تقرير بالصور عن شانا بينى بعد 5000 كيلو

[ramymechanics]

بسم الله الرحمن الرحيم

كان ليا طلبات محددة فى عربية المدام و هى .... تكون هاتشباك و ابعادها سهلة عشان هى كانت لسة بتتعلم السواقة ... تكون اوتوماتيك .. تكون زيرو لأن بعد ما لفيت لفة فالمستعمل لقيت ان البيكانتو تعملها 80 الف جنيه الحالة النضيفة و كمان لتفادى المفاجآت لأنى معظم الوقت مسافر و هى مش هتعرف تتعامل مع الميكانيكية... تكون متزيدش عن 60 الف جنيه

بعد لفة فى السوق احد الأخوة هنا قال لى على الشانا لقيتها بتتباع فى الطارق ب 59000 جنيه بخصم 5000 جنيه عشان فرق الموديل لأنى اشتريتها فى 2014

العربية امكانياتها كالتالى:
1000 سى سى .. اوتوماتيك و ستبترونيك .. 4 زجاج كهرباء .. abs .. اشارات فى المرايات .. راديو مع وصلة aux

صور العربية :















العربية فى الاول الفتيس بيعمل نتشة خفيفة بعد صيانة الالف اتظبط كتير هو بس محتاج تعود لأنه مختلف عن الاوتوماتيك العادى زى ماهو باين فالصورة بس سهل .. التكييف تبريده ممتاز بصراحة .. عالية عن الأرض ومش بتحك فى المطبات .. الاتزان لحد 110 عاجبنى بس مجربتش بيها اسرع من كدة لكن اعرف ناس مشيوا بيها 160 كم\س لكن معتقدش دة صح بالنسبة لحجمها ... قطع غيارها رخيصة و صيانة ال 5000 بتغيير الزيت ب 320 جنيه بغسيل الموتور بالفوم ... الصالون واسع مقارنة بفئتها و الفرش لونين وخامات التابلوه تستحمل الخدمة الشاقة ومساحات التخزين كبيرة جدا فى التابلوه

العيوب:
صوت الموتور بيعلى مع اول نقلة
السحب مش قوى اوى بس مرضى جدا للاستخدام اليومى العادى
بعض عيوب التقفيل نتيجة ان العربية مركونة فى الطارق من سنة و التوكيل عملها من سكات بصراحة
العفشة ناشفة شوية و دة طبعا احسن للاتزان خصوصا مع ابعادها الصغيرة
العيب الرئيسى من وجهة نظرى التزييق من الابواب صوته واضح جدا هجرب فيه WD40 و اقولكم النتيجة ان شاء الله
صوت الكاسيت على قده
نقص قطع غيار الحوادث زى سربنتينة التكييف و الكمبرسور والتوكيل ابتدى يهتم بيها للأمانة لمست دة فى آخر زيارة للتوكيل

بصراحة حتى الآن المدام ماشية بيها 5000 كيلو مشوار يومى من الرحاب للمقطم والعكس والحمد لله مفيش شكاوى عامة

[ARKOON]

الف مبروك يا فندم على العربية :) وفعلا صفقة حلوة مقارنه بالفئة السعرية .

[ramymechanics]

نسيت اقول ان متوسط استهلاك البنزين
5.50 لتر/100كم فى السفر
6.50-8 لتر/100كم جوة البلد

[mohamed_prog]

الف مبروك وربنا يباركلك فيها ويكفيك شرها
ان كنت عايز استفسر من حضرتك علي كام حاجة كدة اصل بقالي مدة بفكر فالعربية دي وكنت عايز اعرف اتساعها من جوة وخاصة الكنبة الخلفية هل مساحة الارجل الخلفية مريحة ولا ضيقة وكمان بالنسبة للصاج هل كويس ولا خفيف

[ramymechanics]

الف مبروك وربنا يباركلك فيها ويكفيك شرها
ان كنت عايز استفسر من حضرتك علي كام حاجة كدة اصل بقالي مدة بفكر فالعربية دي وكنت عايز اعرف اتساعها من جوة وخاصة الكنبة الخلفية هل مساحة الارجل الخلفية مريحة ولا ضيقة وكمان بالنسبة للصاج هل كويس ولا خفيف

الله يبارك فيك يا باشا و شكرا على الدعاء

بالنسبة للوسع العربية واسعة بالنسبة لفئتها وعالية عن الأرض ... المدام مرة ركبت فيها هى و اختها و مراة اخوها و خالتها و 5 اطفال و متسألنيش ازاى

الصاج للأمانة تقيل جدا و ناشف ما شاء الله بس مجربتهاش فى خبطة ولا حاجة لا قدر الله لكن هو محمل و الاكصدامات ناشفة والدهان ثابت مش بتتجرح بسهولة

يعيبها بس ان قطع غيار الحوادث زى السربنتينة والكلام دة قليلة شوية لكن العربية انتشرت والتوكيل وعد مع اول السنة الجديدة هيظبط العربية ان شاء الله

[Haitham Ghazal]

بعد اذنك كنت عايز اعرف هو التوكيل بتاعها مين ؟

[bassem.naguib]

تقرير مبدئي وسريع وممتاز .. تسلم أيدك يا يا رامي باشا .. وفي انتظار المزيد من الانطباعات عن العربية .. وخاصة أني أراها الحصان الرابح كسيارة مدينة فئة الهاتش باك في تلك الشريحة السعرية