ايهما افضل لانوس2005 ام سبرانزا 516 موديل 2009

[mrm714]

عايز اشترى عربية من الاتنين ومحتار بينهم
مع افتراض عدم وجود اختلاف فى حالة العربيتن
يعنى حالة العربيتن ممتاز

[hugan]

لو اول عربيه تشتريها
لانوس
لو خبره
516
عموما ال 516 اعلي بمراحل من الانوس

[hesham fawzy h]

لانوس وابعد عن الصينى

[الاسد المهاجر]

مصر بيجلها زبالة الصيني
الانوس افضل

[Sameh samy]

لانوس افضل طبعا

[nogafoda]

طبعا 516 أوبشنز وامكانيات أحسن كتير من اللانوس وعربية ثبتت وجودها فى السوق وسيبك من الهرى بتاع صينى والكلام الفاضى ده كان زمان برده بيتقال على الكورى توكل على الله ومش هتندم بس أفحص العربيه كويس

[mhkorayem]

لانوس أفضل

[said.d.y]

شوف ياباشا ، المثل البلدى بتاعنا بيقول اية؟ اسأل مجرب ولا تسأل طبيب!
وانا مجرب اللانوس (كانت مع اخويا) ومجرب 516 (كانت معايا).
اللانوس مشاكلها محدودة بالنسبة ل516، مع العلم بان المشاكل الممكن تظهر فى 516موش شرط فى كل عربية.
ال516 تتفوق بكتيييييييييييييييييييييييييييييييييييييييييييير عن اللانوس فى التصميم والصالون والتبلوة والابوشن والصاج وعوامل الأمان.
نصيحتى عن تجربة (رأى الشخصى) ال516 افضل بكتيييييييييييييييييييييييييييييييييييييييييير عن اللانوس. لاكن وانتى بتشترى كل ما يكون الموديل احدث يكون افضل وكمان يفضل العداد (بعد الحالة العامة للعربية طيعاً ) ما يكونش كتير ياريت يكون في حدود50: 60 الف كيلو.
دى حمادة ودى حمادة تانى خالص

[أبو يوسف]

لانوس ,,,, أفضل

[J A G U A R]

516 طبعا لو حاله نظيفه

[mrm714]

الف شكر لكل من اهتم ورد
بصراحة الاسبرانزا طالعة من عينى حديثة واوبشن وشكل وامكانيات
واللانوس عربية بجد ثبات السوال انا كان معايا هيونداى اكسل مانوال
طيب لو نويت اشترى الاسبرانزا هل فى اختلاف فى الاوبشن او صعب اتعامل معاها وانا خبرتى فى الصيانة على قدى
برجاء من خبراء الاسبرانزا الافادة للاهمية القصوى

[دكتور خالد]

انا برضه اخر عربية كانت معايا قبل ال 516 كانت اكسيل97 1500 سى سى - بصراحة هتحس بفرق تاريخى فى الابوشنز و الثبات و الراحة لصالح ال 516- بس اهم حاجة الحالة ثم الحالة - حاول تجيب عربية مش ماشية كتير و مش ملعوب فيها - الاختلاف فى السواقة هيتمثل فى الحجم الكبير شوية و تقل العربية فى الوزن لكن دى هتتعود عليها فى مشوارين تلاته

[Ahmender]

انا ركبت الاتنين...
اللانوس عربية شعبية اى حد بيصلحها وتعتبر 128 العصر. حلوه لو انت اول مره تركب عربية وعاوز تجيب حاجه سنه ولا سنه ونص تتعلم فيها بعدين تبيعها تاني. لكن لو انت بتسوق كويس ولك بعض الخبره يبقى مافيش مقارنة الاسبرانزا تكسب.

اللانوس
مميزات:
عفشة طرية جدا فى المطبات لكن على حساب الثبات.
صيانتها رخيصة جدا (لكن متكرره).
قطع غيار متوفرة بكثرة وبأسعار رخيصة.
التكييف جيد جدا.
إعادة بيع جيدة جدا.
فتيس ناعم.
سحب مقبول.

عيوب:
التابلوه فقير نسبيا لأنه من التسعينات.
عزلها سيئ وبتسمع الطريق وانت قافل الزجاج.
الثبات متوسط. (بسبب العفشة الطرية)
شكلها قديم(من التسعينات).
حجمها كبير بالنسبة لانها مش واسعة من جوه.
بتروح للميكانيكي كتير خصوصا فى الحاجات البسيطه.
وسع الصالون متوسط.(لكن مش ضيقه)
مفيش اوبشن تقريبا :d
وسائل أمان قليلة وفرامل متوسطة الاداء


الاسبرانزا

مميزات:
شكل فخم من الداخل والخارج(خصوصا الداخلى)
واسعة جدا وتعتبر من اوسع السيارات السيدان فى مصر.
أوبشن مش موجود غير في سيارات تتخطى 150 ألف جنيه
فرامل جيدة جدا abs & ebd
ثبات عالى حتى على سرعات عالية جدا ( ثبات غير موجود فى كل منافسيها )
عزل جيد نسبيا مقارنة بفئتها السعرية.
تكييف اواتوماتيك تاتش وبشاشة شيك وأداءه جيد.
عوامل أمان وصاج سميك.
سحبها مقبول على السرعات المنخفضه وجيد جدا على السرعات العالية.
قطع غيار رخيصة تقريبا بنفس أسعار لانوس

عيوب:
حجم كبير
أبواب خشنة نسبيا فى الغلق (مش كل العربيات)
صوت الشكمان (العلبة الخلفية) عالى.
الفتيس اقل نعومة من اللانوس بكتير.
اي ميكانيكي يشتغل فيها لكن لا ينصح الا بميكانيكي متخصص ومتوفرين بشكل معقول.
عفشه ناشفه مقارنة باللانوس (لكن مش متعبه وده اللى بيديها الثبات).

[Ahmender]

على فرة لو نزلت من الاكسيل ركبت لانوس مش هتحس بفرق كبير. لكن لو نزلت من اكسيل وركبت اسبرانزا هتحس انك انتقلت نقله تاريخية. :d
عشان الاوبشن والفخامه عالم تاني خالص

[AMGAD1521977]

رأى الشخصى اسبيرانزا 516 افضل من لانوس فى الآتى :
حجم العربية
الموتور ( لانوس 1500 و اسبيرانزا 1600 )
الصاج و وزن العربية عمومآ
الكماليات ( لصالح الاسبيرانزا طبعآ )
عفشة اسبيرانزا ناشفة لكن تستحمل نظرآ لطبيعة طرق و شوارع مصر
صالون اسبيرانزا واسع و مريح
ميزة كمان تقدر تركب قطع غيار كورى فى اسبيرانزا و دى مش موجودة فى لانوس
و تحياتى لك