تقييم العربية a516 بموضوعية

[AMGAD1521977]

ياريت يا جماعة لكل من يمتلك العربية و له تجربة معاها يقول رأيه فيها بمنتهى الموضوعية سواء كانت سلبيات او ايجابيات

[hugan]

ابدا بنفسك
تقييمك الاول ياباشا واحنا وراك

[AMGAD1521977]

ابدا بنفسك
تقييمك الاول ياباشا واحنا وراك

ابدأ من الاول انا استلمت العربية يوم 5/2/2008 و لم اكن اعرف قبلها هذا النوع من السيارات الصينية الا عن طريق زميل لى فى العمل

اولآ : الايجابيات : السعر المعقول - الكماليات ( تكييف - كاسيت سى دى - انذار...الخ ) -ادخال العنصر الاوروبى فى دواخل المحرك ( محرك غير صينى بالكامل ) - اجزاء الكهرباء فى السيارة المانى الصنع - رحابة الصالون - شاسيه قوى - صاج قوى - تكييف قوى - عفشة قوية ( ايجابية عشان تستحمل طرق مصر الغير عادية ) - العربية تقبل تركيب بعض الاجزاء زى الفلاتر من انواع اخرى ( يركب لها فلتر بنزين النوبيرا مثلآ و كمان سير الكاتينة يركب لها السيور الالمانية و ليست الانجليزية فقط )

ثانيآ : السلبيات : رداءة التقفيل المصرى ( ليس الصينى ) متمثل فى خامات الفرش و الطارة و التابلوه - عدم ضبط زوايا العجل للسيارة ( عن تجربة شخصية ) - التوكيل و نوعية الخدمة ( ارضاء العميل يتفاوت ما بين الحين و الآخر كذلك قطع الغيار ابو الفتوح بيسترخص فى بعض قطع الغيار و يجيب نوعيات رخيصة زى الفلاتر مثلآ ) - عدم وجود شفافية فى المعاملة فى التوكيل ( كمثال لا ترى السيارة و لا تعرف ما الذى تم تغييره فى السيارة بعكس توكيلات اخرى مما يؤدى الى عدم الثقة بين صاحب السيارة و التوكيل ) - العفشة ناشفة مما يجعلك تشعر بالمطب - نوعية الكاوتش الذى يتم تركيبه فى السيارة من نوع pirelli ناشف بالنسبة للعربية و ايضآ غير ملائم لطبيعة الطرق المصرية - عدم وجود ايرباج فى السيارة - عدم وجود اضاءة زينون فى السيارة ( لو تم تركيبها على العدسات حتعمل شغل عالى اوى )

ملحوظة اخيرة : العربية دى زى اى عربية تحتاج الى صيانة و مش معنى انها تحتاج الى صيانة تبقى العربية ضعيفة هى مشكلة الناس ان التوكيل جعل الناس تشك فى مصداقيته للعربية عشان كده الناس بتخاف من المنتج الصينى فى حين انه هو عكس ذلك تمامآ
على فكرة انا عامل بالعربية 97000 الف كيلو و بسافر بعربيتى كثير على طرق جنوب سيناء و الحمد لله حتى الان العربية كويسة و بداوم على صيانتها بره التوكيل و ربنا يستر طريقى

[hugan]

تقييم حييادي
تم الشراء 13/7/2008
89000 كيلو متر استهلاك
خارج الضمان من 3سنوات كل الصيانه باعملها بره
استهلاك بنزين معتدل 200 كيلو في الصفيحه
من الخارج العربيه ممتازه بودي خارجي قوي ابواب محمله كبوت وزنه تقيل جدا عن اي عربيه في نفس الفئه في الغالب العربيه كلها دعامات صاج ما يطبقش لو حد ريح عليه
ستروين اكسارا خبطني من الخلف
عنده كبوت واكصدام وفوانيس وردياتير
انا خبطت من الامام في كارينز الشبكه اتكسرت وكمره الاكصدام اتعوجت وتم استعدالها ومفيش اكتر من كده
موتور قوي بطيء نسبيا في الاول والتاني لكن من التالت ممتاز قوته عاليه في سحب العربيه مع الحموله
يعيبه كثره الحساسات
الدوائر الكهربائيه بالكامل
بوابه
كنترول
حساسات
اسبراتير
كلها من بوش
التكيييف ممتاز الكباس ساندن
الفرامل جيده طنابير الاوبترا تركب عليها لسه مغيرها
تيل الفرامل بجيبه كوري
غطاء القربه اوبل
فلتر البنزين فلتر الزيت دايو
السيور الماني وتشيكي او ايطالي او انجليزي
صالون واسع جدا ممكن 4 افراد رفيعين يركبو في الكنبه الخلفيه
ليها مكيانيكيه مخصوصن للشغل فيها ميزه وعيب زيها زي بعض العربيات الالماني مش اي حد يشتغل فيها
العفشه متوسطه المستوي
ناشفه في المطبات
ليها مساعدين مونرو
ممكن مساعدين الانسر بومه يركبوا عليها والفشه بتفرق جامد بعدها
جميع الكماليات مش كماليات منظر كلها تعمل بكفائه
في النهايه صفقه رابحه
مناسبه جدا لسعرها وبتستفيد من كل جنيه تم دفعه فيها

[mmmmgogommmm]

ممتازة==معايا موديل 2011 ماشية 5000 استلام مارس 2011==========ممتازة كموتور وعفشة وثبات عل الطريق-----السعر + الكماليات + ما سبق
يساوى سيارة ممتازة------العيب مركز الصيانةفى الصيانات الدورية فقط بيلكلك ويزحلق --اما فى اصلاح العيوب فممتازين----

[medo99_pc]

بس يا باشا انا كان معايا LS model 2011 Zero
وبعتها وهى عاملة حوالى 24 الف كيلو

نبدأ بالمميزات
عربية بالنسبة لسعرها امكانياتها معقولة جدا واحسن من الفيرنا والاانوس من حيث الأمان وكمان سعر اعادة بيعها مش هيخسرك كتير انا كنت شاريها زيرو ب 60 الف وبعتها بعد سنة وهى عاملة 24 الف كيلو ب 53 الف وكان ممكن تزيد شويه بس انا اللى اتسرعت

وكمان عائلية جدا الصالون واسع طحن والشنطة معقولة

بالنسبة للعيوب:

استهلاك بنزينها عالى شويه
سحبها وانت محمل فى الصيف المتوسط
عفشتها ناشفة اوى والمساعدين وعلبة الدركسيون بيبوظوا بسرعة زى ما حصل معايا وغيرت المساعدين مرتين

وربنا يوفقك

[jant]

بس يا باشا 24.000 كم فى اقل من سنه
ده انت لو راكب ايه كان زمانها عملت اكتر من كده
انا معايا ls موديل 2011 بس عامله 11.000 كم

[medo99_pc]

بس 24 الف فى سنة مش كتير ولا قليل, ده الاستخدام الطبيعى داخل القاهرة وهو يا دوب مشوار الشغل كل يوم وكل فين وفين وسفريه او اتنين فى الشهر بالكتير


بس عموما زى ما قلت هى عرببية كويسة جدا بالنسبة لسعرها يعنى متتوقعش منها اكتر من اللى تقدر عليه