ظاهرة الإمجرند

[Eng.Geo]

الموضوع مش مخصص عن العربية بحد ذاتها
جيلي امجراند عربية جديدة رخيصة ( مش معناه انه في متناول الناس بس هي فعلا من أرخص العربيات ) شكلها من ورا جميل جدا ... من قدام تقليدية جدا
بقالي فترة بلفلف عالدائري ... مش فسح بس أجرائات ترحيل جيش ومشاوير ما يعلم بيها الا ربنا ... ما علينا
طبعا كلنا ملاحظين ان الدائري تقريبا كله شع لأبعد الحدود
كل يوم الاقي مش أقل من 6 عربيات (مش مبالغة) عالطريق معاهم امجراند وطايرين بيها ... حاسس اني شايف مرسيدس يا جداعان !
وانا ربنا هداني وبطلت جري
بس مش معقول فعلا كل يوم وكلهم بيغرزوا و يجروا
انا كل اللي في دماغي هو اللي راكب ده حاسس بأيه ؟ ... هي ثابته فعلا ولا مدياله ثبات وهمي ؟ ... أصلي شنطة العربية بتنط قدامي !
ده في عربية سابت الأرض من ورا !! .... وصاحبها مكمل ولا في دماغه ودايس !!!!!!!
لا مستحيل
قولت في مرة أشوف واحد من السخنانين دول واجيب أخره أشوف هيحصل ايه
في حتة كدة عالدائري بين المرج والسلام ( أقرب للسلام ) الأرض فيها بتطلع وتنزل جامد زي الموجة ... وخصوصا الأقرب للحارة الشمال وواخدة كيرف محترم
لقيت واحد امه داعياله جالي في المنطقة ده .... زودت سرعة لغاية ما عديت 160 وهو طاير ورايا .... جيت عند الملف ومرديتش أهدي وباصص في المراية عليه وكل العربية عمالة بتتنطت وسرعتهم متجيبش 100 ... الحمد لله عربيتي لازقة في الأرض مابتميلش حتي
فجأة الاقي أخونا اللي ماشي ورايا ضهر عربيته بقي جنبه والعربية بتطوح بعيد !
لوكنت أعرف انها كدة مكنتش سخنته بصراحة .... بس هو أكيد مش كل اللي بيسوقها غشيم عشان مايعرفش أخر عربيته ايه !
وقيس علي ده كتير ... كل يوم بلاقي من ده ... دائري وجوزيف تيتو ومصر اسماعيلية وكتير جدا ... مش فاهم ليه كل اللي راكبينها بيعملوا كدة !
أصلا موتور انا شايفه عيان ! مش بتاع جري خالص
وكل كام يوم ألاقي حادثة !
نفس الحال حصل بالظبط مع الفيرنا أول ما نزلت ... وبعدها السيراتو
كلنا عارفين الفيرنا دلوقتي وعارفين عيوبها وتقريبا كلنا سوقناها
والسيراتو والنطة الغريبة اللي بتنطها من ورا والعفشة ال aggressive
انا ماركبتش الأمجراند غير مرة واحدة وهي واقفة ... كانت زيرو وصاحبها كان بيشتكي ان البا ورا مابيقفلش !!! ... لازم يترفع وانت بتقفل عشان ترضي تقفل
يا ريت لو حد ساق العربية يقولنا أحساسه ايه موتور وثبات ... وخبرته في العربيات
ويا ريت اللي سايقينها او سايق اي عربية ماتتغرش بيها .. احنا ماشيين علي هوا
انا مش هاجم اي عربية ... كل عربية وفيها عيوبها ده طبيعي
شكلها جميل وسعرها كويس وربنا يبارك لكل واحد في عربيته

[Hunting_Eagle]

بعيدا عن اي عربية بعينها

تقييم ثبات اي عربية .. بيعتمد على العربيات اللي ركبتها قبل كده

يعني لما تبقى راكب عربية على قد حالها و تركب بعدها عربية متوسطة .. هتحس انك اتنقلت نقلة تاريخية

و العكس لما تبقى راكب عربية ثابتة و تروح تركب عربية اقل منها و الناس منبهرة بأدائها و تقول ان العربية دي مش قد كده هتلاقي الناس بتبصلك باستغراب و كأنك لا تفقه شيء

أول عربية ركبتها كانت لانوس .. و كنت بمشي بيها على 160

ولما ركبت سيات كوردوبا بعدها .. قولت انا ايه اللي كنت بعمله بالانوس ده

و بعدها لما ركبت السوبارو ليجاسي ال awd و الهوندا الأكورد و المازدا 6 .. قولت أنا أول مرة اركب عربية

دلوقتي بعد ما جربت السيارات الأفضل عمري ما اعدي ال 120 الا على طريق مفتوح .. و عمري ما اعمل غرزة

و هكذا .. كل ما تركب عربية افضل ثباتا هتستغرب الناس راكبة العربيات الأقل ازاي

قبل كده عملت تست درايف لل 316 .. عجبني جدا الموتور و كان ليا تحفظات على ثبات العربية !!

الكلام ده كله ينطبق على اي حاجة تانية غير الثبات .. التسارع و جودة الخامات و وسائل الأمان

طالما ما جربتش الأفضل .. هتعتقد دائما انك معاك أفضل حاجة

[S O P H O S]

انا بشوفها كتير فعلا
بس بصراحة مقبلتش جري بزيادة بيها
دايما الاقي الناس ماشين بهدوء

[hany63]

بعيدا عن اي عربية بعينها

تقييم ثبات اي عربية .. بيعتمد على العربيات اللي ركبتها قبل كده

يعني لما تبقى راكب عربية على قد حالها و تركب بعدها عربية متوسطة .. هتحس انك اتنقلت نقلة تاريخية

و العكس لما تبقى راكب عربية ثابتة و تروح تركب عربية اقل منها و الناس منبهرة بأدائها و تقول ان العربية دي مش قد كده هتلاقي الناس بتبصلك باستغراب و كأنك لا تفقه شيء

أول عربية ركبتها كانت لانوس .. و كنت بمشي بيها على 160

ولما ركبت سيات كوردوبا بعدها .. قولت انا ايه اللي كنت بعمله بالانوس ده

و بعدها لما ركبت السوبارو ليجاسي ال awd و الهوندا الأكورد و المازدا 6 .. قولت أنا أول مرة اركب عربية

دلوقتي بعد ما جربت السيارات الأفضل عمري ما اعدي ال 120 الا على طريق مفتوح .. و عمري ما اعمل غرزة

و هكذا .. كل ما تركب عربية افضل ثباتا هتستغرب الناس راكبة العربيات الأقل ازاي

قبل كده عملت تست درايف لل 316 .. عجبني جدا الموتور و كان ليا تحفظات على ثبات العربية !!

الكلام ده كله ينطبق على اي حاجة تانية غير الثبات .. التسارع و جودة الخامات و وسائل الأمان

طالما ما جربتش الأفضل .. هتعتقد دائما انك معاك أفضل حاجة

استاذ و رئيس قسم
النهارده سقت السيفيك و كانت الشوارع فاضيه عشان العيد و كان احساسي ان العربيه ثباتها وحش و مش بتاعة جري و ده طبعا بعد ما خدت على ثبات البيجو ٥٠٨

[2CODE]

من غير ما تحير نفسك

عربية بالسعر ده وصيني مستنيهم يحطولك 5link rear suspension ولا ايه !!!!!!!! ؟؟؟؟؟؟؟؟؟

أكيد حاجة على قد سعرها طبعاً علشان المصنع مش هيخسر :D

هو بس الشعب المصري قلبه جامد ياعم بيطلعوا يجروا بالفيرنا لغاية دلوقتي وبيجروا جنبي كمان !!!! بكون عايز اطلع راسي واقوله يابني اعقل انا 150 وسايب الدريكسون اساساً روح العب بعيد هههههههههههه

بس لاشك في انه عربية كويسه على سعرها بس لو ينزل منها اوتوماتيك تبقى عربية محترمة جداً لكن الناس تعقل دي مش عربية ثبات وجري وشد وفرامل بلاش بلاش بلاش !!!!!!!!

[egyptian_eagle]

متابع

[hugan]

العربيه عاجباك
بس انت مش عايز تقول

[abohazm]

انا هاقول تجربتى مع العربية دى بصراحة هى مع واحد صاحبى فى الشغل جايبها 2013 و عايز يبيع عشان العربية مانيوال المهم انا كمان كنت بغير العربية كان معايا برايد سايبا و كنت بسوى بيها الهوايل يعنى 160 على طريق مصر اسكندرية و اية يا ارض اتهدى ما عليكى قدى ههههههههههههههه
و الكلام دة يومى شغلى فى السادات
المهم قولت اشتريها منة و جربتها لفة صغيرة يعنى العربية واسعة و دمها خفيف و حلوة المهم ركبت معاة بعد ما بعت عربيتى و احنا رايحين الشغل الراجل جاب بيها قدامى 160 و العربية تمام و لا حاسس باى حاجه و العفشة حلوة جدا و التقفيل ممتاز بصراحة انا كا ابو حازم انبهرت ول----------------كن ماشتريتهاش واحد صاحبى جابلى عربية اوبترا 2009 و بالفعل اشتريتها و هنا ظهر الفرق بين الصينى و الكورى انا باخد غرز على 170 عادى الملفات 160 و عادى جدا فطليت من صاحبى اسوق عربيتة و احنا راجعين عربية عادية جدا و متواضعة مع العلم ان عربيتة 2013 و انا 2009 و انا راكب كورى تخيل بقا لو العربية اللى انا اشتريتها يبانى او اوربى اكيد كنت هاحس فى ال ام جراند انى راكب توكتوك
الدروس المستفادة من الرغى الكتير دة
ماتحكمش على عربية غير ما تكون مجرب عربية من نفس الفئة السعرية
المظاهر خداعة
الام جراند عربية حلوة على قد فلوسها بس حد يعرف يقولى بعد 5او7 سنين هاتتباع بكام؟؟؟؟؟؟؟؟؟؟؟؟؟؟؟

[adel_edrees]

و الله أي عربية ما ينفعش تجرى بيه بالسرعات الفلكية دى

[M I D O]

العربية فعلا انتشرت بشكل كبير وثبات العربية ما شاء الله جيد جدااا بس لو الارض مكسرة جامد وممسكتش الطارة كويس هترمي منك جامد واي عربية طبعا كدة الطريق بياثر عليها

[Ahmed Saad]

لا بصراحه في ناس مش بيهمها حياتها وعايزه تجري وخلاص بالعربيه وحاسس انه راكب بوجاتي فيرون وبيحصل معايا كتير الاقي واحد معاه لانوس وجاي جنبي وانا ماشي 140 بالباسات وعايز يشد معايا بروح مهدي خالص وسيبه يمشي حفاظا علي حياته اللي هوا مش خايف عليها والامجراند كعربيه شكل وابشنز كويس بس اداء مش هيبقي زي الياباني والكوري وطبعا الاوروبي بس هيا حلوه بالنسبه لتمنها واكتر عيب مضايقني فيها انها تقفيل مصري زفت لو كانت صيني كانت هتبقي حاجه تانيه

[محمد محليس]

والله انا شايف ان لما يبقي في طرق كويسه في مصر نبقي نحكم علي العربيات
وبعدين اي عربيه كويسه طالما هاتديني اللي انا عاوزة
سواء علي قد مشوار
سواء عشان افراد عائلتي
سواء مشوار في زحمه او حر واحتجت التكييف بتاعها
سواء سفر طويل شويه ومقلتش باصلها معايا
وكل ده هايتحقق في اي عربيه لو حافظت عليها
وبالمناسبه انا كنت مرة في قسم الهيونداي ولقيت واحد معاه النترا وبيقول ان العربيه ماغيرتش الكاوتش بتاعها من الزيرو
وهو كان رايح يعمل صيانه ال60000 كيلو
فكل حاجه حافظت عليها هاتديك اللي انت عاوزة

[kaza]

مش حاعلق علي الكلام لكن مش معني ان العربية صيني تيقي اي كلام انا شاري العربية لزوجتي ومعايا النترا2013وعربية الشغل نيسان صني وركبت قبلها الفئة الخامسة موديل99 دة غير عربيتي المفضلة الفيات الكروما واكيد ناس كتير ما تعرفش الكروما وموتورها التوربو لكن بصراحة الامجراند حلوة وثباتها كويس وافضل من الهيونداي والنيسان بمراحل بس حط في اعتبارك حجم العربية وارتفاع مركز الثقل وسمك العجل الجانبي الكبير كل دة بيؤثر علي الثبات لكن اظن مع جنوط 17 وعجل 205/45 او50الثبات هيكون افضل وهيكون كويس وحاجرب الموضوع دة قريبا
الايمي عربية كويسة جدا وصفقة بالنسبة للسعر ومش هتلاقي منافس بالامكانيات دى بالسعر دة لكن ما تستخفش بيها وتظن انها صيني اي كلام لانك اكيد متاثر بالجيلي الفروتة بتاعة الفرسان ومابل والحاجات اللي دخلت مصر في غفلة من الزمن لا الامجراند مختلفة تماما وصلبة وثابتة علي الطريق وبتحرج عربيات اغلي واثمن منها كتير علي الطريق وعن تجربة