تقرير عن اكسبلوجن 1600 سى سى بعد 5000 كم

[Sherif_Hashem]

السلام عليكم جميعا,

الحقيقة انى فكرت أكتب المشاركة دى علشان تبقى موجودة لأى عضو بيدور على بيانات عن سيارة عايز يشتريها , بس كل اللى بيلاقيه ناس عمالة تمدح, و ناس عمالة تذم بدون ما يكونوا جربوا السيارة بغض النظر عن نوعها و بعدين الموضوع يقلب خناقة و يتقفل على كده.
و يا ريت كل اللى عنده سيارة صينى يعمل نفس الشيء بعد ما يكمل 5000 كم علشان يبقى فيه افادة للي بيشترى و حيران.

أنا جبت العربية اكسبلوجن 1600 سى سى للمدام من 3 شهور و ذلك بعد ما بعنا citroen AX 1995 كانت معاها من الزيرو فى شهر 3 اللى فات و جبت أنا صنى 2006 ماشية 20000 و اديتها المازدا 121 بتاعتى مو 1997 و كانت عاملة حوالى 300000 من الزيرو برضه و كانت حالتها معقولة بس خلاص على وشك تفتح بقها فقلنا نبيعها و نجيب حاجة جديدة.

العربية مواصفتها:
Mitsubishi 4g18 1.6i L engine
power, Air condition, centerlock , 2 anterior electric windows, MP3 CD radio cassette roadstar, electric side mirrors
و خمس جنوط
السيارة تمنها 69000 و خدناها من التوكيل المسلمى م.نصر ب67000 خصم 2000 جنية علشان مو 2009 كانت على وشك النزول.

استلمنا العربية فرشها جميل التقفيل كويس بس التابلوه يعنى نص نص و شكله قريب من التسعينات

ركبنا فيها ال gaurd الأمامى و الخلفى و فرش جلد لحماية فرشها

العربية مميزاتها:
الموتور قوى
الكماليات مش رديئة
عالية عن الأرض و دى ميزة للى سواقته زى مراتى مابتجريش انما بتلبس كل المطبات و الأرصفة كمان عند الركن
البور جيد جدا
العفشة معقولة
مافيش أصوات مع المشى و مافيش حدف
التكييف كويس بس بيتهيألى مش هيسعف أوى فى الحر الشديد و لكنه مابيأثرش على السحب خالص
التوكيل كويس عكس اللى سمعته قبل ماجيب العربية و ده لأنهم غيروا الطقم اللى كان موجود بالكامل و كانوا مرتشين و مابيشتغلوش

العيوب:
جوهريا مافيش حاجة تضايق ماعدا الفتيس بيعض فى الثالث (قالوا بيتظبط فى صيانة ال 5000 أنا لسه ماروحتش)
العربية دفع خلفى فخشنة شوية علشان الكرونا فبعد ال100 صوتها بيبقى عالى
مساحة القدمين للسائق مش مريحة أوى الا للبنات أو الشباب القليل فى الحجم
الشنطة متوسطة الحجم
الكنبة أخرها شخصين و طفل
و بس كده

مافيش مشاكل ميكانيكا أو عفشة أو كهرباء حصلت خلال ال 5000 كم دول
مافيش أصوات ظهرت حتى الأن
بس برضه مراتى سواقتها مش عنيفة و مابتحرقش و لسة مش قادر أقول العربية تستحمل اللى باعمله بالنيسان والا لأ (عامل بيها 45000 فى 8 شهور)

احنا سافرنا بالاكسبلوجن العين السخنة مرتين و العربية محملة و جبت بيها لحد 140 بس الصوت بيبقى عالى و هى أخرها فى الكتالوج 145 بس العداد لحد 180 !!!

انما تسافر على 110- 120 مريح بغض النظر عن الصوت

من الأخر لو بتجيبها لمراتك ماتقلقش و هتبقى مناسبة جدا
لو ليك شخصيا لازم تحط الحاجات اللى قولتها فى اعتبارك علشان ماتضيقكش بعد كده

و أسف للاطالة و يا ريت أكون أفدت و أى سؤال أنا جاهز....

http://www.youtube.com/watch?v=9TzyRIRYP_8

http://www.youtube.com/watch?v=MhX1XkWzulA

http://www.youtube.com/watch?v=2UXk1HWqZIs

http://www.youtube.com/watch?v=lSkLA5kLFPs

https://www.zotyeglobal.com/index.htm

http://en.wikipedia.org/wiki/Mitsubishi_Orion_engine

[ahmed1981]

ألف شكر يا أستاذ هاشم
التقرير مهم جداً لهذه السيارة التي كنت أعتبرها شبه مجهولة
وبالنسبة لسعرها فهو مقارب لسعر اللادا نيفا الجديدة

وأظن أن التنافس سيكون بين الإكسبلوجن واللادا نيفا قوي جداً

ويا ترى لو رجع بيك الزمان تشتري الإكسبلوجن برضه ولا تشتري اللادا نيفا (تكييف وباور وسنتر)

http://www.nilemotors.net/Nile/showthread.php?t=35753

وبنفس السعر أيضاً؟

[Sherif_Hashem]

و الله يا أستاذ أحمد أنا أول مرة أشوف اللادا نيفا الجديدة دى, شكلها جميل و متانتها معروفة, أظن انها هاتبقى مكسب كبير للسوق المصرى و الناس اللى يهمها القوة قبل الشكل.
شوف لو العربية ليا أنا و لازم أختار من الاتنين دول بس هاجيب النيفا و لكن لمراتى و أيضا لناس كتير أوى زيها عندهم حساسية من اسم لادا و مش ناويين يعاملوا العربية على انها هامر و خصوصا لو سيدات أظن الاكسبلوجن هاتبقى مناسبة شكلا و مضمونا.

[aymankamalbasha]

شكرا على التقرير الوافى

[zeyad1810]

ربنا يباركلك فيها ويا ريت تعرفنا اخر التقارير دايما عن العربية معاك

[R A N A]

العربية دي فعلا شكلها حلو وميزتها انها عالية عن الأرض عشان مطباتنا اللذيذة اللي مالية الشوارع :k30:.
بس ياريت حضرتك تقولنا ايه اخر الاخبار وهل روحت صيانة ال 5000 ولا لسة؟ ولو في اي عيوب تانية ظهرت في العربية تقولنا برده عشان اللي يشتريها يبقي على نور .
وميرسي اوي اوي التقرير الهايل ده وياريت كل حد يجيب عربية جديدة (خصوصا الصيني بالذات عشان ناس كتير بتشكك فيه حتى لو مجربوهوش ) يكتب تقارير مفصلة ومحايدة زي حضرتك كده .
عموما ربنا يبارك لحضرتك فيها ومنتظرين تقارير اخرى لصيانة ال 10 الاف ولحد نهاية الضمان كمان :10D5C8~1107:.

[mohamedhamam]

شكراً على التقرير و ربنا يباركلك فيها

[islam_shaker]

السلام عليكم و رحمه الله وبركاته
اولا احب اشكر صاحب الموضوع علي روحه التعاونية الرائعه
ثانيا انا كمان معايا العربية دي بس بقالها حوالي 3 سنين انا جبتها فى اواخر سنة 2006
العربية بصراحه مشاكلها كتير بلذات الكهربا بتاعتها
العفشه مش حلوة اوي زي ما صاحب الموضوع قال
التوكيل بصراحه انا ليا معاهم كذا مشكله بقالها حوالي سنة او اكتر مش عارف دلوقتي ايه نظامهم عشان مبقتش بروحلهم كتير طرمبه البنزين باظت من اول سنة و لما رحت التوكيل قالولي ده قدرها
و اعرف 2 معاهم العربية دي برضو طرمبة البنزين باظت عندهم.دي كانت اول مشاكل ليها معايا و بعديها كان فيه كتير.
بس بصراحه انا مبنصحش حد بيها ولا بنصح حد بلصيني خالص
بس يمكن الموديل بتاع صاحب الموضوع اجددد او حلوا فيها المشاكل الى كانت موجودة قبل كدة
و ربنا يباركلك فيها يا باشا

[mby]

السلام عليكم و رحمه الله وبركاته
اولا احب اشكر صاحب الموضوع علي روحه التعاونية الرائعه
ثانيا انا كمان معايا العربية دي بس بقالها حوالي 3 سنين انا جبتها فى اواخر سنة 2006
العربية بصراحه مشاكلها كتير بلذات الكهربا بتاعتها
العفشه مش حلوة اوي زي ما صاحب الموضوع قال
التوكيل بصراحه انا ليا معاهم كذا مشكله بقالها حوالي سنة او اكتر مش عارف دلوقتي ايه نظامهم عشان مبقتش بروحلهم كتير طرمبه البنزين باظت من اول سنة و لما رحت التوكيل قالولي ده قدرها
و اعرف 2 معاهم العربية دي برضو طرمبة البنزين باظت عندهم.دي كانت اول مشاكل ليها معايا و بعديها كان فيه كتير.
بس بصراحه انا مبنصحش حد بيها ولا بنصح حد بلصيني خالص
بس يمكن الموديل بتاع صاحب الموضوع اجددد او حلوا فيها المشاكل الى كانت موجودة قبل كدة
و ربنا يباركلك فيها يا باشا

فعلا كان فيه حد كاتب قبل كده ان الطلمبه باظت بعد 7 شهور وان التوكيل دفعه تمنها ومارضيش يغيرها في الضمان
وقبل ما اشتري العربيه من اسبوعين كنت سالت واحد راكب عربيه اكسبلوجن عن اخبارها قال لي العربيه كويسه بس خلي بالك ان العربيه لازم دايما يكون فيها بنزين لانه لو العربيه شطبت بنزين الطلمبه هاتبوظ
سؤالي لكل الاخوه اللي حصل لهم مشكله مع الطلمبه هل كان البنزين شطب من العربيه او ما هي الظروف اللي باظت فيها الطلمبه
ارجو الافاده حتي تعم الفائده
حاجه تانيه انا اشتريت العربيه تاني ايد واللي اشتريت منه ضايع منه كتيب السياره الكتالوج اللي بيكون فيه شرح كل شئ عن السياره هل اطمع في معاونه من اي شخص كريم يكون عنده اخده منه واصوره وارجعه له في الحال علما بان السياره اكسبلوجن 2

[emadfarouk]

السلام عليكم اريد رايكم في الموديل الجديد الاتوماتيك حديث النزول

[mby]

خلي بالك من سعر العربيه

السلام عليكم اريد رايكم في الموديل الجديد الاتوماتيك حديث النزول

سيدي حاليا طبعا لايمكن حد يقدر يقول رايه في الجديده لانها لسه نازله يوم الجمعه الماضيه عموما الموديل اللي نزل 1300 سي سي وسعره 70000 جنيه ولايوجد ائ تغيير اطلاقا في اي شئ اخر الا العلامه اللي قدام واللي وراء اتغيرت لحرف دي D بدلا من العلامه القديمه ولا يوجد 1600 اتوماتيك.
علي فكره انا نزلت وشوفتها وعرضت عليهم استبدال (سياسه الاستبدال موجوده اصلا عند الوكيل ) اللي معايا اكسبلوجن2 مانيول 1600 سي سي عامله اقل من 6500 كيلو متر اشتريتها في ديسمبر 2009 ومرخصها 3 سنين واضفت لها بارك سنسور وانذار ووحدات رفع زجاج وفرش للصالون طلبوا مني 20000 جنيه فرق سعر يعني الوكيل قدر سعر العربيه بالاضافات التي تمت وبعد استعمال 6500 كم فقط والعربيه لسه بحاله الفابريكه بالكامل قدرها ب 50000 جنيه يعني العربيه تخسر 30% من تمنها فورا
يعني الوكيل قرر بنفسه ان العربيه لا تساوي اكتر من ذلك وانه اما بيبيعها بسعر مبالغ فيه واكبر من القيمه الحقيقيه او انه عاوز يضحك علي عميله في الاستبدال وفي الحالتين يبقي الوكيل ......... مش قادر اقول انتم تفهموا

[nannah]

بصراحة العربية 2011 من الخارج جميلة جدا احلى من التيجو ومفيهاش عيب بس من الداخل اولا تفقد الجمال عادية خالص وتعتبر صغيرة من الداخل اما الكارثة فهى الكنبة الخلفية اخرها شخصين فقط والارجل فى الخلف ليس لها مساحة كافية والكنبة الخلفية متعبة جدا فى الجلوس
وهى على فكرة جر خلفى
بس بصراحة شكها حلو
اما العداد فلسرعة القصوى 140 اظن لانها كنزة فلو زودو السرعة حتقلب وكمان الابواب مش تقيلة خفيفة خالص

[HOSSAM99]

عربيه جميله جداا

[M_SALLAM]

عربية جمية جدااا (" موتور ميتسبيشى لانسر يبانى و عفشة يبانى ") و كمليتها رائعة و شكلها جميل و اقتصادية جداااا و شبابية و عالية ..
قعدت معايا العربية بقلها 5 سنوات و بعتها لمجرد التغير فقط ..
العربية باسم الله ما شاء الله عليها جميلة جدا و مغيرتش اى حاجة فيها من عفشة او اى حاجة فى العربية..
و ثبتها رااااائع انا كنت بجيب بيها ال 120-145 بتبقا ثابتة تماما و باخد بيها ملفات على 120 ..
هى العربية كل عيوبها انها ضيقة و العفشة ناشفة الى حد ما ...
و محتاجة لتوكيل و مركز صيانة محترم ...
انما موضوع الطلمبة دة محصلش معايا غير لما مشيت بيها لحد اخر نقطة بنزين فى التنك ..
و لما روحت التوكيل غيروها و جابولى واحدة ماركة ( bush ) المانى
غير كدة العربية رائعة و سعرها كويس على عربية 2*4 ...

[islam_shaker]

لو حد عندو اى استفسار عن العربية انا موجود