تقرير استخدام الامجراند ل 5000 كيلو

[M I D O]

بسم الله الرحمن الرحيم

تقرير استخدامي للامجراند في شهر ونص وعمل 5500 كيلو ...

بسم الله نبدء ...

انطباعي عن العربية انها ما شاء الله جميلة و الحمد لله اختيار موفق .. العربية عيبها الوحيد انها تقفيل مصري ودة بيسبب بعض المشاكل الي ممكن تواجة الناس ومنهم انا قابلني بعض المشاكل لاكن بفضل الله بسيطة و اتحل معظمها في التوكيل وباقي مشكلة لسة متحلتش لحد دلوقتي ..
العربية في الاول قبل صيانة الالف و النقل علي 2 ونص ار بي ام كان تجميعها بطئ و تسارع ضعيف وطبعا مفيش تكييف وكان عندي 7 مشاكل ..
حدفة يمين وانا سايق ..
نور الاستوب الخلفي مبينورش غير لما ادوس فرامل جامد غير كدة وانا بشعر فرامل مبتنورش وكنت بدوس جامد عشان تنول و الي ورايا يعرف اني بهدي رغم انها مخاطرة انة لو قريب هيلبس فيا بس عدت الحمد لله ..
الكاسيت بيعلق .. ومتحلش و الكاسيت اصلا زبالة وقالولي تغيرة في صيانة الالف قلت بلاش نديلة فرصة تانية
عضة في المارشدير .. ولسة متحلتش . كانو هيعملوها في صيانة الالف بس كنت مستعجل وقلت هعملها في ال 5000
الجلدة الي علي الزجاج الامامي فكت ولزقتها ..
مش متذكر قابلني اية بصراحة تاني بس قابلني كمان مشكلتين تقريبا وعملتهم في الصيانة ..
بعد صيانة الالف و تغيير فلتر زيت و زيت 10000 شل العربية سحبها بقي افضل شوية ولاكن مازال ضعيف
بقيت انقل علي 3 ونص بدل 2 ونص و السحب بقي ما شاء الله افضل بمراحل و التجميع بقي افضل برضو لاكن محستش باي فارق او تغيير في العربية تاني ..
في خلال ال 5000 كيلو دول سافرت بالعربية تقريبا 10 مرات كل مرة ب 250 كيلو و العربية علي الطريق ما شاء الله اللهم بارك .. ثبات . عزل . فرامل . تكييف ( ساخن فقط ) . سحب ما شاء الله ممتازة ..
قابلني بالعربية 4 مواقف خطيرة ولولا ستر ربنا كان زماني لابس فيهم ..
الاول كنت نازل من كوبري بسرعة وقدامي عربية ومرة واحدة العربية الي قدامي دخلت شمال ابص الاقي في وشي تروسيكل ماشي علي 30 تقريبا وانا ماشي علي 80 وورايا عربية لازقة فيا قمت مدي انتظار وهديت عشان مخبطش في التروسيكل و الي ورايا عمال يقلب نور وانا مش عارف اعمل اية بس ستر ربنا الي ورايا دخل شمال وبقي ورايا فاضي لحد اخر الكوبري ..
التاني كنت علي طريق القاهرة وماشي علي 100 وقدامي عربية نص نقل محملة مواسير لاقيتها فرملت مرة واحدة و المواسير خطبت في العربية الي قدامها وانا وراة قمت داخل يمين جامد ولولا ستر ربنا كنت هخبط في موتوسيكل علية 3 افراد بس كنت ماشي جمبهم بالظبط لحد ما بعدت عن الحادثة الي حصلت دي
التالت كنت راجع البيت وماشي علي الشمال علي 120 الاقي عربية دخلت مرة واحدة شمال وانا جمبها وهتخبط فيها قمت دايس فرامل جامد العربية كلبشت في الارض وهوة دخل قدامي وطبعا لحقتة وطلعت *** امة شتيمة
الرابع كنت طالع كوبري وماشي علي 100 وفي لانوس علي الكوبري ناحية الشمال ماشي علي 60 وانا جاي من اليمين لاقيتة مرة واحدة دخل يمين و الكوبري فااااااضي وانا شغال كلاكس ودة مفيش وخبط في الرصيف الي علي الكوبري وكان ممكن اتقلب لولا ستر ربنا هديت ودخل قدامي وبعدين انا دايس كلاكس مستمر قام راجع يمين قمت منزل الازاز وطلعت ايدي وقلتلة تعالي ورايا جة ورايا ووقف عند اخر الكوبري وبطلت العربية وقفلتها ورحتلة لاقيتة بينزل الزجاج وقاعد جمبة بنت قلتلة انزلي قام نازل طبعا اخدتة علي جمب وهزقتة وقلتلة انت مبتفهمش ولا بتعرف تسوق قالي انا اسف وحقك تضربني كمان قلتلة والله لو كنت لوحدك كنت ضربتك بس عشان معاك واحدة مينفعش احرجك قدامها وروح الله يسهلك بس خلي بالك بعد كدة لان لو كان جري لعربيتي حاجة لاقدر الله كنت هشيلهالك عشان انت مهمل مش هتبقي غصب عنك ومشيت ..
العربية مميزاتها غير الوسع و الاوبشن و الكلام الي اتهري كتير دة .. الفرامل فعلا ما شاء الله ممتازة . الثبات ممتاز . التسارع جيد جدا . العزل ممتاز . العفشة ناشفة ومش عجباني . التكييف الساخن ممتاز .
المشاكل الي عندي لحد دلوقتي ولسة متصلحتش ..
عوامة البنزين عاوزة تتغير و قالو لسة موصلتش من الصين و النهاردة كلمت غبور قالي وصلت وسعرها 475 دة غير الضريبة قلتلة انا ضمان يا باشا مش هشتري حاجة قالي خلاص خلي المهندس الي عندك يبعت طلب بواحدة و هنبعتهالك ..
العضة في المارشدير الغبية لسة متعملتش و هحاول اعملها ان شاء الله في صيانة ال 5000
الكاسيت بيعلق بس مش كتير وانا راضي عنة حاليا لو علق كتير شوية هغيرة و ربنا يستر ويفضل معقول
العربية في المجمل اختيار موفق و ما شاء الله جميلة عدا بعض مشاكل التقفيل الغبية يعني مثلا الجلدة الي علي الزجاج عندي طارت معا الهواء وكانت هتتقطع ولزقتها في التوكيل يعني شوية مشاكل هبلة بس عيب طبعا من قلة الضمير في تثبيت الحاجة عشان يوفرو زي ميكونو لازقينها بنشا ..
تقييمي العام للعربية بعد 5500 كيلو ..
السحب / جيد جدا بعد 3 ار بي ام
التكييف / ممتاز الساخن . البارد جربتة وكويس جدا بس الحكم علية في الصيف مش دلوقتي لاني بشغلة و الحرارة برة العربية 25 وبخليها جوة 21 يعني مش مقياس لية
الثبات / ممتازة
الفرامل / ممتازة
العزل / ممتاز
استهلاك البنزين / جيد جدا في السفر و معقول داخل البلد يميل احيانا انة يكون عالي نسبيا داخل البلد
العفشة / ناشفة لسة ودة كويس عشان الثبات بس وحشة في المطبات
التوكيل / ايجي اوتو مركز الخدمة عندنا كويس جدا و فية مهندس اسمة احمد سعيد راجل محترم جدا وشخصية محترمة جدا وانا سعيد اني اتعرفت بية و اصبح صديقي بعيدا عن العربية / غبور ابو رواش .. زبالة .. تاخير في ارسال قطع الغيار و الكول سنتر اسلوبهم وحش و النهاردة زعقت لواحد في الموبايل من اسلوبة و قلتلة احترم نفسك و اتكلم عدل عشان انت متعرفنيش ممكن ابهدلك و احترم نفسة بعد الكلمتين دول
التقييم العام للعربية ..
السحب / 8/10
التكييف / 8/10 حار 9/10 بارد ( مش مقياس لحد الصيف عشان الحكم يكون موضوعي )
الثبات / 9/10
الفرامل / 9/10
العزل / 8/10
استهلاك البنزين / مش ثابت لاكن في المجمل ياخد 8/10
التوكيل / مركز الخدمة عندنا ياخد 8/10 ابو رواش ياخد صــــــــــفــــــــر /10
العربية في المجمل ما شاء الله اللهم بارك جميلة و ربنا يديمها عليا و علي ملاكها نعمة ويحفظها من الزوال
معلش طولت عليكم في الكلام و التقرير دة مني للمنتدي الي عرفت و اتعلمت منة كل حاجة و لكل اعضاء المنتدي المحترمين و بالاخص العضو dedi عشان اصالحة
معلش الموضوع غير منظم وغير مرتب بس معلش ماليش انا في التنظيم و الترتيب و الحركات دي

[mohamed hussei]

الف مبروك ياباشا لو العربية دية منزلتش تقفيل مصري كانت هتحقق نجاح ساحق

[adel_edrees]

تقرير معتدل و متميز يتسم بالموضوعية بعيدا عن كونك متحمس للعربية بالتوفيق أن شاء الله و أبقى قولنا عملت أيه في موضوع عضة المارشدير علشان أنا بأعانى منها بس أنا علشان العربية مش عربيتى عربية صاحبى فمش راضى أتكلم أنا قلت له على الموضوع ده و هو طنش لكن بعد سواقة لحد الفيوم حلوان و العودة مرة تانية العربية مكلبشة في الطريق كلبشة جامدة جدا و دى يمكن أكتر حاجة لفتت أنتباهى لكن السحب أنا ما حسيتش بيه قوى لأن أنا ما بأجريش بالعربيو و ما بأقرصش قوى و أنا مش ناسى موضوع العزومة

[M I D O]

الف مبروك ياباشا لو العربية دية منزلتش تقفيل مصري كانت هتحقق نجاح ساحق

الله يباركلك يا باشا و العربية محققة نجاح ساحق فعلا ولو نزلت تقفيل صيني او علي اقل تقدير تقفيل مصري محترم كان الانتشار دة اتضاعف و حلت مكان الفيرنا في المبيعات

[J A G U A R]

تقرير جميل وربنا يباركلك فيها .. كلها عيوب بسيطه ومقدور عليها .. يكفى انها بالنسبه لسعرها افضل من الفيرنا واللانوس والافيو والعربيات الكحيانه دى .

[هانى ظرف منصور]

ربنا يباركلك فيها

[M I D O]

تقرير معتدل و متميز يتسم بالموضوعية بعيدا عن كونك متحمس للعربية بالتوفيق أن شاء الله و أبقى قولنا عملت أيه في موضوع عضة المارشدير علشان أنا بأعانى منها بس أنا علشان العربية مش عربيتى عربية صاحبى فمش راضى أتكلم أنا قلت له على الموضوع ده و هو طنش لكن بعد سواقة لحد الفيوم حلوان و العودة مرة تانية العربية مكلبشة في الطريق كلبشة جامدة جدا و دى يمكن أكتر حاجة لفتت أنتباهى لكن السحب أنا ما حسيتش بيه قوى لأن أنا ما بأجريش بالعربيو و ما بأقرصش قوى و أنا مش ناسى موضوع العزومة

متحمس للعربية ازاي يعني يا باشا عشان ممكن حد يفهمها غلط ويفسرها اني بجامل للعربية

[M I D O]

تقرير جميل وربنا يباركلك فيها .. كلها عيوب بسيطه ومقدور عليها .. يكفى انها بالنسبه لسعرها افضل من الفيرنا واللانوس والافيو والعربيات الكحيانه دى .

تسلم يا باشا ومنور الموضوع

[M I D O]

ربنا يباركلك فيها

ربنا يخليك يا باشا

[adel_edrees]

متحمس للعربية ازاي يعني يا باشا عشان ممكن حد يفهمها غلط ويفسرها اني بجامل للعربية

لا والله أنت مش بتجامل التقرير فعلا ممتاز و بعدين أنا قلت التقرير محايد و وموضوعى و متميز ودى الحقيقة و أنت ذكرت العيوب قبل المميزات

[M I D O]

لا والله أنت مش بتجامل التقرير فعلا ممتاز و بعدين أنا قلت التقرير محايد و وموضوعى و متميز ودى الحقيقة و أنت ذكرت العيوب قبل المميزات

ربنا يخليك يا باشا ودة من زوقك

[dedi]

حبيبى يا ميدو تقرير جميل و مميز كالعادة وانا موش زعلان واحنا اخوات
مبروك ياباشا وربنا يكفيك شر الطريق و بلاش القرص الجامد
هو انت كنت عازم نصف ال فى المنتدى ووعدهم على عزومة على العموم انا مانسيتش و شكل الناس مانسيتش

[د.عماد صلاح]

علي البركه يا ميدو ....بس 5500 كيلو في شهرين كتير اوي الصراحه .....علي فكره شفت ايمي في القاهره فوانيسها الاماميه غريبه شويه هما غيروا الفوانيس ولا ايه

[M I D O]

حبيبى يا ميدو تقرير جميل و مميز كالعادة وانا موش زعلان واحنا اخوات
مبروك ياباشا وربنا يكفيك شر الطريق و بلاش القرص الجامد
هو انت كنت عازم نصف ال فى المنتدى ووعدهم على عزومة على العموم انا مانسيتش و شكل الناس مانسيتش

ربنا يخليك يا باشا وارجو انك متكونش زعلان مني ..
و بالنسبة للعزومة انا تحت امركم في اي وقت انتو حبايبي يعني

[M I D O]

علي البركه يا ميدو ....بس 5500 كيلو في شهرين كتير اوي الصراحه .....علي فكره شفت ايمي في القاهره فوانيسها الاماميه غريبه شويه هما غيروا الفوانيس ولا ايه

يااااااااااة عشان من شافك يا دكتور فينك كدة ..
انا عامل 5500 في بالظبط 50 يوم مش شهرين كمان
عشان بس بسافر كتير القاهرة و الفوانيس الي شفتها دي بتاعة الشكل الي بينزل في السعودية و الخليج المعتمة ودي بتتغير في التوكيل ب 2050 جنية وتديهم الي عندك