سؤال للخبراء

[hamada_71]

الحمد لله عملت حادثة بسيارتي m11 وشيلتها وطلعت بيها على تكنو سيرفيس1 (جسر السويس) دلوقتي عايز أعرف بالنسبة لإجراءات التأمين أنا بلغت الشركة والمندوب عاين السيارة ومستني المقايسة طب لما ياخد المقايسة حيشتغلوا في السيارة على طول ولا إيه النظام وبعدين هل التأمين حيدفع كامل قيمة التكاليف. السيارة موديل 2010 ودي أول مرة يحصل لي حادث.


على فكره حاجة صغيرة طلعت بيها من الحادث ده إننا بننسى حاجات شايفينها صغيرة بس ممكن تكون مؤثرة زي دعاء السفر مثلا ودعاء الركوب وبعدين راحتك الجسمانية أثناء السفر

ووقاكم الله جميعا شر الطريق والحوادث.

[huss2000]

الف سلامة ليك والحمد لله انك بخير وربنا يعينك على اصلاح السيارة
كنت ماشي بسرعة ولا ايه

[hugan]

قدر الله
وقضاء اخف من قضاء
ربنا يعينك وترجع احسن من الاول

[khaled_Saga]

الف حمد الله على سلامتك وقدر الله وماشاء فعل

اخونا احمد عضو باسم katoba لو شاف الموضوع اعتقد هيفيدك جدا لانه خبرة فى الحوادث والتأمين

ربنا يكفينا ويكفيك الشر اللهم امين

[hemaa_82]

في الطبيعي علشان الانجاز و بمجرد عمل المقايسة بتبدأعملية فصال ما بين الورشة و شركة التأمين ..... النصيحة متعملش حاجة لحين الموافقة علي المقايسة او البت فيها علشان وقتها هتعرف التأمين وافق علي تغير باب مثلا و لا سمكرته بس ....كان زمان كله بيغير انما مع الاسعار العظيمة و الحوادث اللي خاربة بيوت التأمين بقت غالبا بتتسمكر طالاما الصاج فيه حيل ...المهم بعد ما بيحددوا ايه اللي اتوافق عليه حضرتك تروح تشوف و لو فيه اي حاجة زياده نفسك فيها هتكون علي حسابك فلازم تعرف تمنها لوحدها عير ان مع كل سنه في البواليص العادية بيزيد تحمل الفرد من حساب التأمين ... بمعني لو التأمين هيديك في سنة شراء العربية 100% من فاتورة الاصلاح ... تاني سنه هيرجعلك 90% بس و يقولك ال 10 % الفرق ده كده كده اهلاك ....تعمل حسابك علي دول كمان + الزياده اللي اتكلمنا عليها فوقبعد كده ....
عايز تنجز ....هتدفع كل حاجة و تاخد شيك من شركة التأمين .... فاضي و مستغني هتستني الشيك و تكمل عليه
....
انا كنت مخبوط في الm11 بتاعتي و مكسور اكصدام خلفي + امامي + خبطة باب خلفي شمال + رفرف امامي يمين + رفرف خلفي شمال ....تم تغيير كل الاكصدامات ....و تم سمكرة كل الخبطات و دهان اجزاء فقط ال 5 قطع المذكورة ....في ابو رواش الفاتورة طلعت 5000.....التأمين رجع 3 بس .... خصم 2000 تحمل علشان 3 سنة من الانتاج + بلاغ عن ال خبطات باعتبارها عدد 2 حادثة + اختيار التوكيل و ليس ورشة من المتعاقد عليهم مع شركة التأمين

اتمني اكون قربتلك الصورة كمثال عملي

[hemaa_82]

كنت كاتب كل قطع الغيار و اسعار المصنعيات في الموضوع ده

http://www.nilemotors.net/Nile/100589-m11-34.html

مصنعيات:-

800 سمكرة ....
باب خلفي شمال& رفرف خلفي شمال & رفرف امامي يمين.. "كانو متبهدلين"
استعدال حوامل علبة اكصدام خلفي يمين "خفيف جدا و علي البارد تماما" ..
فك و تركيب اكصدامات جديدة
تلقيط دورانات رفرف يمين خلفي علي البارد و امامي شمال علي البارد " بقشيش 50 جنيه"

1500 دوكو
5 قطع .... باب & 2 رفرف & 2 اكصدام
تلميع باقي السيارة و معالجة الدوران بعد تلقيط البارد " بقشيش ورقتين ب 20 يعني 40 بلبل"

100 سروجي " قال يعني فك و تركيب الباب من جوة"

100 كهرباء " برده قال يعني فوانيس شبورة و الكلام الفاضي ده"

25 مصنعية تغيير زيت


قطع غيار :-

500 اكصدام خلفي فبر
65 باكتة اكصدام خلفي شمال
25 علامة الشنطة الكبيرة
25 طبة شداد خلفي & امامي
475 اكصدام امامي فبر
25 كلبسات عدد 20
147 حامل اكصدام خلفي وسط فبر
57 باكتة باب خلفي شمال
89 باكتة اكصدام خلفي وسط
359علبة حامل اكصدام خلفي يمين
115 كاسح امامي
115 كاسح خلفي
83 ممص صدمات اكصدام امامي"حشو فلين"

29 فلتر زيت
236 جالون موبيل 1
68 لتر موبيل 1



طبعا نزود 10% علي كله ضرائب ... علشان نساعد البلد ...

اجمالي 5500

[katoba]

جرى اية ياعم خالد انت هتفضحنا فى القسم ولا ايه ههههههههه .. الف سلامة ليك ياباشا واعتقد ان الاخ هيما جابلك المفيد بالضبط وبالنسبالى انا كان عندى خبطة فى الاكصدام الامامى مع فانوس اماى يمين مع فانوس شبورة وشبكة مع حته فى الصاج جنب الرفرف تم سمكرتها وباقى القطع تم استبدالها بقطع جديدة وكانت التكلفة 3000 سددتها انا للتوكيل واخدت فاتورة وديتها شركة مصر للتامين وحصلت بعد فترة على 2400 يعنى اتحملت 600 وكانت موديل السنة

[katoba]

بالمناسبة كنت عاوز اعرف هدفع كام فى تانى سنة لشركة التامين . هل الحادثة هتاثر على القسط السنوى والنسبة هتزيد ولا هيمشى الموضوع طبيعى وهيقل بنسبة معينه زى مافهمونى فى المعرض

[khaled_Saga]

بالمناسبة كنت عاوز اعرف هدفع كام فى تانى سنة لشركة التامين . هل الحادثة هتاثر على القسط السنوى والنسبة هتزيد ولا هيمشى الموضوع طبيعى وهيقل بنسبة معينه زى مافهمونى فى المعرض

هههههههههه انت اتفضحت خلاص يا عم احمد واللى كان كان --- عندك مانع ؟؟

اعتقد مش هيأثر .. مبلغ التأمين تانى سنة بيتحسب على 80% من تمن العربية وبعد كده بيقل 10% كل سنة .. يعنى اول سنة كنت مأمن 100% على مبلغ 72000 اللى هو تمن العربية زيرو كاش والسنة التانية امنت على 80% من تمنها اللى هو 57600 والسنة الجاية حسب كلام البنك هيبقى على 70% وهكذا ..

وحشتنى على فكرة وان شاء الله اكلمك قريب

[katoba]

هههههههههههه انت كمان والله ياخلود وعموما ياباشا لينا كلام مع بعض قريب لانى عاوز اسالك فى حاجات كتيره

[khaled_Saga]

هههههههههههه انت كمان والله ياخلود وعموما ياباشا لينا كلام مع بعض قريب لانى عاوز اسالك فى حاجات كتيره

عيونى ليك يا عم احمد هستنى مكالمتك

[hamada_71]

متشكر ليكم جدا يا جماعة
والحمد لله على كل شئ أنا الخبطة بتاعتي جت زياده شوية عنك يا هيما فيها مقص أمامي وفردتين بالجنوط بتاعتهم فبرضه كنت عايز أعرف التأمين بيدفع لغاية كام في المية إصلاحات يعني أنا عربيتي 2010 يحاسبوني على كام

على فكرة أنا كنت ماشي 100 - 120 متهيألي مش سرعة أوي هو صحيح طلعت على الرصيف بس الحمد لله
عموما أنا شاكر لكل واحد رد على الموضوع سواء بالدعاء أو الردود وكفاكم الله شر الطريق