اي استفسار عن الشيري A11

[novo]

امتلك سياره ايه الفين فمن يرغب بلاستفسار انا جاهز

[ehabbadr]

لو ممكن تكتب تقييمك عن العربيه و عامله كام كم و اخبارها معاك ايه و شكرا....

[baher]

ياترى اخبار السحب ايه والتكيييييف والعقشه

[sokasoon]

ياريت تقولنا اخبارها ايه


وبكل امانة وشفافية

[novo]

A11

العربيه عامله معايا لغايه دلوقتي 32000 كم ,انا اخترتها بعد ما جربت الانوس و ركبت الفيرنا. العربيه دي افضل من الاثنين دول .
المشكله الوحيده اللي قابلتها حتى الان هي طرمبه الباور, الباور بدأ يصدر صوت عالي فلما رحت للتوكيل قالي العيب من الطرمبه و غيرهالي, الصوت جه تاني فلما رحتلهم قالولي ان جميع القطع كانت معيبه, و ان القطع الجديده هتيجي من الصين .
بالنسبه لاسعار قطع الغيار فتعتبر مهاوده بالنسبه للجديد, انا عملت حادثه كبيره اوي وغيرت حاجات كتير فمثلا سعر الرفرف 150 و الاكصدام الامامي 400 و الفانوس الامامي 400 و الكابوت 500 مع العلم ان الصاج اقوي بمراحل من معظم السيارات الموجوده في نطاقها السعري 60000-70000
بالنسبه للقياده فالسياره مريحه علي الطرقات المعبده بس نظام التعليق خشن اقوي لما يكون فيه نقر وحفر , ومن النقطه دي فعلا يبدأ جمال العربيه دي.في الملفات ثبات هايل مع متعه قريبه من سيارات الدفع الخلفي و بعيده تماما عن السيارات الواقعه
في نطاقها السعري و اعلي ( والله امتع من الكورولا بكتير).
العربيه الكواليتى بتاعتها جيده و ان كان تصميم التابلوه قديم نوعا ما.
بالنسبه للموتور فيتميز بعزم هايل علي سرعات منخفضه, عيبه الازعاج ما بين 90-110 بعد كده ما شاء الله طلقه, التسارع هايل لغايه 150 بعد كده معدل التسارع بيقل. لما قفات العداد كانت السرعه 195 على 6000 و الاحساس كان جيد مع ثبات محترم و عزل صوتي اكثر احتراماز

[معاذ الشرباصى]

بس حضرتك انا شايف قطع الغيار غالية نوعا ما بالنسبة لعربية صينى ده بالنسبة للفوانيس و الكبوت

يعنى كبوت الانوس ب 600, و فانوس امامى فى البولو ب 500 تقريبا

و نفس العيب بتاع ابو الفتوح واضح انه موجود فى CIG, الا و هو الاسترخاص فى قطع الغيار و يجيب الارخص و مش مهم الجودة, و بعد كده يلطع الناس معاه لحد اما الحاجة تيجى من الصين

[novo]

A11

والله يا فندم حضرتك عندك حق بس اهم حاجه جوده القطعه, الكابوت مثلا تقيل, تحس كأنه لسياره من الثمانينات

[معاذ الشرباصى]

ايوة, بس انا قصدى هو استغلال الوكلاء دول لاحتكارهم القطع الاصلية للسيارة

فبالرغم من انها رخيصة جدا فى بلد المنشأ, الا انهم بيغالوا فى الاسعار لتحقيق ارباح وهمية

لكن لو مثلا توفرت قطع الغيار دى خارج نطاق التوكيل, اكيد هتجبرهم على تخفيض اسعارهم

[وائل عطية]

تقييم محايد ومُعبر عن طبيعة العربية
المشكلة هي في ارتفاع سعر قطع الغيار مع عدم توافرها غير لدى الوكيل مما يجعله يضع السعر الذي يرديه حتى وإن كان مبالغ فيه

[novo]

A11

طبعا عند حضراتكم الف حق, و الموضوع ده انا لمسته اول ما اشتريت العربيه, كان سعر الفانوس 500 سنه 2005 و بعدين دلوقت 400 ولما استفسرت في التوكيل عن سر انخفاض الاسعار قالولي ان حجم السيارات المباعه فاق التوقعات وبالتالي بدؤا في تخفيض الاسعار, كمان المنافسه من الشقيقه اسبرانزا ضغطت عليهم اكتر.
بالنسبه للتكييف فهو فرنساوي و اداءه زي الكوري و اقل من الياباني.
نسيت اقول لحضراتكم ان البادي للعربيه دي هوه نفسه تقريبا للسيات توليدو 96مع بعض التغيرات الطفيفه, يعني لو عايز الاسباني من كل حاجه هتلاقي, العفشه بلكامل زي التوليدو, الوصلات الكهرباء وايه بي اس بوش .

[emo]

لى استفسار بخصوص الحرارة انا اشتريت عربية شيرى a15 وقالولى انها زى a11 مع اختلاف الشكل فقط - ومؤشر الحرارة بيوصل للنصف فهل ده طبيعى ؟ كما انه بعد توقف السيارة هل طبيعى ان مراوح الردياتير تقف ام تظل تعمل حتى يتم تبريد السيارة زى ما احنا متعودين فى العربيات الاقدم .
وهل قطع الغيار متوفرة ام لا ؟ وشكرا مقدماً على الرد .

[novo]

A11

بالنسبه للحراره فده طبيعي وهتلاقيها دايما كده, بالنسبه للمروحه فدي حاجه في العربيه وبتختلف من ماركه لاخري . بالنسبه لقطع الغيار معظمها متوفر بس في حاجات ساعات مش موجوده, انا بعد الحادث غيرت المارش, استنيت 8 ايام لغايه م جابوه.

[emam]

شكرا يا استاذ نوفو على الرد ولى سؤال تانى انا حاسس ان استهلاك البنزين عالى يعنى بتعمل حوالى 200 فى الصفيحة فهل ده طبيعى ولا ايه ؟ :roll:

[novo]

CHERY A11

بالنسبه لاستهلاك الوقود فهو في المتوسط مئه كم/8.5 لتر , وعلي فكره ممكن كل 1000كم تضيف للوقود positive powerبتباع في موبيل ب14 جم , ده هيحسن الاداء و الاستهلاك بشكل ملحوظ.

[novo]

test drive chery A11

حد يا جماعه ساق العربيه دي غيري؟ يا ريت نسمع منكم .