كل مايخص السياره ايمجراند 7 (emgrand7) الصينيه الجديده والسعر مفاجأه بضمان غبور

[احمد دعباس]

السياره رائعه واكثر من رائعه سيكتسح بها غبور كل السيارت المنافسه بنفس الاسعار
وهذه كماليات السياره
1500 سى سى مانيول
1- بور
2- تكييف تاتش
3- 2ايرباج
4-abs+ebd
5-سنتر
6- ريموت كنترول
7- سنسور بارك
8- مريات كهرباء
9- زجاج كهرباء
10- cd تاتش
11- جنوط اسبور 15
12- عدسات اضاءه اماميه متحركه
13- فوجات
14- كمبيوتر رحلات
15- عدادات ار بى ام
16- فرش جلد

والسعر مفاجأه

76000

[hugan]

مفيش كلام
هايوقف حال
الانوس
اللوجان
اسبرانزا 516
بي واي دي
واكيد هاياخد في الرجلين
صني الجديده
اوبترا
لو العربيه دي عملت مبيعات محترمه
هاتعطل علي عربيات كتير

[احمد دعباس]

فعلا رؤوف غبور بيفترى على العربيات اللى فى نفس المستوى العربيه فى الحقيقه خرافه اصلا شكلها وهم

[SGH]

جميلة عاوزيين المنافسة تبقى ف صالح المستهلك اللى استحمل كتير
و عاوزيين الخطوة الجاية الاتوماتيك علشان القاهرة الجميلة اللى ما ينفعش فيها المانيوال

[SGH]

emgrand7 تبع Geely و غبور واخد تجميها فمصر و هية شركة محترمة

[ابو اسلام]

فعلا رؤوف غبور بيفترى على العربيات اللى فى نفس المستوى العربيه فى الحقيقه خرافه اصلا شكلها وهم

الف شكر لحضرتك طبعا علي هذا السرد الجميل
وبما ان حضرتك مسئول مبيعات يبقي واجب عليك ( ودا من عشمنا)
ان حضرتك ترفعلنا صور طبيعية للسيارة
من الخارج والداخل وخصوصا من الداخل
وحتي رفع الصور يا ريت تقولنا هل لون الطبلوة والكراسي نفس الصورة اللي حضرتك رفعها ولا يختلف
لو مختلف ياريت تعرفنا عليه
معلهش هنتعب حضرتك معانا

[bassemali]

التنين الصيني قادم لقمع الكثيرين من اللي( بيستعبطوا) وبيبيعولنا عربيات مافيهاش أي أوبشن ( زي الفيرنا والانوس مع كامل إحترامي لملاكها) بضعف تمنها .

[hassanin_lada]

متابع وربنا يكرمنا

[ahmed76]

متابع .. اتوقع نجاح العربيه دى ... شكلها يجمع بين الاوبترا والنيسان صنى .. ويبقى السعر والجوده

[احمد دعباس]

ان شاء الله هرفع الصور الطبيعيه للعربيه من جوه ومفيش فرق غير شاشه الجى بى اس بدلها سى دى

[احمد دعباس]

موضوع الاتوموتيك ده هو لسه مصرحش بيه بس ياريت ينزل منها اتوموتيك

[dedi]

متابع هو فية ناس على الموقع قالت انة سعرها 749000

[michael rafik]

المهم سعرها هايكون كام ؟ علشان موضوع السعر ده مهم جدا يعنى لو سعرها نفس سعر الفيرنا او ارخص هاتضرب الدنيا

[sanhory]

دا تابلوه بالذمة ؟
انا شايف البريليانس fsv احسن منها بمراحل و بنفس السعر

[Dr.Mostafa Anwar]

ذهبت أمس لمشاهدة السيارة بمعرض شارع عرابي بالمهندسين

أولا السيارة كحجم خارجي في حجم البريليانس جالينا أو أكبر سنة

الموتور الخاص بها نفس موتور التويوتا كورولا موديلات 2002-2007 لكن بسعة لترية أكبر وفيه نفس تكنولوجيا VVT

الصالون من الداخل واسع وأنا من ذوي الوزن الثقيل وطولي 195 سم وكان كرسي السائق بالنسبة لي مريح جدا جدا جدا كالسيارة الكورولا المعروف عنها اتساع صالونها "2002" والكنبة الخلفية حتى مع ارجاع الكراسي الامامية بالكامل متسعة وتاخد 3 اشخاص متوسطي الطول والوزن بشكل مريح جدا جدا جدا

خامات التابلوه بلاستيك جامد وليس طري لكن جودة التقفيل تضاهي أو أعلى من الكوري عموما وعزل المقصورة رائع بمعنى الكلمة ... لما تقفل الابواب كأنك عملت Mute للأصوات خارج العربية زي ما بتعمل في التليفزيون كده ودي حاجة ابهرتني

الشنطة بحرررررررررررررررر وتقفيلها خاماته ممتازة جدا

في عازل فيبر على غطا الشنطة من الداخل وكذلك الكبوت

الفرش الجلد جيد لكن جلد صناعي وواضح جدا "مش جلد طبيعي"

مستوى الدهان وتفنيشه ما عجبنيش نهائي ولاحظت ان أكر الأبواب الخارجية مثلا فيها حتت مقشرة كده والمعجون ظاهر من تحتها ... وفي الزوايا بتاعت الأبواب والكابوت المفروض بيبقى في شريط كده سميك بيقفل أو بيحاوط أطرافهم مش موجود والدهان في الأجزاء الداخلية زي الكبوت من الداخل "مسيل" وظاهر جدا

لكن للحيادية ما أعرفش هل العربية دي بس اللي فيها المشكلة دي وللا كل العربيات ...

لكن كمجمل ... العربية دي بسعرها ده وإمكانيتها دي هتزلزل سوق السيارات في مصر وهتزيح حاجات كتيييييييير قوي في طريقها

بالمناسبة أ.جورج اللي قعدت معاه في الفرع أكد لي إن الأوتوماتيك هتنزل أول شهر 12 بزيادة 12 ألف جنيه عن المانيوال وهيكون فيها فتحة سقف .... أنا شخصيا مستعد أبيع الكورولا واشتري العربية دي لو فعلا نزلت بالسعر ده 87 ألف جنيه