قبل شراء سبيرانزا a516 تمهل قليلا واقرأ هذا الموضوع

[ahmed000]

الموضوع منقول
السلام عليكم ورحمة الله وبركاته
من يومين تلاتة لقيت عربية اسبيرانزا شكلها عامل حادثة غريبة
العربية مش مخبوطة من قدام ولا من ورا ولا حتى من الجنب ولا كمان مقلوبة
العربية بالبلدي كده باركة على الأرض بطريقة اول مرة اشوفها في حياتي
بالصدفة البحتة طلع صاحب العربية معرفة
صاحب العربية اسمه الدكتور علاء سألته عن الحادثة وازاي حصلت
وعرفت ان العربية الصيني الزيرو اللي موديلها 2007 وتمنها 68 الف جنيه مصري اللي هو تمن كرورلا او فيكترا في السعودية
العربية ببساطة كده انفصلت منها بيضة العجلة عن المقص وبالتالي العربية طارت منه يمين وشمال وفقد السيطرة عليها
وطلع على رصيف ونزل من على رصيف........الخ
والحمد لله انه ما حصلوش حاجة
طبعا لما تكون راكب عربية جديدة عالزيرو ويحصل معاك كده دي حاجة ترعب
الغريبة فعلا محضر اللجنة الهندسية الثلاثية المنتدبة من المرور
واللي جه في التقرير المرفق مع الصور
التقرير ادان العربية بنسبة 100000% وادان سوء التصنيع
اللي احنا بنرضى بيه وساكتين عليه
الراجل كلم التوكيل ..... وطبعا بدون الدخول في تفاصيل طويلة
انتوا عارفين النتيجة كانت ايه
انا مش هاقول نتيجة الاتصالات مع الوكيل المصري ولا الشركة الأم في الصين
بس هاقولكم شوية حاجات وانتوا تفهموا منها رد التوكيل والشركة الأم كان ايه
زي مثلا البحر واسع .... اتخن حيطة.....اللي معاك اعمله....الخ من العبارات الشهيرة التي تدل على امانة الوكلاء في مصر والشركة المصنعه للسيارة ذات الجوده العالية في الصين
انا عشان ماكونش باقول كلام مرسل وخلاص جبتلكم صورة من التقرير الفني بتاع المرور ورد الشركة من الصين
وقريبا صور العربية عشان تتفرجوا على اللي احنا فيه

[ahmed000]

المكتوب في التقرير الفني عشان لو ماعرفتوش تقروا من الصورة:
السيد الأستاذ رئيس نيابة قسم ثان باسيوط
تحية طيبة وبعد
بناء على انتداب سيادتك لنا بتاريخ 23 نوفمبر 2008 وذلك لمعاينة السيارة رقم 78110 ملاكي اسيوط في المحضر رقم 6 اموال قسم ثان اسيوط 13 نوفمبر 2008 فقد انتقلت انا المهندس سعيد ثابت السكري والمهندس عامر يوسف جلال والمهندس محفوظ فتحي جرس مهندسي مرور محافظة اسيوط الى مكان تواجد السيارة امام منزل مالك السيارة بشارع النيل باسيوط وتمت المعاينة بتاريخ 23 نوفمبر 2008 ونفيد سيادتكم بالاتي:
بفحص السيارة وتحمل لوحات معدنية رقم78110 ملاكي اسيوط الكاركة اسبيرانزا طراز ايه 516 واللونن فضي فاتح والشكل ليموزين وموتور رقم 11404 وشاسيه رقم 7006147
وموديل الفان وسبعه
بفحص السيارة تبين وجود تلفيات وتشمل انفصال بيضة المقص الأمامي الأيمن وكذلك انفصال الكوبلن وهو ذراع نقل الحركة بين علبة الدركسيون التروس الى العجلة الأمامية اليمنى مما ادى الى عدم التحكم بالسيارة بالكامل
لانفصال العجلة الامامية اليمنى عن باقي السيارة والذي ادى بدوره الى انزلاق السيارة والذي ادى الى اصطدام السيارة بجسم صلب في الجانب الايمن للسيارة
مما ادى لحدوث تلفيات اخرى ومنها تطبيق الرفرف الامامي اليمين وخلع الاكصدام الامامي من الجهة اليمين وتحطيم جنط العجلة الامامي اليمين من الخارج والتواء مقص الامامي الايمن من الجهة اليسرى للعجلة الامامية اليمنى وتحطيم الباب الخلفي الايمن من الاسفل وكذلك الرفرف الخلفي الأيمن والتواء المقص الخلفي من المنتصف
ونرجح ان سبب الحادث هو انفصال بيضة المقص الأمامي الايمن والذي ادى الى عدم التحكم بالسيارة واصطدامها بجسم صلب على يمين نهر الطريق
نرفع هذا لسيادتكم برجاء التكرم بالنظر
وتقبلوا سيادتكم بقبولوافر التحية
امضاء المهندسين

[ahmed000]

وحمد الله على سلامة صاحب العربية
وده ايميل الدكتور علاء اسماعيل صاحب العربية
لو حد مش متأكد من كلامي او شاكك فيه
dr.alaa_ismail@yahoo.com

[bassemali]

حسبي الله ونعم الوكيل
مع تعاطفي الشديد مع البشمهندس صاحب السياره لكن أحب أقول أن ده قضاء وقدر وأذكر أن في سنة 96 كنت في السعوديه عايش مع والدي ووالدتي اللي بيشتغلوا هناك وفي المدرسه عندنا مدرس كان شاري تويوتا كريسيدا موديل السنه وعمل بيها حادثه وهو مسافر مع أهله نتج عنها وفاة أبنته الصغيره(6 شهور) بسبب إنفصال بيضة المساعد الأمامي للسياره وفق التقرير الفني يعني نفس السبب بالضبط وكانت العربيه برضه على الزيرو فقصدي أن ده عيب صناعه وليس مشكلة شركه أو مصنع وإنما الكمال لله وحده مفيش عربيه كامله وعلى فكره أنا مش من ملاك أسبرانزا ولا قصدي أدافع أو أهاجم حد أنما أنا بعبر عن رأيي فقط .
دي النقطه الأولى أما النقطه اللي فعلا تغيظ هو الرد السلبي من الشركه الوكيل والشركه الأم وعدم تحملهم المسؤوليه وده طبعا لأنك في مصر مش لأي سبب تاني .

[dodoloin22]

مين هيشتريا بايييييييييييييييي

[mantis7806]

ياسعادة الباشا
العربية موديل 2007 والحادثة في نوفمبر 2008
يعني العربية ممكن تكون مشيت سنتين وبعدين حصل اللي حصل
مع احترامي اعتقد ان الحادث قضاء وقدر
وربنا يكفينا جميعا شر الطريق

[ahmed000]

صور العربية بعد الحادثة


صورة 2


صورة 3

[أبومعاذ]

شكلها كدا سوء استخدام

[AhMeD EzZ]

اعتقد ان الحادث قضاء وقدر
وربنا يكفينا جميعا شر الطريق

[basom]

والله انا من تجربتى للعربية دية اصدق اى حاجة دية عربية زبالهههههههههههههههههههههه

[zeyad1810]

والله انا من تجربتى للعربية دية اصدق اى حاجة دية عربية زبالهههههههههههههههههههههه

انت شكلك بتكرة العربية دى اوى

[nabilbassali]

من الصور - واضح ان الجنط مش بتاعها - يعنى ممكن يكون سبب الحادثة تركيب جنوط غير ملائمة مع تصميم العفشة.

[mohamed_prog]

من الصور - واضح ان الجنط مش بتاعها - يعنى ممكن يكون سبب الحادثة تركيب جنوط غير ملائمة مع تصميم العفشة.

100%

[M.Osman]

من الصور - واضح ان الجنط مش بتاعها - يعنى ممكن يكون سبب الحادثة تركيب جنوط غير ملائمة مع تصميم العفشة.

هو دا اللى انا عايز اقوله ... و على فكرة انا مرة شفت عربية نفس النوع واقفة على طريق سريع عند اليوتيرن ... و العجلتين اللى قدام حاصل فيهم نفس الحوار مع انها مش مخبوطة ولا حاجة !!!

لما شفت التوبيك دا استغربت بصراحة.

حاجة كمان انى دايما بلاقى الكاوتش بتاع العربية دى ( لما تكون عربية من دول ماشية قدامى ) بلاقى العجلتين اللى ورا مش متوايزيين .. دائما كدا .. !!

[nazaryia]

من شكل العربيه اقدر اقوللك ده سوء استخدام غرز و خمسات و حركات