خلال أ/ عماد حبيب أو من خلال أ/ داليا وإلا مكنش اتعمل موضوع مثبت في المنتدى ومخصوص لخدمه العملاء وأعضاء المنتدى .. وعلى العموم أحنا بشر ومعرضين للخطأ مش أنبياء بنمشي على الأرض .

فلازم نراعي أننا في منتدى محترم في الأول والأخر وننتقي الألفاظ اللي بتتكتب .

[bassem.naguib]

ياباسم يا حبيبى انا لما بقول عم المناهرى بقول مش قصدى كلمة عم اللى بتتقال فى الشارع انا قصدى عم يعنى راجل كبير زى عمى او فى مقام عمى اولا
ثانيا تكبير الخط علشان انا عينى بتزغلل من الخط الصغير مش اكتر مع انك بتستخدمة فى كتاباتك

تمام يا باشا .. وصل مفهومك .. وبعدين أنا خطي لا هو صغير ولا كبير .. تحياتي .. جاي المقابلة ولا مش جاي .. ههههههههههه

المقابلة دي على حسك حتحقق أعلى نسبة حضور في المنتدى .. بس على الله متجيش ... ومتقلقش لو حصل ضرب ولا حاجة حفديك بنفسي وناكل العلقة أنا وأنت سوا ... ههههه