الى الاخوة الاسبرنزاوية

[amirhafez]

:lol: السلام عليكم انا امير من الاسكندرية ممكن اسجل معاكم مع العلم انى لسة بافكر اشترى بس انا سامع كلام عن الاسبرنزا الa516 فارجو منكم الافادة هل فعلا تستاهل ولا عيوبها كتير بعد اذنكم اريد الرد سريعا ويكون كلام عن تجارب

[amratef25]

اخى العزيز امير
نصيحه لوجه الله تعالى
حذارى ان تشترى العربيه ديه
و الله انا كل ما اسأل حد من اصحابها
يقولى عربيه زى الزفت و توكيل معفن
و عيوب لا حصر لها
و عدم توافر لقطع الغيار
و .. و .. و ..................
على فكره انا كنت هشتريها
و الحمد لله رجعت عن القرار ده فى اخر لحظه
و كمان استاذ وائل عطيه (مشرف قسم الاسبرانزا)
بعد ما جاب العربيه
باعها بعد اقل من سنه
و فى ناس كتير هنا فى المنتدى
باعوا العربيه بعد فتره قليله

و لو مش مصدق
افتح جريده الوسيط
و شوف السيارات الصينى
هتلاقى كل اللى جاب اسبرانزا
عاوز يبيعها بعد حوالى من 5000 الى 20000 كم
و بيبيع بنفس السعر و يمكن اقل حوالى من 62000 الى 63900

و اقسم بالله نسايب اخويا فيهم دكتور اشترى الاسبرانزا الكبيره
و ندمان اخر ندم
و بيقول انها عربيه زباله
و عاوز يبيعها و مش عارف

و اخيرا
انا بنصحك لوجه الله تعالى و ليس لى اى مصلحه
و القرار لك
و لا تنسى صلاة الاستخاره
قبل اى شىء
و ربنا يوفقك لما فيه الخير لك

[ashraf yassein]

تحياتي لكل الاخوه الاعزاء وكل عام وانتم بخير
الاخ امير .. المحترم
انا عندي سياره اسبيرانزا516 موديل 2007 واستخدمتها خلال اجازتي بمصر حوالي 1750كم وخلال تلك المسافه انطباعي عنها كان انطباع رائع جدا جدا فهي ناعمه جدا وتكييفها ممتاز ثابته جدا مع السرعات العاليه وملبيه في الزنقات حقيقي بدون اي زياده وكل مااخذته عليها هو ان العفشه الخلفيه ناشفه شويه وبعض عيوب التقفيل المصري مثل الابواب وان كانت عاديه وطبعا انا باقول انطباعي هذا عن السياره ويمكن بعض الاخوه يتخيل اني عندي سيارة اخري اقل من الاسبيرانزا لذلك كان هذا انطباعاتي عنها ولكن احب اقول لك انا عندي هنا في السعوديه سياره تويوتا كامري ولم الاحظ الفرق الكبير وهذا للامانه والله على ماأقول شهيد
وارى ان المشكله الحقيقيه هي مشكله الحاجز النفسي لكل ماهو منتج صيني بس دي سياره مش لعبة اطفال بلاستيك. ولك خالص تحياتي

[ehabbadr]

استاذ امير لو عايز تشوف العربيه عن قرب و لو تحب تجربها بنفسك و تسمع كلام الملاك بنفسك ممكن تشرفنا يوم الخميس 27/9 الساعه 10 مساءا فى موقف كارفور عند اخر الموقف عند مدخل السينما لأن الكلام غير التجربه

[وائل عطية]

بص ياسيدي ..
العربية معقولة على قد فلوسها يعني ماتفتكرش إنك هاتبقى راكب عربية فارهة ولا اعتمادية بنسبة 100 % ولكن عربية معقولة مش حلوة للدرجة وليست بهذا السوء اللي ممكن تتخيله ..ولكن يعيبها بشدة التوكيل فهو أحد أهم أسباب فشل هذه السيارة إن لم يكن هو السبب الرئيسي فهو توكيل غير منظم وغير محترم بالمرة ولا يمت إلى الاحترافية بأدنى صلة ..يعني من الآخر لو حتى العربية معقولة فالتوكيل بتاعها هايكرهك فيها لا محالة ودا اللي حصل معايا..
+ إنك هاتشتريها وهاتفكر في بيعها بعد فترة بسيطة ..يبقى من الأول ودرءاً للضرر ولو مش عايز وجع دماغ بلاش وخلاص !

[eng_mkhalaf]

شيرى A11 تكسب عربية محترمة

[mohaismail]

نصيحة هات شاهين دى انسب حاجة للفئة السعرية دى واركبها وانت مطمن على اخر قطع الغيار ارخص من الاكل وربنا يوفقك

[usama_esam]

اللي يعيبها التوكيل فقط لكن العربية جيدة

[محمدايهاب]

هي البيكانتو مالها و لو عاوز عربية كبيرة ممكن البونتو أو السمند ( ده على اعتبار أن حضرتك مش فارقة معاك البلد المنشأ )
طبعا الكلام غير التجربة بس أما عربية يبقى بتتباع بعد 5000 -20000 يبقى الكلام واضح و بعدين التوكيل لو حضرتك سألت هيقولولك و الله الموفق

[amirhafez]

شكرا لجميع الاخوة

شكرا لجميع الاخوة على هذة النصائح المفيدة والله الموفق لما فية الخير

[محمد فؤاد]

يأخي والله العربية معايا ذي الفل وعلي فكرة انا دخلت علي الوسيط وقلبتة فوق وتحت ولم أجد احداً عارض عربية اسبرانز في الوسيط خالص وأقسم بالله انا سافرت بها مشوار بعيد ومشيت علي 170 كم في طريق صحراوي عربية ثابتة علي الأرض وذي الفل وكنا راكبين اربعة في السيارة ومع ذلك سبت الدركسيون في السرعة ماحدفت يمن ولا شمال ثابة فعلا علي الأرض وعلي فكرة انا كان معايا دايو نوبيرا والأسبرانزا والله أكبر مافيها عيب يمكن بعض عربيات الأخوة الأفاضل المشاركين في المنتدي احتمال كان عندهم عيوب لكن والله العظيم العربية معايا ذي الفل ومافيها عيب وعمري ماسمعت عن صوت صفرة في تيل الفرامل والأبواب في صيانة 1000كم اتظبتت وذي الفل
أسف للأطالة وكل عام وانتم بخير