بلية الدبرياج

[ahmadems]

دلوقت أنا معايا ال f0 وللأسف طلع منها صوت عالى والميكانيكى قالى دى بلية دبرياج ولازم تتغير
هل دى بتبقا عليهم فالضمان ولا كدا كدا هدفع تمنها وهما بيغيروها فى الضمان
وفى كل الأحوال الناس نصحونى أنى مسفرش بيها للتوكيل لأنى فى العريش وقالولى إنها مش هتوصل لحد هناك
فعايز أفهم, لأن لو كدا كدا دافع يغور الضمان لأنى مبستفدش منهم حاجة غير تغيير الزيت بس ومفيش أى حاجة بطلبها بتتعمل, أنا دلوقت 30 ألف كيلو

[ahmadems]

شكراً على التعاون

[bassem.naguib]

شكراً على التعاون ولا موبيل ولا شل ... هههههههههه

متقفلش كدة يا باشا .. أكيد لو حد عارف حاجة أو يقدر يفيدك كان قال .. وللأسف اللي معاهم f0 شبه معدومين هنا في المنتدى يمكن يكون واحد أو اتنين ومبقوش يعملوا مشاركات عن العربية بالرغم أنها عربية كويسة في فئتها وسعرها علشان كدة مفيش فيها مشاكل أو تجارب ممكن تتقال .

بالنسبة لسؤال حضرتك .. أنت بتقول أن الناس نصحوك بعدم السفر بها من العريش لأنها ممكن متوصلكش .. وكمان بتقول أنك مستغني عن الضمان لو دفعوك تمن البلية لأنك مبتستفدش منهم بحاجة .

فخلاص كدة حضرتك سألت الأسئلة وجاوبت عليها بنفسك .. وأنا أؤيد نصيحة الناس بعدم السفر بها لأنها لو عطلت بيك في السكة لا قدر الله حتبقى مشكلة كبيرة في نقل العربية وخلافه .. فعلى أيه الطيب أحسن وأعملها عندك .. وظبط مع ميكانيكي يكون كويس يشوفلك الصيانات بتاعتها .. بس أهم حاجة تكون عارف جدول الصيانة بتاعتها علشان ميفوتكش تغيير حاجة في ميعادها .

تحياتي ليك يا باشا ولأهل العريش كلهم .

[ahmadems]

هههههههههههه, شكراً يا أستاذ باسم على رد حضرتك
وتحياتى لحضرتك

[bassem.naguib]

نورتنا يا أحمد باشا .. وأتمنى من حضرتك لو عملتلنا تقارير وأنطباعات عن السيارة .. وخاصة أنها نزلت بأوبشن جديد وكماليات جديدة وناس كتيرة بتسأل عنها ومحدش بيعرف يجاوبهم .

شرفتنا مرة تانية وفي انتظار مشاركاتك معانا دائماً إن شاء الله .

[x_gomgom]

اولا طقم الدبرياج من المستهلكات اللي مش بتدخل الضمان و بالتالي مش هيرضوا يدخلوها في الضمان...
انا برضه غيرت الطقم بس على 33,000 الف كيلو و للاسف مش ممكن توفق حاجه تركب عليها... هو تقريباً عامل 750 جنيها و انا ركبته بره ... و بلاش تساقر بيها بالحاله دي لو البليه فرطت و انت ماشي هتبقي مشكله حقيقية....
و أسف للتأخر في الرد نظراً لظروف العمل الغير أدميه

[bassem.naguib]

نورت المنتدى يا رامي باشا .. وعوداً حميداً .. أعتقد أنك الوحيد اللي حترد على الاستفسارات الخاصة بالـ f0 لأنك الوحيد اللي أعرفه معاه العربية وداس فيها كتير .

كان ليا سؤال .. أنت اشتريت طقم الدبرياج منين ؟!! ومعقولة مفيش حاجة متوافقة معاها .. أكيد في حاجة بس الموضوع عاوز بحث وتمحيص سواء في المنتديات العربية أو المنتديات الأجنبية .

ولو فيها تتقيل عليك .. بتعمل صياناتك فين .. وهل هي سهلة ولا معقدة .. ويا حبذا لو عملت الكلام ده في موضوع منفصل يكون مرجع للأعضاء يعرفوا منه المميزات والعيوب بعد ما مشيت بالعربية فترة من الزمن .. وتحياتي ليك .

[x_gomgom]

الصراحة اتا كل صياناتي في التوكيل و لما بحب أعما حاجه بره في مركز في فيصل اسمه Top Gear الصراحه شغلهم نضيف جداً و مش غالي... قطع الغيار للاسف مش موجود ليها بديل الا في الحاجات الخفيفه (البوجيهات - فلتر الهواء- فلتر الزيت- السير) فقط دا اللي عرفت اجيبه من بره....

[Amr Axel]

شوف توكيل nsk تقريبا كنت شايفه في التوفيقية قدام السنترال برة ديه شركة يابانية متخصصة في جميع انواع البلي بما فيهم بلي الدبرياج
خد معاك القديمة و اطلع عليهم يشوفوها او لو حتي تعرف الموتور و الفتيس في الأصل نازليين في عربية ايه ممكن تلاقي طقم دبرياج يتولف عليها و تبقي اسهل لكن اسمع ان الموتور اساسا صيني قلبا و قالبا
و ممكن تشوف لو ليها قطع من تويوتا ايكو
لو قفلت اوي روح غير الطقم في التوكيل و ريح نفسك و خلاص