التقييم من وجهة نظرى بعد 500 ك ............عماد

[Emad]

________________________________________

مبروك السيارة
وربنا يديك خيرها ويبعد عنك شرها
عاوزين بامانة شديدة تقول لنا عن مزاياها وعيوبها بالتفصيل
1- متانة الصاج
2- الاكسسوارات والمزايا فى السيارة من ناحة الاوبشن
3- قوة الطلعة بالسيارة ومستوى السحب
4- اعلى سرعة جبتها بيها
5- التابلوة ومستوى تشطيبه
6- الفرش ومستواه
7- العفشة وحالة السيارة عند تحميلها
8- الاحتكاك من تحت عند عبور المطبات
9- مستوى التكييف
10- التعامل مع الوكيل فى صيانة 1000 وهل انت راض عن مستوى الصيانة


متانة الصاج كويس جدا و ناشف وتقريبا فى نفس متانة الفيات و التويوتا و البى ام وانشف من الهيونداى لانها كانت معايا
الاكسسوارات والمزايا فى السيارة من ناحة الاوبشن دى بقا كتير جدا وبجد حاول تقرا بداية المشاركات هنا وعلى كونتكت كارز لانه لا يمكن حصره و هذا هو سبب شد النا س ليها يمكن ذكر الابشن اللى مش موجود فيها مثل شاشات الدى فى دى و الاير باج و سنسور الباركنج وتسخين الكراسى غيركدة كله موجود
قوة الطلعة بالسيارة ومستوى السحب يمكن يكون مش قوى بس مش ضعيف بس علشان انا لسه فى التليين بس رغم كدة لما بجرى السحب بيكون رائع فى السرعات العالية
اعلى سرعة جبتها بيها كانت 100 رغم انهم قالولى اخرى 80 وكانت هتجيب بس مزودتش و محستش و انا على 100
التابلوة ومستوى تشطيبه جيد بس تخيل العمالة المصرية يعنى عندى درج الطابلوه مفارق سنة جهة الشمال بس لو واحد مايعرفش العيب دة مش هيلاحظه بس انا اصلى من خوفى و الاقى ورعبى كنت بدور على العيوب بس كل دى حاجات بتتحل فى التوكيل على فكرة كفاية ذوق الناس و ادبهم حتى لو ماتحلتش بس هى بتتحل
و بالمناسبة واحد صاحبى فى الفريق معايا جاب فرنا وظهر صوت زنة فى الطابلوة عنده راح التوكيل تخيلو قالولو دى مشكلة فى الفرنا وملهاش حل اضطر انة لازم يشغل الكاسيت وهو ماشى و بيندم دلوقتى مع انى حظرتو من الفرنا و قولتلو هات اسبيرانزا مسمعش الكلام تعالوا شوفو دلوقتى لما بيركب معايا
الفرش ومستواه حلو بس طبعا زى كل الناس ركبت فرش جلد بيج فاتح
العفشة وحالة السيارة عند تحميلها العفشة جيدة بس المطبات الجامدة بحس بيها فى علبة الدركسيون مثل عيون القط وعادية فى التحميل لانها اصلا عالية بس السحب بيقل طبعا
الاحتكاك من تحت عند عبور المطبات كما ذكرت
مستوى التكييف يعمل بس ماشغلتوش غير مرتين وانا واقف لتاكيد انه يعمل ثم قفله انا فى اول 1000

التعامل مع الوكيل فى صيانة 1000 وهل انت راض عن مستوى الصيانة
لسه طبعا نظرا لظروف المباريات الودية و المعسكرات استعدادا للكاس فمش لاحق اتمتع بالسواقة كتير بس هانت خلاص

اسف لاطالتى وارجو ان اكون قد افدتكم
شكرا
عماد عثمان
اسبيرانزا رقم 10

[محمد صبري ابراهيم]

تقييم مبدائي رائع يا كابتن عماد

و ربنا يباركلك فيها و يديك خيرها و يكفيك شرها

[خالدابوالنجا]

ربنا يبارك لك يا عمده فعلا الواحد بيستريح لما يسمع تقييم من واحد ثقه

فيه سؤال : انته متاكد ان العربيه الى انته بتحكى عليها دى صينى . معلهش اته عارف انا كنت غايب ومش عارف


السلطان ابو النجا الاول

[هشام.النجار]

ماشاء الله ربنا يبارك , بس على فكرة الباركينج سنسور موجود فيها بالفعل يا كابتن عماد
العربية عاملة معانا دلوقتي 650 كيلو ومزودتش عن 80 بس حاسس إني كأني جايب الأول لسه العربية لما تخلص تليين بإذن الله حتجيب 140 وهي مستريحة

[hamtle97]

مبروك العربية يابو الكباتن
ربنا يديك خيرها ويحميك من شرها
ممكن أسألك
ربكت الفرش بكام وفين؟
ماهى الاوبشن اللى لفتت نظرك فى السيارة ؟
خالص شكرى وتقديرى :D :D :D :D

[TAREKSHEIR]

مبروك ياكابتن .. طلًع حاجه لله . ومنتظرين تقييمك عن تجربه فعليه .

[baher]

مبروك ياكابتن بس هي الاسبيرانزا بتاعت الكبيره موش كده

[Yasmine]

تقييم رائع

تقييم رائع والف مبروك يا كبتن عماد
و ربنا يكفيك شرها

[tarek2]

كابتن عـمـــــــــــــاد _ بعد التحـيــــــة

أولا : مبروك عليك العربيــــة
ثانيا : تقييـم موضوعى جدا - وهذا مانريده بالضبط فى هذا المنتدى للأسـتـفادة من المـزايا أو مـعــرفة العيـــوب وكيفية أصـلاحها أو تـلافيـهــا ، وبمناسـبة عين القط أو المـطـبـات الجـامدة فأنها موجودة فى معظم السيارات فى مـصــر وده طبـعا راجع لطبيعة الطـرق عنـدنـا ، أنصحك بتـجــــربة تعبئة الأطــارات بالنتروجـيـن 32 أمامى و 30 خلفى وفى أنتظار انطباعك عن تلك التـجـربة و شــــــــــــــــــــكــرا

طـــــــارق أمــــيــن - أســبرانزاوى 36

[Emad]

الله يبارك فيكو جميعا و السيارة كويسة بس مش معنى كدة ان ما فيهاش عيوب بالعكس فيها عيوب كتيرة كمان بس يمكن التغاضى عنها مقابل كل هذه الكماليات وايضا التوكيل بيحاول جاهدا حل كل المشاكل التى لو لم تحل برضه السيارة كويسة بدليل حاول تقارنها لكى تعرف انها كويسة ولا وحشة باى عربيه مع مراعاة السعر والكماليات

وهى فعلا صينى بس المشكلة فى الموضوع ده مش الصين و لكن فى اللى بيستورد بيسترخص والدليل فى السوق الاوروبى احسن المنتجات صينى فالسبب فى المستورد المصرى بس المرة دى اللى بيستورد اعتقد واحد فاهم و اختار صح بدليل الضمان بتاعها 100000 مش 60000 زى اى عربية ؟؟؟؟؟؟؟؟؟؟؟؟؟؟؟

انا جبت بيها 100 اكتر من مرة وكنت لسه بليين وعلى الرابع و ماكنتش حاسس ودلوقتى 140 لغاية دلوقتى

استاذ هشام انا معنديش البركنج سنسور انا معايا 516 اعمل ايه ؟

استاذ حامد ركبت الفرش جلد بيج فاتح ايطالى بتاع اللانسر بس من غيراى علامات فى ش دمشق بالكربه عند رجل طيب اسم المحل مزيكا و سعره 180 بالتركيب يمكن ده واجب معايا لان مفيش فرش باقل من 200 و اتنين صبيان اشتغلو ولمعوه ورضضتهم يعنى قول 190 و قولو انك جاى من طرفى و تنضيفه سهل جدا
للاسف فى استاذة برضه شافته وسالتنى و قولتلها التوفيقية بس هو فى دمشق ياريت تكون شافت الرسالة دى علشان لا تضل وتذهب التوفيقية غلط اعتذر ثانية وهو هيليق عندك لانك سيارتك كحلى انا اسف على التاخير بس دى اول مشاركة لية من ساعة ما سالتينى
و ساضع الفرش و الكشافات فى موضوع منفصل للافادة
احلى اوبشن تعديل مستوى النور بينفع فى السفر والطرق السريعة وشكل السيارة من قدام بجد رائع بس ماتسالنيش من ورا بس انا عدلتة برضة و بقا كويس نسبيا

اجمالا السيارة رائعة بس ملاكها محتاجين يحبوها اكتر و اكتر ويشيلوها من تحت الميكروسكوب ويعتبروها عربية عاديه وبص على المميزات شويه

انا فعلا نويت ادبح بس الوقت زانقنى شويه ادعولى يا جماعة داخل على وقت صعب ومحتاج دعواتكم

وشكرا عماد عثمان