ليه أشتريت سبرانزا ؟؟؟

[Abonora]

-- لا تعليق

منقول

[ehabbadr]

هو بقه جاب الــ 80 الف دي منين دول مجبوش ثمن الجمارك بس

انا قصدى جمارك لمكونات للسياره المجمعه محليا

[أبو عبدالله]

متجيش أبدا

حضرتك العربيه أصلا سعرها بالخارج 100 الف جنيه مصري وفي لسه جمارك تبقى ازاي توصل 80 الف بس بصراحه ده حساب غلط وعمرها ماتيجي كده أبدا

ثم اي عربيه مجمعه محليا بتفرق الف او الفين حاجه زي كده بينها وبين اللي بتيجي استيراد زي الدايو كده بتفرق في حدود 3 الاف جنيه زياده او اقل عمرها متعمل فرق كبير ككده والدايو مجمع محلي وبيجي في بورسعيد كوري منطقه حره لو خرجته من الجمارك هتلاقي سعره قريب جدا من المصري

[ehabbadr]

انا أدور على المداخله فى كونتاكت و اجيبها لحضرتك لانها تفصيليه جدا بس مش فاكر كانت فين

[معاذ الشرباصى]

انا فعلا يا دكتور ايهاب قرأت موضوع السوناتا ده, و كمان موضوع ان اللانوس فى بدايتها لما كانت تمنها 38 الف جنيه, كانت مكلفة ابو الفتوح 18 الف جنيه بالضرايب بكل حاجة

ابو عبدالله, يبقى ايه فايدة التجميع المحلى لو الفرق هيبقة الفين تلاتة؟ ازاى يعنى

ابسط مثال النيسان الصنى, واحد صاحبى شارى اليابانى ب 115 الف جنيه الاتوماتيك, و بعدها بكام شهر نزل التجميع المحلى و كان الفرق حوالى 20 الف جنيه بينهم

لأ طبعا لازم يكون فى فرق كبير, على الاقل علشان المستهلك يقتنع انه يشترى التجميع المحلى

[محمد صبري ابراهيم]

اولا سعر ال A5 في الصين نفسها في حدود
US$11,152
يعني تقريبا 64000 جنية مصري

يعني العربية في بلدها بتتباع بحوالي 64000، منين بقى إن تمنها الحقيقي من 35000 إل 40000؟؟؟؟؟؟؟؟ ، أرجو التوضيح

و ده رابط بالسعر
سعر الاسبيرانزا A516 في الصين


بالنسبة لقاعدة الغالي تمنه فيه، فهي أكيد قاعدة صحيحة، بس لما يكون الغالي ده فعلا تمنه فيه مش تمنه فجيب الوكلاء و الجمارك و الضرائب، و أجي أقول تمنه فيه

و على فكرة المفروض نتكلم بمنطق ال Best Buy او ال Best Value for money يعني أحسن حاجة تشتريها بالفلوس أو أحسن قيمة تحصل عليها من الفلوس، ما حدش بيفكر بمبدأ "إن ما دام ده غالي، يبقى أكيد كويس" !!!!!!!!!!!!!!!

عربية وحشة، ماشي بس بكام؟
عربية حلوة، بردة بكام؟
هو ده السؤال

عربية رخيصة و فيها مشاكل محددة و مش مشاكل قاتلة (يعني مش مشاكل في الماتور مثلا، مشاكل في أساس العربية) و ماله بتغطي إحتياج شريحة و فئة محددة من الناس
عربية غالية جدا و ما فيهاش مشاكل (مع كامل التحفظ على كلمة مافيهاش مشاكل خالص ديه) بردة و ماله بتغطي إحتياجات شريحة و فئة تانية من الناس

الاتنين كويسين لإن الأتنين إدوا لكل واحد عربية تغطي إحتياجاته طبقا لظروفة

ما ال 128 و ال 127 مشاكلهم معروفة و محددة و فيها مشاكل بتبقى جامدة و مكلفة و مع ذلك الناس بتشتريهم ليه؟؟؟، علشان العربيات ديه بتدي إللي إشتروها طلبهم في حدود إمكانياتهم المادية

[محمد صبري ابراهيم]

وجب تصحيح معلومة فقط

سعر ال A5 في الصين في حدود ال US$10000 أي ما يعادل 58000 جنية مصري

[محمد صبري ابراهيم]

ليه اشتريت اسبيرانزا؟

بعض الحقائق أولا:
1 - لسة حتى هذه اللحظة لم أستلم السيارة
2 - متوقع الاستلام في خلال أسبوع إن شاء الله

نيجي لرد السؤال:
هاتكلم هنا من أكثر من وجهة نظر

1 - شكل العربية:
العربية شكلها بالنسبة لي مقبول ، هي شكلها من ورا بصراحة مش عاجبني (مسألة أذواق) ، بس في المجمل العربية شكلها مقبول بالنسبة ليا

2 - شكل الصالون و الإمكانيات:
الصالون شكله لأول وهلة مبهر و ملفت، الخامات مش غالية، بل خامات رخيصة، و لكن الملاحظ مثلا إن التابلوة يتكون من جزئين، جزء علوي و جزء سفلي، الجزء العلوي جلد (مش عارف لسة، لم أتأكد بعد هل جلد طبيعي أم صناعي) ، بس إللي أنا متأكد منه إنه نوع جيد يتحمل الشمس المباشرة، و ده ماسك الصالون من الداخل داير ما يدور، اما الأجزاء السفلية من التابلوة فهي بلاستيك ضعيف و يحتاج بعض الحرص في التعامل
الكماليات كثير جدا و مبهرة جدا من أول الكاسيت و ال Sound System إلي إمكانيات التكييف الرقمي إلي كل الإمكانيات الأخرى التي لن يسمح المجال بسردها بالتفصيل.
الكراسي مريحة جدا جدا جدا.

3 - المحرك:
المحرك لسة جديد، أول مرة ينتج كانت في أول 2006، وهو ACTECO سعة 1600 CC ، لم يختبر بعد و لكن بصراحة ما جعلني أقتنع به هو قيام شركة فيات بالتعاقد مع شركة سيري لإستخدام هذه المحركلت في سياراتها القادمة كلها و المجمعة في الصين ، ثم بعد ذلك ستقوم فيات بوضعة في سياراتها ال BRAVA
و ده رابط للكلام ده
رابط عن تعاقد فيات و شيري

4 - نظام التعليق:
نظام تعليق رياضي McPhrson
فرامل ABS من إنتاج شركة Delphi و هذا رابط بموقع الشركة http://delphi.com/

5 - التوكيل:
من وجهة نظري الشخصية إنه واحد من أكبر التوكيلات في مصر و أكثرها إحتراما

6- الضمان:
100000 كم أو 3 سنسن، فترة ضمان من أكبر فترات الضمان في مصر

7 - السعر:
و الذي يقع في المدي المعقول لإقتناء سيارة 1600 في مصر (للأسف)، بالإضافة لإنه تمن العربية برة قريب جدا من تمنها هنا في مصر، و ده من وجهة نظري ميزة مهمة جدا، حيث لن أدفع فلوس (طالع عيني فيها) زيادة علشان خاطر الوكيل عايز يكسب زيادة

8 - العمر الافتراضي:
غير معلوم لسة و لكن لن يكون أسواء من اللانوس مثلا، من وجهة نظري الشخصية

9 - أسعار قطع الغيار:
زي اللانوس و فيه حاجات أرخص، و ده معقول بالنسبة للزيرو

10 - سعر إعادة البيع:
جيد جدا حتى الآن، و لكن أنا شخصيا بشتري علشان أركب مش علشان أبيع، يعني أنا عايز أركب و أتبسط و يوم ما أحب أبيع علشان أجيب حاجة أحسن يبقى يحلها ربنا ساعتها (حاجة في علم الغيب، يعني إللي جابو لانوس ب 38000 كان عارف إنه هايبعها النهاردة ب 50000 جنية !!!!!!!!)

في المجمل:
وجدت إن العربية بتديني حاجات معقولة بسعر معقول، يعني العربية حلوة جدا على قد فلوسها (ده رأيي الشخصي)

هاتقولي:
1 - بس العربية لسة جديدة و محدش جربها
2 - ديه عربية صيني و الصيني سمعته في مصر تكسف
3 - العربية فيها عيوب

أرد على حضرتك:
1 - العربية جديدة ديه حقيقي، و فيه جانب مخاطرة ده بردة حقيقي، بس من واقع قراءة المعطيات (التوكيل و ظروفة و اسمه) تجد إن نسبة المخاطرة هنا من وجهة نظري تصل إلي 30% ~ 20% و التي هي نسبة مخاطرة مقبولة بالنسبة لي
2 - سمعة الصيني: و ده كلام ما قدرش أنفيه و لا أكذبة، بس بردة ابو الفتوح مش بيهرج زي ما جاب الدايو و مكانش يعرف أصلا إن دايو بتعمل عربيات و خلاها العربية الشعبية في مصر (و و ما هياش عربية ملهاش عيوب بردة، بس كانت مناسبة بالنسبة لسعرها بردة) جاب الاسبيرانزا و أكيد عارف إنه شايل مسؤلية صيانتها و ضمنها 3 سنسن (مع العلم إنه كمان بيقفلها في مصر) يعني مسؤليته ضخمة جدا، و ماعتقدش إنه غشييم علشان يجيب عربية تخسرة بعد مكسب دايو التاريخي بالنسبة له.
3 - العربية فيها عيوب : أنهي عيوب
الفتيس مبوش : هايربطوه في الصيانة و مبقاش موجود في التسليمات الأخيرة
تيل الفرامل: شحنة تيل فرامل و طلعت سيئة و هايغيروه على حسابهم بالكامل، و بردة العربيات الجديدة ما فيهاش العيب ده، و بعدين موردين الأجزاء المختلفة للعربية لسة أبو الفتوح بيتعامل معاهم لأول مرة ، يعني الموضوع هايخد شوية وقت لحد ما يقدر ينتقى المورد الجيد من السئ لأنه بيقف عليه بخسارة في الآخر
حكة دركسيون و دبة في العفشة: عيوب قديمة جدا و كانت في التسليمات الأولى و إتعلجت في الجديد خلاص و كمان بتتغيير للتسليمات القديمة على حساب التوكيل
التكييف ضعيف : بردة مشكلة قديمة قوي في التسليمات الأوللى و خلاص إتحلت من زمان و كثير من المالكين قال إن التكييف بتاع العربية بقى ثلاجة.
عفشة ناشفة : ممكن تكون سمة عربية ، بس انا شخصيا لي وجهة نظر في موضوع العفشة ده، بس مستني لما أستلم و أجرب حاجة معينة و بعد كدة هاقول رأيي الشخصي فيها
إحساس بإنك مش راكب زيرو: ده إحساس و إنطباع شخصي يتغيير من شخص للتاني
العربية تقيلة و مش بتجمع بسرعة: ده صحيح لحد سرعة 60 كم و بعد كدة تجميعها سريع، و بعدين العربية ديه عربية كلاسيك مش عربية سبور ، مش مطلوب إن التسارع بتاعها يكون عالي، انا كنت شوفت في احد المواقع بس للأسف لا يحضرني الرابط هنا إن التسارع بتاع الاسبيرانزا ال A516 1600 cc من 0 إلى 100 كم حوالي 15 ثانية !!!!! و ده طبعا رقم كبير المفروض يكون أقل من كدة ، لكن في مقابل ده إنت واخد عربية تقيلة و ثابته على الطريق و مش بس كدة ديه بتوصل لسرعات عالية جدا كمان، يعني مريحة جدا في السفر،ـ يعني حاجة قصاد حاجة

في النهاية ده رأيي الشخصي و ليه أنا قررت أشتري العربية ديه

على فكرة يا جماعة أنا كنت قلقا جدا من العربية ديه و كنت قلقا أحجزها أصلا (علشان صيني :lol: :lol: )، بس بصراحة بعد البحث و التقصي و التجربة الشخصية و متابعة التوكيل، قررت إني أتوكل على الله و أحجز و انا كلي ثقة إن ربنا إن شاء الله لن يخذلني فيها ، لأني عملت إللي عليا و أخذت بالأسباب و سألت و حاولت أعرف

في النهاية آسف جدا على الإطالة

[sokasoon]

ليه اشتريت اسبيرانزا؟

1 - لسة حتى هذه اللحظة لم أستلم السيارة

2 - متوقع الاستلام في خلال أسبوع إن شاء الله

حضرتك حاجز اسبرانزا A620 ولا اسبرانزا A516

لان يوم 14/6/2007 هيتم وقف تسليم السيارات الاسبرانزا والمصنع هينتج دايو

الكلام ده مش من دماغى على فكرة وده من التوكيل

بالنسبة للاسبرانزا A620 هما وقفو الحجز بتاع العربية مؤقتا

انا بقول لحضرتك الكلام ده علشان تتصل بيهم علشان يسلموك العربية

علشان لو مستلمتش قبل يوم 14 هتضطر تستنا لحد اخر الشهر

[محمد صبري ابراهيم]

شكرا لإهتمامك أستاذ سوكاسون

انا حاجز A516

وهما في أبو غالي قالولي يوم ما دفعت (06/06/2007) 10 أيام لو ماكلمنكش يبقى آخر أسبوع في الشهر

بالنسبة لل A620 ، انا عارف إن أبو غالي مش بيحجزها دلوقتي علشان عنده قوائم إنتظار تسليم و صلت لحد سنة و علشان كدة مش قادرين يحجزوا تاني دلوقتي

[sokasoon]

شكرا لإهتمامك أستاذ سوكاسون

العفوو يا استاذ محمد صبرى

ولاكن انا يهمنى مصلحتك ومصلحت الاعضاء

علشان كده انا بسأل دايما فى ابو غالى على الاستلام

بالنسبة للاسبرانزا والدايو علشان اى حد حاجز اقدر افيدوو

[محمد صبري ابراهيم]

ولاكن انا يهمنى مصلحتك ومصلحت الاعضاء

علشان كده انا بسأل دايما فى ابو غالى على الاستلام

بالنسبة للاسبرانزا والدايو علشان اى حد حاجز اقدر افيدوو

هي ديه الروح يا أستاذ سوكاسون و هو ده المطلوب للمنتدى علشان يبقى فعلا مفيد، و شكرا ليك إهتماماك بالمصلحة العامة للأعضاء