كل شئ عن 620

[hafez75]

الأخ.المواطن الصديق ال 620 عن تجارب لو علي صوتها فده يعني إن.علبة البيئة عندك لازم تتغير وده عيب شائع عندنا غير كده يعاب على ال 620 إن.صوت المكنة واطي لما تيجي تشد مع حد ودمتم للنضال

اشكرك اخي الكريم على ردك وان شاء الله اكشف على علبه البيئة

[حسام محمد]

العربية ما شاء الله حلوة جدآ فى السفر وربنا رزقنى بأساسيات ها ممتازة موتور وعفشة و فتيس عدا بعض الكماليات إللى مش شغالة وجلد الأبواب فيه بعض التقشير فهى ممتازة بالنسبة للصيانة بعملها فى ورش فى صقر قريش

[حسام محمد]

كنت عايز أسأل لو فى حد عنده فكرة الستارة الخلفية ممكن أجيبها منين وبكام لأنها بتعلق عندى كتير

[yaser89]

السلام عليكم
شكرا يا جماعة على الموضوع الرائع قرأت بعض المشاركات وكانت مفيدة
لكن أنا ركبت جهاز انذار في السيارة (جهاز spy) أخذا بنصيحة البعض على غير اقتناع
المشكلة حاليا بعد تركيب الجهاز ان الزراير اللي بتقفل وتفتح السنتر لوك اللي موجودة في البابين اللي قدام مش شغالين ولما السنتر لوك بيقفل أوتوماتك عند سرعة اربعين بتكون مشكلة علشان تفتح الأبواب تاني لازم اعمل حركة رخمة كده
باختصار شديد ريموت العربية بيشتغل عادي (طبعا طول ما هو بره الكونتاكت) ريموت جهاز spy شغال أيضا
المشكلة في الزراير اللي بتفتح السنتر الموجودة في الباب
هل حد ركب جهاز انذار وحصل معاه كده ولا الأمور شغالة عادي؟ لأن الراجل الكهربائي بيقول لي ده تعارض بين الجهازين وأنا مش مقتنع قوي الصراحة وكمان مش عايز اظلمه علشان هو في تعامله محترم فقلت اتأكد منكم الأول
وشكرا جزيلا لكم

[mmmaaa]

بعد إذنكم بدور على واحدة 620 في حدود خمسين ألف
لو حد عنده واحده أو يعرف حد بيبيع يبلغني
وشكراً مقدماً

[fourseasons]

يا جماعة عاوز اغير من 516 ل 620 ايه رائيكم فى الموضوع ده

[akmm]

يا جماعة عاوز اغير من 516 ل 620 ايه رائيكم فى الموضوع ده

اتكل على الله وخلى باللك انها 2000 سى سى والضريبه حوالى 950 جنيه ومشكله الحجم ومكان الركنه فى البلد الزحمه ولازم تكون جيده مش شرط الموديل سنه كام لانهم كلهم شكل واحد من 2007 الى 2011 ولكن المهم العربيه واكشف عليها كويس وبالتوفيق .

[semsem85]

اهلا بيكم !

من اسبوع رحت علشان ارخص لان الرخصه انتهت
ولقيت تكلفة ترخيص 2000 سي سي اللي فات عليها سنة = 1050جنيه
انا استغربت وقلتله ليه هوا مش المفروض تقل وتكون اقل من كده, قالي ماهي هيا كده اقل من الجديد ب50 جنيه لان عربيتك اقدم سنة
ولقيت ان موديل السنة لل2000 سى سى = 1100جنيه وبيقل 50 جنيه سنويا

ودفعت تأمين 112 ج ورسوم ورق 10ج وبس , مفيش حاجه اسمها اكراميه واو اي حاجه تحت الترابيزه

الاجمالي
1050+112+10= 1172جنيه رخصة سنة واحده

يعني كده حضرتك الترخيص والضريبة حاليا لو هرخص او السنه تبقي 700 جنية لو موديل 2007

[semsem85]

ملقتش احسن مكان اسأل عن استفساري غير هنا من اللي جرب العربية قدامي واحده 2007 فبريكا عاملة 60 ألف كيلو كلها زي الفل ب 60 ألف جنيه ايه رايكم عربية اعتمادية ولا اجيب ميجان 2006 هتكون في نفس السعر ارجو منكم الرد وشكرا

[akmm]

ملقتش احسن مكان اسأل عن استفساري غير هنا من اللي جرب العربية قدامي واحده 2007 فبريكا عاملة 60 ألف كيلو كلها زي الفل ب 60 ألف جنيه ايه رايكم عربية اعتمادية ولا اجيب ميجان 2006 هتكون في نفس السعر ارجو منكم الرد وشكرا

تقريبا كلنا وسبق ردينا على حضرتك ................. اعمل استخاره وشوف هترسى على ايه .

[ALshahba]

ترخيص 620...تاني مره

السلام عليكم ورحمة الله
اصدقائي وحشتوني جدا ..... انا مادخلتش هنا من وقت طويل ...... كنت بخش علي صفحات تانيه فى نفس المنتدي

المهم انا عايز احكيلكو علي الترخيص لاني رخصت قريب
الرخصه انتهت ورحت رخصتها فى اول اكتوبر اللي فات كالمعتاد ....و انا بكره اليوم ده لانه زحمه جدااااا وبيكلفني كتير والدنيا مالهاش اي قواعد يتمشي عليها
بعد عذاب لما وصلت للشباك الموظفه قالتلي تمن الضريبه =930ج .... اقولها ازاي دي موديل 2010 يعني المفروض اخرها 850ج ... قالتلي ده اللي قدامي يا استاذ

المهم انا غالبا بدفع عند منفذ البريد اللي جوا المرور .... بيكون رايق جدا وبقعد مع الموظف جوا وبيديني الورقه بتاعت التراخيص كلها وبقعد اقرأها بهدوء وبلاقي فى الاخر اني بدفع اقل من شباك المرور......مش عارف ازاي
المفاجئه .!!!!
مالقيتش البريد جوا المرور ....... !!! استغربت ولما سألت قالولي انه اتشال ولو انا عايز ادفع هناك اروح بنفسي لاي منفذ بريد خارج المرور
قلت سبحان الله ..... يعني لما الناس تستريح من حاجه لازم تلغوها ولما يكرهو حاجه تستمروا فيها....!!!!
المهم رحت زي الشاطر دافع الفلوس والتأمين وشراء ورق(لحمه)بتاع المرور وظرف(لحمه)اجباري مالوش اي لزمه

الاجمالي 930+112+20=1062ج كامله من غير اي رشاوي(اكراميات) او خلافه
المخالفات = 0ج والحمد لله

دمتم فى امان الله

[ALshahba]

من وجهة نظري المتواضعه انا شايف ان موديل 620 من اجمل موديلات اسبيرانزا
ماعدا تجهيزات الزجاج ..... افضل نوع 516

بس طبعا التسارع بتاع 620 بطئ فى الاول .... وده ممكن يضايق ناس كتير وممكن مايفرقش مع ناس كتير

كان نفسي تنزل "الانفي" اوتوماتك وفتحة سقف ....... بس الواضح انها تطوير ال516 (مش عارف قى ايه) ومنزلنها بشكل جديد ....مع ان المفروض من سياسات اي شركه انها تطور من نفس المنتج بنفس الاسم وتقدمه بشكل افضل وامكانيات اعلي او علي الاقل تقدمه مع تلافي اخطاء الاسبق ....لكن سياية اسبيرانزا مختلفه ....وده انما شايفه مش كويس من وجهة نظري

الحاجه التانيه اللي عايز اتكلم فيها:
- اسم الصيني فى مصر مازال سئ جدا ومحدش مقتنع بيه الا المضطر......مش عارف ليه
- اسم اسبيرانزا مازال مش حلو وبيعتبروها عربيه تعبانه ..... ومش بتنفع غير فى التاكسي

لكن لو جيت اتكلمت عن "البريليانس" الناس تقول " لا لا لا لا دي حاجه تانيه خالص ..دي البافاريه" ..... طبعا انا بضحك جدا من القول ده ...لان الناس بتعتبرها bmw..... وهي بريييييئه تماما عن تصميم او صناعتها او قطع غيار البي ام .... لكن الناس بتحب تتمسح وخلاص
بل بالعكس ....الاسبيرانزا امكانياتها اكتر من البريليانس ..... والسعر اقل وقطع الغيار متوفره واقل فى السعر
بس تقول ايه للعقول اللي لسه بتقول "المرسيدس مرسيدس....الالماني الماني" وهي مالهاش اي دعوه بالالماني

وده يا جماعه خلاني اشعر ببعض الاحباط وخيبة الامل فى عربيات بقالها من 2006 حتي الان يعني 7 سنوات حتي الان ولسه الناس خايفه منها بل وبتقول فيها كلام وحش جدا
كل ده خلاني بجد افكر ابيع واشتري اي موديل تاني يكون اوروبي او ياباني ....لكن العربيه بصراحه كويسه اوي ورخيصه جدا فى قطع الغيار
انا مثلا اول مره اغير تيل فرامل من ساعة ماشتريتها ..... لسه مغيره من شهر عامل امامي وخلفي =70+65=125ج وتكلفة تركيب =30ج وبكده يكون المجموع =155ج
شوف كده اي عربيه اوروبي او اسيوي تعمل كام فى الحركه دي
انا تقريبا يوماتي علي صفحات الاتي
1-فلونس
2-بيجو (508)
3-كورولا
4-بي ام
5-سيراتو
وبلاقي فى التكلفه كلهم غاليين جدا بالنسبة للاسبيرانزا ..... وماتقوليش معمره ..... خش كده علي الكورولا وشوفو الفضايح فى تغيير التيل مع الطانبوره كل 25الف كم وساعات تيل بس وشوف بيتكلف كام
انا مغير التيل علي 68الف كم بعد 3 سنين !!!

بس يمكن فعلا ان الانواع اللي ذكرتها فى الاعلي دي تسارعها اعلي بكتير من الاسبيرانزات كلها .... اعادة البيع كويسه وسريعه
وحاجات كتير اوي ياجماعه .....فاعذروني لو كنت بقول عايز ابيع ....بس ده بجد من قرفي

ودمتم فى امان الله

[ALshahba]

يا جماعة عاوز اغير من 516 ل 620 ايه رائيكم فى الموضوع ده

توكل ومش حتندم الافى الاتي:
1-تكلفة الضريبه غاليه
2-التسارع فى الاول بطئ ابطأ من 516
3-حتفقد خواص الزجاج الكهربي من وحدات رفع والنزول التلقائي(التاتش)

اتكل على الله وخلى باللك انها 2000 سى سى والضريبه حوالى 950 جنيه ومشكله الحجم ومكان الركنه فى البلد الزحمه ولازم تكون جيده مش شرط الموديل سنه كام لانهم كلهم شكل واحد من 2007 الى 2011 ولكن المهم العربيه واكشف عليها كويس وبالتوفيق .

موضوع انها 200 سي سي ده مش مشكله خالص......بقولك وعن تجربه انها بتوفر كويس ....او تقريبا زي 516 طبعا لوماشيك عادي .....مش بتكلم عن الشد والحرق لانه ده بيختلف من شخص الي اخر
ولو بتمشي علي طرق سريعه كتير ..........حتوفرلك اكتر من 516 عن تجربه فى العربيتين(كان عندي 516)

اما الضريبه ....زي ماقلتلك فعلاغ كتير مش اقل من 900ج

الحجم ليس بالعائق خاااالص .... حتمشي عادي جدا وحتركن برضه عادي .....ده بيعتمد علي مهارة السائق

اكشف عليها كويس وياريت تكون حاله جيده ومش متهاتنه
ولو متهانه فتكلفة توضيبها رخيصه جدا بالمقارنه باي موديل تاني

[akmm]

-حتفقد خواص الزجاج الكهربي من وحدات رفع والنزول التلقائي(التاتش معلش الجزئيه دى مش فاهمها ياريت توضيح ولسيادتك جزيل شكرى ...........

[ALshahba]

-حتفقد خواص الزجاج الكهربي من وحدات رفع والنزول التلقائي(التاتش معلش الجزئيه دى مش فاهمها ياريت توضيح ولسيادتك جزيل شكرى ...........

يعني اقصد ان موديل 516 فيها:
1- وحدات رفع ........ مش موجوده ف620
2-زراير الزجاج تفتح كامله من دوسه واحده(نظام التاتش) ........ مش موجوده ف620(الا زجاج الساق فقط)