جديد فى نادى البريليانس

[daridy]

اولا ازيكم يا احلى اعضاء
انا جديد فى نادى البريليانس fsv
عندى شويه اسئله كدا عاوز اعرفلها اجابات
اولا: موضوع السماعات اللى ورا انا شايف مكانها موجود بس تقريبا مفيش فيها سماعات
اعمل ايه عشان اركبلها سماعات وياترى اعملها فى التوكيل ولا فى اى مركز وخلاص ؟

ثانيا: موضوع الفوجات (فوانيس شبوره) اجيبه منين وراكبه فين برده وسعره وتركيبه كام تقريبا؟

ثالثا : عاوز اركب ريموت ووحده رفع وانزار فى العربيه عاوز اعرف اركبهم فين فى التوكيل ولا بره ولو بره يبقى فين وسعرهم كام هنا وهنا وهل لو ركبتهم بره هابغلسوا فى التوكيل ولا لاء ؟

رابعا: انا هاروح اعمل صيانه ال 2000 كم عاوز اعرف العنوان بتاع التوكيل فى القطاميه ولا فى ابو رواش وياترى هاتكلفنى اد ايه ؟

معلش طولت عليكم بس انا جديد زى ماقلتلكم

:-)

[sherifbaroid]

اولا :- الف مبروك على السيارة ربنا يا بارك لك فيها و يكفيك شرها
بص يا باشا موضوع السماعات فعلا فى مكان ليها فى الباب بس مافيش سلك واصل من الكاسيت لحد الباب انا افضل انك تحفر فى الفبرة اللى ورة احسن كمان جميع الابواب بها غطاء ابيض بلاستيك من الداخل فحرام تفك الباب,عنوان القطامية انت من السويس صح و انا كمان بص حتاخد الدائرى و تفضل ماشى لحد متلاقى على ايدك الشمال توكيل مرسيدس كمل و اول فتحة بعد الجامع حتلاقى علامة مكتوب القطامية ادخل فيها و حتلاقى محمد زكى بتاع كيا ثم توكيل برليانس بس المفروض تحجز الاول و دة الرقم 16224 سعر تركيب السماعات كان من فترة حوالى 900 جم بس هما مش مسؤلين لو حصل حاجة فحرام الفلوس.الفوج لايت مش عارف انت مجهز عندك تركب و لا هما عاملين 700 جم الاصلى لكن فى شارع دمشق الواحد 160 جم بس بيصفر بسرعة انا اقصد العدسة.الصيانة كانت حوالى من 350 الى 400 تقريبا

[Hmatchy]

بص انا مركب عده صوت كامله برة ومغير كل حاجة ماعدا الكاسيت
لو فى امكانيه انك تركب جى ام و سماعتين بيضاوى ورا يبقى زى الفل بس اعمل حسابك هتقطع فى الصاج
اما لو مش غاوى صوت اوى ركب سمعتين محترمين ورا و غير اللى قدام هتسمع صوت كويس بردو من غير جى ام او اى حاجة
بالنسبة لوحدة الرفع انا عاوزك تجرب و انت بتقفل تفضل عامل المفتاح على وضع الاغلاق فى الباب 3 ثوانى يعنى تلف لحد ما اللوك يقفل و تفضل كده 3 ثوانى لان ممكن تكون زى الجالينا فيها وحدة رفع
لو مفيش روح ركب عادى بس عند حد كويس
للعلم اى شغل بتعملو فى العربيه مش بيطلعها من الضمان الا لو اتسبب فى بوظان حاجة يعنى عمر ما مساعد يضرب فا يقولك علشان مركب انذار مثلا
فا اى حاجة او تعديل اعملو برة بلاش التوكيل بس اعملو عند حد نضيف
اما بالنسبه للصيانه اعتقد فى حدود 320 وعندك فى مركز فى جسر السويس وكيل معتمد اسعارهم ارخص من الوكيل شويه بس نفس مستوى الشغل
نصيحة ليك كل 5000 كيلو ربط عفشة متستناش كل 10000 يعنى مرة مع الصيانه ومرة مع نفسك

[daridy]

يعنى اروح لمركز الصيانه المعتمد اللى فى جسر السويس احسن
وياترى ده مايخرجنيش بره الضمان ؟
ولو صح عاوز اعرف عنوانه بالظبط عشان انا فى السويس

[Hmatchy]

لا \طبعا ميخرجكش برة الضمان لانو وكيل معتمد
هو ارخص ونفس مستوى الخدمه و اسرع فى الوقت
مكانو بعد سوق القنال قبل البافاريه بتاعت الطفايات و انت جاى من العاشر

[ostoraa]

مين اللي قال ان الجالينا فيها وحدات رفع انا جرت كذا مره اني ادووس 3 ثواني علي اللوك اللي بيقفل لقيته مش بيقفل الزجاج بيقفل العربيه بس

[tifalol]

بص انا مركب عده صوت كامله برة ومغير كل حاجة ماعدا الكاسيت
لو فى امكانيه انك تركب جى ام و سماعتين بيضاوى ورا يبقى زى الفل بس اعمل حسابك هتقطع فى الصاج
اما لو مش غاوى صوت اوى ركب سمعتين محترمين ورا و غير اللى قدام هتسمع صوت كويس بردو من غير جى ام او اى حاجة
بالنسبة لوحدة الرفع انا عاوزك تجرب و انت بتقفل تفضل عامل المفتاح على وضع الاغلاق فى الباب 3 ثوانى يعنى تلف لحد ما اللوك يقفل و تفضل كده 3 ثوانى لان ممكن تكون زى الجالينا فيها وحدة رفع
لو مفيش روح ركب عادى بس عند حد كويس
للعلم اى شغل بتعملو فى العربيه مش بيطلعها من الضمان الا لو اتسبب فى بوظان حاجة يعنى عمر ما مساعد يضرب فا يقولك علشان مركب انذار مثلا
فا اى حاجة او تعديل اعملو برة بلاش التوكيل بس اعملو عند حد نضيف
اما بالنسبه للصيانه اعتقد فى حدود 320 وعندك فى مركز فى جسر السويس وكيل معتمد اسعارهم ارخص من الوكيل شويه بس نفس مستوى الشغل
نصيحة ليك كل 5000 كيلو ربط عفشة متستناش كل 10000 يعنى مرة مع الصيانه ومرة مع نفسك

باشا هي سماعات البيبان بتاعت العربيه 10 سم ولا 13 ولا 16 يا ريت تقولي من فضلك

[Hmatchy]

على ما افتكر 16

[tifalol]

انت ماغيرتهمش ؟

[Hmatchy]

غيرتهم و مركب فى الابواب كلها
بس الكلام ده من سنه ونص فا مش فاكر بس ممكن اعدى على بتاع الكاسيت اسئلهولك

[shiko_sla]

طب انا عايز اغير الكاسيت بحاجة نظيفة dvd و كدة يعنى و اركب سماعات ورا ماتعرفش حد كويس و التكلفة حاتكون فى حدود كام

[Hmatchy]

لو دفى دى محترم بالجى بى اس هيخوش فى 3 الاف جنيه لوحدو
وعدة صوت 2 او 3 الاف انت ودماغك

[tifalol]

غيرتهم و مركب فى الابواب كلها
بس الكلام ده من سنه ونص فا مش فاكر بس ممكن اعدى على بتاع الكاسيت اسئلهولك

مركب ايه في الابواب ؟ سوني
سماعات بيزها حلو من غير السماعات الي علر الرف ورا يعني هحتاج صب ولا لأ
و غيرت الكاسيت ولا حاجه
معلش انا بتعبك

[Hmatchy]

مركب ايه في الابواب ؟ سوني
سماعات بيزها حلو من غير السماعات الي علر الرف ورا يعني هحتاج صب ولا لأ
و غيرت الكاسيت ولا حاجه
معلش انا بتعبك

انا عملتهم حاجة حاجة
جبت سماعتين ور ال جى صوتهم حلو و كويس فى البابين
بعد كده ركبت جى ام سيمفونى 280 وجبت سماعتين بايونير 380 فى الرف اللى ورا
وبعد كده جبت بازوكا جى بى ال 1000 و غيرت الجى ام ل 640 فور تشانيل وركبت شماستين

[tifalol]

كل ده من غير ماتغير الكاسيت ؟؟