الرائعة اسبيرانزا 620

[Dr MNM]

انا كان معايا اسبيرانزا 516 2008 اسود ميتاليك
و عملت معايا 25000 كيلو ماكانليش فيها اى شكوى نهائيا خلال السنة الاولى بس بعد كدة بدات تظهر خشونة العفشة و جبتلها مسامير زوايا لانسر مخلوعة من عربية لانسر استيراد متقطعة بعدها انتهت كل مشاكل العفشة الخشنة
بعتها من شهرين و جبت 620
حاجة تانية خالص من جوة
العربية على فكرة غاية فى الفخامة و القيامة و الشياكة
بسعر 87000 بس تركب عربية 2000 سى سى موتور ميتسويشى جالانت و فتيس ميتسوبيشى مانيوال اوتوماتيك.....
حاجة و لا فى الخيال فرش جلد فاخر يعدى ثمنة 3000 جنية العربية فيها تقفيل ابنوس فى غاية التناسق و الشياكة فى الابواب و الكنسول
اية عيوب العربية؟؟؟؟
مش عارف
ال516 ماعملتش معايا عيوب كهرباء او ميكانيكا خالص
متوقع ان ال620 هتكون تصنيع افضل و أدق
خاصة مع الموتور الميتسوبيشى الجالانت اللى مايختلفشى على جودتة اتنين
بصراحة
فى السعر دة حرام نشترى اى عربية تانية
حاجة اخيرة
استهلاك البنزين مش فارق عن 516 بشكل كبير و الضربية العالية هما دفعوها لمل نزلوا سعر العربية من 115الف جنية غاية 87 اف جنية
يعنى دفعوا ضريبة 20سنة
وشكراااا

[3ateef]

مشكور على المعلومات.....

[mmmmgogommmm]

ربنا يباركلك بس الضريبة كام باالظبط واستهلاك البنزين اد اية فى الصفيحة واية هى مسمير الزوايا ولك جزيل الشكر

[evram]

هي عربية شكلة طيارة فعلا و فاخمة جدا جدا

[hamdy]

ممكن صور اذا تكرمت؟؟

[motorola]

الف مبروك و ربنا يباركلك فيها
عندى استفسار هى سعرها نزل رسمى من 115 ل 87 موديل 2010
لو انا فاهم صح انزول الكبير دة سببة ايه خفضوا حاجة من مكونات السيارة؟ اصل الفرق ده يقلق
ياريت تقولنا الضريبة كام بالضبط و إستهلاك البنزين جوه البلد اد اية
شكراً اخى الكريم

[human]

و فتيس ميتسوبيشى مانيوال اوتوماتيك.....

هيه الاسبرنزا ستبترونك؟

[Dr MNM]

الاسبيرانزا 620 ستيبترونيك مانيال اوتوماتيك
بسالافضل تخليك على الاوتوماتيك استهلاك الينزين حوالى 8 الى 10 لتر فى المائة كيلو
على فكرة انا لسة فى التليين الضريبة 1200 فى السنة بتقل كل سنة 50 جنية
بس السعر لما نزل شال هم الضريبة
لية بقى نزول السعر ناس فى توكيل عيسى بتقول انة نازل شكل جديد موتور 2000 سىسى نفس موتور ال 516 مش جالانت و مكونات الربية الداخلية هتكون ااقل لان العربيات الالفين سى سى مش ماشية بعد الضربية الجديدة
و العربة فيها مكونات اغلى من قيمتها
خلاصة الكلام دى تصفية لموديل 620 بشكلة الحالى استعدادا لنزول شكل جديد بس مكونات ااقل علشان السعر يكون منافس
صور ال620 الجديدة موجود فى موقع نادى الاسبيرانزا و احكموا بنفسكوا على الفرق الكبير بين الموديليين

[human]

جميل
معلش بس العربيه ديه لو بيوزعوها ببلاش مش هشتريها

يعنى حضرتك مشترك من ديسيمبر 2008 و ماشتركتش فى اى مناقشه و النهارده عامل مداخلتين بس و الاتنين عشان تقول شعر فى الاسبرينزا!!

[ruicosta]

الراجل ماقالش شعر ولا حاجة الراجل بيقول رأيه فى العربية اللى جابها وجربها ولقاها حلوة بالنسبة له هو لازم الناس كلها يبقى رأيها زى رأيك

[human]

الراجل ماقالش شعر ولا حاجة الراجل بيقول رأيه فى العربية اللى جابها وجربها ولقاها حلوة بالنسبة له هو لازم الناس كلها يبقى رأيها زى رأيك

لأ طبعا
و كل واحد حر تعجبه العربيه

بس اللى انا شايفه انه مش مجرد واحد بيقول رأيه -- و ده رأيى وانا حر فيه برضه :)

مشترك من ديسيمبر 2008 و مافتكرش يخش غير دلوقتى غير عشان يقول على الاسبرنزا

الله اعلم بالنيات بس احنا شفنا حالات شبه ديه هنا قبل كده لاناس يروجون لعربيات بعينها

و كمان الكلام يجافى الحقيقه الموتور موش موتور جالانت حديث و لكن جالانت قديم يعنى متأخر تكنولوجيا بشويه محترمين و اللى معاه العربيه بيشتكى منها مش بيشكر فيها بشهادات ناس كتيره

[human]

انا قريت الموضوع تانى


ممكن اكون ظالم الراجل - على العموم ربنا يكرمنا كلنا و يغفر لينا خطايانا و يوفقه لو كان صادق و يسامحه لو ماكانش

[ALshahba]

ياريت يات جماعه اللي عنده اعتراض علي العربيه دي, يقول اعتراضه ويوضح عيوبها علشان نكون فاهمين العيوب
انا معروضه عليا بسعر خيالي بس قلت اسأل الاول
ياريت ماتبخلوش علينا بمعلوماتكم عن النوع ده
ودمتم سالمين

[Dr MNM]

بخصوص عدم مشاركتى فى المنتدى قبل كدة لانى كنت مشترك فى منتدى نادى الاسبيرانزا اما رايى فى العربية هو وجهة نظر
و انا قرات كتير تعليقات على العربية 620 قبل ما اشتريها كان كلة اعتراضة انها صينى و دى نظرة سطحية من غير ما يبص على مضمون العربية
يعندى رفض مسبق من قبل حتى التجربة
و زى ما قولت لحضراتكوا انا كان معايا 516 و كانت اكتر من ممتازة مفيهاش زرار او اشارة او حاجة و لو بسيطة علقت او باظت
و دة ادانى ثقة انى اشترى 620 اللى مفروض انها تكون اجود و افضل و
انا لما بنقل وجهة نظرى مش مقصود بيها انى اشجع حد معين على العربية دى و ان كنت بحب الخير للجميع زى اللى معاة موديل معين مرتاح فية لانة بيلاقى نفسة فى الشكل و الاداة دة اوعدكوا انى اكون اكثر تفاعل مع هذا المنتدى و شكرااااا

[ALshahba]

طيب ياريت تنقلي وجهة نظرك العملية لل620 لاني عايز اشتؤيها
شكرا ليك