فامية byd 2014 علي الرخصة

[A7med AlMaGiC]

ياجماعه انا عايز حد يكون بيعرف ف موضوع الفامية ده بيكون مكتوب ايه ف الرخصه وكده علشان اتأكد ان كلها فاميه انا معايا العربيه ومن يوم ما روحت ارخصها طبعا هي بتيجي فامية خلفي بس وبعد ما رخصت انا مكنش ف دماغي اصلا افيمها كلها بس بعد ما استلمت الرخصه لقيت مكتوب فيها بالظبط كده (زجاج خلفي ملون , زجاج جانبي ملون ) روحت مفيمها كلها يعتبر بقت دارك دلوقتي والحمد لله يعتبر لفيت بيها القاهره كلها ومحدش وقفني ولا حتي ف طريق سفر غير مره واحده وامين الشرطه متكلمش ع حاجه ف عايز اتأكد هي هي فعلا كده كلها فاميه ولا لأ علشان في ناس بتقولي لا هما قصدهم كده الجزء الخلفي بس اللي فامية ياريت حد عارف او مفيم العربيه بتاعته يقولي كده ايه النظام واسف ع الاطاله

[mohamed_selim]

المكتوب فى الرخصه هو الفابريكه بتاع العربيه
لو وقفت فى لجنه بتاعة فاميه هيعملك مخالفه لان الرخصه موضحه الخلفى و الجانبى يعنى امامى و بتاع السائق و اللى جنبه مش موجودين فى الرخصه ....

[A7med AlMaGiC]

المكتوب فى الرخصه هو الفابريكه بتاع العربيه
لو وقفت فى لجنه بتاعة فاميه هيعملك مخالفه لان الرخصه موضحه الخلفى و الجانبى يعنى امامى و بتاع السائق و اللى جنبه مش موجودين فى الرخصه ....

بس المكتوب ف الرخصه جانبي ملون !! محددش بقي هو جانبي خلفي ولا امامي ؟ ! لأن هو كاتب خلفي ملون وجانبي ملون كان ممكن يكتب جانبي خلفي ملون زي ما شوفتها ف كذا رخصه مع ناس اصحابي فابريكه كاتب زجاج خلفي جانبي ملون لكن عندي فارق بين زجاج خلفي ملون وزجاج جانبي ملون وبردو الله اعلم ياريت حد يفيدنا اكتر

[A7med AlMaGiC]

مع العلم يا جماعه انا شوفت عربيات كتير اوي byd فامية خلفي رخصتها مكتوب فيها زجاج فامية فابريكه خلفي فقط !! ده اللي خلاني بسأل دلوقي بعد ما فيمت لأني اعتبرت رخصتي فامية كامله زي ما سألت وقالولي كده هو محددش الجانب خلفي ولا امامي والكلام ده كان ف المرور ياريت حد يفيدني ..

[mohamed_selim]

مانا قلتلك ... انا عندى فى الكارينز مكتوب فاميه فابريقه لا محدد خلفى ولا امامى .... بس اللى بيحصل فى اللجنه ان الظباط عارفين العربيات بتنزل ايه و ممكن يشوف الازاز من جوه لو ملزوق عليه ميبقاش فابريكه و اسهل حاجه لو عايز يغلس يسحب الرخص و يدخلك فحص و يطابق اللى فى الملف مع العربيه .... فمن الاخر انت مش فى السليم .... انت نص سليم :)

[A7med AlMaGiC]

مانا قلتلك ... انا عندى فى الكارينز مكتوب فاميه فابريقه لا محدد خلفى ولا امامى .... بس اللى بيحصل فى اللجنه ان الظباط عارفين العربيات بتنزل ايه و ممكن يشوف الازاز من جوه لو ملزوق عليه ميبقاش فابريكه و اسهل حاجه لو عايز يغلس يسحب الرخص و يدخلك فحص و يطابق اللى فى الملف مع العربيه .... فمن الاخر انت مش فى السليم .... انت نص سليم :)

يعني هي بتبقي رخامه ظابط انه فاهم ان العربيه بتنزل نص فامية بس من الاخر طب تمام امال لو العربيه مثلا رخصتها كلها فامية بيبقي مكتوب فيها ايه دي معلومه شخصيه ليا كنت عايز اعرفها

[ابوجنى2112]

بيبقى مكتوب زجاج ملون فقط بدون تحديد
وكام لحنة وقفتنى وسالتنى الفامية فى الرخصة
اقول لة ايوة..
ويشوف الرخص وامشى عادى.

[A7med AlMaGiC]

بيبقى مكتوب زجاج ملون فقط بدون تحديد
وكام لحنة وقفتنى وسالتنى الفامية فى الرخصة
اقول لة ايوة..
ويشوف الرخص وامشى عادى.

تمام زجاج ملون فقط ده العربيه كلها ؟؟ ولو هي العربيه كلها انت ثبتها ازاي ع الرخصه معلش ياباشا هتعبك معايا

[mohamed_selim]

مفيش عربيه بتنزل فاميه كلها .... الجزء اللى ورا بس .... ممكن الامامى يكون ملون مش غامق و ساعتها بيتكتب زجاج ملون فابريقه بدوم تحديد مكان ... اثباتها بيكون ان مهندس الفحص يبيكتب فى ورقة الفحصو بترجه للموظب بيطابق اللى مكتوب فى الافراج او جواب الشركه المصنعه للمرور و بتتحط على الرخصه

[kokowasfy]

الفامية الكلى للسيارة بيبقى مكتوب زجاج ملون و مش محدد دا لو مكتوب محدش يقدر يوقفك ابدا و تدخل على اتخن لجنة محدش يكلمك لكن فى الحالة بتاعتك اكيد طبعا هيرخمو عليك و ممكن سحب رخص

[A7med AlMaGiC]

طب الحمد لله ان محدش وقفني ده انا عاملها دارك كلها متشوفش اي حاجه من العربيه اصلا .. طب معلش سؤال رخم تاني الناس اللي مفيمة العربيات كتير اوي دي بيعملوا ايه وازاي بيخلي الرخصه كلها فامية وهي مش جايه من بلدها فامية ؟؟

[mody112]

بص ياباشا اللى مكتوب فى الرخصة مش محدد الزجاج الجانبى الخلفى او الامامى عادى يعنى
المهم بقى هتبقى انت وحظك لو وقعت فى امين شرطة رخم هو اللى هيسالك عن الفاميه الامامى ولا الخلفى ويغلس ويقولك ان العربية بتنزل فابريكة جانبى خلفى وخلفى فاميه مش الجانبى الامامى هتقوله الرخصة مش محددة هيرخم ويقولك هدخلك فحص تانى وده بقى لو امين شرطة رخم قوى انما فى العادى هيشوفو الرخص مكتوب فيها فاميه وتمشى .
ولو حسيت بقلق وانت داخل على لجنة ابقى افتح الزجاج الجانبى الامامى وخلاص

[A7med AlMaGiC]

بص ياباشا اللى مكتوب فى الرخصة مش محدد الزجاج الجانبى الخلفى او الامامى عادى يعنى
المهم بقى هتبقى انت وحظك لو وقعت فى امين شرطة رخم هو اللى هيسالك عن الفاميه الامامى ولا الخلفى ويغلس ويقولك ان العربية بتنزل فابريكة جانبى خلفى وخلفى فاميه مش الجانبى الامامى هتقوله الرخصة مش محددة هيرخم ويقولك هدخلك فحص تانى وده بقى لو امين شرطة رخم قوى انما فى العادى هيشوفو الرخص مكتوب فيها فاميه وتمشى .
ولو حسيت بقلق وانت داخل على لجنة ابقى افتح الزجاج الجانبى الامامى وخلاص

الف مليون شكر يا باشا وربنا احسن اجابة ريحتني بجد يعني هي من الاخر هتبقي رخامه امين شرطه مش اكتر لكن الرخصه مش محددة وتمشي سليمة الحمد لله

[captainahmed]

انا معايا byd f3 2014 و نازل في الرخصة زجاج ملون فبريقة
مش محددين ولا امامي ولا جانبي و لا ايه
اعتقد محدش يقدر يتكلم فيها دي حتي لو فيمت خالص

[mohamed_selim]

تانى نقول ... المكتوب بيقول فاميه فابريقه و بما ان الفابريقه مبيكونش ملزوق يبقى اى حاجه ملزوقه على الزجاج غلط .... لو شخص غلس و بص من جوه و لقى فاميه ملزوق من حقه يطلب انك تخش فحص خصوصا ان مفيش فابريقه بيكون سوبر دارك قدام و ورا