m11 ومشاكل العفشة

[omar mario]

السلام عليكم
دى اول مشاركة ليا بالمنتدى المحترم واعضائة المهذبون
حابب انقل تجربتى الشخصية لكى يستفيد منها مالكى سبيرانزا m11
فى الاول كنت امتلك سيارة نيسان صنى 2016 ولظروف ما بعتها واشتريت سبيرانزا m11 موديل 2012 عداد 65 الف كيلو
وبدئت معها المعاناه
اشتريتها منذ 6 شهور ومنذ ذلك الوقت وفى معاناه معها لا تنتهى
بمجرد شرائها انهالت المصاريف
كاوتش جديد
بطارية
مساعدين امامى وخلفى ومقصات امامى وخلفى و بطاحات وغيرووو
وبعد كل دة العربية بردو بتشخلل و مفككة وتخبيط وحاسس انى راكب عربية موديل 2000
رضيت بالامر الواقع وبعدها بشهر طبة المية الى فى البلوكة ضربت وغيرتها بعد كدة حساس كرنك واتغير
وبعد كل المعاناه دى المية بتنقص بشكل كبير وبعد مرور 6 اشهر واحساسى انى راكب معزة مش عربية
خدتها ورحت مركز كشف عليها و كان سبب نقصان المية مجرد غطاء القربة بايظ وكان عندى ونة فى الطارة مع المشى تظهر وتختفى كل ما احرك الدركسيون شمال او يمين غيرت طرمبة باور وبرذو نفس المشكلة والعيي كان بسيط جدا هو ان أفيز خرطوم زيت الباور بيسرب زيت
بس بردو العربية مخلعة من تحت وقولت مبدهاش انا هبيعها وخلاص كدة
صحيت الصبح ع العفشجى الى بتعامل معاه قولتلة انا عاوز العربية دى مفهاش غلطة قالى هنفور العفشة كلها والى فيها هيتعمل
فك كل العفشة وقالى الاتى
العربية دى محتاجة:
جوز مساعدين امامى
علبة دركسيون
اتنين صباع ميزان
كوتشتين ميزان صدر الانطرة
اتنين بارة طرف
2 بطاحة مساعد
بضتين مقص
بليتين صرة امامى
طقم كاوتش ميزان خلفى
كوتشتين ميزان امامى

كان طبعا بالنسبالى صدمة ههههههههه
ازاى انت لسة مغير مساعدين و و و قالى عابة الدركسيون منتهية خالص ممكن اعلجهالك بس شهر وهتحس بنفس التخبيط ولو عملنا كل دة والاسكترا متغيرتش نفس الدبدبة فى الطرق المكسرة هتبقى موجودة
رحنا ع التوفيقية اشترينا كل ما يلزم ناهيكم على الاسعار الى فعلا تخض لقطع الغيار يعنى قدر الله وما شاء فعل لبست فى مبلغ محترم جدا
بس المرة دى خدت حذرى من نوعية قطع الغيار واشتريت الافضل
مساعدين ماك واسكترا اصلية
قفلنا العربية وجت اللحظة الحاسمة انى اجرب العربية
بصراحة اتفاجئت وحسيت انى صرفت قبل كجة فى حاجات ملهاش اى لازمة نظرا انى جبت قبل كدة مساعدين فعلا ملهمش اى لازمة وجة ناتج عن عدم الخبرة
الخلاصة ومن الاخر علبة الدركسيون فعلا بتفرق كتييييير جداااا ولو تعبت منك غيرها بجديد على طول هيا فعلا سعرها غالى بس بردو محاولة اصلاحها من وجهة نظرى تجربة فاشلة وفى الاخر هتغيرها او ترضى بالامر الواقع ولازم تتأكد من كل قكعة غيار بتركبها فى عربيتك علشان متصرفش بالاونطة
واى استفسار انا تحت امركم

[dvdaio15]

نفس اللي حصل معاگ حصل لي بظبط في اسبرانزاa516 احساس بمطبات وطرق مگسره تغير علبه درگسيون جديده عرببه اتحولت بات عربيه تانيه عيب ده من علبه درگسيون الاصليه بتاعه كل صيني والحل فعلا تغير مش اصلاح مبروگ العرببه گده تحتفظ بيها احسن لان گل للي عملته لو حبيت تعمله في غلا ده في عرببه تانيه لو بعت هتعمله بالضعف حته لو تبل فرامل هتعبره هيباه بضعف مبلغ

[hemaa_82]

يعني كل ده و في الاخر ولا تقول سعر القطع و لا منين؟؟؟؟؟ يا وحش :)


حبر الكي بورد خلص ولا ايه :)

متقول يا سيدنا جبت كذا من كذا و بكذا و رقم تليفونهم كذا خلي الناس تدعيلك .....


الف مبروك علي الشغل و ربنا يسعدك و تفضل سليمة

[omar mario]

من عينى hema
علبة دركسيون 2500ج
مساعدين 1350
بطاحات 300
2 صباع ميزان 280
كاوتش ميزان خلفى 75 جنية
كاوتش ميزان امامى ملقتهاش ولا هيا ولا بيض المقص
بلى الصرة الاتنين ب 350 نوعهم تايلاندى
العفشجى اخد منى 300
غير طبعا المصاريف الى بتقبلك فى السكة يعنى الحمد الله اتلسعت مبلغ محترم اوى
الاماكن الى اشتريت منها من الاخر علشان متلفش كتير وعلى الفاضى لانى فى الاول غلبت مع قطع الغيار
عليك وعلى العسكرى الى فى التوفيقية او شركة الفتح فى التوفيقية بردو
ولو فى صيانة للعربية مركز المتحدة دة رحتلو رخيص جداااا وحلولى مشكلة ونة الطارة ونقصان المية وناس فاهمة فى شغلها وفى العربية

[omar mario]

dvdaio فعلا علبة الدركسيون دى بتفرق جدااااا حتى لو عملت العفشة كلها وهيا بايظة تحس العربية مكركبة وكأنك معملتش اى حاجة وحلها الجزرى انك تشيلها خالص وتجيب جديد
واكتر حاجة بتضر علبة الدركسيون على حد علمى هو المشى بسرعة فى الطرق الغير ممهدة
اما عن سعر قطع الغيار فعلا زادت بشكل كبير جداااااا

[hemaa_82]

تسلم يا عمر علي الافادة و تسلم عيونك

[sherif309]

ممكن عنوان وتليفون مركز المتحدة لو سمحت

[hemaa_82]

كلمني علي الواتس علي نمرة 01000083650 هبعتلك لوكيشن و كونتاكت كارد

[mega 2003]

الف مبروك على صيانة السيارة انا عندى مشكلة فعلا وهىالاربع مساعدين ضايعين خالص ولما رحت اشتريهم كل محلات القطع غيار واحد نصحنلى بعدم شراء المساعدين الا من التوكيل لان الموجود فى السوق رديئ جدا ومش حيقعد اكتر من شهرين والمساعد حيرجع يخبط تانى والمساعدين فى التوكيل اكيد حيزيدو عن 3000 جنية ممكن اعرف اية المساعد اللى حضرتك ركبتة مساعدين ماك دول صينى برضة ولا اية وحضرتك اشتريتهم من محل اية وشكرا

[omar mario]

ايوة يا فندم مساعدين ماك وحتى الان الحمد الله مفيش منهم اى مشكلة ورجاااااااء لما تشترى اى قطعة غيار للسيارة دى بالزات تأكد من جودتها لان اغلب قطع الغيار بقة مضرووووووبة دلوقتى خصوصا فى الاسبيرانزا