مشاكل فى a113 وياريت سرعه الرد

[bebo2010]

السلام عليكم ياجماعه

انا اشتريت العربيه a113 من حوالى شهر ونص وكنت جايبها الى حد كبير مفهاش عيوب غير الاتى :

1-فى رعشه ملحوظه فى عصايه الفتيس فى الغيارات الى تحت ( يعنى التانى والرابع) (روحت للتوكيل قالولى هنغير عصايه الفتيس ولغايه دلوقتى لسه مجبوهاش من شهر )

2-لما برجع مرشيدير بلاقى العربيه بتنتش بعد مااطلع بيها مرتين كده وبعد كده ترجع كويس (فى التوكيل قالولى ده الطبيعى وانا مش مصدقهم خااااااااااالص )

3- الدبدبه بتاعه المساعدين لما امشى فى طريق شبه مكسر شويه (بردو قالو عادى بس انا مش مصدقهم وفى نفس الوقت مش قادر اغيرهم لانهم مجبوش زيت ولا نقطه حتى )

وبعد كده بدائت مشكله غريبه تحصل معايا وهى لما بكون بحود فى ملف ويكون الطريق مكسر وانا ماشى بسرعه بطيئه بس مش بطيئه اوى بسمع صوت ترزيع وتقريبا جاى من تحت الدركسيون ومش عارف اعرف مركز الصوت ده منين بالظبط وعملت اكتر من تجربه وهقلوكم عليها

1- جربت وانا بحود بالعربيه افصل بدبرياج وبردو سمعته

2-قولت يمكن من الفتيس او عصايه الفتيس فمسكت العصايه جامد وانا بحود وبردو سمعته

3-ربط كل العفشه والمساعدين والبطاحات وكمان علبه الدركسيون وبردو سمعته

4-قولت ممكن يكون طالع من الدركسيون ذات نفسه فرحت عليت الطاره على الاخر فسمعته بس خفيف شويه ..... روحت نزلت الطاره لتحت خالص فلقيته بقى اوضح

فمش عارف ده ايه بالظبط بس الى انا شبه متاكد منه انه صوت ترزيع من سوسته ما فى العربيه ومش مظبوته كويس على قاعدتها ومش بالضروره تكون سست المساعدين

معلش ياجماعه انا طولت عليكم بس ياريت لو حد عنده حل للمشاكل دى فياريت متبخلوش عليا

[egypt0777]

و الله حقلك ايه بس

ما احنا بنقعد نحذر الناس عشان ما يقوش فى عربيات ابو افتوح

ده يا سيدى مشكلة مساعدين و لازم تتغير -- ما فيش حاجة اسمها هى العربية كده اقلم نفسك عليها -- و من الاخر مش حتاخذ حق ولا باطل معاهم.

الدب فى العربية ده بتبقى بوش فى علبة الدركسيون و لازم يتقرط عليه

عيب العربيات ده كلها العفشة

ربنا يعينك على ابو الفتوح و تكمل معاه مع انه زى قلته

[meedoo69]

السلام عليكم
مشكله الدبدبه 90% من الكاوتش الله يسامحهم كاوتش ماركه بس ناشف لما حطيت نتروجين الصوت قل كتير والعفشه اتحسنت ده ما يمنعش ان المساعدين ناشفين يعنى خدمه شاقه لان فى المطبات الجامده مش باسمع صوت الدبدبه باقى الملاحظات مش موجوده عندى حرب تروح الصيانه فى الكويت و البلاد العربيه فى الدقى شارع التحرير الناس هناك فاهمه مش زى التوكيل الاصلى شويه مهندسين صغيرين بيتعلموا فى العربيه

[Haitham10]

طب ياجماعة ممكن سؤال
لو انا من الشرقية وعاوز اقرب مركز صيانة اعمل فيه صيانة الالف فين وبتتكلف كام

والتكييف عندي فصل ..... الكباس شغال وكله تمام تستني الهوا الساقع متلاقيش مهما تعمل
اوكرة الباب فصلت
الدبدبه دي ورعشه الطارة والفتيس عندي برضه
والعربيه تحس سلانسيها عالي يعني علي التاني من غير اي دواسة بتوصل 40 وكانك مشغل مثبت سرعه

بكلامكم ده طمنتوني هل التوكيل والضمان ليهم لازمة ولا اشتري دماغي من دلوقت بما ان العربيه عامله تقريبا 200 كيلو
وفيها حاجات غريبه عماله تحصل مع ان الاستخدام تقريبا نص ساعه او ساعه كل اسبوع

[bebo2010]

-طبعا الناس كلها مشكوره على ردها وفعلا ياميدو انا سألت ولقيت ان الدبدبه دى موجوده فى كل العربيات وانا كده او كده رايحلهم تانى بس لما يجيبوا عصايه فتيس (وده طبعا بعد تقريبا شهر ونص ولما صعدت الموضوع لاداره شركه ابو الفتوح وهم وعدونى انهم هيفروها الاسبوع الجاى ) ولما هروحلهم مش همشى الا لما يشوفوا موضوع الترزيع الى فى الدركسيون ده كمان ان شاء الله
-وبالنسبه للعضو egypt0777 فياريتك كنت موجود قبل ما اشتريها بس هنعمل ايه قدر الله وماشاء فعل (بس انا بردو عندى وجهتين نظر وهقولهملك وليك طبعا انك تتقبل الرأى بتاعى او لا : اولا ومن الاخر كده متطلبش انك تركب عربيه فيها كل الامكانيات الرهيبه دى و ب 50 الف جنيه وتتوقع انها تكون مفيهاش مشاكل يعنى بمعنى اوضح هى العربيه بالتمن ده لازم يكون فيها عيوب كتير ومحدش يضحك على نفسه ويقول انه هيركب بى ام ب 50 الف وتانى حاجه وبمنتهى الصراحه عربيه والدى وهى هيونداى فيرنا وبردو كان فيها عيوب صناعه وابرزهم ان المساعدين ضربت وهى لسه مكملتش 5000 فقصدى اققولك ان عيوب الصناعه دى موجوده فى معظم العربيات ومش شرط الصينى بس )
-وبالنسبه ل Haitham10 فرأى الشخصى انك متخرجش نفسك من الضمان مهما حصل ولو انت تعبت من الناس الى هناك اشتكى للمركز الرئيسى بتاع ابو الفتوح وتفضل تحاول معاهم على قد متقدر علشان انا شايف ان الضمان بيبقى مهم جدا وممكن لاقدر الله حاجه كبيره تحصل فى العربيه ويكون عيب صناعه وهيكلفك كتييييير جداااا وتروح للضمان يقولولك انت خارج الضمان وبالنسبه لمركز الصيانه فانا معرفش وانا عموما بروح الى فى ابو رواش

[ahmed_a113]

بصوا انا مش عارف الحاجات دى إيه بس الدبدبة دى موجودة فى عربية حجمها صغير عشان المساعدين بيكونوا أقصر من العربيات السيدان
جرب البيكانتو و لو مفيهاش كده يبقى أكيد أنا غلطان
عامة أنا معايا إسبرانزا a113 موديل 2009 عامل بيها 63638 كم و معملتش ولا صيانة فى التوكيل لأنه فاشل و كل حاجة بعشر أضعام تمنها الحقيقى و كل الصيانات بعملها برة يعنى مثلا العفشة عند عفشجى و الكهرباء عند كهربائى و الزيت بغيره فى موبيل و هكذا كل حاجة
و كل 4 أو 5 شهور بسافر بيها و بصراحة مريحانى جدا و مفيهاش أى حاجة ممكن تكون أرزاق
مرفق صورة السيارة و هى عاملة 57000 كم و معدية ال 180 كم / س و كان لسه فيها بس الطريق م ساعدنيش

[rodyA113]

السلام عليكم ورحمة الله وبركاته
انا كمان معايا نفس العربيه وفعلا غيرت المساعدين في الضمان وغيرت المساعدين بعد ما اتركبوا لان كان فيهم عيوب صناعه الحمد الله كنت في كربهالمهم فعلا عيب الاساسي للعربيه دي هي المساعدين والعفشه وانصح حضرتك انا عملت الاطارات او الكاوتش بالنتروجين وخلاها نعمه معايا في المطبات اكتر من الاول لكن انا مازلت بعاني من العفشه والدبدبه وقالولي ان ممكن الطلمبه او الطبله مش فاكره قوي بتاعهالمساعدين مش مظبوطه ممكن حضرتك تسال علي الموضوع ده انا كمان هدخلها صيانه كمان اسبوعين لانهم زهقوا مني شكوي من الدبدبه في العربيه ...وكان ليا سؤال بحس ان الابواب ريحت وكمان في فرق بين البدي نفسه والفانوس هل العيب ده يتصلح عادي في الصيانه؟؟؟؟ مع العلم ان عربيتي موديل 2008 استيراد مش محلي ربنا يحفظكوا جميعا

[mantis]

اسبرانزا a113

ياجماعه انا جبت اسبرانزا a113 و من تاني يوم العربيه بتنتش مني كأنها بتقطع بنزين المشكله دي كانت الصبح بس و بعدين بقت العربيه تدور الصبح و اول ما اطلع بيها تفصل و ماتدورش غير بعد 4 او 5 محاولات و بعدين تدور و اجي اطلع بيها تاني تفصل و تفضل المشكله دي تتكرر 5 مرات مثلا و بعدين العربيه تمشي و اول ما اخد ملف علي البطئ تفصل و ماتدورش برده و بعد كده تمشي و تقعد تنتش الموضوع ده بيحصل لما يكون الجو مبرد شويه و وديتها عند ابو رواش ماعرفوش يحلوها و اتخانقت معاهم و اشتكيتهم و دلوقتي هشوف مركز خدمه تاني بس ياريت حد يقولي ايه العيب اللي فيها العربيه بقالها اسبوع بس

[mantis]

ايه ياجماعه ماحدش رد عليا يعني

[amazingahmed]

ياجماعه انا جبت اسبرانزا a113 و من تاني يوم العربيه بتنتش مني كأنها بتقطع بنزين المشكله دي كانت الصبح بس و بعدين بقت العربيه تدور الصبح و اول ما اطلع بيها تفصل و ماتدورش غير بعد 4 او 5 محاولات و بعدين تدور و اجي اطلع بيها تاني تفصل و تفضل المشكله دي تتكرر 5 مرات مثلا و بعدين العربيه تمشي و اول ما اخد ملف علي البطئ تفصل و ماتدورش برده و بعد كده تمشي و تقعد تنتش الموضوع ده بيحصل لما يكون الجو مبرد شويه و وديتها عند ابو رواش ماعرفوش يحلوها و اتخانقت معاهم و اشتكيتهم و دلوقتي هشوف مركز خدمه تاني بس ياريت حد يقولي ايه العيب اللي فيها العربيه بقالها اسبوع بس

اكشف على البوجيهات غالبا هتلاقي واحد محروق. لو مكانش كده تبقى غالبا مشكلة رشاشات أو بطارية.
اكشف على الحاجات دي و قولنا ايه الأخبار. و ربنا معاك.

[mantis]

توكيل ابو الفتوح

ياجماعه انا كنت عند توكيل ابو الفتوح اللي بعد الكارته المعامله بصراحه هناك احسن من ابورواش و هما كشفوا علي العربيه و غيروا حاجه في الكتاوت و قالولي هاتشتغل كويس و انا لسه بجرب فيها و ربنا يسهل

[aftr]

ان شاء تكون احسن من الاول

[aftr]

ان شاء الله

[mantis]

لعيب الي في العربيه رجع تاني

علي فكره ياجماعه العيب الي في العربيه رجع تاني و اتصلت يهم و هزئتهم و جبت كهربائي انا عرفه و عرف المشكله و كانت ضفيره الكهربه ملمسه و الحمد لله بقت كويسه بس المشكله ان التكيف سرب الفريون كله و انا راكنها

[mahmoudmano]

انا شكلي هجيب العربيه دي زيرو مش بمزاجي بس الفلوس مضطراني يعني عايز اركب عربيه مصرفش عليها فلوس وتريحني بعد الموضوع ده انا قلقت