محتار بين الـ M11 and Envy

[OneMeteoR]

بسم الله الرحمن الرحيم

السلام عليكم اعضاء المنتدي

الموضوع ببساطة يتلخص في اختياري للعربية

عايز اشتري عربية فيها كماليات بسعر معقول

كنت هشتري شيفروليه لانوس في الاول

لحد ما لقيت اسبرانزا انفي و ال ام 11

ففكرت جديا في شراء احدهما

فياريت لو حد ليه تجربة مع واحدة منهم , يديني رايه و يساعدني


ملحوظة : انا دورت كتير في الفيس بوك عن جروبات او بيج للعربيان الاسبرنزا و لم اجد

كان ليا تساؤلات كتيرة :

1- هي ليه اسبرنزا مش عاملة دعاية و شغل زي الجيلي ايمجراند , كل جمعه بشتري اهرام الجمعه و الاقي صفحة عن الجيلي ايمجراند 7 و مفيش اي حاجة عن الاسبرانزا ؟
2- انا مش شايف انتشار كتير للعربيات الاسبرانزا في الشوارع , يمكن اكثرهم التييجو و a113
انما الانفي مشفتهاش غير مرة واحدة و والـm11 كام مرة كده
3- من قراتي لمواضيع الاخوة الاعضاء هنا في المنتدي : وجدت ان فيه مشاكل من سوء التوكيل !
4-اخيرا , انا حابب اسال بخصوص اعادة بيع السيارة بعد فترة , اعتقد ان الواحد هيخسر فيها كتير لانها صيني و سوقها مش شغال اوي صح ولا ايه ؟؟

[hugan]

الانفي اقل انتشارا
عربيه جيده اضاعها ابو الفتوح بالدعايه السيئه
ال ام 11 اقل انتشارفعلا

[OneMeteoR]

شكرا اخي Hugan علي ردك و الاهتمام

فـ رايك بلاش الاسبرنزا فعلا ؟؟

[دكتور خالد]

لو انت بتفكر تشترى صينى و تتباع بسهولة من غير سعرها ينزل جامد يبقى عندك ال 516 و التيجو و ال 113 - لكن تقريبا انا فاهم انك عايز تجيب زيرو - ممكن تفكر فى ال بى واى دى - وفعلا انا مش فاهم ابو الفتوح ضارب طناش على عربياته الجديدة ليه كده

[القناص المحترف]

انا كان معايا m11 زيرو لمدة 3 سنوات نصيحة لوجة الله ابعد عن الصينى كلة سواء اسبيرانزا او جيلى او بى واى دى لو انا مكانك ومعايا نفس المبلغ دة هشترة فيرنا او شيفرولية لانوس بدون تردد
وبالنسبة لاعادة البع الصينى كلة زفت وهتخسر كتييييييير فى اعادة البيع
بالتوفيق

[Memo7070]

الموضوع بإختصار money = value
الفيرنا والشيفروليه لانوس عربيات كإمكانيات وإعتمادية سيئة ولا تساوي قيمتها التي تباع بها
اما الصيني حالياً فهو في إعادة بيعه مش حيكون الفيرنا والانوس لو حبيت تبيعهم بعد سنة او اتنين
بس كإمكانيات وإعتمادية فمعلش الإسبيرانزا تكسب بالثُلُث ولا مقارنة بينهم
انا لو معايا فلوس الإثنين زيرو حجيب صيني سواء كانت اسبيرانزا او بي واي دي ومش حفكر اشتري لا فيرنا ولا لانوس لأن الموضوع زي ما قلت لحضرتك في الأول Money = Value

[MACATHIUS]

انا معايا ام 11
كويسة و الميكانيكية بتوعها فاهمينها مفيش مشاكل
عيوبها:
استهلاك بنزين عالى نسبيا لانها بتعرف تعمل تسارع و مناورات بس ممكن تظبطه لو سوقت صح بدون حرق
ضيقة فى الكنبة الورانية
فيه حاجات كدة لازم يبقى عينك عليها تغيرها كل فترة
بعض قطع الغيار الغير اصلىة مش معمرة


مميزاتها:
اوبشنز
شكل جميل
انسيابية و مناورات و ثبات فى الدورانات
قطع غيار متوفرة و ميكانيكية فاهمينها


بالنسبة لى هى ممتازة على قد سعرها


لو معاك فلوس اكتر ما تشتريهاش
و بالمناسبة الصينى يتجاب زيرو عشان تعرف تاخد خيرها

[hugan]

شكرا اخي hugan علي ردك و الاهتمام

فـ رايك بلاش الاسبرنزا فعلا ؟؟

مش كده
في رائيي
الانوس والفيرنا لا يرقو نهائي ولا يصلوا لمستوي 516 او انفي او ام11
مشكله الانفي الانتشار الضعيف

[OneMeteoR]

اخواني جزاكم الله جميعا خيرا علي التفاعل

لكن واضح ان في تباين في الاراء (ناس مع الصيني و اخرين ضد الصيني تماما)

هو انا مازلت علي حيرتي لانها ستكون اول سيارة لي

وانا عايزها زيرو

اللي انا لاحظته ان معظم المؤيدين للصيني معاهم او كان معاهم التيجو او الـ m11 او الـa113

انا محتاج سيارة تستحمل السفر و تكون مريحة و فيها كماليات كويسة

و طبعا سعرها معقول ,, انا لقيت ده في الصيني لكن , زي ما انتوا عارفين ان سمعه الصيني في مصر واقعه جدا

ا انا لمست ده فعلا في بوستات و اخبار كتيرة علي الفيس

[OneMeteoR]

شوفوا الخبر ده

شبح اسبرانزا يطارد "أبو الفتوح" |اليوم السابع

[دكتور خالد]

شوفوا الخبر ده

شبح اسبرانزا يطارد "أبو الفتوح" |اليوم السابع

حماية المستهلك يحيل شركة ''نيسان موتورز مصر'' إلى النيابة العامة



جنرال موتورز تستدعى 218 ألف سيارة أفيو وأوبترا بسبب عيوب فى الأنوار - جريدة البورصة

[Memo7070]

حضرتك لما تسأل عن الصيني حاول تسأل من كان يملك سيارة اخرى قبل اقتناؤه للصيني
لأنه اكيد عمل المقارنة دي لنفسه عشان يعرف ان قراره بإقتناء الصيني سليم من عدمه
اما غير كده فمش حتلاقي رأي Fair
اما لو حضرتك بتعرف تسوق كويس انصحك بقيادة الفيرنا او الانوس وبعدين الصيني واحكم انت بنفسك

[mega 2003]

انا عندى اسبيرانزا m11 شاريها مستعملة من حوالى8 شهور وصراحة تتقال من ساعة مااشتريتها بسم الله ماشاء الله مصرفتش عليها جنية هو البنزين وبس وانا لية وجهة نظر بالنسبة لشراء السيارة زيرو انا افضل شراء السيارة مستعملة لان لو اشتريت العربية جديدة وحبيت تبيع حتخسر كتير لكن لو اشتريها مستعملة انت حتشترية بسعر السوق المستعمل حتيجى تبيع مش حتخسر كتير ويمكن تبيعها بسعر الشراء

[OneMeteoR]

حضرتك لما تسأل عن الصيني حاول تسأل من كان يملك سيارة اخرى قبل اقتناؤه للصيني
لأنه اكيد عمل المقارنة دي لنفسه عشان يعرف ان قراره بإقتناء الصيني سليم من عدمه
اما غير كده فمش حتلاقي رأي fair
اما لو حضرتك بتعرف تسوق كويس انصحك بقيادة الفيرنا او الانوس وبعدين الصيني واحكم انت بنفسك

اخي .. جزاك الله خيرا .. رايك اكيد صائب

انا محتار و هذه اول سيارة لي و لا اعرف حتي الان ما هو الافضل و المناسب

فانا شايف ان اللانوس سيارة كويسه و معقولة و اقتصادية ولكن امكانيتها مش اووي

ولكن امكنيات الصيني خصوصا بي واي دي الجديدة و الانفي وال ام11 رائعه

علي ما يبدو اني انا فقط من يستطيع ان يقرر

[hemaa_82]

بسم الله

بص هية البي واي دي و الانفي كمان اوسع من الام11
بس معرفش ايه نظام المتور الجديد ال1500 بتاع البي واي دي ....انما الام هيه الوحيدة فيهم ال 1600

فيرنا ولانوس ايه بس ... عربيات موديل 99 و 2003 و مبتنزلش غير في محروستنا ...هما بس انتشارهم هوا اللي مخلي الناس بتجيبهم علشان اي حد بيصلح و اي حد بيشتغل في قطع غيارهم .... انما مع اسعارهم الاخيرة ففلوسهم حرام بصراحة