عاوز اعرف استهلاك البنزين بالنسبة للm11 ??

[katoba]

السلام عليكم ورحمة الله وبركاته
ارجو من الاخوة الافاضل ملاك السيارة m11 معرفة معدل استهلاك السيارة للبنزين لانى مقدم على شرائها ومشاويرى كبيرة حبتين يعنى انا من طنطا وشغلى فى المنصورة
يعنى 100 كيلو رايح جاى يوميا .. هما كاتبين فى البورشور بتاعها 7.5 لتر لكل 100 كيلو انا مش عارف الكلام دة عمليا صح ولا لاء ؟؟
علما بانى ان شاء الله ناوى احطلها بنزين 95 علشان اضمنلها عمر اكبر وطبعا الاعمار بيد الله ..
بحسبتى البدائية المتواضعه للخمس ايام الى بشتغل فيهم اسبوعيا :

7.5لتر * 5 ايام = 37.5 لتر اسبوعيا*
37.5 * 2جنية = 75 جنية اسبوعيا
75جنية * 4 اسابيع = 300 جنية شهريا
طبعا انا عارف ان فية ناس هتقولى ان دى حسبة خيالية ومفيش كدة فى الواقع فارجو منكم الافادة الحقيقية لان زى مانتوا شايفين مسافاتى كبيرة .
دانا بحسبتى دى هعمل صيانه الالف بعد 10 ايام ودى مبتحصلش عند ناس كتيير قرايبى واصحابى


ملحوظة : ارجو الرد من كل الاخوة الافاضل الى اتعلمت منهم واستفادت استفادات حقيقية على مدار اشتراكى فى المنتدى
اما اخواتى هواة الشتايم وعدم جلب المنفعه فانا بسؤالى فى غنا عنهم طول مافية شتايم ....... يعنى باختصاااااااااااااار اتمنى فى كل رد يكون فية استفادة فعلية
حتى تعم الفائدة والنفع لى وللاخرين ..

[khaled_Saga]

ياراجل وهل يفتى ومالك فى المدينة ههههههههههههه ؟ انا موجود طبعا ويسعدنى اكون اول واحد يرد عليك يا ابوحميد...

على حسب حساباتى الشخصية وبعيدا عن كلام البروشور لان طبعا كله كلام فاضى .. هقولك تجربتين:

1. من ملاحظاتى للاستهلاك العادى جوة المدينة متوسط الاستهلاك يعنى حوالى 10 لتر \ 100 كم
2. امبارح روحت اسكندرية صد رد (روحت اتعشيت وشيشت ورجعت هههههههه مفيش دماغ احلى من كده اظن؟؟؟) عامل حوالى 350 كم رايح جاى ومشغل التكييف فى حوالى 300 كم منهم استهلكت حوالى 30 لتر يعنى بردو نفس الحسبة تقريبا او اقل شوية يعنى مثلا 9 لتر \ 100 كم (هو ممكن يبقى كتير شوية على انى كنت ماشى بسرعة عالية انما متنساش التكييف)

العربية مش موفرة ومش سفاحة من وجهة نظرى ومن خلال تجربتى فى 2300 كم الاولى .. مقدرش بردو احكم لان فيه ناس بتقول الاستهلاك بيتظبط مع الوقت شوية بشوية والله اعلم.
نستنى بردو ردود الاخوة الاعضاء وبعد كده تقدر تحسب المتوسط بتاعنا كلنا وتقرر وربنا يوفقك وتنضم لعائلة الام 11 قريبا..

تحياتى

[hima77]

في العموم العربية تعتبر من العربيات اللي متوسط استهلاك النزين فيها عالي عن عربيات تانية حتي لو حققت المكتوب في البروشور بالظبط ... انما في الواقع العربية بتعمل 10-11 لتر / 100 كم ( زي عربية خالد ) بس بردوا العربيتين لسه اقل من 5000 كم المفروض يبقي في تحسن في استهلاك البنزين بعد كدا

[nnbnbnb]

انا الحمد لله عربيتى بتعمل متوصط الاسهلاك من 240 الى 260 كيلو فى الصفيحه اى ال20 لتر

يعنى فى ال100 كيلو بتعمل متوصط 120 كيلو

يعنى الحمد لله هى معى زى الفل فى البنزين

[khaled_Saga]

تمام الكلام يا هيما انت وعماد .. واعتقد ان الاستهلاك هيتحسن بعض الشىء بعد ال 5000 كم

[katoba]

تسلم ياخلود انت وهيما وعماد وان شاء الله فى انتظار ردود باقى الاعضاء الى عدوا ال 5000 علشان نستفيد اكتر منهم لانى بصراحة شايف ان استهلاك العربية كبير على سيارة 1600 وشكرا لمروركم ياشباب

[khaled_Saga]

خد دى يا احمد اسمحلى احطها فى موضوعك يعنى فرحان انى جبتها لان اول مرة اعملها وان شاء الله مجبهاش تانى ههههههههه

Uploaded with ImageShack.us

[katoba]

ههههههههههههه يلا ياخالد عقبال اما تقفل الامبير ... ربنا يحميك ويحفظك انت وكل الاعضاء

[hemaa_82]

اسمحولي اقول اللي عندي؟؟؟؟


لو هتمشي مشي عواجيز.... متزودش المتور عن 2500 لفة وملكش دعوة بحد و مش بتشد و كده هتلاقي فعلا انها من 7 الي 8 لتر لكل 100 كيلو و بحد اقصي 9 لو مشغل التكييف حتي جوة البلد ...."طبعا جوة البلد دي في طريق ماشي ... متقفش في زحمة السبتية ساعة و نص في 10 متر و تقولي معدل الاستهالك ايه ... تبقي بتهرج "

لو هتمش سبور بقي و تشد و تحرق و تعلم علي الناس و تجيب 200 كيلو في الساعة "زي مانا بعمل " هتعمل معاك من 10 الي 11 و ربما 12 لكل 100 كيلو و ده برضه بالتكييف .....


انت مش هتمشي كده علي طول ولا كده علي طول فاعمل حسابك علي 10 الي 11 لتر في معظم اسواء الظروف والله اعلي و اعلم ....

خد بالك ان ال 95 ب 3 الا ربع مش ب 2 ....

[katoba]

تسلم ياهيما عالمعلومات القيمة دايما بتحرجنا والله بسماعداتك الهامه وردودك المؤثرة وبعدين ياعم مش تقول ان ال95 بقى ب 3 الا ربع .. ماله ال92 ؟؟ زى الفل ومبيقولش لاء

[ALshahba]

من تجربة والدي للm11 انه كان بيعمل فى الصفيحه 160 كم خارجي و 140 داخلي
طبعا استهلاك كتير جدا وراح علشان يظبطها .... ماجابتش اكتر من كده
ممكن تكون حالة فرديه ...... فماتاخدش عليا..... لان اغلبية الاخوة المشاركين عربيتهم ماشاء الله بتعمل استهلاك ممتاز