الجنط أتسرق

[RAAFAT10]

الأخوة الأعزاء

اليوم حوالى الساعة 10مساء نزلت أشوف العربية فوجأت أن الجنط الخلفى أتسرق والعربية مرفوعة على حجر طبعا دى أول مرة تحصل لى حاجة زى كدة , ومعرفش أية التصرف المهم أنا كنت راكن العربية فى الشارع اللى قدام قسم مدينة نصر
وكنت فاكر أن الشارع دة ممكن يكون أمان علشان قدام القسم ,بس أنا كنت واهم وهم كبير , طبعا أول حاجة عملتها عديت الشارع علشان أعمل محضر طبعا عملولى المحضر وكانوا ناس كويسين بس أنتظرت شوية وبعد المحضر رحت تممت عليها وقلت يمكن سابوا الصواميل , لكن حتى الصواميل بتوع الجنط سرقوهم منهم للة ومعرفتش أركب الأستبن وسبتها دلوقت فى مكانها وربنا يستر وما يكملوش عليها لحد الصبح ,وبكرة هدور على صواميل ليها علشان أعرف أحركها
دلوقت أول حاجة أنا مش عارف أجيب الصواميل بتوعها منين ,ثانيا أجيب الجنط منين وهل هلاقية بالكاو تش ولا أجيب الكاوتش لوحدة والعملية دى ممكن تكلف كام ولو حد يعرف حد بيبيعة بسعر كويس أشترية منة
وهل التأمين يغطى السرقة دى ولا لأ وأذا كان ممكن أعمل أية بالظبط ؟
اللة يسامح اللى خدة لأن الجنط دة جديد لنج لسة ملحقتش أستعملة وأتهنى بية ,أرجو الرد على لو أمكن بسرعة علشان الحق أتصرف وماسبش العربية فى الحتة دى , وشكرا

[mohamed_e36]

الله يعينك والله
السرقه بقت كتير قوي ومن اماكن الواحد ميتوقعهاش مش عارف ليه الحراميه بقى قلبهم جامد قوي كده
معلش انا مش هاقدر اساعدك في سعر الكاوتش ولا الجنط بس حبيت اواسيك
قول حسبي الله ونعم الوكيل والحمد لله انها جت على قد كده

[max_ziro]

قول حسبى الله و نعم الوكيل
و انا اعرف واحد عندة طقم جنوط اسبيرانزا بس مش عارف ممكن يبيع واحد ولا لا
و حضرتك ممكن تفك صامولتين ن الناحية التانية و تمشى ب 2 بس بس بشرط انهم يكونوا على التوازى مع بعض
يعنى اتنين فى وش بعض
و متقلقش الصماويل دى ب المقاس يعنى حضرتك فك صمولة و انت قدام بتاع المسامير و خلية يجبلك صمولة ب المقاس هو بيقيسهم ب البوكوليز بيعرف انهم بتوع عربية و ربنا معاك ..

[egypt0777]

الجنط فى حدود ال 400 ج

[RAAFAT10]

شكرا لكل من أهتم بالموضوع . طبعا أنا تركت السيارة مكانها وأنا كنت خايف ييجوا يكملوا عليها بالليل والحمدالله تانى يوم نزلت أدور على الصواميل لقيت بتوع الفرنا بس مختلفين فى الطول وكانت الصامولة ب3,5 جننية .طبعا مانفعتش فرحت شارع دمشق لقيت الأصليين الواحد ب7 جنية فجبتهم ورجعت ركبتهم وخت العربية وغيرت مكانها وركنتها ,ما فيش ساعتين نزلت أبص عليها لقيت الغطاء مقطوع من عند الرفرف قلت لازم حد خبطها فكشفت الغطاء لقيت فية حكة فى الرفرف الشمال ؟؟؟؟؟؟؟؟.نعمل أية ؟ الحمداللة على كل حال مش عارفين هنلاقيها من الحرمية ولا من اللى بيسوقوا بغشمية . دة حالنا لازم نستحمل .المهم دلوقت أنا بحاول أجيب الجنط بنفس نوع الكاوتش وربنا يسهل .دعواتكم

[A.Saad]

فيه صواميل للجنوط بتبقى بمفتاح علشان مش تتفك الا بيه
التأمين المفروض بيغطى السرقة
بس لازم تعمل الاخطار فى خلال 48 او 72 ساعة من وقت الحادث

[د.محمود صلاح]

قدر الله وماشاء فعل .. السرقة بالفعل بقت منتشرة جدا ولحاجات الواحد ما يتوقعهاش ..

فيه مسامسير معينة لا يمكن فكها إلا بالاداة اللي جاية معاهم

وده بيبقى طقم 4 مسامير تحط في كل جنط مسمار منهم

جربهم كده

[RAAFAT10]

أنا فعلا عملت محضر بس مستنى صورة المحضر توصل للنيابة علشان أجيب صورتة وأروح بيها التأمين . ولا لازم أبلغهم قبل ما تعدى 72 ساعة والموضوع دة حصل يوم الخميس اللى فات يعنى عدت ال72 ساعة؟بالنسبة للصواميل دى فكرة كويسة بس بتتباع فين وتمنها كام؟

[volcano12]

فك مسمار من كل عجله و ركب الاستبن و امشى بتلاته لحد متوصل عند بيتك و تركنها أحسن... بس امشى على مهلك و اشترى 4 مسامير جداد على طول متكسلش

[mohamed_selim]

و حضرتك ممكن تفك صامولتين ن الناحية التانية و تمشى ب 2 بس بس بشرط انهم يكونوا على التوازى مع بعض
يعنى اتنين فى وش بعض
..

الافضل ياخد مسمار من كل عجله و كده هيمشى ب 3 مسامير فى كل عجله و امان اكتر لحد ما يشترى

[Eng_Mostafa_89]

لا حول ولا قوة الا بالله
السرقة بقت داء غرييييييييييب

[midh91]

لا حول ولا قوة الا بالله
حسبي الله ونعم الوكيل
انا لسة العربية FSV ما كملتش اسبوعين وواحد سرق طاسة الكاوتشة وتاني الجنط

[pharonicking]

السرقة انتشرت عشان مفيش حكومة ولا قانون "

[bobo_8000]

رد

الحمدلله ان انت بخير... ربنا يعوضك ...

[elmkaneeki]

لا حول ولا قوة الا بالله
حسبي الله ونعم الوكيل
انا لسة العربية fsv ما كملتش اسبوعين وواحد سرق طاسة الكاوتشة وتاني الجنط

الله اعلم بس انت جايز انت اخدت مطب جامد والطاسة طارت