حصريا لنايل موتورز : اول تقرير مصور عن السيارة mg 350

[eng.m7md.ali]

بسم الله الرحمن الرحيم

النهاردة ان شاء الله جايبلكو شوية صور عن العربية وتقرير بسيط يارب يبقى فيه افادة كبيرة للي بيفكر يشتري العربية دي

مبدأيا داخل على المعرض لقيت العربية دي منتشرة في المكان قولت الحمد لله هشوف كل الفئات اللي موجودة واتضح انها فئتين بس

اللي لفت نظري كمان ان المعرض بيعمل test drive للعربية بدون حجز مسبق بس للاسف مكانش في وقت اني اجرب العربية لاني كنت مستعجل شوية

نيجي للعربية من جوة اول ماتفتح الباب تحس انه تقيل في الفتح ود بسبب الصاج الجامد في العربية بس لما تيجي تقفله يتقفل بكل سلاسة وسهولة بدون رزع

مبدأيا العربية من برة جميلة ودي ازواق طبعا .. من ورا ناحية الفوانيس تحس انها شبه الكروز شوية ومن قدام شكلها جميل بس في حتة في الكابوت شبه السيراتو قوي اللي هيا واخدة سحبة مع المراية في الجنب

نيجي للقاعدة جوة :

بالنسبة للتقفيل والخامات هيا خامات جيدة واحسن بكتير من اي عربية صيني في مصر وخاماتها بتفكرني بالفيات بونتو ايفو في نفس جمالها وبساطتها + ان التقفيل كمان ممتاز جدا بالنسبة لسيارة صيني ولو قارنة بينها وبين الالنترا الجديدة نلاقي ان التقفيل والخامات متقاربة جدا

الامكانيات :

ودي بتختلف من اول فئة للتانية والاساسي منها هو تكييف وباور وسنتر ومرايات كهربة وكاست سي دي + 2 ايرباج + abs - ebd -cbc في الفئتين
بزيادة بعض الكماليات في الفئة العالية زي فتحة سقف كهربة + كرسي السائق كهربة + مالتي فانشن + فرش جلد + خشب ابانوس في الباب والتابلوه والكنسول اللي في الوسط + جنوط سبور 16 مع كاوتش 205-55

الموتور :

الحقيقة مجربتشو وكان نفسي بس زي ماقولت الوقت مأسعفنيش
هو 1500 سي سي 107 حصان عن 6000 لفة في الدقيقة و عزم 135 نيوتن عند 4500 لفة في الدقيقة

والان مع الصور للوحش الصيني الانجليزي الجديد : :

دي من قدام


دي من الجنب


فوانيس الكروز هههههههههههههههه


صورة من الخلف للفئة الاقل


من الجنب للفئة الاقل


دي السحبة اللي قولت عليها


مخرج كهربة خلفي


الباب الخلفي ( سماعة وتويتر)


الباب الامامي (بردو سماعة وتويتر)


دي السماعة في الباب الامامي


الفتيس الاوتو والكونسول (خشب ابانوس)


مخرج يو اس بي (aux)


الطارة المالتي فانشن والعدادات


الكاسيت والتكييف والتابلوه


فتحة السقف الكهربة


زراير تحكم في كرسي السواق


الشنطة

الموتور والحوض


جنوط 16 (فرامل ديسكات ورة وقدام)


المساحة الداخلية



يارب التقرير يكون عجبكم

[yoko]

هل شايفها تستاهل سعرها؟

[eng.m7md.ali]

بصراحة لا

الفئة الاقل ب 115 الف واول ماعرفت انها بالسعر ده مجاليش نفس اسأل عن الكاملة
بس بيني وبينك احسن من اي عربية صيني تانية في مصر واحسن من البريليانس جالينا في الخامات والتقفيل بكتير

[yoko]

انا شايف خاماتها وتقفيلها محترم قوي بس ما زالت صغيرة ونفس فئتها في الكوري بنفس السعر ده او أغلى شويه بس للأسف الكوري مفيهوش أمان بالسعر ده

[eng.m7md.ali]

فعلا الامان مهم جدا وانا اعتقد هتتفوق على عربيات كتير كوري بس عايزة شوية ثقة من المستهلك

العربية بتنزل ب airbags
abs
ebd
cbc ده زي الesp

[Usama Nagi]

العربية فعلا تحفة

للأسف الماركة دي انضف سيارة صيني لأنها مبنية علي شاسيه و تكنولوجيا انجليزي مش بادئين من الصفر زي باقي الشركات و للأسف سعرها في الصين غالي فعلا مقارب لسعرها في مصر

حلها الوحيد انها تتجمع في مصر بس كده هتبقي فيها مشاكل

[eng.m7md.ali]

دي لو اتجمعت في مصر سمعتها هتضرب اكتر واكتر ومش هتحقق مبيعات
هتاخدلها فترة وسعرها ينزل زي الجالينا

[أحمد فاروق سيد]

أولاً : تسلم أيدك على التقرير
ثانياً : لا أتوقع أنتشار السيارة فى ظل سعرها الشئ والمغالى فيه
فوق الـ 100000 ج أفضل الكورى ...

[eng.m7md.ali]

أولاً : تسلم أيدك على التقرير
ثانياً : لا أتوقع أنتشار السيارة فى ظل سعرها الشئ والمغالى فيه
فوق الـ 100000 ج أفضل الكورى ...

ربنا يخليك يا باشا
انا اعتقد اللي هيشتري العربية دي من هواة العربيات النادرة او المميزة
العربية بصراحة حلوة من جوة اوي كتقفيل وخامات

[MaZaGAngeE]

فوق الـ 100000 ج أفضل الكورى ...

أختلف معاك
الكوري تحت ال 100
الياباني و بعض الاوروبي من 100 الى 200
الأمريكي و بعض الاوروبي فوق 200