اشتريت m11 عاملة 43000 كيلو متر- هيييه

[MACATHIUS]

من فضلكم انا اشتريت m11 و عجبانى جدا .. ياريت حد يقولى افضل مكان للصيانة الدورية ليها فين و ايه الحاجات اللى بتبوظ فيها و محتاجة اهتمام- زى ما سمعت قربة المياه - و شكرا مقدماً

[exact]

مبروك عليك... المكان ده حسب موقعك... بس اسمع ان المركز الرئيسي في ابو رواش

[shiko85]

الف مبروك و ربنا يديلك خيرها و يكفيك شرها

[eshoo]

الف مبروك وربنا يديلك خيرها ويكفيك شرها. الحاجه الاساسيه اللي بتحتاج تغيرها فعلا بتكون قربة المياه وتقريبا بتغيرها كل سنه علشان معموله من خامات سيئه وسعرها تقريبا 130 جنيه

[MACATHIUS]

ثان كيوه ليكوا كلكوا .. بس ممكن اعرف القربة دى اجيبها منين...

[hugan]

الف مبروك
لو مش هاتتعامل مع التوكيل
في مركز المتحده اسعارهم قريبه من التوكيل
لكن الميزه عن التوكيل انك بتشوق الشغل بنفسك
في ورش مختصه كتير للاسبرانزا
صقر قريش
الاميريه
جمال عبد الناصر الحرفيين
اهم صيانه في العربيه سير الكاتينه والبلي غيره علي 40 الف
وماتتنازلش عن الجيتس
يليله الكونتنتال الالماني
عموما التوفيقيه مليانه محلات لقطع غياراها
وشارع دمشق ذكي جرجس
اشهر واحد
النصيحه الاخيره اعي اي حد غير مختص باسبرانزا يتعامل مع العربيه
انتظر رد اخونا هيما 82
يعطيك الافاده الكامله عن العربيه

[hemaa_82]

ربنا يباركلك يا اخ هوجان ... اشمعني انا يعني ما كلنا اخوة...

عامة .... العربية بتغير قربة كل سنة ..."مش عارف الاخيرة اللي من عند الملك نظامها ايه ...ادينا هنشوف"... لو غالية هتبقي ب 100 جنية ... موجودة في دمشق و الحرفيين في اخر شارع المرسيديس ناحية الجامع

بلف السايكون بيتغير كل 50 الف علشان العربية متدربكش ... ب 50 في دمشق و الحرفيين و ب 130 في تكنوسيرفيس في جسر السويس ... ابقي اشتري الغالي علشان اصلي و هيعيش بدل ما تغيرة ب 50 بلبل كل 10 الاف

الصنايعية ....

محمد رشاد .... رقم واحد بالنسبة لي .... تعامل و اسعار متوازنة"صقر قريش - المعادي"
المتحدة ..."بيقولو غالي بس انا مش شايف انهم غاليين قوي يعني"
ابانوب ... في الرخيص بس ورشة علي النظام القديم و مفيش سكانر ... في الاميرية
في الحرفيين ... جنب الشيخ طه ... بس انا شايف انها للطوارء بس علشان شباب و سنهم صغير

[hemaa_82]

و نسيت اقولك الف مبروك .... و احكيلنا بقي من وجهه نظرك اللي ليها و اللي عليها بالمقارنة مع اللوجان حسب ما انت كاتب في بروفايلك

[MACATHIUS]

شكراً على المعلومات القيمة يا اخ هيما و هوجان و انا باعتز بصداقتكم جميعاً و كل اللى شاركوا بالرد...
للعلم انا كنت شارى اللوجان زيرو اول مانزلت فى 2010 المغربى.
*بصوا انا اول ما ركبتها حسيت بفرق شاسع بينها و بين اللوجان فى موضوع الدركسيون ... اللوجان دركسيونها تقيل و هى كانت اول عربية اركبها بس انا كنت فاكر انه كدة خفيف بس لما ركبت ام 11 اتهيألى ان فيه حاجة فى علبة الدركسيون من خفيته بس اللى باع لى ركبها تانى و جربه او قالى مافيش حاجة هى كدة بطبيعتها ..... المهم انا كنت شاكك بس مع الوقت فهمت انها كانت مسألة تعود و اخدت عليها. اذن الدركسيون فى اللوجان تقيل عن الام 11. بس للامانة كنت باحس بأن تقله دا أمان.

*بالنسبة للثبات و انا هنا باتكلم عن الثبات اثناء الدوران بالسيارة الام 11 أأمن بكتير من اللوجان لأن اللوجان اعلى و كمان كنزة مش انسيابية زى الام 11. انا بحس بالفرق دا لما بالف درجات كبيرة فى المنحنيات و على سرعة. لانى مجرب اللوجان انها تخوف شوية.

*بالنسبة للصاج . صاج اللوجان ورق .. سمكه اقل من ام 11.. انا فاكر مرة واحد صاحبى ساق عربيتى اللوجان و كان فىه بنت اتزنقت ما بين عربيتى و ما بين عربية تانية واقفة .. المهم عدت على خير و ماجرالهاش حاجة مجرد شوية عياط بس اللوجان صاج الباب الشمال انبعج للداخل. باب الام 11 اتقل من باب اللوجان بدون شك لأنى جربت الاتنين.

*عاجبنى اوى الجنوط 16 اسبور فى الام 11 حاسس بالقوة و الشياكة مع بعض. اللوجان 15 و عادية

* بالنسبة للعفشة .. دى اكتر حاجة عجبانى -هى و المحرك- فبالمقارنة باللوجان فهى تعتبر الفرق الاساسى بين العربيتين.. مثلاً البروزات الاستيل اللى بتبقى فى الارض كمطبات دى (المربعات البارزة فى الرصيف) كنت باحس انها بتاكل فى كاوتش اللوجان و بتنحر فى العفشة و تزلزل البنيان الداخلى للعربية و الصالون يترجرج. اما الام 11 فهى انعم بكتيييييير و مش باحس بأى خطر على العربية لو دوست عليهم بالام 11

*مش عارف اوصف ازاى موضوع الفرامل بس لما بدوس عليها مافيش مرة اندفعت لقدام.. الفرامل بتاعة اللوجان كانت ناشفة و بتكلبش فجأة.. غالبا دا بسبب الـ abs فى الام 11 اللى مكانش موجود فى اللوجان. جايز يكون دا احساس غريب شوية بس دا اللى اختبرته بنفسى بدون مجاملة

*بالنسبة للمحرك بقة ما اقدرش اقارن ما بنيهم لان محرك اللوجان بتاع 2010 اعتقد كان 8 صمام ... بينما ام 11 هو 16 صمام ---المهم المحرك بكل تأكيد اقوى فى الام 11 . فيه ميزة اساسية فى الام 11 عن اللوجان وهى انك لما بتدوس بنزين فى لحظات طلوع كوبرى او رغبة فى التسارع مثلاً بتلاقى استجابة فعلية سريعة الى حد كبير.. لكن اللوجان فى المطالع اضعف و الـ dynamic response بتاعها ابطء..

*التكييف فى اللوجان احلى بكتير من الام 11 .. جايز محتاج شحن حاليا للام 11 بس اللوجان تكييفها لا يعلى عليه.

* الشكل بقة اذواق و الحجم كمان.. بس الصالون الداخلى متساوى تقريباً للاتنين بالرغم من ان الابعاد الخارجية للام 11 اكبر . المسافة بين اكرسى الامامى و الخلفى اكبر فى اللوجان .. ماعرفش ازاى.

*المفتاح فى اللوجان كان احلى.. انا خدت مفتاح واحد للام 11 بينما اللوجان كانوا اتنين واحد عادى و واحد ريموت.. وكمان الام11 زرار الريموت اللى بيقفل هو هو اللى بيفتح بينما فى اللوجان كان الزرار اللى بيقفل غير اللى بيفتح.. و دا لو اخدتوا بالكوا احسن فى حالة لو مش فاكر قفلت العربية و لا لأة و عاوز تتأكد .. فى اللوجان هتدوس تانى على اللى بيقفل بينما فى الام 11 لازم ترجع للعربية و تبص على المسوجر و تتأكد و بعدين تدوس تانى على نفس الزرار لو كانت مفتوحة..


اخيراً انا مبسوط جدا بالعربية دى و موضوع انها صينى دا مش فارق معايا خالص بالعكس انا باحترمها و بحافظ عليها اكتر من اللوجان

ياريت بقة الفترة الجاية ماتزهقوش من اسئلتى لغاية لما اعرف سكة صيانة كل حاجة فى العربية الحلوة دى.. لانى ناوى فترة كدة و اشتريها زيرو.

[M I D O]

الف مبروووووووووووووووووووك ربنا يباركلك فيها ويكفيك شرها

[hemaa_82]

تحت امرك في اي شئ و اي استفسار ... و سيبك من هوجان معهوش ام11 "بهرج والله .... صباح الفل يابو هوجان"

[akmm]

الف الف مبروك .............

[abdulhafeez]

حضرتك بتقول تكييف ام 11 ضعيف ...........

الام 11 مع قريبي لو ماشي بلليل التكييف بيشتغل على on والواحد بيكون بردان

بينما لو الجو حر جدا جدا ... آخره بيشتغل على 5

وفي المتوسط درجة 2 بتخلي الواحد سقعان بصراحة


وعلى العموم الف مبروك

[S O P H O S]

الف مبروووك عليك

[MACATHIUS]

حضرتك بتقول تكييف ام 11 ضعيف ...........

الام 11 مع قريبي لو ماشي بلليل التكييف بيشتغل على on والواحد بيكون بردان

بينما لو الجو حر جدا جدا ... آخره بيشتغل على 5

وفي المتوسط درجة 2 بتخلي الواحد سقعان بصراحة


وعلى العموم الف مبروك

بص انا جربت التكييف فى عز الضهر و كان ضعيف عن بتاع اللوجان اللى انا مجربها سواء درجة التبريد او كمية الهواء و سرعته. لكن بالليل أكيد اى تكييف بيسد