لمبة التشيك check engine فى الأميجراند ec7 .. تجربة شخصية وطريقة حلها

[jackson_75]

نبدأ كلمنا بقول السلأم عليكم ورحمة الله وبركاته..

من يوم ما جبت العربية من شهر إبريل 2013 وأنا بقرأ مشاركات الأعضاء وشكواهم المستمرة من لمبة التشيك اللى بتنور لوحدها ، وكتير كنت بقراء أن فى ناس راحت على التوكيل ويصلحوها وبعدين ترجع تنور تانى ، بصراحة موضوع مقلق جداً ودماغى كتير كانت مشغولة بيه ،، لدرجة أنى كنت بسأل نفسى هى ليه مش بتنور عندى مع أنى بستخدم العربية كتير وبسافر بيها كل شوية ؟!!

ماهو يا أما العربية دى فيها حاجة غلط ..!!
يا أما الناس دى اللى بتمتلك العربية هى اللى بتمشى غلط وبتفول من أى بنزينة وخلأص ، أو يمكن فى منهم اللى بيحط بنزين 90 ومش فارقة معاه أى حاجة وخلأص وتمشى العربية ، 90 شغال ، 92 شغال ، ويمكن فيه اللى بيحط 80 وأحنا مش عارفين ، أو مكسوف يقول لحسن حد يتريق عليه ...!!!

بصراحة الموضوع ده كان شاغل تفكيرى جداً ، وكل شوية أقول فى نفسى ،هى أمتى هتنور عندى بقى عشان أبقى زى الناس كلها لأنى تعبت من الأنتظار ومن التفكير فيه وطبعاً الخوف من حدوثه ؟؟!!

بصراحة الموضوع كان بالنسبة لى ، عامل زى اللى عارف أن فى فيرس منتشر بالبلد ومعظم الناس أتصابت منه ، وأجالأً أم عاجلأً ستلحقه العدوى .. ربنا يكفينا ويكفيكم شر الأمراض جميعها ..

لحد ما حصلت المعجزة ، وجت من عند ربنا لوحدها من غير ما أسعى لها ..!!!

بالامس وأنا راجع ع المنزل وقبل ما أدخل على البيت بحوالى عشرة متر كده ، كان فيه حتة عالية بالأرض وقبة لم ألأحظها ،دخلت فيها وأخدتها تحت بطن العربية ، وسمعت بعدها زى صوت تكة من تحت ، بالظبط زى ماتكون العربية وهى معدية فوقها أكلت حتة من البروز اللى فى الأرض ده ..!!
بعدها مباشرتاً نورت لمبة التشيك ومارضيتش تفصل تانى ، بالرغم من انى دورت وفصلت أكتر من مرة ، وبعدين دورت العربية الصبح تانى ومازالت منورة بردوا ،بصراحة أتضايقت وفضلت متعكنن شوية كده ، بصيت فى النتيجة وكان يوم 13 يونيو ، وسبحان الله ،، التاريخ ده من كل عام لأزم يحصل لى فيه حاجة تعكننى وتفضل فى دماغى متشالة للسنة اللى وراها .. مش عارف ليه التاريخ ده بالذات مش راكب معايا 13/6 ،لدرجة أنى بفكر ماأطلعش من بيتنا بالتاريخ ده من كل سنة ،، هههههههههههههه..!!!

المهم صليت الجمعة وعملت كوباية شاى بالنعناع ولبست هدمة الشقا وتوكلت على الله ، فتحت الكابوت وفصلت البطارية ، بصيت على المية جواها ، تمام مش ناقصة ، فتحت فلتر الهواء ، نظفته بالبلأور ، نظفت السربانتية بالبلاور وغسلتها بالمية ، وبعدين رحت قافل الكابوت وأنا فاصل البطارية وفضلت لأكتر من 40 دقيقة بغسل فى العربية وألمعها ، فتحت الكابوت تانى بعد ما نشفت العربية، وصلت كابلأت البطارية ، مادورتش على طول غير بعد 5 دقائق كده بعد ما وصلت كابلأت البطارية ، وفضلت أفصل وأدور بعدها 5 مرات ، كل شوية أدور وبعدين أفصل ، وأرجع ادور تانى وبعدين أفصل ، وهكذا لمده 5 مرات متكررة ، ورا بعض ، ورا بعض .. وبعدين رحت مدور مرة واحدة ، وشغلت كل الأنوار كلها على العالى حتى الشبورة الأمامية واللى ورا فى الاكصدام ، ونور الصالون نورته كمان ، والكاسيت شغلته بس ماعلتهوش طبعاً عشان الجيران ، والتكيف شغلته على الأخر ، وفضلت سايب العربية دايرة لمدة 5 دقائق على هذا الوضع ، بعدها فصلت وطفيت كل الأنوار ورحت داخل على الكابوت تانى وجبت بخاخة منظف الأنجكشن الصفرة الطويلة اللى بتتباع فى محطات البنزين بحوالى 30 جنيه ، فتحت بالمفك من عند البوابة بعد فلتر الهواء وخليت أبنى يدوس بنزين وانا أرش بالبخاخة من عند البوابة ، بس هو ما عرفش يظبط رجله ، فالعربية فصلت منه ، بقيت أنا أدور وهو يرش من عند البوابة ، وتشم ريحة البنزينة طالعة نى مش محروق كويس ،وكل شوية أزود وهو يرش من الفتحة بتاعت البوابة ، بعدها قفلت ولميت عديتى ودورت الموتور وطلعت بيها مشوار مسافة 20 كيلو والتكيف شغال ، وفصلت ودورت وأنا ماشى اكتر من مرة .. النتيجة النهائية ..

ماشاء الله لأ قوة ألأ بالله ،، عشرة من عشرة .((-:

الخلأصة ..أنا حسيت أن اللمبة دى بتنور نتيجة اى خبطة بتيجى فى الشكمان من تحت ده ممكن يكون جزء كبير من سبب المشكلة لأنها نورت عندى بعد ما خبطت من تحت فى الحتة البارزة من الأرض , والجزء التانى المشترك بهذه المشكله هو أوكتان البنزين ، لأن العربية بتحتاج أوكتان فوق ال 92 وده مكتوب على التانك 93 فيما فوق ، عشان كده هتحتاج يبقى معاك بأستمرار حاجة من تلأتة تمشى عليها :-

-يا أما تشترى عبوة منظف الأنجكشن وكل فترة تفتح البوابة وتنظف بنفسك ودى على فكرة احسن من عبوة محسن الأوكتان اللى الناس بتشتريه وبيحطوه مع البنزين وهما بيفولوا.

- يا أما تفول كل فترة متقاربة ب 5 لتر 95 مع 92.يعنى تخللط ..!!

-أو تريح دماغك من وجع الدماغ ده كله وتفول 95 بأستمرار ، وده هيبقى أسوء الأختيارات ، لأنه أختيار هيبقى مكلف وعاوز قدرة مالية فى ظل غلو سعر البنزين ال95 .

وطبعاً فوق كل الخطوات السابقة وزيادة عليها ، تمشى بحذر عشان ماتخبطش فى الشكمان من تحت كل شوية مع المطبات ، أقصد التلأل اللى بيعملوها بالشوارع وبيسموها مطبات .. لأن الخبطة اللى بتحصل دى فى الشكمان من تحت بتسمع فى الحساس اللى راكب عليه ويمكن يكون ده جزء كبير من سبب أنارة هذه اللمبة كل شوية أول لما حاجة بتلمس الشكمان ، وعلى فكرة مش كل الناس اللى بتسوق بتاخد بالها من الأصوات دى ، يعنى ممكن العربية تتحك وتتخبط من تحت وهو او هى مش واخدين بالهم ، ممكن يكون عشان الكاسيت أو الراديو بيبقى شغال بصوت عالى ، أو بيتكلم بالموبايل ومش مركز ، وممكن يكون الأنسان اللى بيسوق بطبيعته لم يتعود ان يكز مع اى صوت جديد طارىء على الموتور أو الحكات اللى بتحصل ..
الخلأصة ، أحنا عندنا مشكلتين مرتبطين ببعض وهما اللىبيلعبوا دور كبير فى هذه المشكلة

1- حساس الشكمان ..
2- أوكتان البنزين ..

دى كانت بداية طرف الخيط فى المشكلة وطريقة حلها خطوة بخطوة ، يارب أكون أصبت الصواب فى ظنى ..!!!

على فكرة انا مش ميكانيكىبس أتعلمت حاجات كتير من كثرة القراءة فى أكثر من منتدى وأتعلمت اطبق اللى أ قرؤه عملى بنفسى ، أنابشتغل مرشد سياحى ، يعنى كل اللى فاكر أو اللى فاكرة أن الموضوع صعب ومش هايعرف يعمله بنفسه ، بقوله .. تعمل حاجة من ثلأثة

- يا أما تجمد قلبك وتشرب أسبريت ..

- يا أما تعملك كوباية شاى بالنعناع زى حالتى وتتكوكل على الله ، تسمى بأسم الله وتبدأ شغلك فى عربيتك بنفسك خطوة بخطوة حسب اللى قرائته ..!!!

- يا أما تقعد فى بيتكم أحسن تتدفى بالبطانية وتوديها التوكيل وتريح دماغك ، هههههههههه
بس ساعتها أنت اللى هتبقى الخسران لأنك هتفقد متعة الاحساس بطعم النجاح فى حل مشكلة كانت مضيقاك وربنا كرمك وأتغلبت عليها بنفسك ..!!!

ياريت أعرف رأيكم أيه بالكلأم ده كله ،،وياريت كل اللى عنده اللمبة لسة منورة يجرب يمشى على نفس الخطوات دى ويقولنا النتيجة بدها ..!!

يارب أكون أفدتكم ، تحياتى لكم جميعاً ((-:

[gamal saad]

تانى مرة برضو بقولك يامحمد باشا يا أبو الباشاوات كلهم تسلم بجد وكدة أنت أول واحد يكتشف الحاجة دى برافو عليك ربنا يذيدك من نعيمة ههههههههههههههههههههه وألف شكر وأنا أنشاء الله بعد كدة هتصل بحضرتك لو عطل قابلنى ولم أجد لة حل وجزائك عند الله

[M I D O]

بسم الله ما شاء الله علي حضرتك ربنا يباركلك يا باشا تقرير روعة

[mk3]

وجبت بخاخة منظف الأنجكشن الصفرة الطويلة اللى بتتباع فى محطات البنزين بحوالى 30 جنيه ، فتحت بالمفك من عند البوابة بعد فلتر الهواء وخليت أبنى يدوس بنزين وانا أرش بالبخاخة من عند البوابة ، بس هو ما عرفش يظبط رجله ، فالعربية فصلت منه ، بقيت أنا أدور وهو يرش من عند البوابة ، وتشم ريحة البنزينة طالعة نى مش محروق كويس ،

مفروض كده تغير بوجيهات

[jackson_75]

تانى مرة برضو بقولك يامحمد باشا يا أبو الباشاوات كلهم تسلم بجد وكدة أنت أول واحد يكتشف الحاجة دى برافو عليك ربنا يذيدك من نعيمة ههههههههههههههههههههه وألف شكر وأنا إن شاء الله بعد كدة هتصل بحضرتك لو عطل قابلنى ولم أجد لة حل وجزائك عند الله

أستاذ جمال سعد جزاك الله خيراً، وكلأمك ده كبير أوى عليا ،، يشرفنى أتصال حضرتك فى أى وقت وأهلاً وسهلاً بك ، بس على فكرة أنا مش خبير أوى زى ما حضرتك فاكر ، والمنتدى الرائع ده مليان ناس ذات خبرة قوية فى كل شىء أكتر منى بكتيررررررررر ،وأنا أتعلمت منهم ، وأحنا منتظرين بردوا أرائهم لأثراء الموضوع ولتعميم الفائدة ،، تحياتى لك

[jackson_75]

مفروض كده تغير بوجيهات

مالهاش دعوة بالبوجيهات خالص ، وبعدين بوجيهات أيه اللى تتغير على عربية زيرو لسة ماشية 6000 كيلو ..!!!

[MEGAREKAB]

ممكن حضرتك تقولنا على اسم منظف الرشاشات ده ايه وازاى طريقه استخدامه ؟

[bassem.naguib]

تسلم أيدك على المحاولة .. وفي اعتقادي الشخصي أن المشكلة دي تنحصر فقط زي ما انت قولت في أوكتان البنزين والحساسات .


وأنا ليا تعليق بالنسبة للجزئية دي .. وهي أولاً أن عبوة منظف الانجكشن بيتحط مع البنزين في التانك .. ثانياً اللي رشيته ده منظف للبوابة فقط .. وهو شيء جيد ويفضل عمله كل فترة طويلة لو حسيت أن العربية مش مظبوطة معاك ... ثالثاً محسن الأوكتان بيتحط برضه مع البنزين في التانك وهو في فكرته يقترب من أنك تحط 5 لتر تقريباً بنزين 95 مع باقي التفويلة 92 .. رابعاً فتح وغلق الكونتاكت أكثر من مرة بعد فك وتوصيل كابلات البطارية يسمى ايديال ليرن .. وهو بمثابة إعادة ضبط العربية على الوضع الديفولت بتاعها .. ومسح أي أيرور .

ولكن ما هي الخطوات الصحيحة لعمل الايديال ليرن للجيلي .. هل هي كما ذكرت (فصل البطارية ، تنظيف البوابة ، توصيل البطارية ، تشغيل كافة الكهرباء في العربية ، غلق وفتح الكونتاكت 5 مرات) أم خطوات أخرى ؟! ده اللي عاوزين نوصله .

-يا أما تشترى عبوة منظف الأنجكشن وكل فترة تفتح البوابة وتنظف بنفسك ودى على فكرة احسن من عبوة محسن الأوكتان اللى الناس بتشتريه وبيحطوه مع البنزين وهما بيفولوا.

ومشكور مرة أخرى على نقل التجربة .

http://www.nilemotors.net/Nile/103773-a.html

http://www.nilemotors.net/Nile/71086-a.html

ودول موضوعين ممكن يكونوا مفيدين لشرح الفكرة .. ولكن أكيد التنفيذ حيكون مختلف في الجيلي .

[jackson_75]

تسلم أيدك على المحاولة .. وفي اعتقادي الشخصي أن المشكلة دي تنحصر فقط زي ما انت قولت في أوكتان البنزين والحساسات .


وأنا ليا تعليق بالنسبة للجزئية دي .. وهي أولاً أن عبوة منظف الانجكشن بيتحط مع البنزين في التانك .. ثانياً اللي رشيته ده منظف للبوابة فقط .. وهو شيء جيد ويفضل عمله كل فترة طويلة لو حسيت أن العربية مش مظبوطة معاك ... ثالثاً محسن الأوكتان بيتحط برضه مع البنزين في التانك وهو في فكرته يقترب من أنك تحط 5 لتر تقريباً بنزين 95 مع باقي التفويلة 92 .. رابعاً فتح وغلق الكونتاكت أكثر من مرة بعد فك وتوصيل كابلات البطارية يسمى ايديال ليرن .. وهو بمثابة إعادة ضبط العربية على الوضع الديفولت بتاعها .. ومسح أي أيرور .

ولكن ما هي الخطوات الصحيحة لعمل الايديال ليرن للجيلي .. هل هي كما ذكرت (فصل البطارية ، تنظيف البوابة ، توصيل البطارية ، تشغيل كافة الكهرباء في العربية ، غلق وفتح الكونتاكت 5 مرات) أم خطوات أخرى ؟! ده اللي عاوزين نوصله .


ومشكور مرة أخرى على نقل التجربة .

http://www.nilemotors.net/nile/103773-a.html

http://www.nilemotors.net/nile/71086-a.html

ودول موضوعين ممكن يكونوا مفيدين لشرح الفكرة .. ولكن أكيد التنفيذ حيكون مختلف في الجيلي .

أستاذ باسم فى البداية أعتذر لحضرتك جداً على تاخرى بالرد ، سامحنى كنت مشغول وقليل الاستخدام للنت بالفترة الماضية ، بالنسبة لسؤال حضرتك ، كلأمك كله مظبوط بخصوص تعريف الأيديال ليرن ، والخطوات ديه كلها أنا كنت مرتب لها خطوة خطوة قبل ما أشتغل أى أنها لم تكن عشوائية ، وتعريف الأيديال ليرن ده انا كنت أتعلمته من واحد فاهم فى ميكانيكا السيارات كتب عنه مقال بالنت وأنا كلمته بالتليفون وأستفسرت منه عن بعض الأجزاء اللى ماكنتش مفهومة من مقاله ، ثم توكلت على الله ونفذتها بنفسى ، وأحنا كلنا بنتعلم من بعض ، ويابخت من تعلم العلم وعلمه .وعلى فكرة هى الخطوات دى كلها بتاعت الجيلى أميجراند بدليل أنها نجحت مع سياراتى والحمد لله , أحب أطمنك كمان أن السيارة حتى الأن وبفضل الله وبعد تعريف الأيديال ليرن مشيت بيها كتير واللمبة الحمد لله ما نورتش تانى خالص وكله تمام بفضل الله . تحياتى لك وأعتذر مرة أخرى لك ولكل الأخوة الأعضاء عن التاخير بالرد

[hamada1307]

مشكور على المعلومات المفيده لكن لى استفسار حضرتك ذكرت ان بداية المشكله حكه اسفل السياره ولكن عند علاجها لم تقترب من اسفل السياره وكانت خطوات حضرتك تنظيف الانجكشن فقط فما هى العلاقه بين اسفل السياره وتنطيف الانجكشن واللمبه المضائة [img3]http://[/img3]

[omar_rizk]

السلام عليكم

انا عضو جديد في المنتدي ولكن كنت متابعه من فتره وفسم الاميجراند بالاخص وانا اشتربت الابمي من حوالي شهر ونص وشغاله معايا الحمد لله زي الفل .... بس امبارح ظهرت ليا مشكله ان لمبه فحص المحرك دي نورت ومش عارف اغمل ايه وانا عامل بيها لخد الان 650 كم..... استني لما اروح للتوكيل في صيانه الالف ؟؟؟ ولا اغمب ايه ؟؟؟؟ برجاء الافاده من خبراء الايميجراند

[midooo_119]

السلام عليكم

انا عضو جديد في المنتدي ولكن كنت متابعه من فتره وفسم الاميجراند بالاخص وانا اشتربت الابمي من حوالي شهر ونص وشغاله معايا الحمد لله زي الفل .... بس امبارح ظهرت ليا مشكله ان لمبه فحص المحرك دي نورت ومش عارف اغمل ايه وانا عامل بيها لخد الان 650 كم..... استني لما اروح للتوكيل في صيانه الالف ؟؟؟ ولا اغمب ايه ؟؟؟؟ برجاء الافاده من خبراء الايميجراند

موضوع اللمبة ده حصل عند كذا حد و تقريبا هى مشكله فحساس الشكمان فالعربيه حضرتك ماتقلقش و لما تروح صيانه الالف التوكيل هيعملها و كانوا قايلين هيجيبوا سوفت وير جديد عشان اللمبة دى حساسه للبنزين فالسوفت وير مش هيخليها تنور من البنزين
لكن مفيش مشكله ماتقلقش

[jackson_75]

مشكور على المعلومات المفيده لكن لى استفسار حضرتك ذكرت ان بداية المشكله حكه اسفل السياره ولكن عند علاجها لم تقترب من اسفل السياره وكانت خطوات حضرتك تنظيف الانجكشن فقط فما هى العلاقه بين اسفل السياره وتنطيف الانجكشن واللمبه المضائة [img3]http://[/img3]

العلأقة أنها مرتبطة بحساس الشكمان اللى عند الفرن

[omar_rizk]

السلام عليكم


انا اللي كانت خصل معايا مشكله اللمبه فخص المحرك اللي نورت من حوالي اسبوعين ... امبارح بقي لقيت اللمبه طفت لوحدها ودورتها وسوقت بيها امبارح كام مشاور ولسه طافيه....عموما انا رايح الصيانه اول الشهر اللي حاي ... بس هي ليه طفت لوحدها؟؟؟؟؟

[hugan]

المفترض ان لمبه التشيك لما تنور
يبقي الكنترول سجل عطل في حساس من حساسات العربيه
المقترض ان العربيه تتحط علي جهاز كشف الاعطال
ويتعرف العربيه مسجله ايه بالضبط
سواء بوابه
او حساساس جاكمان
بيكون متسجل ويتعرف عن طريق جهاز الاعطال