شانجان cs35 ....... حد يلحقني و له جزيل الشكر

[Sherif_Hashem]

صباح الخير علي جميع أعضاء المنتدي المحترمين،

يا ريت لو حد عنده العربية الشانجان cs35 أو حتي يعرف حد إشتري السيارة دي يقولي رأيه فيها ايه أو أي حاجة يعرفها عن الوكيل و قطع الغيار و إلخ ..... سأكون شاكر جدا لأني بأفكر جديا في شرائها لزوجتي بدلا من سيارتها الإكسبلوجن ١٦٠٠ مو ٢٠٠٨ (علي فكرة أنا ماعنديش أي حساسية من الصيني، و السيارة الإكسبلوجن دي معانا من الزيرو و عمرها ما قلت بأصلها معانا) ، فياريت حد يلحقني قبل ما أتجنن و أنزل بكره أجيبها ، و لا رأيكم أزود شوية و أجيب التريوس في المضمون مع اني مابحبش شكلها و فقر كماليتها؟ ..... أرجو الإفادة :)

[hesham fawzy h]

زود وجيب تريوس

و عايز اسألك سؤال صغير :)

ايييية عيوب القاشقاى من وجهة نظر حضرتك ؟

[Sherif_Hashem]

شكرا للرد و يا ريت أعرف ليه حضرتك قلت تريوس و بلاش الشانجان، عشان دي ياباني و دي صيني و سعر إعادة البيع و لا حضرتك سمعت عن عيوب في الشانجان من ناحية التوكيل او قطع الغيار او عيوب في السيارة نفسها؟

بالنسبة للقاشقاي هي بقالها معايا حوالي ١١ شهر مو ٢٠١٤ من الزيرو ، عربية ممتازة في كل شئ يعيبها فقط فقر التابلوه و غياب بعض الكماليات اللي بالنسبة لي مهمة زي البلوتوث و المرايات مش ضم كهربائي و أيضا قدرتها علي التسارع ضعيفة مقارنة بالسيارات السيدان ( و لو أن الموديل الجديد بالموتور ال ١٢٠٠ التربو حسبما سمعت سوف تكون أضعف من هذه أيضا)

[hesham fawzy h]

انا اول مرة اعرف ان فى عربية صينى بالاسم دة

و معنى انها مش منتشرة يبقى مش متجربة . خليك فى التيريوس احسن و اى مقارنا بينها و بين التيريوس الترسوس تكسب ما عدا الاتساع

و شكرا على المعلومات الجميلة :)

[Sherif_Hashem]

يا باشا أنا اللي متشكر علي الرأي و النصيحة :) ، نشوف أراء بقية الناس خصوصا لو في حد جابها فعلا ، يا مسهل

[hesham fawzy h]

حبيبي يا شريف بية :)

[yasser100]

بص انا اشتريت لمراتى البريليانس ال fsv السيدان سنة 2010 و ما كانتش منتشره و ﻻ حد يعرفها و خدت قرارى و فضلتها عن النيسان صنى وقتها و ما كانش علشان فرق السعر . كان معايا فلوس الصنى و روحت خلاص المعرض علشان اخلص فيها و لما اتفرجت على العربيه ما اقتنعتش و اشتريت البريليانس و من اوائل الناس اللى اشتروا الموديل ده فى مصر .

النهارده شوف سعرها كام و مش بالاوبشن اللى كنت شارى به العربيه . يكفى انه اقول لك انها شغاله بصمه و مفتاح بلوتوث مش بينزل دلوقتى بعد انتشارها .
و كنت واقف عند معرض عربيات و صاحبه سألنى على العربيه و قال لى اشتريها منك بالسعر اللى انت اشتريت به .

خد قرارك بنفسك و ادخل على النت و شوف المواصفات و الشركه بره و ما تخغش .

[osamaos20022]

بلاش التيريوس عربيه فقيرة جدا مش هتعجبك

[hugan]

الشانجان متوقع ليها مبيعات عاليه
لافضليه التجميع المستورد
العربيه ابتدت تنتشر
المنافسه كبيره بينها وبين التيجو الاوتو الجديده

[Sherif_Hashem]

أنا متشكر جدا علي كل المشاركات المفيدة جدا بالنسبة لي ، لازلت في مرحلة تكوين رأي نهائي و في انتظار المزيد من الأراء المفيدة ...... فعلا ده أحسن منتدي عربي علي النت كلها و أكثرهم فائدة و جدية .... شكرا للجميع

[ayman20100]

الشانجان حلوة بس كده :)
روح اتفرج بنفسك ولو ارتاحت ليها نفسياً اتوكل على الله واشتريها

[mody112]

شوفت واحدة كانت داخله تترخص النهارده قدام المرور من بره شكلها جميل جدا معرفش من جوة ظروفها ايه ؟

[Sherif_Hashem]

ما هي دي المشكلة يا باشا ، انها من جوة احلي من برة ١٠٠ مرة :) ، تقفيلها مستحيل تقول عليه صيني أبدا و لا حتي كوري ، بس الخوف مع أول إحتياج لقطعة غيار أو عيب صناعة تلاقي التوكيل بيقولك مافيش و عيش بقي يا ريس مع حماية المستهلك و خدمة العملاء و التليفونات .....

[hugan]

ما هي دي المشكلة يا باشا ، انها من جوة احلي من برة ١٠٠ مرة :) ، تقفيلها مستحيل تقول عليه صيني أبدا و لا حتي كوري ، بس الخوف مع أول إحتياج لقطعة غيار أو عيب صناعة تلاقي التوكيل بيقولك مافيش و عيش بقي يا ريس مع حماية المستهلك و خدمة العملاء و التليفونات .....

الانتشار هو كلمه السر
لو العربيه باعت مبيعات عاليه
ماتقلقش من قطع الغيار والصيانه

[samakaerror]

طمنا يا باشا ... جبتها ولا إيه الكلام ؟؟
وألف مبروك مقدماً