يومى فى صيانة ال 5000 كم على الهواء مباشرة

[khaled_Saga]

اخوانى الكرام .. زى ما عودتكم على نقل اخبارى اولا بأول والنهاردة بنقلكم اخبارى فى صيانة ال 5000 كم من داخل مركز الصيانة الرئيسى بأبة رواش ولكن انا كتبت الموضوع متأخر لانى سمت العربية وجريت على كارفور اشترى شوية حاجات وحاليا بكتبلكم وانا قاعد فى جراند كافيه داندى مول
- سلمت العربية للمهندس ابو بكر الساعة 9:20 ص وكان امر الشغل بناءا على ملاحظاتى يحتوى الاتى:

1. صيانة ال 5000 كم العادية
2. مراجعة صوت تصفير من التيل الامامى شمال مع الفرامل وعلى السرعات البطيئة
3. مراجعة صوت صوصوة وتزييق من العفشة يكون واضح اكتر مع المطبات ( المهندس قاللى غالبا من فرامل اليد) وانا متهيألى الكلام ده سليم لان كان فيه اخ عضو هنا فى المنتدى قاللى نفس الموضوع كان عنده وطلع العيب من واير فرامل اليد .. لما استلم العربية اشوف عملوا ايه
4. برجلة وتنتيش فى العربية فى الغيارين الاول والتانى
5. خشونة فى نقلات الفتيس على الغيارين الاول والتانى
6. استهلاك بنزين عالى

- قالولى تعالى استلم على الساعة 1 ظهرا ان شاء الله
- بالنسبة للخبطة اللى فى القايم روحت سألت فى ورشة السمكرة مع المهندس وئام قاللى هتعمل محضر وتروح شركة التأمين تبلغ وتجيبلنا العربية نعمل مقايسة وبعدين ييجى مهندس من شركة التأمين يعاين ونشوف ايه هيحصل .. الله يكرمه وئام قالى اليومين دول زحمة والموضوع هياخد وقت فأنا قررت اسيبها فترة كده حتى تخذى العين لحد لما اشوف سمكرى محترف يعملها بتكلفة معقولة
- بالنسبة لبلى البطاحة الامامى اللى المفروض اغيره على الضمان من بعد ما اشتريت العربية باسبوع لسه مجتش ولكن وعدونى ان دفعة قطع الغيار جاية اخر الاسبوع الجاى وارجعوا السبب الى ان من بعد الثورة مفيش اى قطع غيار جت من الصين نهائى ودى اول دفعة تنزل واكدوا ليا على الكلام ده لما لاقونى مضايق (اصلى شرشحت للبنت الىل كلمتنى من يومين من خدمة العملاء وقالتلى لسه البلى مجاش!!)

حاليا الساعة 12 ظهرا وانا ميعاد استلامى 1 ظهرا ان شاء الله ولما ارجع البيت واريح على بالليل هقولكم اخر الاخبار وعملوا ايه فى الصيانة

بالمناسبة وانا داخل ورشة السمكرة شوفت عربية ام 12 شكلها لذيذ والله بس للاسف صعبت عليا اوى عاملة حادثة غريبة (لحق يشتريها عشان يعمل حادثة) الجنت الامامى شمال مقطوم والاكصدام الامامى مكسور ... نشوف الصورة انا صورتها قولت اوريهالكم وربنا يكفينا الشر

Uploaded with ImageShack.us

[hugan]

مبروك صيانه ال 5000
الجنط ده اكيد اخدت مطب جامد جدا بعجله واحده

[khaled_Saga]

تقرير الصيانة

السلام عليكم ..

الحمد لله تمت الصيانة واستلمت قبل الساعة 1 وكان نتائج تقرير الصيانة كالتالى:

1. صيانة ال 5000 كم العادية
تربيط وتشيك اب على العربية وكله تمام
2. مراجعة صوت تصفير من التيل الامامى شمال مع الفرامل وعلى السرعات البطيئة
التيل كان محتاج تنضيف واتنضف (هو صفر مرتين تلاتة لما رجعت مع الفرملة لكن واضح ان ده الطبيعى مع نضافة طرق مصر )
3. مراجعة صوت صوصوة وتزييق من العفشة يكون واضح اكتر مع المطبات ( المهندس قاللى غالبا من فرامل اليد) وانا متهيألى الكلام ده سليم لان كان فيه اخ عضو هنا فى المنتدى قاللى نفس الموضوع كان عنده وطلع العيب من واير فرامل اليد .. لما استلم العربية اشوف عملوا ايه
فعلا حاجة اسمها جرابات (جمع جراب) فرامل اليد كانت محتاجة تتشحم والصوت اختفى الحمد لله
4. برجلة وتنتيش فى العربية فى الغيارين الاول والتانى
حاجة فى الدبرياج كانت محتاجة رجلاش واتعملت والحمد حاسس انها منتشتش من ساعة مارجعت
5. خشونة فى نقلات الفتيس على الغيارين الاول والتانى
مش فاكر كان ايه السبب بس قالولى انها اتحلت وحاسس بفرق فعلا الى حد ما
6. استهلاك بنزين عالى
مش فاهم نسبة ايه كانت عالية (اوكسيدين) وظبطوها على الكمبيوتر بس طبعا مش هيبان الاستهلاك اتظبط ولا لأ الا لما اجرب لفترة


عامة الحمد لله انا شايف ان التقرير ايجابى بشكل كبير عن اول صيانة وانا خارج من هناك مبسوط وبصراحة يا جماعة المهندس ابو بكر ده محترم جدا و وشه سمح والتقرير بتاعه زى العسل

للعلم الصيانة اتكلفت 102.5 جم فقط لا غير يابلاش

فى انتظار مشاركاتكم .. تحياتى

[katoba]

الف مبروك ياخالد على الصيانه وعقبال ال ال100000 وانت وعربيتك فى افضل حال .. والتكلفه معقوله بالنسبة للى اتعمل وابقى طمنا على استهلاك البنزين اتعدل معاك ولا اية واصوات التزييق والتصفير ..

[esam722]

احذر لا تتعامل مع ورشة السمكرة فى التوكيل(ابو رواش)


انا اتعاملت معاهم وشغلهم زباله وكأنك عملت العربية عند سمكرى قاعد تحت الدائرى بشنطة عده


الورش اللى شغاله مع التامين كتير وفيه ناس شغلها كويس بس اسئل

[islam_6110]

اولا ربنا يباركلك فى العربيه
ثانيا بالنسبه للخبطه ممكن تروح صقر قريش فى المعادى فيها ورش سمكره بتتعامل مع التامين و تكلفتهم حلوه انا عندى اخو المدام معاه كارنز اتخبطت فى الرفرف الخلفى يمين قالوله فى التوكيل لزم نقطع الرفرف و نلحم رفرف جديد التامين رفض عمله فى صقر قريش رجعت زى الاول من غير قطع و كلفت مبلغ بسيط
ثالثا ياريت تطمنا فى موضوع البنزين

[khaled_Saga]

مبروك صيانه ال 5000
الجنط ده اكيد اخدت مطب جامد جدا بعجله واحده

الله يبارك فيك

والله الخبطة شكلها كان غريب الله اعلم ايه حصله ربنا يكفينا شر الخطبات

شكرا لمرورك

[khaled_Saga]

الف مبروك ياخالد على الصيانه وعقبال ال ال100000 وانت وعربيتك فى افضل حال .. والتكلفه معقوله بالنسبة للى اتعمل وابقى طمنا على استهلاك البنزين اتعدل معاك ولا اية واصوات التزييق والتصفير ..

الله يبارك فيك يا ابو حميد يا عسل الحمد لله تمت بخير مفيش اصوات تزييق ولا صوصوة انما تصفير التيل مع الفرامل احيانا بيحصل بس ده طبيعى عشان عدم نضافة شوارع مصر اما بالنسبة لاستهلاك البنزين هحسبه ان شاء الله لما افول المرة الجاية وابقى اطمنك

تحياتى

[khaled_Saga]

احذر لا تتعامل مع ورشة السمكرة فى التوكيل(ابو رواش)


انا اتعاملت معاهم وشغلهم زباله وكأنك عملت العربية عند سمكرى قاعد تحت الدائرى بشنطة عده


الورش اللى شغاله مع التامين كتير وفيه ناس شغلها كويس بس اسئل

متقلقش انا مش ناوى اتعامل معاهم فعلا لان سمعت ان شغلهم اى كلام ده غير انهم بيطولوا وموال كده انا هسيبها شوية اعملها بعدين بقى لما اروق

شكرا لمرورك

[khaled_Saga]

اولا ربنا يباركلك فى العربيه
ثانيا بالنسبه للخبطه ممكن تروح صقر قريش فى المعادى فيها ورش سمكره بتتعامل مع التامين و تكلفتهم حلوه انا عندى اخو المدام معاه كارنز اتخبطت فى الرفرف الخلفى يمين قالوله فى التوكيل لزم نقطع الرفرف و نلحم رفرف جديد التامين رفض عمله فى صقر قريش رجعت زى الاول من غير قطع و كلفت مبلغ بسيط
ثالثا ياريت تطمنا فى موضوع البنزين

الله يباركلك

انا هسيبها شوية وبعدين ابقى افكر اعملها فين اهو تخزى العين اللى شغالة على ودنه انا مش فاهم الناس بتحسد على ايه امال لو كانت بى ام!!؟؟

تحياتى

[samer_geo]

تقرير أكثر من رائع و مفيد جداً لأن معظم ملاك إسبرانزا عندهم مشاكل قريبة من المشاكل دي

ألف شكر للمشاركة في التجربة

[khaled_Saga]

تقرير أكثر من رائع و مفيد جداً لأن معظم ملاك إسبرانزا عندهم مشاكل قريبة من المشاكل دي

ألف شكر للمشاركة في التجربة

الف شكر لمرورك

انا دايما بحبانقل تجاربى عشان هو ده الهدف من منتدانا الجميل, تناقل التجارب والخبرات

تحياتى

[Neo206]

مبروك الصيانة و ربنا يباركلك فيها

[khaled_Saga]

مبروك الصيانة و ربنا يباركلك فيها

الله يبارك فيك وشكرا لمرورك