لا خاب من استشار ...اعطنى رأيك وانصح اخاك

[alhoda]

انا من الدقهلية ومعايا 60000 جنية وعايز اشترى عربية بريليانس جالينا أو اسبرانزا A620 ومحتار بينهم تنصحونى بأية مع ان انا كان نفسى فى البروتون جين 2 بس قطع غيارها نار نار وفكرت فى ستروين c4 وفكرت فى الرينو ميجان كل ده استعمال طبعا ومش عارف اجيب ايه بقالى كتير بدور ومش عارف احسم اختيارى ومش هلاقى افضل من اعضاء نايل موتورز يفيدونى فى الموضوع ده طولت علكم بس والله محتار خاصة ان دول تحويشة العمر .

[alhoda]

ايه ما فيش رد ولا ايه فين رجالة نايل موتورز ؟ منتظر الرد

[M.Nabeeh]

ايه ما فيش رد ولا ايه فين رجالة نايل موتورز ؟ منتظر الرد

Lancer 2000
Sunny 2005
Matrix 2006


وأبعد عن الصيني!!!

[wkhater]

انا شايف انك معجب بالسيارات الواسعة اولا لازم تحدد انت عايز ايه يعنى يابانى او كورى او صينى بس انا رأى ممكن تفكر فى النترا موديل 2006 العربية دى كويسة لو بحاله جيدة

[SHERIF2009BHIT]

ابعد عن الاسبرانزا خالص
بالنسبة للميجان عربية كويسة واداء رائع التكيف بتاعها مش زى اليابانى اقل بشويتين بس لازم تعتنى بيها وبالصيانة بتاعتها
الجالينا عربية محترمة والموتور بتاعة كويس بس 2000 سى سى يعنى استهلاك البنزين والضريبة عالية
سيتروين c4قطع الغيار مرتفعة وسعر اعادة ابيع مش كويس بس مريحة واداء ممتاز
بروتون جميلة اداء موتور وعفشة رياضية ناشفة شوية بس تمشى مع الطرق المصرية بس التابلوة فقير شوية
الاختيار لك بناء على اية اللى عاوزة من السيارة

[alhoda]

الف الف شكر لكل الاعضاء اللى جاوبونى المشكلة ان كان عندى اوبترا 2007 اوتوماتيك وبعتها من سنتين كان نفسى فى حاجة اعلى منها بس حصل ظروف والفلوس اتصرفت وكل اللى احتكم علية 65000 جنية بالتمام عايز عربية واسعة وعالية عن الارض لانى عايش فى الارياف وكل يوم الاقينى مشدود لعربية منها طبعا الماتريكس بس مش عارف 65 الف يجيبوا موديل كام واوتوماتيك وحالتها كويسة
انا اسف بس بجد محتار
يعنى الصينى الاقى ناس تقول جميلة وفى نفس الموضوع تلاقى ناس بتزم فى العربيات الصينى وناس تقول معايا الصينى وجميلة وبصراحة الاوبشن اللى فى اى عربية صينى كتير ومغرى لكن الكورى والماركات التانية فقيرة قوى فى الاوبشن وبردة قطع الغيار غالية مافيش عربيات قطع غيارها رخيصة غير الموديلات القديمة اللى تحت 98 ، 99 ودى عربيات ما فيش فيها حتى Abs اللى اصبح مهم جدا للثبات وتقليل نسبة انقلاب السيارات
نفسى حد يكون معاه اسبرانزا او جالينا يعنى مجرب ينصحنى لوجه الله
واسف جدا بس حضراتكم عارفين لما الواحد يكون بيدور على عربية بكل الفلوس اللى حيلته بيبقى عايز فيها كل حاجة ويوفر كمان ........
وانا شايف الاسبرانزا منتشرة وكمان عربية واسعة وموتور قوى هى صحيح 2000 cc بس استهلاك البنزين قريب جدا من العربيات ال 1600 يعنى الفرق يمكن لتر او لتر ونص فى ال100 ك مش كدة ولا ايه وبتهيألى الكورى لما نزل كان عليه هجوم جامد
فنفسى لما ندى رأى يكون عن تجربة علشان نفيد ونستفيد
وجزاكم الله كل خير

[alhoda]

طيب معلش بقى سؤال اخير انا من الدقهلية وكنت عايز انزل سوق القاهرة ادور يمكن الاقى حاجة متكونش على البال والخاطر وتفى بالغرض يعنى انا وحظى بس ناس كتير بتنصحنى انى استنى لبعد العيد وحجتهم فى كدة ان الاسعار بتبقى عالية قبل العيد لكن بعد العيد الاسعار فى السوق ممكن تريح شوية ايه رايكم
وانا بتكلم وبحاول افكر معاكم بصوت عالى لان مش هلاقى افضل من اخوانى فى نايل موتورز علشان استشيرهم واخد بنصيحتهم فلا خاب من استشار ... وشكرا لكل من ساهم بالرد فى الموضوع وربنا يديم المحبة بيننا

[safwat]

انا معايا جالينا ٢٠٠٦ عامله معايا ٩٢٠٠٠ كليومتر
الصراحه عربيه فوق الممتازه مع ملاحظه ان انا عندي c180
وفعلا مش عارف اركب عربيه تانيه بعد الجالينا

[alhoda]

انا معايا جالينا ٢٠٠٦ عامله معايا ٩٢٠٠٠ كليومتر
الصراحه عربيه فوق الممتازه مع ملاحظه ان انا عندي c180
وفعلا مش عارف اركب عربيه تانيه بعد الجالينا

انا كمان ميال جدا للبريليانس جالينا رغم تخوفى بسبب نصائح بعض الاعضاء بالبعد عن الصينى فياريت حضرتك تطمنى اكتر وتحكيلى عن تجربتك مع عربيتك وتقيمك لها حتى لو العربية دى مظلومة نرفع الظلم عنها ونوضح حقيقتها للناس ويا ترى اسعار الصيانات بتاعتها ايه وقطع الغيار اسعارها ومتوفرة ولا لأ وربنا يباركلك فيى عربيتك ويديك خيرها ويمنع عنك شرورها واسف على الاطالة بس دا من عشمى بما اننا اعضاء فى نفس هذا المنتدى الرائع وشكرا منتظر ردك

[ahmed_oth]

يا سيدى الفاضل لو تعبت نفسك شويه فى قسم البرليانس هتلاقى ابواب كتيره عن تجارب الناس مع العربيه ديه
ومن الاخر البرليانس بكل موديلاتها احسن وانضف واقوى عربيه صينيه
ونصيحه لك ابعد عن اى عربيه توكيله عز العرب سواء صينى او هندى او المانى او ,,الخ