إعـــــــلان

Collapse

.

,
See more
See less

L3 رائعة byd الجديدة كل شئ عنها بالتفاصيل والفيديو والصور

Collapse
This is a sticky topic.
X
X
 
  • Filter
  • الوقت
  • Show
Clear All
new posts

  • المشاركة الأصلية كتبت بواسطة khaled bebo مشاهدة المشاركة
    والله يا جماعة انا احترت ....... قريت الموضوع ده من أوله لآخره ورحت اتفرجت على العربية وشكلها عاجبنى والأوبشن كمان بس بخاف من أى عربية عليها مشاكل علشان دول تحويشة العمر مش هزار يعني

    نفسى في نصيحة بجد أعمل ايه أشترى لانسر جديدة وخلاص علشان الاقى فلوسى تانى ولا ادفعها في عربية زي كده وناس كتير بتحذر منها وممكن كل فلوسى تضيع فيها

    ياريت اللي عنده العربية دي من فترة يقولى عاملة معاه ايه وانا لو لقيت واحد بس في الشارع راكبها هاوقفه واسألة انشالله يشتمنى ههههههههه

    ومعلش ياريت السادة الأعضاء يقولو لى موقع الشركة على الانترنت علشان مش عارف الاقية

    وليه توقف حد فى الشارع .. انا اجيب لك صاحبها لغاية عندك

    ده تقرير زميل فاضل فى المنتدى استلم السيارة فعلا
    وطبعا كلام صاحب السيارة أكثر ثقه من اى حد أتفرج عليها ومشى
    ارجو ان يفيدك والرجل لن يتأخر فى اجابة اى سؤال

    المشاركة الأصلية كتبت بواسطة moe khodairy مشاهدة المشاركة
    السلام عليكم و رحمة الله و بركاته

    هذا هو التقرير الذي و عدت به عقب شرائي byd l3 مانيوال و تجربتي بعد 500 كيلو،في الحقيقة انا لسه مكاملتش ال 500 كيلو بس في زملاء كانوا عايزين التقرير بسرعة فكتبته على عجل و اتمنى انه يكون وافي و بيرد على كل تساؤلات السادة الزملاء بشأن العربية و طبعا انا تحت امر أي حد عايز يسأل في أي حاجة.

    أولا: مواصفات السيارة (لمن لا يعلم) :

    - سعة الموتور 1500cc
    - هورس باور 107 حصان
    - مانيوال
    - فتحة سقف
    - مفتاح بصمة ذكي لتدوير السيارة و فتح السيارة من ثلاثة اماكن و هي الشنطة و الابواب الامامية
    - navigator و به مجموعة برمجية من الادوات المساعدة مثل الالة الحاسبة
    - الكاسيت يشغل dvd, usb, aux fm,am
    - تلفزيون رقمي يستقبل القنوات الارضية digital tv
    - تارة القيادة multifunction بها ازرار تحكم في الصوت و تغيير mode و القنوات او المحطات
    - مخدع امامي به مكان للتخزين و به مدخل ال aux و usb و مخدع خلفي
    - 5 جنوط سبور 15
    - فرامل abs وebd
    - 2 air bags للسائق و للراكب الامامي
    - ايموبيلايزر و جهاز انذار
    - حساسات للركن parking sensors
    - كاميرا خلفية للركن تعمل تلقائيا مع المارشدير rear camera
    - تكييف (طبعا)
    - 4 زجاج كهربائي و ضبط كهربائي للمرايات
    - زجاج خلفي و زجاج جانبي خلفي ملون
    - تثبيت لكرسي الاطفال
    - فتح الشنطة و تانك البنزين من الداخل
    - العربية معاها كوريك و مفتاع عجل و مثلث

    ثانيا: تجربة الحجز و الشراء

    قمت بزيارة معرض شركة الأمل -مرة أولى- الموجود بشارع نزيه خليفة خلف الحرية مول بالكوربة لمشاهدة السيارة انا و زوجتي و قمت بركوب السيارة و تدويرها و تجربة التكييف و خلافه و فعلا اعجبت بالسيارة و اقتنعت بها دونآٓ عن السيارات الاخرى في فئتها مثل الايمجراند و الانفي و m11 و لا مجال للمقارنة مع الفيرنا و اللانوس مع الاحترام للجميع طبعا.
    سألت الموظف المسؤول عن السعر فقال 88,000 فقلت له من الاخر كام؟ فقال -من غير تحوير-: ممكن ننزل ألف جنيه. طبعا انا لما لاقيته قال كده على طول قلت في نفسي المرة اللي جاية لما اجي احجز ممكن يبقى في كلام تاني.
    المهم، رحت مرة تانية علشان احجز و ادفع عربون و اختار اللون كنت رسيت في المرة الاولانية على اللون النبيتي لانه هو اللي شفته و شفت السيلفر و الفيراني بس لاقيت اللون الاحمر معروض المرة دية و مكانش موجود المرة اللي فاتت و دخل دماغي جداو قررت اني اختاره ، و انا بتكلم مع الموظف في السعر قلتله ها اخر كلام ايه؟ قاللي زي ما قلنا المرة اللي فاتت مش هينفع انزل اكتر من الف جنيه، يعني السعر هيبقى 86,000 !!! :d
    المهم، انا ماعلقتش و قلتله يعني ده اخر كلام ده انتوا حتى مش بتدوا اي هدايا؟ قاللي و الله هو ده اللي هقدر اعمله و ده السعر النهائي.
    دفعت ألف جنيه و جيت اختار اللون الاحمر قاللي بس الاحمر ممكن يتأخر لمدة عشر أيام قلتله مش مشكلة، قاللي طب قول لون تاني يبقى احتياطي و ألح في الطلب بس أنا رفضت لأني حسيت انه ممكن يكون عنده ستوك في المخزن او عربية في المعرض من الوان تانية و عايز يخلص منهم او عايز يفضي المخزن شوية بدل مايطلع من المصنع بحجة ان اللون هيتأخر!! و فعلا طلع عندي حق و استلمت بعد 3 أيام!! فنصيحة اختار اللون اللي انت عايزه و ما تتنازلش.

    ثالثا: تجربة الاستلام

    كنت حجزت يوم جمعة لاقيته بيكلمني يوم الاثنين الصبح بيقولي العربية وصلت! رحت في نفس اليوم اتفرجت عليها و دفعت باقي المبلغ ناقص الف جنيه و قلتله اني هستلم بكرة الثلاثاء.
    و انا بفحص العربية استعنت بموضوع قديم هنا على المنتدى عن كيفية استلام f3 للاخ الاستاذ ابو ياسمين و وضعه الاستاذ باسم نجيب استعنت بيه كمرجع لترتيب افكاري و عملت للموضوع كوبي على الايباد معايا و استخدمته ك check list و انا بفحص العربية.
    اطمنت انه كله تمام و مفيش مشاكل تقفيل خالص و فعلا العربية تقفيلها جيد، الموظف جربلي ال navigator و قالي فكرني بكرة اديك الميموري كارد بتاع الخرائط -و قد كان-
    لاقيت زيت الباور ناقص شوية خليته تاني يوم اشترى زيت و كمله لحد max و لاقيت خربوش صغير جدا ناحية باب السواق و قاللي هعملهولك باللبوليش بس ما راحش ، هو اصلا الخربوش لايذكر بس الواحد و العربية جديدة بيبقى حاسس ان العالم كله شايفه : D
    الموكيت بتاع العربية كان متوسخ بلون اسود تقريبا من المصنع بس هما في المعرض نضفوه.
    العربية كانت عاملة بتاع 34 كيلو تقريبا.
    رحت تاني يوم فعلا و كان معايا واحد صديقي استلمت و دفعت الباقي و اخدت ضمان الكاسيت و المانيوال و ورق العربية و جواب المرور، الموظف قاللي 50 جنيه علشان الورق اديتهمله و اديته 100 جنيه اكرامية ليه و للناس اللي في المعرض.

    رابعا: تجربة القيادة:

    كنت قلقان من رحلة العودة للهرم و خايف مااخدش بسرعة على الدواسات و ابعاد العربية بس القلق ده تلاشى تماما بعد ما ركبت العربية و زبطت المرايات و وضعية الكرسي و طلعت على البنزينة اللي بجوار المعرض فولت ب 130 جنيه -التانك 50 لتر- و القلق و الخوف تلاشوا فعلا حتى قبل ما اكون على صلاح سالم، العربية سواقتها سهلة جدا و ناعمة و سلسة و الباور حلو جدا.
    صوت الموتور هادي و عزل السيارة جيد
    قعدة العربية مريحة و الكراسي جلد و مريحة و بامكانك التحكم في ارتفاع كرسي السائق، كمان اشتريت مسند الظهر من كافور و مريحني في السواقة (ب 17 جنيه)
    التكييف جيد جدا ليلا (على واحد) و جيد نهارا (ممكن واحد او اتنين أخري)
    سحب العربية جيد جدا و بيتأثر بالتكييف ، طبعا انا لسه في التليين فآخري في rpm بيكون 2 و ماعدتش 100 كيلو/ساعة
    الفرامل هايلة، طبعا ممنوع الفرملة المفاجئة او القرص على الفرامل في التليين بس انقذتني في موقف وحيد و انا شايف ان في المجمل ادائها هايل.
    العربية عالية الى حد ما، بمعنى مش بتحك في المطبات خالص، سواء قانوني او مطبات اهالي
    العفشة سلسة مش ناشفة ولا طرية و ده بشهادة كذا حد ركب جنبي.
    درج التابلو صغير شوية و يتعوض بان المخدع الامامي به مكان للتخزين و كمان الابواب الربعة فيهم اماكن تخزين.
    الإضاءة تحفة، النور الواطي ليه 5 مستويات يتم التحكم فيهم من بكرة في لوحة التحكم على يسار التارة بيخلوك كاشف الطريق كله ، النور العالي مفيش وصف ليه ده طبعا غير الشبورة ورا وقدام.
    المفتاح الذكي ده اخترااااع، كنت في الاول مش حاسس بقيمته بس مع الاستخدام بقيت مبسوط بيه جدا، مش بحتاج اني اقعد ادور في جيوبي على المفتاح و خصوصا لو كنت شايل ابني الصغير او شايل حاجات كتير، بضغطة واحدة تفتح العربية و بضغطة تقفلها ( طبعا العربية مش بتقفل لو نسيته جوة )
    بالنسبة لزرار engine start فده خلاني النهاردة اهرب من السايس امبارح بسرعة اسطورية :d
    الزرار ليه 3 ضغطات: الاولى للكاسيت و التانية للكهرباء كلها و التالتة للتدوير مع دوسة الفرامل.
    صوت الكاسيت حلو ( 4 سماعات و 2 تويتر ) مع امكانية التحكم في توزيع الصوت.
    الشنطة واسعة جدا
    الموكيت فاتح جدا و لازم يتعمله فرش في اقرب فرصة

    خامسا: المشاكل

    -باسمع صوت خبطة خفيفة في الناحية اليمين قدام لما بنزل في نقرة
    -البكرة بتاعت ضبط ارتفاع الكرسي اتخلعت مع اني استخدمتها مرة واحدة بس، هي عاملة زي دراع رفع الزجاج يدويا في التركيب، مشرشرة و بتركب كبس.
    - ال navigator بطل يشتغل و بعد كده اشتغل بعد ما عملت reset للجهاز و دلوقتي التليفزيون عامل نفس الحركة، تقريبا في مشكلة في الsoftware بتاع الجهاز و لسه هكلم الضمان.

    سادسا: الترخيص (مرور فيصل)

    ضريبة 3 سنوات : 850 جنيه
    تأمين اجباري 3 سنوات : 320 جنيه
    طفاية و شنطة اسعافات : 200 جنيه
    ملف : 65 جنيه
    اكراميات و باركينج و حافظة ورق و مسامير نمر (ايوة مسامير نمر علشان اشترتها من بره لانهم سلموني النمر من غير حتى مسامير! ) : بتاع 120 جنيه

    خد بالك:

    و انت بترخص لازم تبقى عارف ان الموديل ده l3 لسه جديد و محدش تقريبا عارفه فالموظفة طلعتلي الرخصة f3! و كان حوار، امين الشرطة بيقولي ما تمشي حالك و اعملها انت بالقلم! قلتله يعني يبقى معايا فيرنا و ارخصها اكسنت؟ راح مبلم، طبعا دخلت للموظفة و فهمتها و جبتلها الملف تاني و وريتها الفحص و جواب المرور و قعدت من تاني و استنيت دور جديد، و طلعت الرخصة فيها الموديل : L3 gs-1 ، هو انا مش عارف هو ايه gs-1 ده بس احسن ما تطلع عربية تانية خالص، الحمد لله... ربنا ينجينا كلنا من المنظومة الفاسدة دي.

    الخلاصة:

    السيارة رائعة بكل المقاييس شكلا و مضمونا و بتقدم حل حقيقي عملي للسوق المبالغ في اسعاره و الفقير في امكانياته و كمالياته فهي تتفوق على جميع اقرانها من نفس الفئة السعرية و حتى غيرها في الفئات الأعلى حتى 150,000 جنيه...بتدفع فلوس بتاخد قدامها اداء و كماليات و ماركة زي الغول هتاكل السوق السنين اللي جاية بدل ما تدفع فلوس و تاخد ماركة بس! و اعتقد اننا سنراها في الشوارع كثيرا في العام القادم دون حتى التسويق لها من قبل الشركة الوكيلة. ربنا يدينا خيرها و يكفينا شرها انا و اسرتي و الناس اللي ماشية في الشارع.

    يا رب يكون التقرير كان وافي و شامل لجميع الجوانب المهمة و تحت امر الجميع في الاسئلة.

    ملحوظة: تعمدت عدم وضع صور لان الاخوة في المنتدى هنا كانوا قايمين بالواجب و زيادة و مقدمين موضوعات عن العربية فيها صور و اعتقد ان الناس هنا عارفين شكل العربية كويس من جوة و من برة.


    المشاركة الأصلية كتبت بواسطة moe khodairy مشاهدة المشاركة

    بالنسبة للسادة الزملاء اللي سألوا عن ايه اللي يميزها عن الايمجراند، و الكلام اللي جاي ده وجهة نظر شخصية قد لا تمثل اي قيمة ... انا كنت ناوي اجيب الايمجراند و نزلت اتفرجت عليها مرتين، و اتفقت مع الراجل اللي في المعرض على كل حاجة و كنت مقتنع بيها و سألت ناس كتير و كنت كل ما بلاقي حد راكبها في الشارع كنت بوقفه و اسأله عليها.
    الايمجراند عربية شكلها فخم فعلا و شيك وانا بحبها بس لاقيت جدال كبير حواليها و ناس بتشتكي و ناس لأ و اللي بيشتكوا كل واحد فيهم بشكوى مختلفة عن التاني يعني المشكلة مش في باتش واحد مثلا، لا ده في مشكلة فعلا اكبر من كده، فحسيت انها زي البطيخة و اتقفلت منها و في ناس كانت بتقول انها بتحك في المطبات، و كمان انا لما ركبتها و ركبت ال l3 و شفت التقفيل حسيت ان في فرق و كمان حسيت ان في فرق في الدهان.
    ده زائد الاوبشن الزيادة اللي في ال l3 زي ال ( navigator و كاميرا الباركينج و التليفزيون و مفتاح البصمة و الستارت انجين و فتحة السقف)
    و زي ما قلت هي اذواق و لولا اختلافها لبارت السلع و ربنا يبارك لأي حد معاه الايمجراند




    المشاركة الأصلية كتبت بواسطة moe khodairy مشاهدة المشاركة
    الله يبارك فيك و ربنا يخليك...
    - ال navigator مش باشتراك ولا حاجة هو في كارت ميموري عليه الخرايط و بيحدد موقعك مع الاقمار الصناعية و بيقولك انت فين على الخريطة.
    - التليفزيون بتشغله بزرار و بيتولف اتوماتيك زي الرسيفر و بيقرا القنوات الارضي اللي هي من الاولى للتالتة و قنوات النيل و النايل تي في، حوالي اتناشر قناة و بتقلب بينهم من الجهاز نفسه او من التارة.
    - قعدة الكراسي مريحة و الفرش خامته حلوة و الدواسات مريحة و دواسة البنزين مرتاحة مش مزنوقة زي الايمجراند.
    - فتحة السقف كهرباء طبعا بس مش اتوماتيك يعني مش ضغطة واحدة و بتفتح فتحة كاملة للخلف و و فتحة بزاوية عشرين لفوق من ورا.
    - في حاجة كمان و هي وجود سينسور لحزام الراكب الامامي يعمل حين ركوب الشخص فقط.
    - معدل استهلاء الوقود اللي هو شئ مهم جدا : 9.9 لتر لكل 100 كيلو يعني بتعدي 500 كيلو في التفويلة مرتاحة و ده اقل واجب و ذلك مع استخدام التكييف.
    [CENTER][SIGPIC][/SIGPIC][/CENTER]
    [RIGHT]abojessy سابقا[/RIGHT]

    Comment


    • يا باشا مش عارف اشكرك ازاى
      انت راجل ميه ميه
      هاحاول اتصل بيه على الخاص واخد رقم تليفونه

      Comment


      • بجد شكرا جدا جدا لذوقك ولردك وكده كويس انها نفس قطع الغيار الميكانيكا

        Comment


        • الساده المحترمين سؤال مهم جدا للاسف لسه جى فبالى دلوقتى لما الحجر بيتاع الريموت السيارة يفضى هنشغل العربيه بالبصمه ازاى هل فى مكان زى العربيات اللى فيها بصمه زى الكيا او الانترا مثلا نحط المفتاح ونشغل العربيه حتى تغير الحجر ارجو الافاده وشكرا

          Comment


          • المشاركة الأصلية كتبت بواسطة sedmam مشاهدة المشاركة
            الساده المحترمين سؤال مهم جدا للاسف لسه جى فبالى دلوقتى لما الحجر بيتاع الريموت السيارة يفضى هنشغل العربيه بالبصمه ازاى هل فى مكان زى العربيات اللى فيها بصمه زى الكيا او الانترا مثلا نحط المفتاح ونشغل العربيه حتى تغير الحجر ارجو الافاده وشكرا
            هو مش هيفصل مرة واحدة انت حتحس ان البطارية بدأت تضعف و انت بتفتح الباب مثلا. و في كمان الكارت الاحتياطي و انا عن نفسي فكرت في كده و قررت اني ابقى اشيل معايا بطارية احتياطي

            Comment


            • في حاجة انا مستغربلها...
              البروشور بتاع العربية بيقول ان الفتيس الاوتوماتيك dct بينما الكلام على الموقع انه cvt و اللي اعرفه انهم حاجتين مختلفتين و انت كنت لا أعلم الفارق بينهم... ممكن حد يقولنا هو الفتيس ايه بالضبط؟ و ايه الفارق بين النوعين؟

              Comment


              • DCT
                Dual Clutch Transmission
                [B][FONT=Comic Sans MS][SIZE=5][COLOR=Green]

                [SIGPIC][/SIGPIC]


                Life's too Short for the Wrong Job[/COLOR][/SIZE][/FONT][/B]
                ziabassem سابقا

                Comment


                • المشاركة الأصلية كتبت بواسطة moe khodairy مشاهدة المشاركة
                  هو مش هيفصل مرة واحدة انت حتحس ان البطارية بدأت تضعف و انت بتفتح الباب مثلا. و في كمان الكارت الاحتياطي و انا عن نفسي فكرت في كده و قررت اني ابقى اشيل معايا بطارية احتياطي
                  شكرا ليك بس هل فى مكان للكارت مثلا علشان انا بصراحه اتفرجت على العربيه ومش اخدت بالى وكمان المعرض مش فاهم حاجة فى العربيه اساسا غير انها بى واى دى وشكل جديد وشويه الاوبشن اللى هو حفظهم

                  Comment


                  • المشاركة الأصلية كتبت بواسطة bassem.naguib مشاهدة المشاركة
                    dct
                    dual clutch transmission
                    استاذى الكريم هل ممكن توضحلنا ايه فكرت الفتيس وايه الميزة والعيب بتاعوا لو وجدت عندك المعلومه وشكرا لحضرتك جدا على الرد

                    Comment


                    • فى موضوع مهم على المنتدى فيه تفاصيل فنية كتيرة عن الفتيس DCT وكمان فتيس DSG وطبعا العربية byd بتنزل بالنوع الأول اللي هو DCT وملخص كلام المهندسين اللي كاتبين الموضوع والملاك ان الفتيسين دول كلهم مشاكل في أرقى انواع السيارات اللي نزلت بيهم زى BMW مثلا ولازم له نوعين من الزيت يتغيروا فيه مش نوع واحد وفيه كلام مهم ان الفتيس ده بيتغير كل 25000 كيلو وده طبعا كلام يخلى الواحد ما يفكرش في الاوتوماتيك نهائيا ويخليه في المانيوال.



                      ده رابط الموضوع على المنتدى

                      Comment


                      • استاذى الكريم هل ممكن توضحلنا ايه فكرت الفتيس وايه الميزة والعيب بتاعوا لو وجدت عندك المعلومه وشكرا لحضرتك جدا على الرد
                        وانا لقيت الرد ده على نفس نوع الفتيس تقريبا



                        مـــــــــــــنـــــــــــقـــــــــــول من / المشاركة الأصلية كتبت بواسطة Ahmed Amin

                        اتمنى حد يفهمنى علشان فعلا مش فهمت حاجة ..

                        كنت منتظم لحد موجة البرد دي وكسلت,
                        بس عشان أنشغلت شوية كمان, إن شاء الله أظبط تاني قريب.

                        والفتيس ال 6 نقلات مكنش أوتو عادي, كان DSG بس كان wet clutch
                        وظهر فيه مشاكل بس دا كان أفضل من الفتيس الجديد ال 7 نقلات لأنه لأنه Dry clutch
                        و مشكلة الفتيس مش في أنك تمور في الزحمة بدل ما تسيبها علي الغيار وتفضل معلقها وماسك فرامل,

                        المشكلة في ال dsg عدد النقلات الرهيبة اللي بينقلها في شارع واحد,
                        النقلات الكتير اللي ملهاش لازمة دي كفيلة أنها تأكل أحلي أسطوانتين دبرياج, وتهلك الميكاترونيك.
                        الموضوع دا هوا اللي لازم يتعالج قبل ما العربية تنزل للمستهلك,,
                        وإلا هيبقي زي ما كله قال إن VW بتستخدم عملائها كفئران تجارب وبتجرب الفتيس عليهم.


                        كمان عشان تبقي فيه نقطة واضحة ال DSG هوا مسمي الفتيس الخاص بمجموعة VW
                        لكن نوع الفتيس أو تصميمة أسمه DCT اللي هوا Dual clutch transmission
                        دلوقتي نظام ال wet clutch اللي كان في ال DSG القديم فيه شركات كتير بتستخدمه مش VW بس.
                        عندك مثلاً
                        موديلات BMW ال M3 وال M5 وال M6 كلهم بينزلو SMG اللي هوا برضه فتيس مانيوال من جوا وفيه أسطوانة دبرياج بس من غير بدال دبرياج, فتيس DCT وبنظام wet clutch
                        ال Easytronic من أوبل فتيس مانيوال زي مانت عارف, ومظبطش معاهم.
                        ال MMT بتاع تويوتا مانيوال ومظبطش معاهم.
                        البورش 911 و Cayman و Panamera الفتيس DCT 7 غيار wet clutch ومفهوش مشاكل.
                        النيسان ال GTR فتيس 6 غيارات DCT و wet clutch برضه ومفهوش مشاكل.

                        وأخيراً ال S-Tronic بتاع أودي هوا أقرب واحد لل DSG في التصميم, وهوا wet clutch برضه, ومفهوش مشاكل الفولكس.
                        ودا هقولك عليه في الأخر مينفعش ليه مع VW.


                        كل أنواع الفتيس ال wet clutch أستهلاكها أعلي في البنزين حوالي 7% عن الفتيس الجديد ال dry clutch,
                        فولكس بدأت تتوجه ناحية ال dry clutch عشان يحسنو ويقللو من أستهلاك البنزين, وكمان يقللو من تكاليف الصيانة لأنك مش هتحتاج تغير زيت للفتيس وهيتشال بند تكلفة تغير الزيت للفتيس من جدول الصيانات بما أنه مانيوال.

                        بس الفتيس القديم كانت ميزته إن الزيت كان بيبرد أسطوانة الدبرياج أفضل من تصميم الجديد,
                        نقلات الفتيس ال 7 غيارات ال dry clutch مش بتبقي كويسة بعد ماالعربية بتمشي في شارع زحمة أو بسرعة بطيئة لفترة طويلة زي شارع كله مطبات, والناس بتقول إن العربية بتبدأ بتنقل الغيارات زي اللي بيكون لسه متعلم علي المانيوال جديد وبيشيل رجله مرة واحدة من علي الدبرياج.! الغيارات بتركب مش مستريحة.


                        سبب الأصرار بتاعهم إن الفتيس دا نقلة ثورية فعلاً في عالم الألات الجر,
                        وأتصرف علي الأبحاث بتاعته فلوس كتير في تطويرة (ودا تبرير أي حد يقولك ال dsg حلو)
                        وكل الكلام دا علي عيني ورأسي,, وأنا عن نفسي عاجباني فكرة الفتيس,,

                        بس مينفعش إني كمستهلك إني أخد فتيس فيه تكنولوجية عالية أه بس متجربش كفاية علي أرض الواقع وفيه عيوب جسيمة زي دي,, وألبس أنا في حيطة بسبب العيوب دي بعد فترة الضمان أو أرمي العربية.!

                        يعني هقولك بسرعة المعادلة الصعبة اللي حققها ال dsg هوا بيديك
                        (1)أداء وسحب عالي جداً يعني تجميع السرعة فيه ممتاز لأنو المفروض فتيس مانيوال من جوا ومفيش محول عزم زي الفتيس الأوتو العادي فمفيش عزم بيضيع,
                        (2)النقلات سريعة جداً في ما بين الغيارات, لأنه فتيس مانيوال برضه فأسرع في النقل من الأوتو وأسطوانة الدبرياج بيتحكم فيها الكمبيوتر وكمان عندك أسطوانة للغيارات الفردية وأسطوانة تانية للغيارات الزوجية يعني الأسطونة المفروض مش بتجهد بسرع ووبتفضل تاخد أداء عالي دايماً لأنك مش بتحمل علي أسطوانة واحدة طول الوقت, وكمان أنت لما بتكون علي الأول وهتنقل للتاني بيكون التاني جاهز وشغال قبل ما العربية تاخدة, فالنقلات بتبقي رهيبة.
                        (3)وفي الأخر أستهلاك للبنزين ممتاز جداً جداً,.

                        لكن لما تكون ماشي بعربيتك وهيا فتيس أوتو 4 غيارات مثلاً في شارع زحمة,,
                        وتلاقي نفسك في الشارع دا نقلت 26 مرة لأنك كل شوية بتدوس بنزين والعربية تطلع أول وتنقل تاني وممكن تالت بعدها,
                        وتقف فتجيب أول, وبعدين تاني وهكذا.
                        وصاحبك جنبك بعربية فيها فتيس dsg ماشي في نفس الشاره ونفس الزحمة وعربيته نقلت 97 مرة أو 112 مرة في شارع واحد ميستاهلش .!!! وأنت لسه مكملتش مشوارك,
                        طبعاً دا بيهري أسطوانة الدبرياج, وبيضيع الميزة بتاعت إن فيه أسطوانتين بيريحو بعض لان رينج الغيارات قليل جداً.

                        مـــــــــــــنـــــــــــقـــــــــــول من / المشاركة الأصلية كتبت بواسطة Ahmed Amin

                        Comment


                        • طب وبعدين الواحد كده قلق من الفتيس الاوتوماتيك ياجماعه

                          Comment


                          • زملائى الأعزاء

                            موضوع فيتيس DCT تم بحثه مئات المرات فى جميع المواقع العالمية
                            وهناك خطأ اساسى وكبير يقع فيه الناس دائما عندما يسمعون كلمة DCT

                            وهو انهم يظنون ان هذه الكلمة تعنى نفس الفيتيس وكأنه فيتيس واحد تتبادله جميع الشركات
                            وهذا ليس صحيح لأن DCT فى الحقيقة هو فكرة تكنولوجية وليس ماركة تجارية
                            تماما مثل كلمة محرك 4 سيلندر فهو فكرة محرك ولكن هل صنعته مرسيدس مثل بى ام وهيونداى مثل تويوتا

                            وهل لوكان فيه مشكلة فى رينو ستكون نفسها فى متسوبيشى لأن المحرك له نفس الفكرة

                            كل هذا الكلام سيكون بلا جدوى عندما نعلم ان المشكلة كانت منحصره فى فيتيس شركة فولكس وبى ام واستخدموا تصميم يسمى DSG
                            وتم حل المشكلة تماما وتعديل الفيتيس من سنة 2009

                            ومع هذا اطمأن الجميع بأن الفيتيس DCT المستخدم على سيارات BYD ليس له علاقة من قريب ولا من بعيد ولا صلة له بموضوع DSG ولا بمشكلته

                            وارجو ان نكتب على جوجل dct transmission

                            ثم ادخل إلى ويكيبيديا الموسوعة الحرة

                            وستجد القصة كاملة لهذا الفتيس وشرح لأنواعه الكثيرة جدا ومنها النوع الذى سبب المشكلة

                            ولكن المفاجأة انك ستجد بالموسوعة قائمة كاملة للشركات العالمية التى تستخدم الأن DCT على بعض موديلاتها

                            وهم بالترتيب حسب ما جاء فى الموسوعة العالمية

                            بى ام دابليو - بى واى دى - مرسيدس - فيات - كريزلار - فورد - جنيرال موتورز - هوندا -
                            هيونداى - لوتس - ماكلارين - متسوبيشى - نيسان - بيجو - ستيروين - بورش - رينو

                            هذه هى قائمة الشركات التى تبنى الفيتيس فى بعض مودلاتها على تكنولوجيا DCT
                            مثلما تفعل BYD وليس هى فقط بل جميع سيارات الصين من اول جيلى اميجراند الأوتوماتيك إلى شيرى
                            أو اى شركة اخرى محترمه هناك تستعمل نفس الفيتيس على الكثير جدا من موديلاتها

                            فهل تظنون يا زملائى المحترمين أن كل هذة القائمة الطويلة من الشركات العالمية العابرة للقارات قد قررت الأنتحار
                            وتدمير سمعتها بأستخدام فيتيس فاشل !!!

                            ام ان له عدة طرق لصناعته نجحت كلها جميعا حول العالم رغم خطئ طريقة واحدة
                            لم تستخدمها ابدا BYD

                            ومرة اخيرة اكرر أن DCT هو فكرة تكنولوجية يتم تطبيقها بعدة طرق حسب الشركة المصنعة له
                            وأنه ليس فيتيس واحد يتم توزيعه على الجميع



                            ملاحظة اخيرة

                            للزميل العزيز الذى احتار بين CVT و DCT على موقع الشركة
                            واقول له انى وقعت فى نفس حيرتك وبحثت حتى عرفت السبب
                            وهو ان الفيتيس CVT كما جاء بموقع الشركة الأم موجود على احد موديلا ت L3 وهى النسخة الثالثة ويركب على المحرك

                            BYD483QA
                            1800cc
                            160hp

                            اما النسخة الأولى والنسخة الثانية الموجودة فى مصر

                            1500cc
                            108hp

                            فيركب عليهم الفيتيس DCT

                            وهذا سبب اللخبطة والحيرة التى وقعنا فيها جميعا

                            على العموم فعلى موقع BYD الأخبارى ان الشركة ستعتمد الفيتيسDCT على جميع سيارات الشركة بدون استثناء
                            وأنهم طوروه بأنفسهم ليلائم سياراتهم بالذات كما جاء فى نص الخبر

                            ومرة اخرى اقول هل نظن انهم قرروا الأنتحار
                            ارجو ان يكون الله وفقنى فى التوضيح

                            والتفاصيل الكاملة فى ويكيبيديا
                            [CENTER][SIGPIC][/SIGPIC][/CENTER]
                            [RIGHT]abojessy سابقا[/RIGHT]

                            Comment


                            • بجد انت ريحتني . كان نفسي افهم قصه الفتيس والحمد لله عرفتها بجد شكرا جدا جدا ليك

                              Comment


                              • ملخص المشاركة اللي نسخت الرابط بتاعها قبل كده ان الفتيس الـ dct ده مناسب اكتر للطرق المفتوحه ولكن شوارعنا الواقفة دايما اكيد هايزود معدل تآكل الفتيس نفسه والكلاتش بتاعه.
                                وفيه واحد ضرب مثل حلو اوى في المشاركة دي وقال ما معناه أن لو فيه عربية اتوماتيك وعربية dct بيتحركوا مع بعض فى شارع زحمه الفتيس الأوتوماتيك على ما ينقل 24 نقله يكون الفتيس الـ dct نقل 112 نقلة تقريبا وده هايخليه يتاكل بسرعه ويحتاج تغيير وقصص يعلم بيها ربنا

                                انا فاهم طبعا ان كلمة dct دى اسم تكنولوجيا بتستخدمها الشركات ده موضوع مفهوم مافيش فيه مشاكل
                                وان الماركات الكبيرة دي بتستعملة في بعض موديلاتها ومش كل موديلاتها واكيد الموديلات دي مش ناجحه في مصر علشان طرق القاهرة الواقفة على طول لأن الفتيس ده محتاج يمشى على طريق سفر وفيه ناس غيرت الفتايس دي على كيلوات قليلة وطبعا بعد الضمان هايبقى الواحد مننا وشه في الحيطه :) ده اذا الضمان خدمه اساسا

                                تخيل بقى لما شركة صينية تقلد الشركات الكبيرة اللي هيا فشلت فيه اصلا يبقى هنا المخاطرة كبيرة
                                خصوصا ان الفتيس ده لسه جديد وما اتجربش كويس زي اى عربية تانية

                                البى واى دي القديمه الاوتوماتيك كانت الناس مجرباها (ام ماكينة ميتسوبيشى) لكن دي لسه جديدة وبتكنولوجيا فاشلة في الشركات الكبيرة وكمان ده تقليد صيني للفشل ده.

                                يبقى الواحد يخليه في المانيوال احسن له واللي مش عايز مانيوال يخليه في ماركة تانية مش صيني او صيني متجرب كذا سنه علشان الواحد يقدر يشترى

                                لكن انا عمرى ما هابقى معمل تجارب بتحويشه العمر لا يمكن ابدا طبعا حتى لو هادفع اكتر بكتير في عربية تانية متجربة والتكنولوجيا بتاعتها معروفه ومتجربة يبقى أضمن علشان فلوسى ما تضيعش.

                                العربية عاجبانى بس مرعوب منها
                                ولا رأى حضراتكم ايه ؟

                                Comment

                                Working...
                                X