معروض عليا 516 ... و محتاج استشارتكم ضروري :)

[moonish_galaxy]

السلام عليكم و رحمة الله و بركاتة

محتاج اعرف رايكم ضروري في العرض ده

516 موديل 2007 فابريقة جوة و بره , مانيوال طبعا و الحاله انا شايفها كويسة

محتاج تفيدوني في رينج سعرها ,, و ايه اهم الحاجات الي اخلي بالي منها قبل الشراء

و خصوصا انها من معرض ,مش من واحد اعرفة

و هل هيه عربيه مناسبة و خصوصا انها هاتكون اول عربيه ليا و لسه متعلم سواقه جديد

لكم مني جزيل الشكر و العرفان

[M I D O]

العربية جميلة بس المعروضة عليك عداد قد اية و الحالة العامة للعربية اية

[moonish_galaxy]

العربية جميلة بس المعروضة عليك عداد قد اية و الحالة العامة للعربية اية

استاذ ميدو حضرتك الي جميل ,,, متشكر جدااا علي رد حضرتك

العداد حوالي 60 الف و ما شاء الله الحاله العامة كويسة و فابريكة جوا و برا

محتاج اعرف سعرها العادل و احسن سعر ممكن اخدها بيه كام

و ايه الحاجات الي اخلي بالي منها قبل الشراء خصوصا ان مافيش مراكز صيانه عشان ارفعها

يادوب ميكانيكي هيجي معايا ,, و هل حضرتك تنصحني بيها خصوصا اني لسه جديد في السواقه

و شكراااااااااا

[mrastra]

عداد 60 الف
سنة الصنع 2007
يعنى حوالى 7 سنين
يعنى فى السنة 9 الاف كم !!!!!!!
دة كدة صاحبها مش بيتحرك بيها
يبقى المفروض الـ 60 الف كم دول يبانو فى العربة كولها
من اول دواسات البنزين والفرامل والدبرياج لازم يكونو جداد لانج
مقبض الفتيس ميكنش ماشر ولا متاكل
طارة الدركسيون تكون زاهية كدة مفهاش اى قطع ولا تكسير
كمان الكراسي ما ينفعش يكون كرسي السائق هبطان
انا بؤلك كدة لية عشان لو العداد ملعوب فية يبقى تاخد بالك ومش صعبة دى بتحصل كتير جدا
وبينى وبينك عمر العربية مش متوافق مع عدادها
المهم ميكنش فى لمب منورة فى الطابلوة ولا لمبة abs ولا لمبة epc بالكتير لمبة تيل فرامل بس وطبعا لمبة حزام الامان
خلى الميكانيكى يشوف الموتور ويسمع صوت التاكيهات
يبص على الموتور من فوق ومن تحت هل مرشح زيت
وانا لو منك هاخد بوهيجى معايا ويحكم اذا كانت كلها فبريكة من برة ولا راشة حزام
لو كل دة تمام اعتقد سعرها العادل 45 الف جنية لان بالفعل عدادها قليل

[abdulhafeez]

اهم حاجة في العربية ان المكنة ما تكونش اتفكت قبل كدا .... لان مواتير العربيات دي مش اي حد يفكها ويعملها جوان او عمرات .......ز لو انت قريب من دائري المعادي على المريوطية كدا .... خدها لمركز المتحدة واعملها فحص شامل هناك ومش هيكلف كتير

عندك الاسطى وائل السمكري انا شاري حوالي 3 عربيات وهو اللي فحصهم سمكرة تمام .... والميكانيكا بيفحصها الاسطى حسين وعندهم كمبيوتر وبيرفعوا العربية من تحت وكل حاجة ... الموضوع مش هيعدي 200 ج تقريبا ...
من 100 - 200 ج

[hemaa_82]

وبص علي زيوت العربية لحسن يكون المعرض مش امين و متخن الزيت بزيت ريسورس ولا حاجة علشان يزود كبس المكنة و يكتم صوتها


اتأكد من لزوجة الزيت اللي علي المقاس و خليك عارف ان الموبيل و شيل بتوع المواتير دي لزوجتهم مش عالية قوي .... اخف من العسل يعني و اخف من زيت التموين ..... تقريبا قريبة من لزوجة عباد الشمس لتسهيل الوصف

[hemaa_82]

هيه مالها قلبت علي مطبخ و طبيخ ليه كده :)