إعـــــــلان

Collapse

.

,
See more
See less

تقيم السيارة m11 بعد أكتر من 50 ألف كيلو متر

Collapse
X
 
  • Filter
  • الوقت
  • Show
Clear All
new posts

  • تقيم السيارة m11 بعد أكتر من 50 ألف كيلو متر

    بسم الله الرحمن الرحيم

    السلام عليكم ورحمه الله وبركاته

    انا شاري العربيه في شهر 10 سنه 2009 و العداد عامل تقريبا 53 الف كيلو متر

    مميزات
    :

    --ثبات عالي جدا جدا وصلت بيها حتي 190
    -- متور اكثر من ممتاز وكنت مش متوقع انه بالجودة دي
    -- صاج العربيه محمل
    -- الاكصدام الامامي والخلفي خبط بيهم كتير ولا بويا طلعت ولا حصلهم اي شيئ
    -- فوانيس إضائه ممتازة
    -- تابلوة شيك جدا مع تصميم خارجي انيق جدا
    -- فررامل جبارة جدا جدا و abs و abe يعملو بكفائه ممتازة
    --- تكيف جيد " غيرت فريون برة التوكيل ب 110 جنيه بعديها اصبح التكيف اسكيمو "
    --- عفشه مش ناشفه زي السيراتو ولا ملبن زي التويوتا ولكن متوسطه وبتستحمل البهدله
    -- امكانيات العربيه علي سعرها ممتازة جدا
    -- التسارع ممتاز " مع صديقي النترا 2009 منيوال جربنا هوة بيسبق في الاول و بعدكدة انا بجيبه في الغيار التالت وفي الرابع بسبقه ولما بجيب الخامس هوة بيحصلني عند 160 بعد كدة تسارع حتي 180 زي بعد بالظبت , جربنا نسابق بعض اكتر من مرة و كلها زي بعض بالظبت .. مع صديقي تالت ماتركس اتوماتك كان برة المنافسه
    --- البلد عندنا بقالهم سنه بيحفرو عشان الغاز الطبيعي و البلد رايحه في ستين داهيه مفيش حته سليمه و رغم كدة العفشه الحمد لله زي الفل عربيات كتير مع صحابي لانسر 2009 عامله 30 الف غيرت مساعدين امامي و مقص ماتركس عامله 90 الف غيرت 4 مساعدين و مقصين اوبل فيكترا 2009 عامله 40 الف غيرت كوبلن و ربنا و تقريبا كل عربيات اللادة الي في البلد عفشتها اتكسرت و هما ماشين ... وربنا يستر عليا
    --- استهلاك متوسط " انا بجري و بقرص علي الغير " متوسط من 9 الي 12 كيلو في اللتر ياعني 190 الي 230 كيلو في الصفيحه تقريبا داخل وخارج المدينه
    --- عريضه من الداخل و الخارج ياعني السائق والراكب الامامي كتافهم مش بيلزقو في بعض زي باقي العربيات مثل الهونداي اكسنت و فيرنا او اللانوس ... صالون واسع للراكب الامامي ضيق بعض الشيئ للراكب الخلفي
    --- .... جميع الكمليات من حساس نور و حساس مطر و زجاج كهرباء و غيرة وغيرة يعملو بكفائه بعد 50 الف كيلو بفضل الله بدون اي مشاكل و الحمد لله
    --- السوند سيستيم بالعربيه مرضي الي حد كبير و كذلك الكاسيت ممتاز
    --- الفتيس ادائه حتي الان لا غبار عليه
    --- كاوتش الفابريكه يعمل بكافئه حتي الان و لكن بدا النقشه تخف فحبدأ في تغيرة ان شاء الله علي 60 الف
    --- الجنوط ممتازة رغم اكل مطبات بالكوم وعلي سرعات عاليه ولا رفه ولا عوجة ولا اي شيئ الحمد لله والاستبن لم ينزل حتي الان ... ماشاء الله لاقوة الا بالله
    --- البطاريه شغاله تمام وبدرو العربيه في البرد علي طول
    --- الباور ممتاز ناعم و مريح جدا
    --- مع حموله خمس ركاب العربيه مبتفطس زي عربيات كتير

    ........* يوجد مميزات اكتر من كدة بس كفايه عشان مكونشي مبالغ ........*

    العيوب :

    -- أكبر مشكله انك مش حتقدر متروحشي للتوكيل عشان العربيه متخرجشي برة الضمان لأن العربيه ممكن يظهر فيها مشكله و مش حتلاقي طقع غيار برة
    --تزيق في العفشه الخلفيه و بيروح لو شحمت مكان إلتقأء مواسير الفرامل مع الحلقه إلي شيله هذة الموسير
    --- تزيق جامد في العفشه الاماميه و دة لسه جديد عليا ظهر مع اول شتوة السنه دي و لسه مشفتش حل للأصوات دي لغايه ما الشتاء يخلص و الدنيا تنشف
    --- تيل الفرامل الامامي لما يبدأ يخلص بتلاقي رجه جامدة عند الفرامل مع السرعات العاليه ممكن تشك في الطنابير ولكن لو غير التيل المشكله بتروح
    --- تقفيل العربيه مش بالجودة المطلوبه
    --- كونها عربيه صيني عشان كدة مش واخدة حقها رغم انها افضل من عربيات كتير اغلي منها في السعر
    --- 1400 كيلو وزن بدون اي راكاب اظنه من العيوب
    --- مش منتشرة و عشان كدة مفيش ولا قطع غيار ولا اكسسوار متوفر ليها
    ---- سعر اعادة البيع غير مرضي
    ---- بنزين 90 لا يصلح لها بيخلي المتور يسقف و بالتالي بنزين 80 ياعني انتحار للعربيه
    --- في رعشه بسيطه في الطارة وهيا العربيه واقفه أقصد " بتحس ان العربيه دايرة " و العزل غير جيد " ياعني في عربيات جديدة كتير مش بتحس انك مدور العربيه و علي سرعات عاليه بتسمع صوت الماتور
    --- لا يوجد غطاء للماتور بيخلي غسيل الماتور شيئ مخيف للخوف من تسرب اي شيئ للبوجيهات
    --- الخامات المصنوع منها الطارة سيئه للغايه " بتقشر " رغم خامات التبلوة جيدة جدا

    ........* والله والله بعصر دماغي مش لاقي حاجه تانيه ............*
    ------------------------------------------------------------------------------------------------------------------------------
    المشاكل و الحلول
    -----------------
    1- الطنابير الاماميه علي 20 الف ظهر رجه مع الفرامل تم طلب طنابير اماميه و تم تغيرها عند 30 الف ولكن عند صيانه 25 الف تم تغير تيل امامي بعديها الرجه راحت و لكن كان تم طلب الطنابير و المهندس قالي مفيش مشكله انت مش حتدفع حاجه في التغيير بس انا استحرمت الموضوع و بعد دردشه معاة قالي انا المسؤل عن الموضوع
    2- قربه المياة اتشرخت عند تقريبا 22 الف كيلو و تم طلب واحدة وتم تغيرها في صيانه 25 الف علي حساب التوكيل
    3- اول ما استلمت العربيه اداء التكييف كان متوسط في صيانه 5 الاف تم تغيير الفريون في التوكيل علي حسابهم ايضا ولكن بردة الاداء كان غير مرضي رحت لواحد عندنا في البلد غيرت عندة الفريون ب 110 نوع الماني بعديها اصبح فريزررررررررر
    4- اول ما استلمت العربيه كان في نقرة في الاسكاترة وزادت بعد ما اكلت مطب و تم تغيرها في صيانه 15 الف كيلو وبعدها ظبت زوايا برة التوكيل و مفيش مشكله في الاسكاترة حتي الان
    5- تم محاوله سرقه العربيه و الحرامي كسر الزجاج اليمين الخلفي ووجته بسهوله برة التوكيل عند بتاع الزجاج ب 110 بالتركيب وبعد كدة عرفت انه ب 70 جنيه .. الحمد لله
    6- طوبه محترمه من مجهول في الزجاج الوراني خلته فرافيت -- دورت عليه برة التوكيل لقيته بالطب يجي بعد يومين من مصنع مصري اسمه دكتور جريش ب 220 بالتركيب
    7- مكنه الزجاج الوراني باظت و تم طلبها و المكنه وصلت و تم الاتصال بي و حغيرها في صيانه 55 الف علي حساب التوكيل
    8- سيبت النور الصغير مضيئ مع تشغيل الكاست لفترة طويله تقريبا اكتر من ساعه حتي البطاريه نامت و اطريت لتدوير العربيه بالزق علي الغيار التاني و سيبت العربيه دايرة بعديها نص ساعه حتي البطاريه شحنت ورجعت تدور العربيه تاني الكلام دة كان من حوالي 6 شهور والبطاريه الان تمام والحمد لله
    9 - من حوالي 9 اشهر لسبب غير معروف العربيه مرضتشي تدور خالص كله تمام وصوت المارش شغال و البطاريه تمام ولكن بلا جدوي اطريت ادور العربيه زق و و بعدها متكرررشي الموضوع دة خالص غير مرة من
    شهر وبردة دورتها زق و السبب غير معروف و هيا الان بدور علي طول واحد قالي ممكن وساخه بنزين عشان انا بمشي علي الاحتياطي علي طول
    10- لمبه النور الواطي للفانوس الشمال اتحرقت وغيرتها ب 25 برة التوكيل
    11- لمبه الفانوس الشمال ورا اتحرقت غيرتها بس مش زي الي راكبه ب 3 جنيه الاصلي كانت مش موجودة ساعتها وكانت ب 10 جنيه
    12- اكلت مطب محترم وكنت مركب ناس معاي وقلت العربيه اتكسرت والحمد لله علبه الشكمان الوسط الي اتكسرت و رحت التوكيل غيروها علي حسابهم !!!! اة والله بس من يومها الشكمان وهوة مش مظبوط
    13-- كنت حنسي في والعربيه كانت عامله 14 الف الدينمو فصل واتصلت بيهم و جولي في البد وتم تغير الديمنو


    ........ ملحوظه هامه جدا الموديلات من 2011 و 2012 مفهمشي مشاكل 1- الدينمو 2- الاسكاترة 3- قربه المياة --- تم تلافي هذة العيوب في المودلات الجديدة ........*
    --- جاري اعجب بالعربيه و اشترها من سنه و هيا عامله معاة 25 الف و مفيش مشاكل من اي نوع ولا دينمو ولا اسكاترة ولا قربيه المياة و كل فترة بنتقابل و نتكلم عن المشاكل و نجرب عربيات بعض و الحمد لله انا هوة راضين تماما علي إختيارنا

    --------------------------------------------------------------- ---------------------------------------------------------------

    أداء التوكيل :
    -------------
    كلمتين و بس " ناس محترمه " عشرة اكتر من سنتين مفيش مرة اروح غير لما يزدني احترام ليهم

    التوكيل الي شغال معاهم عيسي طنطا و الحصري في دمنهور بس بتوع عيسي ناس فاهمه اوي و لكن الحصري مش فاهمين اوي بس كلهم محترمين


    هذا تقيمي للعربيه طوال هذة الفترة سواء ايجابيات او سلبيات
    والله علي ما اقول شهيد
    و السلام عليكم ورحمه الله وبركاته

  • #2
    حاجه نستها من ضمن المميزات
    العربيه حرارتها مبتزيتش في اقصي الظروف عن 90 درجه و حاجه تانيه لو شغلت التكيف درجه الحراة بنزل شرطتين لان في مروحه اضافيه علي سرابنتينه التكييف إلي قدام الريداتير

    Comment


    • #3
      رربنايبارك لك فيها

      Comment


      • #4
        تقييم اكثر من ممتاز .. ربنا يباركلك فى عربيتك ويزيدها خير ولكن امسك الخشب ومايحسد المال الا اصحابه :)

        تعليق على بعض النقاط:

        --- 1400 كيلو وزن بدون اي راكاب اظنه من العيوب : ده ميزة اكتر منه عيب لانه احد اسباب ثبات العربية مكن عيبه انه يتقل العربية شوية فى سحبها ده غير تسقيف الموتور لو العربية مهدية اوى وواخده الغيار التانى

        --- في رعشه بسيطه في الطارة وهيا العربيه واقفه أقصد " بتحس ان العربيه دايرة " و العزل غير جيد " ياعني في عربيات جديدة كتير مش بتحس انك مدور العربيه و علي سرعات عاليه بتسمع صوت الماتور:دى طبيعة الاسبرنزات ان مواتيرها مش من نوع الصوت الهادى .. ربما يكون العزل فعلا مش بالمستوى المطلوب ولو انك لو ركزت وانت فاتح الكبوت هتلاقى عزل حرارى بين الموتور ومقصورة القيادة لكن بالرغم من كده بحس فى الصيف احيانا بصهد جاى من ناحية المكنة .. العزل اللى كويس فعلا هو بتاع الكبوت نفسه يعنى لو العربية عاملة مشوار وسخنة تيجى تحط ايدك على الكبوت من برة متحسش بسخونة

        --- الخامات المصنوع منها الطارة سيئه للغايه " بتقشر " رغم خامات التبلوة جيدة جدا:
        التابلوه من برة بس اللى هو الكونسول انما لو ركزت فى الخامات الداخلية زى الادراج والطفاية الخ الخ هتحس انها بلاستك من بتاع لعب الاطفال وده سببه ابو الفتوح مش العربية نفسها لان العربية اساسا بتنزل من برة نضيفة لكن عشان هو يطلع بمكاسب خيالية بيشيل منها كتير ويحط خامات سيئة

        كلمتين و بس " ناس محترمه: اسمع ان عيسى كويس يمكن هتلاقى اراء كتيرة عكس رأيك على فروع التوكيل الرئيسية زى ابو رواش ولكن انا عن نفسى احيانا بحسهم محترمين واحيانا لأ .. عامة انت لما تخرج من التوكيل وتلاقى كل مشاكلك اتحلت هتحس انك راضى وتقول محترمين ولو لقيتهم نفضوا ليك ولملاحظاتك او انك محتاج قطعة غيار مش موجودة هتقول عليهم زفت .. اللى استنتجته انهم لما بيكونوا مضغوطين اوقات الزحمة الخدمة بتبقى هباب والعكس

        5- تم محاوله سرقه العربيه و الحرامي كسر الزجاج اليمين الخلفي: حرامى حمار يبقى يقابلنى لما يشوف حلمة ودنه لو عرف يدورها

        ---------------------------------
        اللون الاحمر مخصص للمداخلات الاداريه فقط
        2.14م
        1/3/2012

        م.ع.12

        Comment


        • #5
          تقييم ممتاز
          ربنا يبارك لك فيها عقبال ال 200000 كيلو
          [SIGPIC][/SIGPIC] ياتقول كلام في محله يا تقول حلو ياحلو
          [url]/photos/a.879931698703941.1073741827.879900435373734/879931905370587/?type=1[/url]

          Comment


          • #6
            معايا العربية وعامل بيها لحد دلوقتي 43000ك وبقالها معايا سنتين و شهرين والحمد لله العربية كويسة جدا جدا جدا بس المشكلة العفشة لازم تتربط كل فترة عاشن بتعمل اصوات عجيبة

            Comment


            • #7
              تسلم ايدك على التقرير و ربنا يباركلك فيها
              [CENTER][gdwl][glow1=#85207e][mark=#78498a][mark=#ffffff][FONT=Tahoma][SIZE=3]عدلت فأمنت فنمت يا عمر[/SIZE][/FONT][/mark][/mark][/glow1][/gdwl]


              [/CENTER]

              Comment


              • #8
                تقرير ممتاز و عربيه مميزه و فعلا من العربيات اللي عجبتني جدا
                ربنا يبارك لك فيها
                [IMG]http://img542.imageshack.us/img542/2454/tempraswpnel.jpg[/IMG]

                .................. سبحان الله و بحمده ,, سبحان الله العظيم ....................

                Comment


                • #9
                  تقرير ممتاااااااااااااز .. ربنا يباركلك فيها

                  Comment


                  • #10
                    تقرير اكثر من رائع وربنا يباركلك فيها ويحميها من كل شر

                    Comment


                    • #11
                      عربيتي عاملة 43 الف وتقريرك دقيق وسليم من حيث المميزات والعيوب

                      Comment


                      • #12
                        تقرير لا غبآر عليه من ناحيه الشموليه والوضوح في ادق التفآآصيل
                        بس انا بصراحه معرفتي محدوده عن الاسبرانزا ودخلت القسم بالصدفه
                        فياريت لو حضرتك توضح هيا كم cc وسعرها جديد كام ؟
                        والعربيه على قد عيوبها بس فيها مميزات كويسة صراحه
                        وربنا يديك خيرها ويكفيك شرها

                        Comment


                        • #13
                          المشاركة الأصلية كتبت بواسطة manchestrawy مشاهدة المشاركة
                          تقرير لا غبآر عليه من ناحيه الشموليه والوضوح في ادق التفآآصيل
                          بس انا بصراحه معرفتي محدوده عن الاسبرانزا ودخلت القسم بالصدفه
                          فياريت لو حضرتك توضح هيا كم cc وسعرها جديد كام ؟
                          والعربيه على قد عيوبها بس فيها مميزات كويسة صراحه
                          وربنا يديك خيرها ويكفيك شرها
                          العربيه 1600 سي سي 118 حصان
                          ثمنها 73 الف جنيه

                          Comment


                          • #14
                            بخصوص تقشر الدريكسيون .... هيتغيرلي علي الضمان و حجزته امبارح

                            قلب الولاعة كان اتحرق نتيجة لعب بنتي فيها و اتغيرت علي الضمان امبارح
                            مكنة الزجاج كانت بتزيق و اتغيرت امبارح بدل ما يحطو شوية زيت علي السوستة و الجراب

                            اشتريت للزمن حاملين اكصدام امامي يمين و شمال ب 50 جنيه "25 للجنب"

                            قطع الغيار بقت متوفرة فعلا في ابو رواش و حتي للبيع مش اصلاح بس بدليل شراء الحوامل المذكورة

                            فعلا تشحيم العفشة بيقعدك حوالي 13000 الف بدون تزييق "شحم مش زيت"

                            الوزن اللي هوة 1400 ده وزن صافي انما الوزن الاجمالي بدون ركاب 1770 "اقل من الاوكتافيا بتاع 30 =40 كيلو" ثبات اعلي بس تسارع اقل و بنزين اكتر و دي معادلة لازم تدفعها للاطمئنان و انت ماشي



                            انا عامل 35 الف ... ابو رواش اتغير تماما بعد ما توفرت قطع الغيار .... هبقي احكي في تقريري لما افضي ان شاء الله



                            اخيرا ربنا يباركلك و يبارك للجميع :)
                            [SIZE=6][COLOR=#001109]البريبئ [/COLOR]اتخرم و عايزيين [COLOR=#001109]بريبئ[/COLOR] جديد [/SIZE]:B4_444::dzey:

                            Comment


                            • #15
                              تقييم ليس عليه غبار لاكن العيب الخطير هو عدم توافر قطع الغيار أنا هعايا ال m11 عامله 20000 وغيرت قربه مياه ولاكن بعد فتره وعندى خرطوم البنزين مكسور وبدور عليه ومش لاقيه حتى فى التوكيل والسياره موديل 2011 وبرضه فيه عيب فى عداد البنزين بيركن ولما روحت قلولى أحنا راجعنا على الوصلات يعنى برضه فى نظرى التوكيل غير مرضى

                              Comment

                              Working...
                              X