سخونه الجالينا

[Ahmed Refaaat]

السلام عليكم . يا جماعه انا معايا جالينا 2007 والعربيه بسبب السخونه جابت وش سلندر قبل كدا . واشتريت وش جديد وركبته وطرمبه ميه جديده والريداتير كشفت عليه وسلكته والراجل قال تمام مافيهوش حاجه والمراوح تمام بس بتشتغل سرعه واحده . بس هتجنن بعد ده كله برضو العربيه بتسخن جامد فى الزحمه لدرجه انها قربت تدخل على الشرطه الحمره . فاانا مش عارف اعمل ايه خايف تجيب وش سلندر تانى لا قدر الله . لو حد عنده نفس المشكله دى او حل ليها ياريت يقولى . والف شكر لكل اعضاء نايل موتورز

[bluemail]

عليكم السلام
المراوح بتشتغل علي كام؟
والترموستات اخبارها ايه؟

[pepo2011]

لازم الاول تشوف الترموستات والمراوح بتشتغل امتي وهل مظبوطة ولا لاء
وبعد كدع هاتعرف مشكلتك في الكهربا في المراوح ولا في دورة التبريد

[tasaka]

والمراوح تمام بس بتشتغل سرعه واحده . بس هتجنن بعد ده كله برضو العربيه بتسخن جامد فى الزحمه

سبب السخونه على السرعه البطيئه بيكون عاده مراوح
سبب السخونه على السرعه اعاليه بيكون عاده رادياتير ا دوره تبريد

هل المراوح عندك المفروض بتغير سرعتها و دلوقتى لا ( سرعه واحده ) ؟ .. لو كده يبقى تحل المشكله دى اولا و تجرب

[abokoko]

الحراره علي سرعه ممكن تكون ترموستات الكوعه

[Ahmed Refaaat]

هى الترموستات انا كشفت عليها والحمد لله طلعت تمام . المروحه بقى بتشتغل سرعه واحده وبعد ال93 . فاانا مش عارف اعمل ايه . بفكر اركب مروحه تبريد اضافيه ايه راى حضرتك

[Ahmed Refaaat]

العربيه فى الزحمه الحراره بتزيد خالص . لكن على سرعه بتبقى تحت ال90 والحمد لله . يبقى كدا العيب منين .ولو حد يعرف كهربائى كويس ياريت يقولى عليه .

[tasaka]

العربيه فى الزحمه الحراره بتزيد خالص . لكن على سرعه بتبقى تحت ال90 والحمد لله . يبقى كدا العيب منين .ولو حد يعرف كهربائى كويس ياريت يقولى عليه .

سبب السخونه على السرعه البطيئه بيكون عاده مراوح
سبب السخونه على السرعه اعاليه بيكون عاده رادياتير ا دوره تبريد

هل المراوح عندك المفروض بتغير سرعتها و دلوقتى لا ( سرعه واحده ) ؟ .. لو كده يبقى تحل المشكله دى اولا و تجرب

[Ahmed Refaaat]

هى فعلا المروحه بتشتغل على سرعه واحده .

[Ahmed Refaaat]

لو حبيت اجيب حساس حراره بتاع مراوح الريداتير بس يكون بيشتغل قبل ال90 بحيث اعرف اشغل السرعه التانيه للمروحه . فهل فى نوع معين بتاع اى عربيه بس يركب عادى مع الجالينا ولا مافيش

[tasaka]

ما تغيرش طريقه عمل المراوح الاصلى .. و اعتقد ان اللى بيتحكم فى سرعتها هو كنترول المراوح ( غير متأكد )

اسأل كهربائى فاهم .. لو قال لك ان شغل المراوح كده طبيعى ( سرعه واحده على طول .. و مابتغيرشى سرعتها حسب درجه الحراره ) .. و ان سرعه المراوح طبيعيه و ليست بطيئه .. و ان اتجاه مرور الهواء من المراوح سليم و ليس معكوس .. يبقى تبتدى تدور على سبب ثانى

[Ahmed Refaaat]

هى مشكله العربيه دى ان السرعه الاولى بتشتغل على 93 لكن عمرى ماشفت السرعه التانيه الا لما افصل فيشه المروحه عن حساس الحراره المروحه بتبقى شديده . فاانا كنت بفكر اعمل اى حاجه بحيث احاول اخلى السرعه الاولى تحت ال90 والتانيه على 93 . فايه راى حضرتك . او لو حضرتك تعرف نوع معين من مراوح التبريد تكون مخصصه للسخونه العاليه ياريت حضرتك تقولى عليها واكون شاكر جدااا لحضرتك . وشكرا لاهتمام حضرتك بالموضوع

[احمد نور الدين]

غالبا السرعة التانية مابتشتغلش غير مع التكييف جرب لما العربية تسخن شغل التكييف وبص ع المروحة لو زودت سرعتها والعربية بردت يبقي انت محتاج تغير الترموستات كان في حد عمل الموضوع ده قبل كده في الجالينا دور علي موضوع في الارشيف باسم مشكلة الحرارة في الجالينا او حاجه زي كده