الى مالكى التيجووووو فقط

[هانى القناوى]

كنت محتاج اعرف من كل اللى امتلك التيجو معلومات عنها
علشان اللى ماركبشى العربيه دى لمده كبيره مش هايقدر يحكم عليها
ووبعد كده كل اللى اساله يقولى ياعم دى صينى ويتريقوا على العربيه علشان كده قولت اسال اللى امتلك العربيه دى وعايشه معاه

1 / قوه ومتانه العربيه (صاج وعفشه )
2 / اسعار قطع الغيار
3 / هل معمره ولا كل شويه بتبوظ حاجه من العفشه او اى جزء
4 / اداء التكيف فى الظهر
5 / وسائل الامان والراحه والابشن اللى فيها
6 / استهلاك البنزين
7 / افضل فئه واعلى فئيه ايه
8 / وسع الصالون وارتفاعها عن الارض ( علشان المطبات)
9 / اسعار الفئات
سعر موديل 2013 للاعلى فئه اوتوماتك
ياريت تقول ايه تجهيزات فى اعلى فئه للاوتوماتك

[hamaka]

هى العربية مش معايا ، بس كنت بفكر فيها فترة طويلة و كنت بدور على اجابات لنفس أسئلتك دى ، فا هقولك على اللى أعرفه لحد من السادة ملاك العربية يدخل يأكد ، يعدل أو ينفى الكلام....

1 - صاجها قوى جداً و محمل فى معظم أجزاء العربية ، بس العفشة ناشفة ناشفة يعنى
2- أسعار قطع الغيار رخيصة و موجودة بكثرة و الصنايعية بيعرفوا يتعاملوا معاها كويس
3- مش اعتمادية أوى ، كل فترة بتحتاج يتعمل فيها حاجة ، مش حاجات تعور جيبك أوى بس بتحتاجلها حاجة كل شوية
4- التكييف بتاعها كويس جداً و بعض الناس قالت ممتاز
5- الأمان فيها كويس على الورق ، يعنى ABS و Air Bags و كده بس معرفش حد جرب الحاجات in action ربنا يستر على الجميع ، فيها أوبشنز كتير زى معظم الصينى و الراحة مش أد كده أوى عشان العفشة و الكراسى ناشفة شوية ، بس اللى عمل فرش محترم ظبط العيب ده
6- استهلاك البنزين فيها عالى بشكل ملحوظ مقارنة بفئة الموتور بتاعها ، و ده طبعاً بسبب وزن العربية العالى على موتورها
7- هما اللى كانوا موجودين من الشكل القديم فئتين: مانيوال 1600 و أوتوماتيك 2000 ، الشكل الجديد بقى مانيوال بس و الاوتوماتيك منزلش مصر
8- صالونها واسع و عالية جداً عن الأرض و بتنسى المطبات فيها (من ناحية الحك فى المطبات لاكن بتحس بيها طبعاً عشان نشوفية العفشة)
9- اخر سعر أعرفه ليها 115000 للشكل الجديد ، معرفش القديم لسة موجود زيرو ولا لأ

[هانى القناوى]

شكرا يا hamaka على توضيحاتك
طيب هى العربيه مش هاتنزل اوتوماتك2000 cc فل ابشن 2013 ؟ الشكل الجديد
زى ايه الحاجات اللى بتتعمل كل شويه
وبعد كد هى لسه زيرو وبتحتاج مصاريف ؟؟!!؟؟

[hamaka]

شكرا يا hamaka على توضيحاتك
طيب هى العربيه مش هاتنزل اوتوماتك2000 cc فل ابشن 2013 ؟ الشكل الجديد
زى ايه الحاجات اللى بتتعمل كل شويه
وبعد كد هى لسه زيرو وبتحتاج مصاريف ؟؟!!؟؟

الشكل الجديد منزلش منه الاوتوماتيك لسة ، يجوز مستنيين موضوع الدعم ده اللى شكله كده هيفكس بعد ما مرسى اتقلش أو على الأقل هيتأجل....

الحاجات اللى بتحتاجها دى بتبقى أعطال سببها فى المعتاد مستوى التقفيل عشان مصرى (بيقولوا ان الجديدة تقفيل بره و لو الكلام صحيح تبقى ميزة قوية جداً) ، تصنيف الأعطال طبقاً لرواية مالك العربية اللى سألته ، كانت مره لقى الزيت بينقص جامد ، طلعت مشكلة فى الفلتر و الكارتيرة و اتعمله فى الضمان من غير فلوس ، مره احتاج يغير التيل الأمامى بدرى أوى مكانش مشى بيه غير 7000 أو 8000 كيلو حاجة كده و مرضيوش يغيرهوله فى الضمان و قالوله ده حاجات استهلاكية و انت استخدامك سئ و كده ، طبعاً هو ولا استخدامه سئ ولا نيلة ده بيحسس على العربية بس التيل اللى ركب كان سئ ، كان فيه كام حاجة تانية كده قاللى عليها بس ده اللى فاكره حالياً

العربية الزيرو كده كده عليها ضمان ضد عيوب الصناعة ، بس القطع الاستهلاكية عليك (تيل ، سيور ، فلاتر ، بوجيهات الخ) الفكرة بقى ان الحاجات دى مش بتبقى معمرة أوى فى العربية ، يعنى ممكن تتغير على فترات أقرب من المعتاد و عشان كده ممكن تلاقى نفسك رايح جاى على التوكيل أو الميكانيكى كل شوية خصوصاً لو استخدامك للعربية عالى زى سفر كتير أو مشاوير يومية طويلة ، لو استخدامك ليها بسيط مش هتحس بحكاية قلة الاعتمادية دى و من هنا بتلاقى اختلاف أراء الناس على اعتمادية العربيات ان كل واحد بيتكلم على أساس استهلاكه الشخصى ، بس فى المجمل كثرة الأعطال فى العربية دى لوحظت أكتر من غيرها نسبياً و أكتر من ماركات تانية صينى برضه و اسبيرانزا خصوصاً زى ال 516

[هانى القناوى]

طيب العفشه معمره يعنى ماتحتاجش تربيط كل شهرين ولا 3

[akmm]

عفشه اى ماركه لاى عربيه بتحتج تربيط ومتابعه كل 6 شهور بسبب جمال الطرق عندنا وحلاوه المطبات المنتشره عندنا ,,,