؟تغيير البطارية وبعض الدروس المستفادة

[melsheshtawy]

أخوانى الأعزاء
أحب النهارده أشارك معاكم تجربة جديدة فى سيارتى BYD F3 للإستفادة .. العربية معايا بقالها سنتين إلا شهر واحد بالظبط وكالعادة صاحى أروح شغلى وجيت أدور العربية لقيتها مش بتدور ولا حتى بتحاول ولا بتحط أى منطق .. على طول شكيت فى البطارية لأن بقالها سنتين وهى كما تعلمون مش جافة وانا بقالى كتير متابعتش المية بتاعتها .. المهم إنها كانت منتهية لدرجة إنها مش قادرة تلقط إشارة الريموت ودى كانت المشكلة ... لأن لما العربية اتفتحت بالمفتاح إشتغل جهاز مانع السرقة وفصل دائرة تدوير السيارة وحتى محاولات التدوير بالزق فشلت تماما .. من الواضح جدا إن جهاز الأنذار ليه بطارية خاصة مشحونة وده ليه دليل هقوله بعد شوية .. المهم بعد محاولات مكثفة إنتهت بعمل وصلة خارجية وعن طريقها فقت الباب بالريموت دارت العربية ووصلت الكهربائى لورشته وبطلت العربية وجيت أدور تانى لقيتها كما كانت .. مش هطول عليكو فى تفاصيل المهم دورتها بوصلة وذهبت مباشرة لتغيير البطارية وطبعا لأنى مضطر اغيرها قبل حتى ما أبطل العربية معرفتش الف كويس وجبت من اول محل قابلته الحقيقة كان عنده نوعين كلورايد بلس جافة وكان تمنها 400 بعد القديمة ونوع اسمه inci aku تركى اول مرة اشوفها وتمنها 460 بعد القديمة ودى إللى انا ركبتها ... الملاحظة الظريفة إللى عجبتنى هى إن الراجل أول ما فك الكابل بتاع البطارية الإنذار اشتغل وده كويس جدا لأنى سمعت ان الحرامية بيعتمدوا على فصل البطارية قبل السرقة لإيقاف جهاز الإنذار
نصيحة للفائدة: نظرا لأن كلنا معرضين لهذا الموقف إذا مكنش من البطارية فممكن من الريموت كلنا نحاول نعرف الطريقة إللى يمكن بيها إيقاف مانع السرقة بدون الريموت (ليها طريقة أظن قريتها فى الكتالوج) ومفضلش إننا ننشرها عشان تفضل العربية محتفظة بقدرتها على منع السرقة بس أنصح كل واحد يعرف الطريقة دى لنفسه عشان لو اتزنق فى موقف زى ده
وأخيرا أحب أؤكد إن دى بفضل الله أول حاجة أغيرها فى العربية حتى قبل تيل الفرامل

[أحمد جودة]

كلام جميل ......... وشكرا على نقل التجربة

[akmm]

شكرا لنقل التجربه

[Silent~Dream]

مشكور على التقرير

[ehabpopo]

شكرا على نقل التجربة ... وشكرا على المعلومة

[mastr_n]

شكرا على المعلومات المهمة

[M I D O]

موضوع ممتاز واوبشن جميل جدا من b y d

[lonedoctor]

لا انصح بشراء البطارية التركى حيث انها لم تكمل سنة واحدة معايا ورميتها للاسف

[melsheshtawy]

[QUOTE=lonedoctor;3875187522]لا انصح بشراء البطارية التركى حيث انها لم تكمل سنة واحدة معايا ورميتها للاسف[/QUOT
طب ممكن تقولنا كان نوعها إيه ... لعل وعسى التركى يكون فى انواع كويسة وأنواع مش كويسة .. أنا طبعا إشتريت وخلاص بس عشان باقى الأعضاء

[Amr Axel]

شكرا لنقل التجربة عن نفسي لو كنت مكانك كنت غيرتها ببطارية مغلقة اللي هي الجافة عالطول عشان اريح دماغي من حوار الصيانة الدورية كل شهر او شهر و نص و طبعا حفاظا ع الحوض و الكبوت من مية البطارية
و ان كنت أفضل الفارتا او هانكوك او اي سي ديلكو و كنت اتمني لو شركة بي واي دي تنزلنا بطاريات بي واي دي في العربية لكن باقي الانواع بصراحة مبعترفش بيها بتفكرني بالجنوط اللي نازلة جديدة :)