مشكلة بعد عمل صيانة الالف للعربية f0

[Ahmed_BYD_F0]

بسم الله الرحمن الرحيم

اخوانى الاعزاء اعضاء منتدى BYD الكرام
احب اعرفكوا انى عملت صيانة الالف فى التوكيل بالقطامية وحقولكوا بالتفصيل خطوة خطوة اللى انا عملتو (بس متضيقوش منى عشان الكلام كتير)
وتقولولى احل مشكلتى بعد الصيانة دى ازاى واللى بسال عنها فى اخر الموضوع

اولا: وعداد عربيتى كان عامل 970 كيلو وكان يوم خميس فتحت كتيب ضمان شركة الامل لقيت اقرب مكان لى فى القطامية
فاتصلت بيهم وقولتلهم انا عايز احجز صيانة الالف
فسالتنى اللى ردت على التليفون انت اسم حضرت ايه ورقم المحمول ورقم السيارة فسالتها انهى رقم بالضبط قليتلى الرقم اللى ادهولك بتوع المرور
فقليتلى حضرتك تشرفنا يوم السبت الساعة العاشرة صباحا انا حجزتلك الميعاد ده وتيجى تقولهم انا حاجز الساعة العاشرة صباحا
فقولتلها هو انا مش ممكن اجى بكرة قليتلى احنا مش شغلين بكرة فقول بس انا كده عقبال ماجيلكوا حعدى الالف كيلو قليتلى مش مشكلة

ثانيا:فعلا لما روحت التوكيل كان العداد معدى الالف وكان 1030 كيلو
اتحركت بالعربية التاسعة والنصف صباحا من دار السلام المنطقة اللى ساكن فيها وخدت الدائرى على طول لحد ملقيت منزل القطامية وخدت يمين على حسب ما هما رسمين فى الكتيب
فضلت ادور على نفق الشهيد بس ملقيتوش ووقفت العربية اسال عنه فقلولى مفيش حاجة اسمها نفق الشهيد هنا
فسالتوا طب فيه اى نفق بعديه محمد زكى على حسب ما رسمينه فى الكتيب
فقلى اه ارجع تانى وعلى شمالك حتلاقى نفق صغير مكتب عليه نفق السلام وبعد متعديه حتلاقى محمد زكى
ففعلا رجعت ودورت على النفق لقيته على الشمال فى صنية كبيرة ومكتوب عليه نفق السلام فدخلته وبعد معديته لقيت منطقة فيها كذا توكيل على اليمين توكيل لتيوتا وقدامى توكيل كيا وعلى الشمال بنزينة وبعدها توكيل BYD قلت الحمد لله وصلت اخيرا

ثالثا: لما وصلت بوابة التوكيل قابلنى امن البوابة بمنتهى الترحاب وسالنى اسم حضرت ايه قولته وسالنى رقم المحمول وقولتله الرقم وقولت انا حاجز الساعة العاشرة صباحا
فقلى اتفضل انا حبلغهم والمهندس اللى يجيلك قولى انا حاجز الساعة عشرة (مش عارف الحجز ده مهم انى اقولهم جدا ليه)
فروحت راكن العربية فى اى مكان فاضى لان لقيت طابورين عربيات كتيرة واقفة حوالى اكثر من 50 عربية ولقيت واحد بيبص على العربيات فسالت قلولى المهندس اللى بيستلم السيارات
لقيته معاه اوراق وخلص الاوراق اللى معاه وماشى فتوجهت اليه وقولتله انا حاجز الساعة عشرة قلى حاضر لما يجيلى امر الشغل بتاع حضرتك
انتظرت كثيرا لحد ملقيت المهندس بيقولى انت الاستاذ احمد فقولتله مضبوط فقلى ادينى رخصة العربية بتاعة حضرتك وفضل يملى نموذج امر الشغل ببيانات الرخصة وسالنى انت جى ليه
قولتله اعمل صيانة الالف فسالنى ايه ملحوظات تانية على العربية فقولتله اشارة المارشدير شمال البيضة مش شغالة فقلى ده العادى العربية F0 و F3 بيجوا من الصين كده
وقولتله فيه صفارة بسيطة لما بدوس فرامل فكتب الملحوظة دى
فقلى انتظر قليلا لحد ما اجى لعربيتك
لقيته بالنسبة للعربيات اللى مش اول مرة تيجى زى حلاتى بياخذ رقم العداد ويجرب المساحات والتكييف وبيفتح شنطة العربية ويبص على الاستبن وبيفتح الكبوت وبيبص عليه
ولما جه لعربيتى F0 ركب العربية وخد رقم العداد وكتبه فى امر الشغل وقالى هات الريموت وحطه فى العربية وقالى حضرتك انتظر فى الاستراحة وفى حد حياخذ العربية يدخلها الورشة

رابعا: طلعت الاستراحة ولقيت كراسى وناس منتظرة وهناك شباك الوميتال كبير بيطل على الورشة
قعدت اكتر من ساعة ومشفتش العربية بتاعتى دخلت الورشة
نزلت للمهندس اقوله ان العربية مدخلتش الورشة اصلا فقلى متقلقش حتاخذ دورها وتخش الورشة فعلا انتظرت كتير لحد ما العربية شوفتها دخلت الورشة
قعدت كتير لحد متصلوا بيه على الموبيل وقالى المهندس انزل خد عربيتك يعنى انا انتظرت من الساعة الحادية عشر الى الساعة الواحدة ظهرا
نزلت عشان استلم العربية لقيت المهندس بيسوقها وخارج من الورشة بسرعة جدا ويدوس فرامل وبيعمل بيها خمسات وبتصفر العربية
فقلى اركب يا استاذ احمد فركبت معاه وسقها وداس فرامل ومسمعتش صوت صفارة وسقلته امال لما جيت بيها كانت بتصفر ليه فقلى عشان الاسفلت ناعم
فقلى اتفضل انزل وحاسب وحتلاقى المفاتيح واستلم العربية
فروحت حسبت وكان مبلغ المحاسبة 181.5 جنيه وادانى فاتورة وروحت عشان اخد العربية واحد قلى ورينى الفاتورة ودانى رموت العربية وقلى عند البوابة اديلة صورة الايصال
وفعلا سوقت العربية لحد البوابة وخد منى صورة الايصال
وتم صيانة الالف بسلام

والسؤال المهم دلوقتى اللى انا اصلا عامل الموضوع ده علشانه لما سوقت العربية بعد صيانة الالف لقيت العربية سريعة وخفيفة جدا
ودراع البنزين والفرامل خفاف قوى كانى بدوس على ورقة والدبرياج خف سنة يعنى لما بدوس دبرياج وادوس بنزين وارفع رجلى من على الدبرياج ولو سنة بسيطة الاقى العربية جريت
الموضوع ده مجننى جدا ورعبنى ولسه متعودش عليه
تفتكروا يا جماعة ده سببه ايه وهما عملوا ايه فى العربية عشان تبقى كده
وهل ده سببه السوائل بالعربية قلت
ويا ريت طلب اخير قولولى ازاى اشيك على زيت الفرامل والدبرياج واعرف ازاى انه نقص عشان بتاع التوكيل قلى لو الحاجات دى نقصت اتصل بيه فورا ومتزودهاش احنا حنزودهالك

واخيرا ارجو انى ماكنتش متقال عليكو وكنت رغاى كبير

[lidosasa]

اللى أعرفه فى أى عربية بصفة عامة إن لازم فى صيانة الألف فى التوكيل يتم تغيير زيت الموتور وفى بعض التوكيلات بتغيير زيت الفتيس كمان . بس واضح من الحساب إنهم مغيروش زيت الموتور

[bassem.naguib]

ألف مبروك على الصيانة .. وربنا يباركلك فيها ويكفيك شرها .. وتكون مبسوط منها دائماً .

معلش أنا مش فاهم نقطة العربية بقت سريعة وبتجري ؟! هل ده شيء كويس يعني من وجهة نظرك ولا شيء وحش .. ولا ممكن يكون علوا الدبرياج شوية وأنت مش واخد على العلو بتاع الدبرياج ؟!

على العموم بعد الصيانة الأولى لأي سيارة الأداء بيختلف تماماً وبيتحسن طبعاً .. والأكيد أنهم غيروا زيت الموتور بزيت موبيل xhp وده تمنه بيبقى في حدود 135 أو 150 جنية تقريباً .. والزيت ده بيقعد 5000 كيلو لحد الصيانة القادمة .

بالنسبة لاستفسارك عن قياس زيت الدبرياج والفرامل .. فعلى ما أعتقد أنه بيكون في خزنة صغيرة على السيرفو بتاع الفرامل (داخل الكبوت) .. بتشوف مستوى الزيت على الخزنة دي على المستوى الماكس ولا يقل عن المستوى الميني .

[Ahmed_BYD_F0]

اللى أعرفه فى أى عربية بصفة عامة إن لازم فى صيانة الألف فى التوكيل يتم تغيير زيت الموتور وفى بعض التوكيلات بتغيير زيت الفتيس كمان . بس واضح من الحساب إنهم مغيروش زيت الموتور

شكرا يا اخى باهتمامك بالرد على موضوعى
هم فعلا غيروا زيت الموتور بزيت موبيل1 تقعد 5000 كيلو (بحوالى 135 جنيه) عشان الصيانة القادمة وغيروا كمان فلتر الزيت وده بمبلغ 35 جنيه وزودوا ضريبة المبيعات بقى اجمالى الفاتورة 181.5 جنيه

[Ahmed_BYD_F0]

ألف مبروك على الصيانة .. وربنا يباركلك فيها ويكفيك شرها .. وتكون مبسوط منها دائماً .

معلش أنا مش فاهم نقطة العربية بقت سريعة وبتجري ؟! هل ده شيء كويس يعني من وجهة نظرك ولا شيء وحش .. ولا ممكن يكون علوا الدبرياج شوية وأنت مش واخد على العلو بتاع الدبرياج ؟!

على العموم بعد الصيانة الأولى لأي سيارة الأداء بيختلف تماماً وبيتحسن طبعاً .. والأكيد أنهم غيروا زيت الموتور بزيت موبيل xhp وده تمنه بيبقى في حدود 135 أو 150 جنية تقريباً .. والزيت ده بيقعد 5000 كيلو لحد الصيانة القادمة .

بالنسبة لاستفسارك عن قياس زيت الدبرياج والفرامل .. فعلى ما أعتقد أنه بيكون في خزنة صغيرة على السيرفو بتاع الفرامل (داخل الكبوت) .. بتشوف مستوى الزيت على الخزنة دي على المستوى الماكس ولا يقل عن المستوى الميني .

الله يبارك فيك يا اخى
ومشكور جدا على اهتمامك بالرد على موضوعى
اما بالنسبة ان العربية بقت سريعة طبعا ده شئ كويس جدا لان سحبها بقى سريع
بس المشكلة اللى عندى انى لسة متعودتش على كده لانك زى ما انت عارف انا كان عندى لادا 2106 وكان دراع البنزين والفرامل كانوا تقال مش خفاف كده زى الـ F0 واهوه انا حصبر شوية لحد ما اتعود على كده
اما بخصوص الدبرياج بالعكس انا اول ما ارفع رجلى عنه ولو سنة الاقى العربية اتحركت وسحبها اسرع من الاول بس زى ما قولتلك مسألة وقت وحتعدى
وهم فعلا غيروا الزيت زى ما بتقول كده بالظبط (انت استاذ كبير)
ومتشكر جدا على انك دلتنى على مكان زيت الفرامل (بس يعنى ايه على السيرفو) معلش عشان انا لسه معرفش المصطلحات كلها
يعنى انا كده اطمن واقول ان العربية كده مفهاش مشكلة
وسؤالى الاخير لك هى قربة المياه سهلة انى اكتشفها لانى فتحت الكبوت قبل كده وسالت واحد قالى ان ديه مياه المساحات وقربة المياه فين بالظبط
وهل لو لقيت مستوى السوائل العربية قليلة لا اقوم بتزويدها بنفسى واتصل بالمهندس فى التوكيل زى ما هو امرنى بالظبط ؟؟؟؟

[bassem.naguib]

الله يبارك فيك يا اخى
ومشكور جدا على اهتمامك بالرد على موضوعى
اما بالنسبة ان العربية بقت سريعة طبعا ده شئ كويس جدا لان سحبها بقى سريع
بس المشكلة اللى عندى انى لسة متعودتش على كده لانك زى ما انت عارف انا كان عندى لادا 2106 وكان دراع البنزين والفرامل كانوا تقال مش خفاف كده زى الـ F0 واهوه انا حصبر شوية لحد ما اتعود على كده
اما بخصوص الدبرياج بالعكس انا اول ما ارفع رجلى عنه ولو سنة الاقى العربية اتحركت وسحبها اسرع من الاول بس زى ما قولتلك مسألة وقت وحتعدى
وهم فعلا غيروا الزيت زى ما بتقول كده بالظبط (انت استاذ كبير)
ومتشكر جدا على انك دلتنى على مكان زيت الفرامل (بس يعنى ايه على السيرفو) معلش عشان انا لسه معرفش المصطلحات كلها
يعنى انا كده اطمن واقول ان العربية كده مفهاش مشكلة
وسؤالى الاخير لك هى قربة المياه سهلة انى اكتشفها لانى فتحت الكبوت قبل كده وسالت واحد قالى ان ديه مياه المساحات وقربة المياه فين بالظبط
وهل لو لقيت مستوى السوائل العربية قليلة لا اقوم بتزويدها بنفسى واتصل بالمهندس فى التوكيل زى ما هو امرنى بالظبط ؟؟؟؟

المسألة زي ما بتقول مسألة وقت وحتاخد بعد كدة على سنس العربية .. ورجلك حتتعود على دوسة البنزين والفرامل والدبرياج .

بالنسبة لمعنى السيرفو .. فهو ببساطة شديدة حاجة كدة بتساعد على ضغط زيت الفرامل (زيت الباكم) أثناء دوستك على بدال الفرامل .. فمتلاقيش دواسة البنزين محجرة تحت رجلك زي الموديلات القديمة من 127 وما قبلها .

أنا بصراحة مش حافظ أماكن المية ومية المساحات وزيت الباكم .. بس ممكن جداً تبص على الكتالوج وهو حيبين ليك مكان كل حاجة فين .. وطبعاً وبيبقى في كل خزان علامات للـ MAx وللـ MINI المفروض السوائل متزدش ولا تقل عن العلامتين دول .

ولملئ السوائل فبالنسبة للمساحات فمفيش مشكلة منها ممكن تملاها بنفسك .. إما بالنسبة لمياه الردياتير فللحفاظ على العربية والردياتير يجب أن تراعي نوعية المياه الموجودة إذا كانت خضرا أو حمرا .. وهي من المفترض أن لا تنقص إلا بمقدار قليل جداً وإلا لو كان فيه تسريب في دورة المياه .

زيت الباكم يجب أن تراعي درجة الزيت الموجودة إذا كانت dot3 أو dot4 وفي الغالب بتكون dot3 .. وبرضه نفس الحكاية المفروض الزيت مينقصش إلا لو فيه مشكلة تسريب أو التيل ابتدى يتاكل ويحتاج إلى تغيير (لسه بدري شوية على القصة دي) .. ويراعى تعليمات الكتالوج والتوكيل حتى لا تفقد الضمان .

نصيحة .. أقعد كدة في ساعة صفا وأزأز مع اليوزر مانيوال .. حتعرف حاجات كتير وخاصة أماكن الزيوت والمياه .. ولو في أي سؤال أحنا في الخدمة

[Ahmed_BYD_F0]

المسألة زي ما بتقول مسألة وقت وحتاخد بعد كدة على سنس العربية .. ورجلك حتتعود على دوسة البنزين والفرامل والدبرياج .

بالنسبة لمعنى السيرفو .. فهو ببساطة شديدة حاجة كدة بتساعد على ضغط زيت الفرامل (زيت الباكم) أثناء دوستك على بدال الفرامل .. فمتلاقيش دواسة البنزين محجرة تحت رجلك زي الموديلات القديمة من 127 وما قبلها .

أنا بصراحة مش حافظ أماكن المية ومية المساحات وزيت الباكم .. بس ممكن جداً تبص على الكتالوج وهو حيبين ليك مكان كل حاجة فين .. وطبعاً وبيبقى في كل خزان علامات للـ max وللـ mini المفروض السوائل متزدش ولا تقل عن العلامتين دول .

ولملئ السوائل فبالنسبة للمساحات فمفيش مشكلة منها ممكن تملاها بنفسك .. إما بالنسبة لمياه الردياتير فللحفاظ على العربية والردياتير يجب أن تراعي نوعية المياه الموجودة إذا كانت خضرا أو حمرا .. وهي من المفترض أن لا تنقص إلا بمقدار قليل جداً وإلا لو كان فيه تسريب في دورة المياه .

زيت الباكم يجب أن تراعي درجة الزيت الموجودة إذا كانت dot3 أو dot4 وفي الغالب بتكون dot3 .. وبرضه نفس الحكاية المفروض الزيت مينقصش إلا لو فيه مشكلة تسريب أو التيل ابتدى يتاكل ويحتاج إلى تغيير (لسه بدري شوية على القصة دي) .. ويراعى تعليمات الكتالوج والتوكيل حتى لا تفقد الضمان .

نصيحة .. أقعد كدة في ساعة صفا وأزأز مع اليوزر مانيوال .. حتعرف حاجات كتير وخاصة أماكن الزيوت والمياه .. ولو في أي سؤال أحنا في الخدمة

متشكر جدا جدا جدا جدا على المعلومات القيمة دى ويا ريت ما كنت تقلت عليك

[bassem.naguib]

مفيش تقل ولا حاجة يا باشا .. أهلاً بيك في أي وقت .. وأحنا هنا لمساعدة بعض .. فالأخوة تجمعنا قبل الزمالة أو الصداقة في أقسام الصيني بصفة خاصة والمنتدى بصفة عامة .

[ak_626]

- حضرتك متقلقلش خالص من موضوع الدبرياج و البنزين, ده حاجه طبيعيه لأن العربيه فعلا سريعة الاستجابه و ناعمه.
- احيانا بحرك العربيه من وضع الثبات و على الغيار الاول من غير ما ادوس بنزين, يعني بفصل دبرياج ببطئ و بلاقي العربيه بتتطلع على الاول من غير ما ادوس بنزين خالص.
- صفارة التيل احتمال كبير ترجع تاني لان التيل الاصلي ناشف جدا ومش هتتحل غير لما تغيره.
- اتأكد من مستوى مياه الريداتير بنفسك لأنهم مش بيشيكوا عليه في التوكيل و احتمال تلاقيه ناقص لان القربه جنب الريداتير. لو ده حصل معاك روح اي بنزينة موبيل و اشتري لتر مياه زرقاء و زود من القربه فقط.
- لو حابب تزود كفاءة التكيف روح فيم العربيه فيميه لايت, مش هيبان خالص في المرور بس هيفرق معاك جامد و هيحجب شمس كتير و يزود كفاءة التكييف.
- خالي بالك من النزول في حفره على سرعه لان ده هيطبق الجنت بسبب ان العفشه رياضيه و بالتالي كل الصدمه هتسمع في الجنط الحديد.
- والف الف مبروك و ربنا يحميها و يكفيك شرها.

[Ahmed_BYD_F0]

- حضرتك متقلقلش خالص من موضوع الدبرياج و البنزين, ده حاجه طبيعيه لأن العربيه فعلا سريعة الاستجابه و ناعمه.
- احيانا بحرك العربيه من وضع الثبات و على الغيار الاول من غير ما ادوس بنزين, يعني بفصل دبرياج ببطئ و بلاقي العربيه بتتطلع على الاول من غير ما ادوس بنزين خالص.
- صفارة التيل احتمال كبير ترجع تاني لان التيل الاصلي ناشف جدا ومش هتتحل غير لما تغيره.
- اتأكد من مستوى مياه الريداتير بنفسك لأنهم مش بيشيكوا عليه في التوكيل و احتمال تلاقيه ناقص لان القربه جنب الريداتير. لو ده حصل معاك روح اي بنزينة موبيل و اشتري لتر مياه زرقاء و زود من القربه فقط.
- لو حابب تزود كفاءة التكيف روح فيم العربيه فيميه لايت, مش هيبان خالص في المرور بس هيفرق معاك جامد و هيحجب شمس كتير و يزود كفاءة التكييف.
- خالي بالك من النزول في حفره على سرعه لان ده هيطبق الجنت بسبب ان العفشه رياضيه و بالتالي كل الصدمه هتسمع في الجنط الحديد.
- والف الف مبروك و ربنا يحميها و يكفيك شرها.

يا سلام على كلامك الجميل ده انت ريحت بالى
بالنسبة لمياه الردياتير انا بصيت عليها لقيتها ما بين الـ Min والـ Max ولقتها خضراء مش زرقاء والا انت متاكد من اللى بتقوله ويا ريت تقولى امتى ازودها وهل انا اللى ازودها ولا التوكيل لانه قلى ارجوك ما تزودش حاجة اخبر التوكيل واروحلهم وهما حيزودوا كل حاجة وهل ده لانها لسه جديدة معملتس الا 1100 كيلو بس
واخيرا الله يبارك فيك يا اخى العزيز

[ak_626]

كده حضرتك الميه ناقصه شويه
سيبك من التوكيل لانهم مقرفين جدا و محتاجين واحد فاضي و باله طويييييييييل اوي و الموضوع مش مستاهل.
روح حضرتك موبيل و اسأل على الميه الزرقاء (اللي هيه الخضرا) لان عندهم يا ازرق يا وردي, اشتري لتر و زودها بنفسك و شيل الباقي في البيت.
و انا تحت امرك في اي استفسار.

[ابوجنى2112]

اولا ,,
مبروك الصيانة ياعم احمد..وعقبال صيانة..100000كم

المشكلة اللى عندى انى لسة متعودتش على كده لانك زى ما انت عارف انا كان عندى لادا 2106 وكان دراع البنزين والفرامل كانوا تقال مش خفاف كده زى الـ F0

ثانيا,,
انسى بقى اللادا..واتعامل مع جديدك ..ربنا يبارك لك فيها.
وبلاش موضوع الدرعات دة ..ومشيها دواسات..
يعنى دواسة بنزين،،وفرامل..ألخ..ألخ.....
أحسن باسم يزعل منك ويحطك فى اليلاك ليست..هههههههههه


هم فعلا غيروا زيت بزيت موبيل1 موتور تقعد 5000 كيلو (بحوالى 135 جنيه)


ثالثا..
موبيل xhp هو اللى 5000كم..
موبيل 1.......... 10000كم..
ونصيحة اخوية يلاش موبيل من أساسة..وبلاش اى زيت 5000كم لأنة معدنى
وانت عربيتك جديدة..خسارة تتعبها وتوسع الخلوصات بتاعتها..
وافتكر انى قولت لك بلالالالالالالالالالالاش معدنى..
يعنى تحط زيت تخليقى بالكامل..اللى هو مشهور ب10000كم.
عندك وولف مثلا..او زادو..ودول بيقعدوا لغاية12000كم..
وممكن عشان تتأكد فية موضوع لعمنا كبير المقام دكتور /مناهرى بيتكلم فية عن الزيوت
هاتقولى التوكيل هايرفض..
هاقولك لأ..خد الزيت معاك فى الصيانة وغيرة على مسئولية العميل..ماتخافش من الكلمة
مش عشان هو عايز يغير زيت كل 5000كم ويستفيد..ابهدل انا عربيتى..واوسع خلوصاتها
نصيحة من اخ ..فضى زيتك بتاع موبيل وغير للزيت النخليقى من اولها..
وبعدين روح صيانة ال 5000كم واعملها بدون غيار زيت..
وبعدين فى صيانة ال10000كم تروح بالزيت بتاعك معاك وتغيرة زى ماقولتلك
يبقى بتعمل مرة ال5000 بدون زيت
وال10000كم بالزيت وانت اللى مشتريه بمعرفتك..
فية مواضيع كتير فى المنتدى عن الزيوت ..خش اختار الزيت المناسب لعربيتك ..واللى ترتاح له

اللهم قد بلغت ،،،اللهم فاشهد..[/COLOR]

[salama 78]

السلام عليكم ورحمة الله وبركاته
يشرفنى ان ابداء عضويتى معكم
و كان لى طلب و استفسار مهم
ان شاء الله نويت اشتري العربية f0 ان شاء الله فى منتصف شهر نوفمبر 2013 ان شاء
و كنت طالب النصيحة من الاخوة الافاضل التى لهم خبرة مع العربية f0

تانى طلب ان سالت عليها كتير فى المعارض معرفتش اوصل الى اى معرض عنده العربية خالص

[Ahmed_BYD_F0]

السلام عليكم ورحمة الله وبركاته
يشرفنى ان ابداء عضويتى معكم
و كان لى طلب و استفسار مهم
ان شاء الله نويت اشتري العربية f0 ان شاء الله فى منتصف شهر نوفمبر 2013 ان شاء
و كنت طالب النصيحة من الاخوة الافاضل التى لهم خبرة مع العربية f0

تانى طلب ان سالت عليها كتير فى المعارض معرفتش اوصل الى اى معرض عنده العربية خالص

وعليكم السلام ورحمة الله وبركاته
دحنا اللى يشرفنا يا سلامة باشا انك تكون معانا
واحب اطمنك ان اختيارك موفق باذن الله وربنا يديك خيرها ويكفيك شرها
العربية دى كويسة جدا ومريحة فى السواقة وناعمة وتكيفها جميل قوى يعنى فى الاجمال عربية كويسة
والعربية دى موجودة فى كذا معرض ولو مش موجودة اكيد حتلقيها فى التوكيل اللى فى محمد زكى بعد نزلة الدائرى المريوطية بعد نفق السلام
وكمان موجودة فى معرض شركة الامل اللى فى شارع النزهة
وكمان موجودة فى معرض فى شارع التحرير بباب اللوق بس مش متذكر اسمه دلوقتى
واى استفسار انا فى الخدمة

[ak_626]

عربية ممتازه جدا و لايوجد بها اي مشاكل او كوارث
تقفيل صيني - افضل سياره في فئة ال City Car في مصر من حيث السعر و الاعتمادية و الكماليات