دعوة للنقاش حول مساعدين الاسبيرانزا

[essam2008]

كل عام وانتم بصحة وخير بمناسبة عيد الفطر .
انا عايز اغير مساعدين العربية فبرجاء الإفادة للاهمية اختار ايه؟؟؟؟؟؟؟؟؟؟؟؟؟؟؟؟؟؟؟؟؟
من خلال البحث والسؤال توصلت للمعلومات التالية:
(1) بالنسبة للمساعد ال كي واي بي يقال من خلال الاستخدام علي المستوي أنه غير صالح للاسبرانزا لانه ضعيف وبيضرب بعد فتره قريبه.
(2) بالنسبة للمساعد المونرو بيقال أنه كويس بس فيه ناس بتقول أنه بيفقد العربية ثباتها بعد 120كم.
(3) فيه نوع جديد اسمه تكنو وده مش عارف عنه اى ردود

[stonecoldmido5]

مساء الخير انا ركبت كي واي بي الياباني امامي , و المونرو الصيني خلفي و االحمد لله احسن كتير من الفابريكة بس العربية فعلا علت شوية و اتزانها مش زي الاول

[BESO516]

الضمان غيرلى المساعدين الأمامى مرتين وللأسف باظو وانا بره الضمان دلوقتى

فمحتار جدا جدا لأنى عايز حاجه نضيفه جدا بس بدون مالعربيه تعلى او توطى او تفقد اتنزانها وده اللى بدور عليه وربنا يسهل

[midoelmodamer]

متااااابع وهو سؤال معلش الهدف من تغيير المساعدين علشان تنعيم العفشة ولا لغرض تانى ؟؟

[hugan]

انا ركبت المونرو من حوالي سنه وشغالين كويس لكن النشفان في العفشه موجود
التكنو المفتر ض انها شركه المانيه فعلا لتصنيع العفشه والمساعدين
لكن المساعدين الموجودين في السوق تكنو لكن صيني
المساعدين نازلين في الاساس لمتسوبيشي لانسر مش لاسبرانزا
علشان كده العربيه بترتفع من الامام بالتالي بيائثر علي الثبات يعني 140 او 150 كويس
لكن الكي واي بي مفيش حد شكر فيها لانها ش بتستحمل وزن العربيه التقيل وبتضرب بسرعه
ارشح للك التكنو انا اتفرجت عليه في شارع دمشق
شكله مساعد محتر م ومعمول بنضافه
لكن التجربه الله اعلم

[abdulhafeez]

انا بصراحة مشيت بالمساعدين الفبريكة حوالي 60 الف كيلو على مدى 3 سنين وبعدين غيرتهم ب كي واي بي بس استيراد مع تعديل قطمة الدركسيون وتغيير مقاس الكاوتش الى 195-60-15 العربية اتغيرت تماما واصبحت انعم بكتير مع اني غيرت المساعدين اللي قدام بس واللي ورا بتوع الفبريكة .... هو المشكلة ان في دبة خفيفة في المساعد لما سالت الميكانيكي عليها قال ان المساعد مستعمل ومستحيل يكون زي الجديد ... دلوقتي بعد 5 شهور استخدام حسيت انهم خفو شوية .. بس بصراحة انا غشيم شوية في المطبات واختي بتتعلم السواقة ومش بتاخد بالها من المطبات يعني خدلك كل هبده وهبده وكمان على سرعات فانا اعتقد انهم مش وحشين خالص كده ... وبعدين لما تشتري مساعيدن استيراد تمنهم 300 ج وتغيرهم كل سنة مش قضية .. اللي مخلنيش اجيب الجديد ان تمنه حوالي 1000 وبصراحة الفلوس كانت مزنقة ..... ولكن بشكل عام انا شايفهم مقارنة بتمنهم كويسين قوي... بالنسبة للاتزان بصراحة هو اتغير واصبح اقل على السرعات العالية .. بس ده سببه ان الكاوتش اللي بتنزل بيه العربية بيكون كاوتش اسبور .. وانا ركبت كاوتش اعلى ب 1 سم وكمان مش اسبور فاكيد هيكون في فرق بس مش كبير قوي بصراحة ... ( انا شخصيا ممكن استبدل شوية الاتزان دول ب نعومة اكتر في العربية لان المطبات اكتر من الطرق السريعة )

[akmm]

مونرو ... افضل .

[akmm]

مازلت وعن تجربه بقول مونرو

[beshomilan]

طب غاز بس ولا زيت بس ولا الاتنين على بعض ولا ايه؟؟
استفسار تانى
هو كل نوع عربيه ليها المساعد بتاعها ولا ممكن مساعد عربيه يتوفق على موديل تانى؟؟

[hugan]

طب غاز بس ولا زيت بس ولا الاتنين على بعض ولا ايه؟؟
استفسار تانى
هو كل نوع عربيه ليها المساعد بتاعها ولا ممكن مساعد عربيه يتوفق على موديل تانى؟؟

مكتوب علي جسم المساعد غاز تكنولوجي
يعني غاز علي زيت
اظن ان الغاز من اسباب نشفان العربيه
كل عربيه ليها المساعد بتاعها الا اذا تشابه التصميم بين عربيتين
مثال في القديم
الفيات 25 وال 1300 هم نفسهم نفس مساعدين ال 32 وتقريبا العفشه واحده
الصينين اقتبسوا عفشه الانسر البومه في الاسبرانزا 516
علشان كده نفس المساعدين بيركبوا