تعالو نعرف ازاي بنتحاسب مع التوكيل بتاع توحة.. المصنعيات, صباحو نصب

[kimocyc]

السلام عليكم ورحمة الله وبركاته.. اعضاء المنتدى الكريم..

طبعا الاعضاء اللي بيتعاملو مع توكيل تكنو سيرفيس ابو الفتوح - اي فرع في المحافظات - نفسهم يعرفوا ازاي بنتحاسب مع التوكيل في المصنعيات.. طبعا كلنا تقريبا عارفين اسعار قطع الغيار بس لغز المصنعيات لأ...

الأول كانت الساعة بـ 60 جنيه .. تمام
وبعدين بقت دلوقتي بـ 85جنيه.. حلو ...

تيجي بقا انت مثلا عايز تغيير زيت الموتور مثلا بس فتكون المعادلة..

85 (قيمة الساعة الواحدة) ÷ 10 (وحدة ثانبتة على السيستم عنده) = 8.5 جنيه
طب وقت تغيير زيت الموتور كام وحدة ؟؟ 5 وحدة او ما يعادل النصف ساعة يبقى الحساب كام ؟؟ تقريبا 42.5 جنيه - ههههههههههههههه

طب لو زيت الفتيس بقا عايز اغيره لوحده .. حيكون كالآتي..

85 (قيمة الساعة الواحدة) ÷ 10 (وحدة ثانبتة على السيستم عنده) = 8.5 جنيه
طب وقت تغيير زيت الفتيس كام وحدة؟؟ 3 وحدة أو ما يعادل ثلث ساعة يبقى الحساب كام ؟؟ تقريبا 25.5 جنيه - حلوة اللعبة دي ؟؟؟


ملاحظات هامة ..

- توحة راجل حقاني ودا باين في فرق الزمن بين تغيير زيت الموتور والفتيس - باين اهوووو ، بيديلك حقك .. ههههههههههههههه
- قيس على كده اي حاجة لما تحب تغييرها.. اسأل قبل ما تتعور..

- خالص التحية وصباحو نصب... !

[khaled_Saga]

موضوع جميل وشدنى انى اشوفه واتكلم فيه .. معاك ان توحة نصاب وكل التوكيلات نصابة ويمكن هو اقلهم حتى واسأل اللى معاهم هيونداى وغيرها .. ولكن

انا عملت 3 صيانات لحد دلوقتى ولاحظت ان المصنعيات فى الصيانات التلاتة ثابتة (بخلاف لو حطيت زيت او اى قطعة غيار خارج الضمان) ولقيت ان المبلغ حوالى 105 جم وبالرغم ان فى صيانتين منهم انا سلمت العربية الصبح بدرى واستلمت اخر اليوم خالص يعنى اخدت وقت كبير فى الورشة واسمع دى كمان بعد اخر صيانة كنت المفروض اغير بلى بطاحات امامى وكنترول اى بى اس وروحت بعدها باسبوع اغيرهم (مكنش ميعاد صيانة) وغيرت الحاجات دى على الضمان والعربية فضلت من الصبح لاخر النهار ومدفعتش ولا مليلم واحد!!!

انا مش بدافع عن توحة بالعكس انا واحد من الناس اللى متغاظ منه فى بعض الحاجات ولكن الحق للحق يقال وقولت اعرض تجربتى .. لكن اللى سمعت عنه انه التوكيلات اللى غير ابورواش زى تكنو سيرفيس اسعارها فعلا اغلى من ابو رواش

تحياتى لك

[kimocyc]

طبقا للتعليمات المحملة على السيستم الجديد..

فقد تم تثبيت اسعار الصيانات العادية فقط دون تغيير اي قطعة أو زيت .. مجرد صيانة عادية كشف سوائل ، تربيط عفشة وما الى ذلك.. وطبعا لو كان فيه شكوى من العميل اكيد حتتعمل..

ووقت الحساب بيكون مكتوب البند الخاص بصيانة كذا كيلو دون زيت .. ولهذا فان السيستم يتم اضافة قيمة الصيانة فقط من واقع السعر الموجود بقاعدة البيانات.. وصلت ؟؟؟

وبالمناسبة.. انا امبارح كنت موجود في التوكيل وكنت اشتكيت في 19227 عن آخر صيانة عن اشياء غريبة وصيانة مش بتتعمل فيها غير تربيط عفشة فقط وزيادة مياه الرداتير من مياه الحنفية وما الى ذلك.. والعربية كانت موجودة طول اليوم وفي الآخر مدفعتش ولا مليم.. عشان الشكوى كانت جامدة وتم اثبات حاجات اثرت عليهم في التوكيل وكانوا مذهولين..

[kimocyc]

مثال للتوضيح..

- صيانة كذا كيلو بدون زيت كانت (82.5) اصبحت (93 جنيه)
- صيانة كذا كيلو بتغيير زيت وفلتر زيت (110 جنيه)
- صيانة كذا كيلو وتغيير زيت وفلتر هوا وفلتر بنزين وفلتر زيت وبوجيهات (170 جنيه)

وهكذا...........

وللتوضيح .. انا مش بهاجم توحه بالعكس دا حبيبي من ايام الجيزة.. ههههههه بس حبيت اعرف طريقة الحساب ازاي وقولت اعرفها للأعضاء الكرام مش اكتر

[speed demon666]

هو بس للتوضيح ... موضوع التقسيم بتاع الوقت ده هو مقيد به و ده على حسب المكتوب عنده في كتالوج الصيانة اللي محدد فيه كل حاجة من المصنع الأساسي ... انا الكلام ده بقوله من واقع شغلي في مركز صيانة لماركة تانية